UMI YOHAANNISI SOKKA

1 Uminni kayise noohu, macciishshinoommohu, illenkenni laꞌnoommohu, seekkine huwantoommohunna angankenni amandoommohu heeshshote qaali daafira borreessineemmoꞌne; 2 (ee, tini heeshsho xabbino; ninkeno laꞌnoommo; qoleno farciꞌnanni heeꞌnoommo; Anninkewa nootanna ninkera xabbinota hegere heeshsho kiꞌnera kullanni heeꞌnoommo); 3 kiꞌnerano ninke ledo mittimma heedhannoꞌne gede,* laꞌnoommorenna macciishshinoommore kullanni heeꞌnoommoꞌne. Tini mittimmankeno Anninkenna Beettisi Yesuusi Kiristoosi ledooti. 4 Konne coye borreessinanni heeꞌnoommoꞌnehu hagiirrinke woꞌma ikkanno gedeeti.

5 Isiwiinni macciishshinoommotinna kiꞌnera kulleemmo sokka tenneeti: Maganu xawaabbaho; isiwa horonta tunsichu dino. 6 “Isi ledo mittimma noonke” yine coyiꞌnanni heeꞌne, tunsichu giddo millinseemmoha ikkiro, kaphinanni heeꞌnoommo; halaaleno loosu aana hosiinsanni diheeꞌnoommo. 7 Ikkollana isi umisi xawaabbaho noonte gede ninkeno xawaabbu giddo millinseemmoha ikkiro, mimmitinke ledo mittimma heedhannonke; qoleno Beettisi Yesuusi mundee cubbu baalunni keereensitannonke.

8 “Cubbu dinonke” yine coyiꞌneemmoha ikkiro, umonke donganni heeꞌnoommo; halaaluno giddonke dino. 9 Cubbonke kulleemmoha ikkiro, isi ammanaminohanna keeraancho ikkino daafira cubbonke gatona yaannonke; bunshe baalantennino keereensannonke. 10 “Cubbo diloonsoommo” yine coyiꞌneemmoha ikkiro, iso kaphaancho assinanni heeꞌnoommo; qaalisino giddonke dino.

2 Oosoꞌya, konne coye borreessanni noommoꞌnehu cubbo loossinannikki gedeeti. Ayino cubbo loosiro kayinni Anninkewa kaaꞌlaanchu* noonke; isino keeraancho Yesuusi Kiristoosiiti. 2 Isi cubbinkera keeraaꞌmate kakkalo* ikke kakkalaminoho; ikkollana ninke cubbira calla ikkikkinni alame woꞌmate cubbira kakkalamino. 3 Woꞌmanka woyite hajajosi agadhinummoro, iso egenninoommore ikkinoommota tennenni anfeemmo. 4 “Iso egennoommo” yaanni heeꞌre, hajajosi agadhannokki manchi kaphaanchoho; halaaluno konni manchi giddo dino. 5 Isi qaale agadhannohu baalunkura kayinni, Maganu baxilli addinta konni manchi giddo guutaho. Isi ledo mittimma noonketano tennenni anfeemmo. 6 Isi ledo nooe mittimma agadhe heeꞌreemmo yaanno manchi, isi heeꞌrino garinni heeꞌra hasiissannosi.*

7 Baxantinoonni roduuwa, borreessanni noommoꞌneti uminni kayisse nooꞌnetenna keeshshitino hajajooti ikkinnina haaro hajajo diꞌꞌikkitino. Tini keeshshitino hajajo macciishshitinoonni qaaleeti. 8 Ikkollana isiwano kiꞌnewano halaale ikkitinota haaro hajajo borreesseemmoꞌne; korkaatuno tunsichu saꞌꞌanni, addu xawaabbino xawanni no.

9 Xawaabbaho noommo yaanni heeꞌrenni, rodoosi giwannohu xaano tunsichu giddo no. 10 Rodoosi baxannohu xawaabbaho heeꞌranno; guficho ikkannorino isiwa dino. 11 Rodoosi giwannohu kayinni tunsichu giddo no; qoleno tunsichu giddo haꞌranni no; tunsichu illesi ballisino daafira mamira haꞌranni noorono diafanno.

