UMI PHEEXIROOSI SOKKA

1 Yesuusi Kiristoosi soqqamaasinchi ani Pheexiroosi, manni gobba manna ikkite Phaanxoosi, Galaatiyaho, Qephedooqiyaho, Iisiyahonna Biitaaniyaho billaallite heedhannorira doorantinorira, 2 yaano Maganu Annu balaxe afino garinni doorantinorira hattono hajajantannore ikkitanno gedenna Yesuusi Kiristoosi mundee winxanninsa gede ayyaanunni qullaabbinorira:

Eltonna keeru batiꞌroꞌne.

3 Mootichinke Yesuusi Kiristoosi Anniranna Maganira guweenyu ikkosi; isi batiꞌra maarosinni Yesuusi Kiristoosi kao widoonni heeshshote hexxora haaro asse ilinonke; 4 ilinonkehuno sholtannokki, battaabbannokkinna baꞌannokki raggeraati. Tenne ragge kiꞌnera gordoho qixxeessinoonniꞌne; 5 Maganu goofimarchu yannara leeltara qixxaabbe noo gatora ammanate widoonni wolqasinni agare nooꞌne. 6 Xa shiima yanna geeshsha addi addi fonqolinni kainohunni yaadaꞌne gattannokkita ikkiturono, konni coyi baalunni lowo geeshsha hagiidhitinanni heedhinoonni; 7 togoo fonqoli iillannoꞌnehu giiratenni fonqolamirono* baꞌꞌara dandaanno culka lowo geeshsha roortannotinna fonqolante saꞌinoti ammanaꞌne Yesuusi Kiristoosi xawanno woyite galata, gaamaarrenna ayirrinye abbitannoꞌne gedeeti. 8 Iso laꞌine egentinoonnikkiha ikkirono, baxxinannisi; xa laꞌꞌa hoogginisirono, iso ammantinannita leellishshinanninna kulle dandiinannikkiha dhagge ikkanno hagiirre lowo geeshsha hagiidhitinanni heedhinoonni; 9 korkaatuno ammanaꞌne mixowa iillitinannita yaano umoꞌne* gatissinannita affinoonni.

10 Kiꞌnera uyinanni elto daafira masaaltino masaalaano, tenne gato daafira diinaggaabbe hasse, seekkite xiinxallitino. 11 Giddonsa noo ayyaani Kiristoosira iillanno qarrinna hakkunni gedensaanni daanno ayirrinyi daafira farciꞌri woyite, Kiristoosi daafira hiittee yannare woy hiittee woggare kulanni nooro marro marro higge xiinxallitino. 12 Insa soqqantanni noohu uminsara ikkikkinni kiꞌnera ikkinota Maganu xawisinonsa; soqqantinohuno gordunni sonkoonnihu qullaawu ayyaaninni xa dancha duduwo duduwiꞌne manni kulinoꞌne coyi daafiraati. Sokkaasine nafa konne coye laꞌara quqquxantanno.

13 Konnira surreꞌne qixxeessidhine loosoho qodhitine kaꞌe; woꞌmanka woyite wodanaaꞌmitine hedde; Yesuusi Kiristoosi xawanno yannara afidhinanni elto hexxo assidhe. 14 Hajajantinanni ooso ikkitinoonni daafira, alba egenno nooꞌnekki waro haꞌrunsitinanni yorto huntaꞌnera* wodhitinoonte; 15 hatteentenni woshshinoꞌne Magani qullaawa ikkinonte gede, kiꞌneno amanyootiꞌne baalunkunni qullaawoota ikke; 16 korkaatuno, “Ani qullaawa ikkoommo daafira, kiꞌneno qullaawoota ikka hasiissannoꞌne” yine borreessinoonni.

17 Qoleno mallaadikkinni mittu mittunkura loosisi garinni yoo yaanno Anna woshshidhinanniha ikkiro, wosina ikkitine heedhinanni yannara iso waajjitinanni heedhe. 18 Albi annuwaꞌnewiinni* ragidhinoonnite haafa heeshshowiinni keere fultinoonnihu* birru woy culku gedeehu baꞌꞌara dandaanno coyinni ikkinokkita affinoonni. 19 Hatteentenni keere fultinoonnihu, xeꞌnenna muso nookki geꞌrechi mundee gede ikkitinote ayirrado Kiristoosi mundeenniiti. 20 Hige isi balaxe egennaminohu alame xintantara* albaanniiti; ikkollana kiꞌnera yine iso diru goofimarchira xawanno gede assinoonni. 21 Ammanaꞌnenna hexxoꞌne Maganunni ikkitanno gede, iso reyotenni kayisinohanna ayirrinye uyinosi Magano ammantinoonnihu isi widoonniiti.

