IBIRAAWOOTU SOKKA

1 Hundi waro Maganu addi addi doogganni masaalaanote widoonni annuwankera duucha hige coyiꞌrino. 2 Xa kayinni kuri barruwa goofimarchira Beettisi widoonni ninkera coyiꞌrino; isi Beettosi baalunku coyira ragiꞌraasincho asse shoomino; baalanka coye* kalaqinohuno isi widoonniiti. 3 Isi Maganu ayirrinye xawise leellishannohonna woꞌmunni woꞌma Magano lawannoho; Maganunnihu wolqaataamu qaalinnino baalanka coye irkise amadanno. Isi cubbinkenni keereensinkehu gedensaanni, iima Ayirradu* Magani qiniitenni ofollino. 4 Hakko daafira, sokkaasinete suꞌma lowo geeshsha rooranno suꞌma ragiꞌrinohura insa roore ikkino.

5 Coyi gedera Maganu sokkaasinete giddo, “Ati beettoꞌyaati; techo ani atera anna ikkoommohe” hattono “Ani anna ikkeemmosi; isino beettoꞌya ikkanno” yee hiikkunni sokkaasinchi daafira coyiꞌre egennino? 6 Ikkollana bayira Beettosi galagale alame* soyanno yanna daafira coyiꞌranni, “Maganu sokkaasine baala ayirrinye uyitosi”* yaanno.

7 Qoleno sokkaasinete daafira coyiꞌranni, “Sokkaasinesi ayyaanna, soqqamaanosino* giirate buwano assanno” yaanno. 8 Beettisi daafira coyiꞌranni kayinni togo yaanno: “Maganu hegere hegerera zuufaanekkiiti; Gashshootikki siqqono keeraanchimmate* siqqooti. 9 Keeraanchimma baxitto; bunshe giwitto. Hakko daafira Maganu yaano Maganikki, miillakkinni* roorse hagiirru zayite buurinohe.” 10 Qoleno togo yaanno: “Mooticha, ati umo baattote safo safootto; gorduno angakki loosooti. 11 Insa baꞌanno; ati kayinni heeꞌratto; baalunku uddanote gede akkaltanno; 12 kaabbu gede assite xaaxattonsa; uddanote gedeno soorrattonsa. Ati kayinni woꞌmanka woyite ateetilla; dirikkino horonta digoofanno.”

13 Ikkollana sokkaasinete giddo, “Diinnakki lekkakkira woroonni qolammo geeshsha qiniiteꞌyaanni ofolli” yee hiikkunni sokkaasinchi daafira coyiꞌre egennino? 14 Insa baalunku gato ragidhannorira soqqantanno gede sonkannire, qullaawa soqqansho soqqantanno* ayyaanna diꞌꞌikkitino?

2 Sunu sununni ammanatewiinni xeertiꞌneemmokki gede, macciishshinoommo coye albinni roore illachisha hasiissannonkehu iseraati. 2 Sokkaasinete widoonni kulloonni qaali halaalaancho* ikkinota buunxiro, hattono duuchunku gari saonna hajajama hooga taashshote ledo sumuu yaanno qoricha abbitannoha ikkiro, 3 tenne jawa gato lashshi assinummoro, qorichunni hiitto ikkine gata dandiineemmo? Tenne gato balaxe Mootichinke coyiꞌrino; isiwiinni macciishshitinorino konne coye ninkera buuxissinonke; 4 Maganuno malaattatenni, dhaggetenni, addi addi maalalenninna fajjosi ledo sumuu yaanno garinni qullaawu ayyaani elto beehe farciꞌrino.

5 Korkaatuno tenne ninke coyiꞌnanni heeꞌnoommota dagganno alame* gashshitanno gede Maganu sokkaasine diworino. 6 Mitto bayicho mittu farciꞌraasinchi togo yiino: “Qaagattosira isi manchu maati? Woy towatattosira isi manchi beetti maati? 7 Sokkaasinetewiinni shiimare ajishoottosi; ayirrinyunna gaamaarrete baꞌlatto woroottosi; angakki loosi baalu aanano shoomoottosi. 8 Baalunku coyi lekkasi woroonni gashshamanno gede assootto.” Maganu baalunku coyi gashshamannosi gede assino daafira, gashshamannosi gede assinokkihu mittu coyino dino. Ikkirono xaara baalunku coyi gashshameennasi dilaꞌnoommo. 9 Ikkollana sokkaasinetewiinni shiimare ajinshoonnihu Yesuusi, reyote geeshsha qarramino daafira, xa ayirrinyunna gaamaarrete baꞌlatto worroonnisiha laꞌneemmo; isi Maganu eltonni baalunku mannira yee reyo qamasino.

10 Baalunku coyi heeꞌrannohu Maganohooti; heeꞌrannohuno isi widoonniiti; hakko daafira Maganu lowo oosora ayirrinye aara yee, gatonsara Qara Riqiwaancho ikkinoha qarru widoonni qole guuta assasi maltinote. 11 Qulleessannohuno qullaabbannorino baalunku mittu annireeti; hakko daafira isi insa roduuwaꞌya yee woshsha difokkanno; 12 korkaatuno, “Suꞌmakki roduuwiꞌyara kuleemmo; songote mereerono faarsotenni guwiseemmohe” yaanno. 13 Qoleno, “Ani iso addaxxeemmo” yaanno. Galagaleno, “Kuneeti aninna Yihowa* uyinoe ooso” yaanno.