12 Oosoꞌya, borreessanni noommoꞌnehu suꞌmisira yine cubboꞌne gatona yinoonni daafiraati. 13 Annuwa, borreessanni noommoꞌnehu uminni kayise nooha iso affinoonni daafiraati. Wedella, borreessanni noommoꞌnehu busha qeeltinoonni daafiraati. Ooso,* borreessanni noommoꞌnehu Annanke affinoonni daafiraati. 14 Annuwa, borreessanni noommoꞌnehu uminni kayise nooha iso affinoonni daafiraati. Aja ooso,* borreessanni noommoꞌnehu jawaatoota ikkitinoonni daafiraati, Maganu qaali giddoꞌne heeꞌranno daafiraatinna busha qeeltinoonni daafiraati.

15 Alameno alamete aana noo coyeno baxxinoonte. Ayino alame baxannoha ikkiro Annu baxilli giddosi dino. 16 Korkaatuno alamete aana noo coyi baalu yaano maalu yorto, illete halchonna afiꞌnoonnire leellishiꞌra* alametewiinni daannoreeti ikkinnina Annuwiinni daannore diꞌꞌikkino. 17 Qoleno alameno yortoseno saꞌanni no; Maganu fajjo assannohu kayinni hegerera heeꞌranno.

18 Oosoꞌya, tini goofimarchu saateeti; macciishshitininte gede, Kiristoosi giwannohu daanni no; xa nafa batinyu Kiristoosi gibbannori daggino; tini goofimarchu saate ikkitinota tennenni anfeemmo. 19 Insa ninke giddonni fultinoreeti; ikkirono ninke wido diꞌꞌikkitino;* korkaatuno ninke wido ikkitoommero ledonke heedhanno. Ikkollana ninke wido ikkitinori baalanka ikkitinokkiti leeltanno gede ninkewiinni baxxite fultino. 20 Kiꞌne kayinni Qullaawu buurinoꞌne; qoleno baalunkura egenno nooꞌne. 21 Borreesseemmoꞌnehu halaale affinoonnikki daafira ikkikkinni halaale affinoonni daafiraatinna halaaluwiinni kaphu fulannokki daafiraati.

22 Yesuusi, Kiristoosi* ikkinota kaadannoha agurranna wolu kaphaanchu ayeti? Annanna Beetto kaadannohu kuni Kiristoosi giwannoho. 23 Beetto kaadannohura baalaho Maganu Annu ledono mittimma dinosi. Beetto ammanannota farciꞌrannohura baalaho kayinni Maganu Annu ledono mittimma noosi. 24 Kiꞌnera kayinni uminni kayissine macciishshitinoonniri giddoꞌne heeꞌro. Uminni kayissine macciishshitinoonniri giddoꞌne heeꞌrannoha ikkiro, Beettunna Maganu Annu ledo mitto ikkitine heedhinanni. 25 Qoleno isi umisi uyinonke hexxo hegere heeshshooti.

26 Konne coye borreessanni noommoꞌnehu soꞌrisiissaꞌnera woꞌnaaltannori noo daafiraati. 27 Kiꞌnera kayinni isiwiinni adhitinoonnihu buurantinoonni ayyaani giddoꞌne heeꞌranno; hakko daafira rosiisannoꞌnehu mittuno dihasiisanno; hatteentenni isiwiinni adhitinoonni buurama widoonni baalunku coyi daafira rossinanni heedhinoonni; qoleno halaaleho ikkinnina kapho diꞌꞌikkino. Tenne buurama widoonni rossinoonni garinni, isi ledo mittimmatenni heedhe. 28 Konnira oosoꞌya, isi xawanno yannara ruxxi yinummokkinni coyiꞌneemmo gedenna leellanno* yannara saalle isiwiinni xeertiꞌneemmokki gede isi ledo mittimmatenni heedhe. 29 Isi keeraancho ikkinota affiniro, keeraanchimma assannohu baalu isi ila ikkinotano affinanni.