22 Konnira, halaaleho hajajantine kiꞌneneeto* keereensidhinoonni daafira, lawisiisa nookkihu rodiimmate baxilli nooꞌne; hakko daafira mimmitu ledo godowinta seekkitine baxamme. 23 Heeshshonnihunna kaajje heeꞌranno Magani qaali widoonni haaro ikkitine ilantinoonnihu, sholanno wixinni ikkikkinni sholannokki wixinniiti.* 24 Korkaatuno, “maalu baalu* hayissote gedeeti; ayirrinyisi baaluno dubbu daraaro gedeeti; hayisso qoortanno; daraarchuno giggilanno; 25 Yihowa* qaali kayinni hegerera kaajje heeꞌranno.” Kiꞌnera dudumboonnihu danchu duduwino konne “qaaleeti.”

2 Konnira bunshe baala, doga, lawisiisa, hinaasonna heme baala agurre. 2 Xaalla ilantino qaaqquulli gede, Maganu qaali giddo noota karsantinokki* ado halchitinannire ikke; hakkuno ise widoonni gatote widira higgine lophitinanni gedeeti; 3 korkaatuno, Mootichu shaqqado ikkinota qamassinoonni.*

4 Mannu mishinohuwa, Maganu kayinni doorinosihuwanna albasiinni ayirrado ikkinohuwa isiwa yaano heeshshote kinchiwa daggine, 5 kiꞌne umiꞌne qullaawoota kakkalaano ikkate heeshshote kinna gede ayyaanaamo mine ikkitinara minantinanni heedhinoonni; hakkuno Yesuusi Kiristoosi widoonni Maganu adhannota ayyaanaame kakkalo shiqishshinanni gedeeti. 6 Korkaatuno Qullaawa Borro togo yitanno: “Kuneeti dooramino kincho yaano ayirrado safonniha dhaawate kincho Tsiyooni woreemmo; qoleno iso ammanannohu baalu horonta diꞌꞌirraawanno.”*

7 Konnira kiꞌne ammanaasine ikkitinoonni daafira, isi kiꞌnera ayirradoho; ammantannokkiri daafira kayinni togo yine borreessinoonni: “Mine mintannori mishshe agurtino kinchi, qara dhaawate kincho ikkino”; 8 qoleno “guficho ikkanno kinchonna manna karannoha jawa kincho ikkino.” Insa gufidhannohu qaaleho hajajantannokki daafiraati. Wonanni togoo manni gedensi hattoontilla. 9 Kiꞌne kayinni tunsichunni maalaꞌlinanni xawaabbiwa woshshinoꞌne Maganita “dhagge ikkitanno akatta* base baalate dudubbinanni gede doorantinoonni mannaati, mootoollatenna kakkalaanote, qullaawa dagaatinna baxxino jajja ikkate doorantinoonni mannaati.” 10 Kiꞌne alba Maganu manna diꞌꞌikkitinoonni; xa kayinni Maganu mannaati; alba maaro diafidhinoonnireeti; xa kayinni maaro afidhinoonni.

11 Baxantinoonni roduuwa, manni gobba mannanna wosina ikkitinoonni daafira, kiꞌne ledo* olantannote maalu yortowiinni xeertidhine heedhinanni gede amaaleemmoꞌne. 12 Busha assitannoreeti yite kassassannoꞌne woyite, dancha loosoꞌne illensanni laꞌanno gedenna Maganu qonqolche laꞌꞌara daanno barra iso ayirrissanno gede dagate mereero woꞌmanka woyite danchu amanyooti heeꞌroꞌne.

13 Mootichaho yitine mannu gashshooti* baalunkura maahoyye yitine galle; aliidiha ikkino daafira mooteteno maahoyye yitine galle; 14 busha assitannore qorichishshanno gede, dancha assitannore kayinni galattanno gede isi soyinore ikkitino daafira gashshaanoteno maahoyye yitine galle. 15 Maganu fajjo, dancha coye assitine haafa coye coyiꞌrannoha wodancha xeꞌino manna sammi assitinanni* gedeeti. 16 Wolaphino manni gede ikkitine heedhe; wolaphoꞌne Maganu borojjooti gede ikkitine horoonsidhe ikkinnina ise kultine* busha coye assitinoonte. 17 Duuchunku gari manna ayirrisse; roduuwu maamara woꞌma baxxe; Magano waajje; moote ayirrisse.

