LAYINKI PHEEXIROOSI SOKKA

1 Yesuusi Kiristoosi borojjichinna soqqamaasinchi ani Simooni Pheexiroosi, Maganinke keeraanchimmanna Gatisaanchinke Yesuusi Kiristoosi keeraanchimma widoonni, ninke afiꞌnoommo gedeeta ayirrado ammana afidhinorira:

2 Maganu daafiranna Mootichinke Yesuusi daafira afidhinannite halaalaancho egenno widoonni eltonna keeru batiꞌroꞌne; 3 maganimmate wolqasi, ayirrinyisinninna danchummasinni woshshinonke Magani daafira afiꞌnoommote halaalaancho egenno widoonni, heeshshotenna Maganoho galloommore ikkine heeꞌrate kaaꞌlitannonke coyibba baala uyitinonke.* 4 Kuri coyibba widoonni isi ayirradonna lowo geeshsha jawa ikkitino hexxo uyinonke;* hatto assinohu, busha yorto* guma ikkitinote alamennite amanyootu maaeellewiinni gattine, tenne hexxo widoonni Maganu dani beeqqaasine ikkitinanni gedeeti.

5 Konni daafira diinaggaabbine sharrantine, ammanaꞌne aana danchumma lexxe; danchummate aana egenno, 6 egennote aana meessaneeto qeeꞌla, meessaneeto qeeꞌlate aana cinca, cincate aana Maganoho gala, 7 Maganoho galate aana rodiimmate baxille, rodiimmate baxilli aana baxille lexxe. 8 Kuri coyibba giddoꞌne heedhuronna woꞌmituro, Mootichinke Yesuusi Kiristoosi daafira afidhinoonnita halaalaancho egenno loosu aana hosiissinanni gede ikkinnina loosiweelootanna gumiweeloota ikkitinannikki gede agartannoꞌne.

9 Kuri coyibba xeꞌinosihu aye manchino, xawaabba laꞌꞌa giwe ille ximbiiꞌlinoho ballicha manchooti;* qoleno albi cubbisinni keeraawinota hawino. 10 Konni daafira roduuwa, woshshamaꞌnenna dooramaꞌne huluullissannokkita assiꞌrate albinni roore diinaggaabbe; tenne coyibba assa agura hoogginiro horonta diubbinanni. 11 Isinni hatto assitiniro lowo geeshsha maassantine, Mootichinkenna Gatisaanchinke Yesuusi Kiristoosiha hegere Gashshoote eꞌinanni.

12 Konne coye affinoonnihanna giddoꞌne noo halaalinni kaajjitine heedhinoonniha ikkirono, konne coye woꞌmanka woyite kiꞌnera qaagiissa diagureemmo. 13 Konni dunkaani* giddo noommo geeshsha kiꞌne qaagiissanni kakkayisa hasiissannoe yee hedeemmo; 14 Korkaatuno Mootichinke Yesuusi Kiristoosi xawise kulinoe garinni, dunkaaniꞌya muli yannara baꞌꞌannota afoommo. 15 Ani haꞌrummohu gedensaanni kuri coyibba qaaga* dandiitinanni gede, woꞌmanka woyite dandaamiere baala asseemmo.

16 Mootichinke Yesuusi Kiristoosi wolqanna leella* daafira kulloommoꞌnehu, hayyotenni kalanqoonni maatto haꞌrunsine ikkikkinni gaamaarresi illenkenni laꞌneeti. 17 Gaamaarinohu ayirrinyiwiinni, “Tashshi assannoehu, baxeemmo Beettiꞌya konneeti” yaanno qaali* isiwa dayi yannara Maganinkenna Anninkewiinni ayirrinyenna gaacheena adhino. 18 Ee, isi ledo qullaawu ilaalira heeꞌne kuni qaali gordunni daanna macciishshinoommo.

19 Konni daafira tini, masaalote qaale roore hawaqiꞌneemmo gede assitinonke; duuꞌmo saaqqa geeshshanna soodimaru bakkalchi xawa geeshsha wodaniꞌne giddo tunsote xawanno xawaabbira qorophitinanninte gede, masaalote qaaleno illachishaꞌne danchate. 20 Duuchunkura aleenni, Qullaawa Borro giddo nooti mitte masaalono mannu umisinni kalaqe coyiꞌrinota ikkitinokkita affinoonni. 21 Mayira yiniro, masaalo manchu fajjonni daggino yanna dino; hatteentenni mannu Maganuwiinni adhino masaalo qullaawu ayyaani kakkayiseennansa* coyiꞌrino.