3 Maganu ooso yine woshshinanninke gede, Maganu Annu mageeshshi baxille leellishinonkero laꞌe! Qoleno ninke oososiiti. Alame ninke affinokkihu iseraati; korkaatuno alame iso diaffino. 2 Baxantinoonni roduuwa, xa ninke Maganu oosooti; ikkollana albillitte hiittoore ikkineemmoro xaara dixawinsoonni. Isi xawanno woyite isi gedeere ikkineemmota anfoommo; korkaatuno iso addinta laꞌneemmo. 3 Iso hexxitannori baalu isi coꞌicha ikkinonte gede, insano umonsa coꞌoota assidhanno.

4 Cubbo loosa roso assiꞌrinohu baalu seera diiganno; cubboho yaa seera diigate. 5 Isi xawanno gede assinoonnihu cubbonke haaꞌre hoolara ikkinota affinoonni; qoleno isira cubbu dinosi. 6 Isi ledo mitto ikke heeꞌrannohu baalu cubbo loosa roso diassiꞌranno; cubbo loosa roso assiꞌrinohu baalu iso dilaino; qoleno iso diafino. 7 Oosoꞌya, ayino soꞌrisiisoonkeꞌne; isi keeraancho ikkinonte gede, keeraanchimma loosanno manchino keeraanchoho. 8 Cubbo loosa roso assiꞌrino manchi Daawuloosi widooti; korkaatuno Daawuloosi uminni kayise* cubbo loosanni keeshshino. Maganu Beetti xawinohu Daawuloosi looso diigaraati.*

9 Maganu ila ikkinohu baalu cubbo loosa roso diassiꞌranno; korkaatuno Maganu wixi* togoo manchi giddo heeꞌranno; isi Maganu ila ikkino daafira cubbo loosa roso assiꞌra didandaanno. 10 Maganu oosonna Daawuloosi ooso bande anfannihu konninniiti: Keeraanchimma assannokkihu Maganu wido diꞌꞌikkino; rodoosi baxannokkihuno Maganu wido diꞌꞌikkino. 11 Korkaatuno hanafotenni kayissine macciishshitinoonni sokka, mimmito baxa hasiissannonketa kultannote; 12 bushu* wido ikkinohunna rodoosi mararro nookkiha shiinohu Qaaeeli gedeere ikka dihasiissannonke. Qaaeeli rodoosi mararro nookkiha shiinohu mayiraati? Isi loosi busha, rodiisi loosi kayinni keeraancho ikkino daafiraati.

13 Roduuwa, alame gibbuꞌnero maalaꞌlitinoonte. 14 Ninke roduuwanke banxeemmo daafira, reyotenni heeshshote widira saꞌnoommota anfoommo. Rodoosi baxannokkihu reyote giddo heeꞌranno. 15 Rodoosi giwannohu baalu lubbo shiinoho; lubbo shiinohura baalaho hegere heeshsho nookkita affinoonni. 16 Isi heeshshosi* ninkera sayise uyino daafira tennenni baxille anfoommo; ninkerano heeshshonke* roduuwinkera sayise aate giddeeti noonke. 17 Ikkollana tenne alamehu maalaamittete coyi noosi manchi, rodiisi qarrame heeꞌreenna lae marara hoogiro, ‘Giddosi Maganu baxilli no’ yaa hiitto dandiinanni? 18 Oosoꞌya, loosunninna halaalunni ikkinnina coyinninna afuunni calla baxammoonke.

19 Halaalu wido ikkanke tennenni anfeemmo; wodaninkeno isi albaanni harshammi yaanno gede* assiꞌneemmo; 20 tenne assineemmohu wodaninke busha assannonke coyi baalahooti; korkaatuno Maganu wodaninkera aliidiho; isi baalankare afino. 21 Baxantinoonni roduuwa, wodaninke busha assannonkekkiha ikkiro Maganu ledo ruxxi yinummokkinni hasaawa dandiineemmo; 22 qoleno hajajosi agadhineemmo daafiranna iso hagiirsiisannore assineemmo daafira huucciꞌneemmore baala isiwiinni afiꞌneemmo. 23 Hajajosino tenneeti: Beettisi Yesuusi Kiristoosi suꞌma ammanneemmo gedeetinna isi hajajinonke garinni mimmito banxeemmo gedeeti. 24 Qoleno hajajosi agadhannohu baalu isi ledo mitto ikke heeꞌranno; isirano togoo manchi ledo mittimma heedhannosi. Isi ninke ledo mitto ikke heeꞌrannota uyinonke ayyaani widoonni anfeemmo.