18 Soqqamaano danchuullehonna shaqqaddaho calla ikkikkinni, shiimurinni hagiidhitannokki mootoollansarano hasiissanno waajjanni maahoyye yite galto. 19 Korkaatuno mittu manchi Maganu albaanni keeraanchu tiiꞌꞌi heeꞌrasira yee qarra* dandee saironna miincisiro, kuni hagiirsiisanno coyeeti. 20 Cubbo loossineenna gannanniꞌneta cincitine saꞌiniro mayi galati hasiisannoꞌne? Danchare assitineenna iillannoꞌne qarra cincitine saꞌiniro kayinni, kuni Magano hagiirsiisannoreeti.

21 Qoleno, woshshinoonniꞌnehu tenne doogo hadhinaraati; korkaatuno Kiristoosi nafa haꞌrumasi seekkitine haꞌrunsitinanni gede, lawishsha ikke kiꞌne daafira yee qarra adhino. 22 Isi mitto cubbono diloosino; afiisirano dogate qaali dino. 23 Xonnisi woyite qole dixonino. Shetinsisi yannara diwaajjishiishino; hatteentenni, keeraanchimmate yoo yaannohura isonooto eeggo uyino. 24 Cubboho reyine* keeraanchimmate heeꞌneemmo gede, isi umisi cubbonke manninatisinni haqqu* aana duqqino. Qoleno “isi madanni kiꞌne hurtinoonni.” 25 Korkaatuno, kiꞌne bashsho baino geꞌreewi gedeereeti; xa kayinni lubboꞌne* allaalaanchiwanna agaraanchiwa* higginoonni.

3 Hatteente gede kiꞌne minaamuwa, qaaleho hajajantannokki minaannuwi heedhuro, mitto qaaleno coyidhinikkinni amanyooteꞌne baxxe ammanaasine ikkitanno gede, minaannuwiꞌnera maahoyye yitine galle; 2 kuni ikkannohuno, xalala amanyooteꞌnenna lowo geeshsha ayirrissinanninsata laꞌurooti. 3 Xummeꞌne gobbayidita yaano umo shurrubbisiꞌratenni, culku seesa wodhatenni woy seesallitte uddano uddiꞌratenni seensannita ikkitoonke; 4 hatteentenni xummeꞌne baꞌꞌannokki seesiha yaano Maganu albaanni lowo waagi nooha gaꞌlabbichanna jooga akata afiꞌrinoha dahaawinoha giddoyidi mancho ikko. 5 Korkaatuno biꞌree waro heeꞌrinohu Magano hexxinohu qullaawu meenti, minaannuwinsara maahoyye yee gale seesannohu hakko garinniiti; 6 Saarano Abirihaami mootichaꞌya yite woshshitanni hajajantinosi. Kiꞌneno dancha coye assa agura hoogginironna waajjitine qeelama hoogginiro oososeeti.

7 Kiꞌne minaannuwuno, minaamuwiꞌne ledo egennotenni heedhe.* Insano kiꞌne ledo heeshshote elto ragiꞌrannore ikkino daafira, huuccattoꞌnera gufichu kalaqamannokki gede, kiꞌnenni roore hiiqqamanno uduunnichi gede ikkinore meento ayirrisse.

8 Jeefoteno, kiꞌne baalunkura mittu gari hedo heedhoꞌne; wolu manni qarra umiꞌnehu gede assitine hedde; rodiimmate baxillinni baxamme; godowinta marartinannirenna jooguulle ikke. 9 Busha bushatenni woy xono xonotenni qoltinoonte. Hatteentenni maassidhe; korkaatuno woshshantinoonnihu tenne doogo hadhine maasso ragidhinanni gedeeti.

10 Hakko daafira, “heeshsho baxannohunna dancha barruwa laꞌꞌara halchannohu baalu arrawisinni busha coye coyiꞌrannokki gede, suumesinnino dogannokki gede qoropho. 11 Bushu coyiwiinni xeertiꞌro; dancha coye asso; keere hasiꞌro; keeru hoodeno haꞌro. 12 Korkaatuno Yihowa* ille keeraano laꞌanno; maccasino eeggifatte huuccidhanno huuccatto macciishshitanno; busha coye assitannorira kayinni Yihowa* alba shawwu yaanno.”