2 Ikkollana albi waro mannu mereero kaphu masaalaano noonte gede, kiꞌne mereerono kaphu rosiisaano kaꞌanno. Kuni manni bao abbanno babbadooshshe maaxe eessanno; insa woxxinonsa Anna nafa kaadde insaneetira rakke bao abbidhanno. 2 Qoleno lowo manni insata mancaꞌꞌa ikkito* haꞌrunsanno; insanni kainohunni halaalu doogo xonantanno. 3 Kuri kaphu rosiisaano dogate qaale coyidhe, hagaagge mulqitannoꞌne. Ikkollana lowo diri albaanni insa aana yinoonni yoo dikeeshshitanno; baonsano huluullissannota diꞌꞌikkitino.*

4 Maganu cubbo loossino sokkaasine qorichishikkinni diagurino; hatteentenni xiꞌmo tunsichi giddo usure wore,* yoo agadhitanno gede Inxoroxoosi* tugino. 5 Qoleno keeraanchimmate sawaakicha Nohi wolu lamalu manni ledo gatise, maganiweelu manni batiꞌrino alame aana baote waa abbi waro, hundi alame qorichishikkinni diagurino. 6 Hakkiinni saeno maganiweelu mannira albillitte lawishsha ikkitanno gede, Soddoomunna Gomooru katamma buluulo ikkita geeshsha giire yoo yiino. 7 Ikkollana seerimalu mannite mancaꞌꞌa ikkitonni* lowo geeshsha yaadanni heeꞌrinoha keeraancho Looxi gatisino; 8 kuni keeraanchu manchi mereeronsa heeꞌre barru baala laꞌꞌannohunna macciishshannohu bushu assootinsanni kainohunni keeraancho lubbosi* shetisino. 9 Hakko daafira, Yihowa* isira galino manna fonqolunni hiitto asse gatisannoronna finqilino manna kayinni yoote barra iillitannonsa baora* hiitto asse agare keeshshiishannoro afino; 10 hakko iso wolootu mannimma batteessate yorto noonsarenna silxaane mishshannore* yoote barrira agare keeshshiishanno.

Insa mayinae afidhinokkirenna booꞌnaleeyye ikkitino daafira, ayirradda xona diwaajjitanno; 11 ikkollana sokkaasine insanni roore jawaatootanna wolqaataamma ikkite heedhenni, Yihowara* noonsa ayirrinyinni* kainohunni, insa xontanni dirussitanno. 12 Kuni manni amande shinara qalantinori, ayyaani-galte heedhannonna heda dandiitannokki saada gedeeho; affinokki coyira eꞌanni xonantanno. Insa huntanno doogo hadhanno daafira baꞌanno; 13 bushu assootinsanni kainohunni busha guma mixxitanno.

Barra baqaaqa nafa, maalu hasatto wonshiꞌra hagirsiisanno coyi gede assite heddanno. Insa ishinunna xuru gedeereeti; kiꞌne ledo jila hadhuro kaphu rosinsanni woloota soꞌrisiisse hagiidhite ikkitannota hoogganno. 14 Foora ille noonsare ikkitino daafira cubbo loosa qoropha didandiitanno; kaajjite uurritinokkire* dogganno. Hafuura rosino wodani noonsareeti. Rumantino oosooti. 15 Suwashsho doogo agurte, soꞌrote doogo hadhino. Afiꞌranno qiniitira yee busha coye assinohu Biioori beetti Beleaami doogo hadhino; 16 isi hajajo diigino daafira seejjinoonnisi. Coyiꞌra dandiitannokki harricho mannu qaalinni coyidhe masaalaanchunniha macharaarrete assoote hoolate woꞌnaaltino.

17 Kuni manni wayi nookki buꞌaatinna wolqaataame hambabalatte haadhe hadhanno gomichooti; qoleno beebbu tunsichi agadhe noonsareeti. 18 Insa haafa coye coyidhanni boolaqidhanno. Soꞌrote doogora haꞌranno manni giddonni xaalla gatte fultinore, maalu yortonsa kakkayissanninna mancaꞌꞌa coye assitanni* aduultanno. 19 Insa uminsa amanyootu maaeellera borojje ikkite heedhe, wolaphitinanni yite hexxo uyitannonsa; aye manchino wolu manchinni qeelamiro* hakko manchira borojjichoho. 20 Mootichinkenna Gatisaanchinke Yesuusi Kiristoosi daafira halaalaancho egenno afidhe alamete battewiinni gatte fultuhu gedensaanni, galagalte togoo coyira eꞌuronna qeelanturo, albi heeshshonsanni roore gedensiidi heeshshonsa bushshannoti egennantinote. 21 Keeraanchimmate doogo garunni affuhu gedensaanni, uyinoonninsate qullaawa hajajowiinni badhera higgantenni, umonni affukkinni gattoommero woyyannonsahu baino. 22 “Woshichu tufisira higanno; hayishshinoonni manchaameno wirro sabbaho gongoꞌmitanno” yaannohu addu lawishshi insa aana woꞌmino.