4 Baxantinoonni roduuwa, ayyaanunni coyiꞌnoonni qaale baala* ammantinoonte; hatteentenni ayyaanunni coyiꞌnoonni qaali* Maganuwiinni dayinohoronna teꞌee fonqoltine laꞌe; korkaatuno alamete aana batinye kaphu masaalaano kaꞌe no.

2 Ayyaanunni coyiꞌnoonni qaali Maganuwiinni dayinota tennenni affinanni: Yesuusi Kiristoosi mancho ikke* dayinota farciꞌrannohu ayyaanunni coyiꞌnoonni qaali baalu Maganuwiinni dayinoho. 3 Ikkollana Yesuusi daafira farciꞌrannokkihu ayyaanunni coyiꞌnoonni qaali baalu Maganuwiinni dayinoha diꞌꞌikkino. Qoleno kuni ayyaanunni coyiꞌnoonni qaali Kiristoosi giwannohu coyiꞌrannoho; Kiristoosi giwannohu togoo coye coyiꞌrannota macciishshitinoonni; xa nafa konne qaale alamete aana coyiꞌnanni heeꞌnoonni.

4 Oosoꞌya, kiꞌne Maganu widooti; insano* qeeltinoonni; korkaatuno kiꞌne ledo noohu alamete ledo nooha rooreho. 5 Insa alamete widooti; alamete coye coyidhannohunna alameno macciishshitannonsahu iseraati. 6 Ninke Maganu widooti. Magano afinohu baalu coyiꞌneemmore macciishshanno; Maganu wido ikkinokkihu baalu coyiꞌneemmore dimacciishshanno. Ayyaanunni coyiꞌnoonniha halaalu qaalenna ayyaanunni coyiꞌnoonniha soꞌrote qaale bande anfeemmohu konninniiti.

7 Baxantinoonni roduuwa, mimmito baxa agurroonke; korkaatuno baxillu Buicho Maganoho; baxillu noosihu baalu Maganu ilaati; Maganono afino. 8 Baxillu nookkihu Magano diegennino; korkaatuno Maganu baxilleho. 9 Maganu baxilli ninkera xawinohu konni garinniiti; isi widoonni heeshsho afiꞌneemmo gede, Maganu mitto Beettosi alame soyino. 10 Kuni baxilli leellinohu konni garinniiti: Ninke Magano banxoommo daafira ikkikkinni isi baxinonke daafiraatinna cubbinkera keeraaꞌmate kakkalo* ikkanno gede Beettosi soyino daafiraati.

11 Baxantinoonni roduuwa, Maganu konni garinni baxinonkeha ikkiro, ninkerano mimmito baxate giddeeti noonke. 12 Magano lae egenninohu ayino dino. Mimmito baxa agura hoongummoro, Maganu ledonke heeꞌranno; baxillisino giddonke guuta ikkanno. 13 Isi ayyaanasi uyinonke daafira, ninkera isi ledo mittimma noonketanna isirano ninke ledo mittimma noosita anfoommo. 14 Hakkiino sae, Maganu Annu Beettosi alamete gatisaancho asse soyinota ninke uminke laꞌnoommo; qoleno farciꞌnanni heeꞌnoommo. 15 Aye manchino Yesuusi Maganu Beetto ikkinota farciꞌrannoha ikkiro, Maganoho togoo manchi ledo mittimma heedhannosi; isirano Maganu ledo mittimma heedhannosi. 16 Maganu baxannonketa anfoommo; hattono ammannoommo.

Maganu baxilleho; baxillunni heeꞌrannohura Maganu ledo mittimma heedhannosi; Maganohono isi ledo mittimma heedhannosi. 17 Yoote barra ruxxi yinummokkinni coyiꞌneemmo gede,* baxillu ninke giddo guuta ikkinohu konni garinniiti; korkaatuno ninke uminke tenne alamera isi* gedeereeti. 18 Baxillu giddo waajja dino; isinni guutu baxilli waajja fushshe tuganno;* korkaatuno waajja ataawe ikkitannonke. Qoleno waajjanno manchi baxilli guuta diꞌꞌikkino. 19 Isi balaxe baxinonke daafira ninkeno baxille leellinsheemmo.