13 Dancha coye assate laalaattiniro gawajjannoꞌnehu ayeti? 14 Ikkollana keeraanchimmate yitineenna qarru iilliꞌnero nafa, kiꞌne hagiirraammaho. Ikkirono, insa waajjitannore waajjitinoonte* woy massine jajjartinoonte. 15 Ikkollana Kiristoosi Mootichiꞌne gede assitine wodaniꞌne giddo ayirrisse;* hexxoꞌne daafira xaꞌmitannoꞌnerira baalaho dawaro qola dandiitinanni gede woꞌmanka woyite qixxaabbinoonnire ikke; hatto assitinannihu kayinni joongillunninna lowo ayirrinyinni ikko.

16 Kiꞌne daafira bushare coyidhannori, Kiristoosi haꞌrunsaano ikkaꞌnenni leellishshinannihu danchu amanyootiꞌnenni kainohunni, kiꞌne daafira coyidhannohu bushu coyi baalunkura saaltanno gede danchu tiiꞌꞌi heeꞌroꞌne. 17 Korkaatuno busha coye assitine qarrantinantenni Maganu fajjo ikkiro, dancha coye assitine qarrantiniro woyyanno. 18 Keeraancho ikkinohu Kiristoosi nafa keeraano ikkitinokkirira yee mitte hige woꞌmunku woyitira reye cubbuwiinni keere fushshinonsa; hatto assinohu kiꞌne Maganunniwa shiqishara yeeti. Maalunni heeꞌreenna shinoonnisi; ikkollana ayyaana ikke heeshshonniha ikkino. 19 Hatto ikke heeꞌre, haꞌre usurante noo ayyaannara sabbakino;* 20 tini ayyaanna, alba Nohi waro shiimu manni yaano sette lubbo* wayi giddoonni gatte saꞌu markaawe seekkinanni heeꞌnoonni yannara, Maganu cince agare heeꞌreenna* hajajama gibbureeti.

21 Konni coyi ledo mitto gara ikkitinoti cuuama, Yesuusi Kiristoosi kao widoonni xaano kiꞌne gatissanni nooꞌne; cuuama mannimmate xure huntannota ikkitukkinni, dancha tiia afiꞌrate Magano huucciꞌnanni huuccattooti. 22 Yesuusi gordo haꞌre Maganu qiniitenni no; qoleno sokkaasine, silxaannanna wolquwa gashshantannosi gede assinoonni.

4 Kiristoosi maalunni qarra adhino daafira, kiꞌneno isi hedo olu uduunnichi gede assitine qodhe;* korkaatuno maalunni qarra adhino manchi cubbo loosa agurinoho; 2 hakkuno xaate maalunni heeꞌrannota gattino yannasi, mannu hasattora ikkikkinni Maganu fajjora heeꞌranno gedeeti. 3 Mancaꞌꞌa coye assitinanna,* hattono quwa saꞌinote maalu yortonni, quwa sae agatenni, jila jille ikkinannikkita ikkatenni,* agattote jilinninna battennita kaphu maganna magansidhinanni dagate fajjo assitinanna saꞌino yanna ikkitino. 4 Amanyoote baꞌinota togoota maaeela doogo insa ledo haꞌra* agurtinanni daafira gurchaabbanno; hakko daafira xontannoꞌne. 5 Ikkollana kuni manni, heeshshote nooriranna reyitinorira yoo yaara qixxaawe noohu albaanni xaꞌmamanno. 6 Isinni, reyitinorirano dancha duduwo dudumboonnihu iseraati; hakko daafira mannu hedonni maalunni yoo yininsarono, Maganu hedonni ayyaanu ledo sumuu yaanno garinni heeꞌra dandiitanno.

7 Ikkollana baalunku coyi goofimarchi gambisino. Hakko daafira fayyo hedo heedhoꞌne; huuccattoteno baqqi yitinoonnire ikke. 8 Wolu baalunkurinni roore mimmitu ledo lubbora baxamme; korkaatuno baxillu lowo cubbo diwanno. 9 Mimmito gunguntinikkinni wosinsidhe. 10 Addi addi doogonni xabbinote Maganu eltora dancha soqqamaano* ikkitinoonni daafira, mittu mittunku adhitinoonni afanshi garinni, uyinoonniꞌne afansha mimmitoho soqqamate horoonsidhe. 11 Coyiꞌrannohu aye manchino Maganuwiinni adhino qaale coyiꞌranni noohu gede ikke coyiꞌro; soqqamannohu aye manchino Maganu aanno wolqa addaxxe soqqamo; hakkuno, Yesuusi Kiristoosi widoonni Maganu baalunku coyinni ayirranno gedeeti. Ayirrinyunna wolqa hegere hegerera isite. Hamiiꞌni.