3 Baxantinoonni roduuwa, tini xa borreessanni noommoꞌneti layinki sokkaati. Tenne sokka borreessoommoꞌnehu umi sokkaꞌyara assummonte gede, mito coye qaagiissanni suwashsho hedo heedhannoꞌne gede kakkayisammoꞌnera yeeti; 2 hakkuno, konni albaanni qullaawa masaalaano coyidhino qaalenna* Mootichinkenna Gatisaanchinke soqqamaasineꞌne widoonni uyino hajajo qaagginanni gedeeti. 3 Baalunkunni aleenni tenne affe; goofimarchu barruwara uminsa yorto haꞌrunsitanni arrassitanno haaꞌriimaasine dagganno; 4 insa togo yitanno: “‘Leelleemmo’* yee hexxo uyihu hanni mama nooyya? Albi annuwanke reyitu* warinni hanafe baalunku coyi kalaqamu hanafonni kayise noo gedeennilla heeꞌranni no.”

5 Lowo dirira albaanni gordu noota hattono Maganu qaalinni moola baatto waaho aleenni kaajjite uurritinotanna wayi mereero noota leellishanno halaale affanni heedhenni affinokkihu gede ikkitanno; 6 hakkawari alame kuri coyibbanni baꞌino; kuni ikkinohuno baatto gudise wayi egemmi woyiteeti. 7 Ikkollana hakko qaalinni, xa noo gordinna baatto giiratenna maganiweelu manni baꞌꞌannohu yoote barri geeshsha agarante keeshshitanno.

8 Baxantinoonni roduuwa, kiꞌne kayinni Yihowa* albaanni mittu barri kumu diri gede, kumi diri qole mittu barri gede ikkinota deꞌinoonte. 9 Mitu manni hedannohu gede, Yihowa* eino qaale wonshate dikeeshshanno; hatteentenni isi kiꞌne cincinohu baalunku maaro eara ikkinnina ayino baꞌꞌara hasiꞌrannokki daafiraati. 10 Ikkollana Yihowa* barri mooraanchu gede ikke daanno; hakko barra gordu belequ huuronni saꞌꞌanno;* gordonna baatto seekkinoonni coyibba lowo iibbillinni daaqqanno; baattonna aanase loonsoonnirino reqecci yaanno.

11 Kuni baalunku coyi konni garinni daaqannoha ikkiro, qullaawa amanyoote haꞌrunsatenninna Maganoho galtinoonnire ikkitinoonnita leellishannore assatenni hiittoo manna ikka hasiissannoꞌnero hedde! 12 Gordu giiratenni giirame baꞌꞌannohunna gordonna baatto seekkinoonni coyibba lowo iibbillinni daaqqannohu Yihowa* barri daannota agadhitinanninna surreꞌnenni shiqqi assitine heddinanni* heeꞌra hasiissannoꞌne! 13 Ikkollana Maganu uyino hexxo garinni haaro gordonna haaro baatto agadhine heeꞌnoommo; kuri giddo keeraanchimma woꞌmitanno.

14 Hakko daafira baxantinoonni roduuwa, kuri coyibba agadhitine heedhinoonni daafira, jeefote isi xurunna xeꞌne nookkire ikkitine keerunni heedhineenna afannoꞌne gede dandaamiꞌnere baala asse. 15 Qoleno banxeemmo rodiinke Phaawuloosino uyinoonnisi hayyonni borreessinoꞌne garinni, Mootichinke cinca gatote gede assitine kiirre; 16 isi sokkasi baalantera kuri coyibba daafira borreessino. Ikkollana sokkasi giddo mitu coyi huwatate qarrisannoho; egenno xeꞌinonsarinna* yawaawulootu wole Qullaawa Borro shokkishshannonte gede, konne coyeno shokkishshanno; hatto assansa insa umonsa huntanno.

17 Konni daafira baxantinoonni roduuwa, tenne balaxxine affinoonni daafira, seerimalu manni loosanno soꞌronni insa ledo dogantine ballekkine baꞌinannikki gedenna kaajjitine uurritinoonniwiinni ubbinannikki gede qorophe. 18 Hatteentenni Mootichinkenna Gatisaanchinke Yesuusi Kiristoosi eltonninna egennonni lophe. Xaano hegererano isira ayirrinyu ikko. Hamiiꞌni.