20 Aye manchino, “Magano baxeemmo” yaanni heeꞌre rodoosi giwannoha ikkiro, isi kaphaanchoho. Korkaatuno illesinni lainoha rodoosi baxinokkihu, lainokki Magano baxa didandaanno. 21 Magano baxannohu baalunku rodoosino baxa hasiissannosi yitannota tenne hajajo isiwiinni adhinoommo.

5 Yesuusi addinta Kiristoosi ikkinota ammanannohu baalu Maganu ilaati; Anna baxannohu baalu ilasi ikkinohano baxanno. 2 Magano banxeemmohanna hajajosi agadhineemmoha ikkiro, Maganu ooso banxeemmota tennenni anfeemmo. 3 Mayira yiniro, Magano baxate yaa hajajosi agadhate; hajajosino ayirritannota* diꞌꞌikkitino; 4 korkaatuno Maganu ila ikkinohu baalu alame qeelanno. Alame qeelleemmo gede assitinonketi ammanankeeti.

5 Alame qeelara dandaannohu ayeti? Yesuusi Maganu Beetto ikkinota ammananno mancho diꞌꞌikkino? 6 Wayinna mundeete widoonni dayinohu isooti, yaano Yesuusi Kiristoosiiti; dayinohuno wayi ledo calla ikkikkinni wayinna mundeete ledooti. Ayyaanuno tenne farciꞌranno; korkaatuno ayyaanu halaaleho. 7 Farciꞌrannohu sasu coyi no; 8 insano: ayyaanaho, waahonna mundeete; sasunku sumuu yitanno.

9 Mannu farciꞌranno coye ammanneemmoha ikkiro, Maganu farciꞌranno coyi isinni hakkiinni rooreho. Korkaatuno Beettisi daafira Maganu umisi farciꞌrino. 10 Maganu Beetto ammanannohura Maganu farciꞌrinori wodanisira no. Magano ammanannokkihu kayinni, Maganu Beettisi daafira farciꞌrinore ammaninokki daafira iso kaphaancho assino. 11 Farciꞌnoonni coyino konneeti: Maganu hegere heeshsho uyinonke; tenne heeshsho afiꞌnoommohu Beettisinniiti. 12 Beettu noosihura tini heeshsho noosi; Maganu Beetti noosikkihura tini heeshsho dinosi.

13 Konne coye borreesseemmoꞌnehu Maganu Beetti suꞌma ammantinannirira kiꞌnera hegere heeshsho nooꞌneta affinanni gedeeti. 14 Iso addaxxineemmo coyi* konneeti: aye coyeno fajjosi garinni huucciꞌnummoro isi macciishshannonke. 15 Huucciꞌneemmore baala macciishshannonketa anfoommo daafira, xaꞌmiꞌneemmore afiꞌneemmota dihuluullammeemmo.

16 Aye manchino rodiisi reyote iillishannokki cubbo loosanna lairo, huuccatto assannosi; Maganuno heeshsho aannosi; kuni ikkannohu cubbinsa reyote iillishannoha ikka hoogirooti. Ikkollana reyote iillishanno cubbi no. Togoo cubbo loosino manchira ayino huuccatto assona diyeemmo. 17 Bushu loosi baalu cubboho; ikkollana reyote iillishannokki cubbi no.

18 Maganu ila ikkinohu baalu cubbo loosa roso assiꞌrannokkita anfoommo; hatteentenni Maganu ila* ikkinohu agarannosi; bushuno* kisasira didandaanno. 19 Ninke Maganu wido ikkinoommota anfoommo; alame woꞌma kayinni bushu anga no. 20 Ikkollana Maganu Beetti dayinota anfoommo; isi halaalaanchu Magani daafira egenno afiꞌneemmo gede wodancha uyinonke. Ninkerano Beettisi Yesuusi Kiristoosi widoonni halaalaanchu Magani ledo mittimma noonke. Isi halaalaancho Maganootinna hegere heeshshooti. 21 Oosoꞌya, kaphu magannawiinni xeertidhe.*