12 Baxantinoonni roduuwa, giirate gedee fonqoli iilliꞌnero, wosinchu coyi iillanni nooꞌnehu gede assitine heddine dhagge assidhinoonte. 13 Hatteentenni Kiristoosi ayirrinyisinni xawanno woyite, kiꞌneno hagiidhitinanni gedenna lowo geeshsha tashshi yaannoꞌne gede, isi qarri beeqqaasine ikkitinoonni daafira woꞌmanka woyite hagiidhe. 14 Kiristoosi suꞌmira yitineenna minshiꞌnero,* kiꞌne hagiirraammaho; korkaatuno ayirrinyu ayyaani yaano Maganu ayyaani aanaꞌne fooliishshiꞌranno.

15 Ikkollana kiꞌne giddo ayino lubbo shaannoha woy mooraancho woy busha coye assannoha woy manni coyira eannoha ikke qarra adhoonke. 16 Ikkollana aye manchino Kiristaancho ikkasinni qarru iillisiro saalfatoonke; hatteentenni konne suꞌma duqqe woꞌmanka woyite Magano ayirriso. 17 Korkaatuno yoo Maganu mine hanaffannoti balanxe murroonni yanna tenneeti. Konnira yoo ninkewiinni hanaffannoha ikkiro, Maganunnihu danchu duduwira hajajamannokki manni gawalo hiittoota ikkitakka? 18 “Keeraanchu manchi quuxxi yee gatannoha ikkiro, Maganiweelunna cubbaataamu manchi mamira higannokka?” 19 Hakko daafira Maganu fajjo assansanni kainohunni qarru iillannonsari, dancha coye assitanni ammanamino Kalaqaanchira insaneeto* eeggo uyidho.

5 Konni daafira, anino insa gede cimeessa, Kiristoosi qarrira naqaashshenna albillitte xawanno ayirrinyi beeqqaancho ikkoommo daafira, mereeroꞌne noo cimeeyye togo yee eegameemmo:* 2 Aliidi laꞌꞌaano ikkitine soqqantinanni,* eeggo uyinoonniꞌneta Maganu hoshsha allaalle; gidde ikkeennaꞌne ikkikkinni Maganu albaanni umiꞌne fajjonni soqqamme; doogimale qiniite afiꞌrate halchonni ikkikkinni soqqamate quqquxamatenni, 3 Maganu jajja ikkitinorira mootooꞌmatenni ikkikkinni hoshshate lawishsha ikkitine towaatte. 4 Allaalaasinete roorrichi xawanno yannara baꞌannokkita ayirrinyu baꞌlatto adhitinanni.

5 Hatteente gede, kiꞌne wedellu geerraho* hajajamme. Ikkollana mimmitu ledo nooꞌne aantenni, baalunku joongille* uddidhe;* korkaatuno Maganu booꞌnaleeyyete ikkito giwanno; jooguulleho kayinni elto aanno.

6 Hakko daafira, yannasira gotti assannoꞌne gede, wolqaataame Maganu anga woroonni umoꞌne heeshshi asse; 7 isi kiꞌnere malanno daafira, yaaddoꞌne* baala isi aana tuqqe. 8 Woꞌmanka woyite wodanaaꞌmitine hedde; deantinoonte! Baarigaariꞌne Daawuloosi egemmannoha hasiꞌranni ittananno doobbiichi gede doyanno. 9 Alamete doyichora noohu roduuwu maamari woꞌmu giddo noo roduuwiꞌnerano togoo qarri iillanni noota affine, ammanatenni kaajjitine uurritine iso gibbe. 10 Ikkollana, shiima yanna qarra adhitinihu gedensaanni, Kiristoosi ledo nooꞌne mittimmanni hegere ayirrinyisiwa woshshinoꞌnehu elto baalate Magani, isi umisi qajeelshaꞌne jeefo gananno. Kaajjishannoꞌne, jawaachishannoꞌne hattono teesiisannoꞌne. 11 Wolqa hegerera isita ikkito. Hamiiꞌni.

12 Ammanamino rodii gede asse laeemmohu Silwaanoosi* widoonni, tenne harancho sokka ani borreessoommoꞌne; borreessoommoꞌnehuno kiꞌne jawaachishateetinna tini Maganunnita halaalaancho elto ikkitinota seekke farciꞌrateeti. Tenne elto seekkitine cuꞌmidhe. 13 Baabiloonete heedhannoti kiꞌne gede doorantinoti keere sokkinoꞌne; beettiꞌya Maarqoosino keere soyinoꞌne; 14 mimmito baxillunni sunqitinanni keere haadhe.

Kiristoosi ledo mittimma nooꞌnerira baalaho keeru kiꞌne ledo ikko.