14 Hakko daafira tini “ooso” maalanna mundee ikkitino daafira isino maalanna mundee ikkino; kuni ikkinohuno reyinanni gede assate wolqa noosiha Daawuloosi reyosi widoonni coꞌo hunanno gedeeti; 15 qoleno heeshshonsa diro baala reyo waajjite borojjimmate giddo heedhinore baalanka keere fushshanno gedeeti. 16 Isi kaaꞌlanni noohu sokkaasine ikkinokkiti egennantinote; hatteentenni isi kaaꞌlanni noohu Abirahaami sirchooti.* 17 Hakko daafira mannu cubbira keeraaꞌmate kakkalo* shiqishara, Maganu soqqanshora maarannohanna ammanaminoha kakkalaanote biilo ikkanno gede baalunku coyinni “roduuwisi” gedeeha ikka hasiissinosi. 18 Jifami yannara isi umisi qarramino daafira, jifantanni noore iille kaaꞌlansara dandaanno.

3 Hakko daafira, iimi woshshatto* beeqqaasine ikkitinoonniri qullaawoota roduuwa, iso ammanneemmota faajjete coyiꞌneemmoha, soqqamaasinchonna kakkalaanote biilo Yesuusa hedde. 2 Muse Maganu minira baalaho ammanaminoha ikkinonte gede, isino shoominosi Maganira ammanaminoho. 3 Mine minannohu minunni roore ayirrado ikkino daafira, isirano* Musenni roore ayirrinyu hasiisannosi. 4 Mitto mittonka mine mininohu nooti egennantinote; baalankare kalaqinohu* kayinni Maganoho. 5 Muse Maganu minira baalaho ammanamino soqqamaanchooti; soqqanshosino yannate gedensoonni kullanni coyira naqaashshete; 6 Kiristoosi kayinni Maganu mine shoomaminoho ammanamino beettooti. Woꞌmanka woyite huxuxxi yinummokkinni coyiꞌneemmohanna hagiidhineemmo gede assitannonketa hexxonke goofimarchu geeshsha seekkine cuꞌmiꞌneemmoha ikkiro, ninke Maganu mineeti.

7 Konni daafira qullaawu ayyaani togo yaanno: “Techo huurosi macciishshitinanniha ikkiro, 8 annuwaꞌne halalla lowo geeshsha hanqisannoere assite jiffue barri gede wodanaꞌne dilleessitinoonte; 9 hakkiicho annuwaꞌne 40 diri giddo assoommore laꞌinoha ikkirono jiffinoe; hattono hettissinoe. 10 Konninni kainohunni tenne ilama tiyyiꞌre togo yoommo: ‘Wodaninsa woꞌmanka woyite soꞌranno; doogoꞌyano afa didandiitino.’ 11 Konni daafira ‘Fooliishshoꞌyawa dieꞌanno’ yee hanqiꞌyanni xaarummo.”

12 Roduuwa, heeshshote Maganiwiinni xeertiꞌrasinni ammana nookkihu bushu wodani kiꞌne mereero aye giddono heeꞌrannokki gede qorophe; 13 hatteentenni, kiꞌne giddo ayino cubbunnite dogate wolqanni dillaawannokki gede, “Techo” yinanni yanna noo geeshsha barru baala mimmito jawaachishshe. 14 Korkaatuno Kiristoosi beeqqaasine ikkineemmohu,* umo noonke hawaqiꞌra goofimarchu geeshsha seekkine cuꞌmiꞌnummoro callaati. 15 Hakkuno “Techo huurosi macciishshitinanniha ikkiro, annuwaꞌne lowo geeshsha hanqisannoere assitu yanna gede wodanaꞌne dilleessitinoonte” yinoonni gedeeti.

16 Huurosi macciishshite heedhenni lowo geeshsha hanqissinosiri ayeooti? Muse massaganna Gibitsetenni fultinore baala diꞌꞌikkitino? 17 Hatteeno agurranna, Maganu 40 diro woꞌma tiyyiꞌranno gede assituri ayeooti? Hakkore cubbo loossurenna reeshshinsa halalla uwe gatire diꞌꞌikkitino? 18 Qoleno fooliishshoꞌyawa dieꞌanno yee xaariri ayeooti? Hakkore hajajama gibbure diꞌꞌikkitino? 19 Konnira ea dandiitinokkihu ammana hoogansanni ikkinota anfoommo.

4 Konnira fooliishshosiwa eate hexxo xaano noo daafira, kiꞌne mereero ayino hakkira eikkinni gatannokki gede qorophino.* 2 Korkaatuno dancha duduwo annuwankera dudumbinte gede, ninkerano dudumboonninke; ikkollana macciishshite hajajanturira noonsa gedee ammana insara noonsakki daafira macciishshitino qaali dikaaꞌlinonsa. 3 Ninke kayinni ammana noonketa leellinshoommo daafira tenne fooliishshowa eꞌneemmo. Alame xintantu yannanni kayise loosisi goofinoha ikkirono, isi “‘Fooliishshoꞌyawa dieꞌanno’ yee hanqiꞌyanni xaarummo” yiino. 4 Korkaatuno mitto bayicho lamalki barri daafira, “Maganu lamalki barra loosisi baalunkunni fooliishshiꞌri” yiino. 5 Kowiicho galagale, “Fooliishshoꞌyawa dieꞌanno” yiino.

6 Xaano fooliishshosiwa eannohu mitu manni no; qoleno balanxe dancha duduwo dudumboonninsari hajajama giwansanni eꞌukkinni gattino; 7 hakko daafira lowo yanna gedensaanni Daawiti faarsora, “Techo” yee galagale mitto barra murino; hakkuno aleenni, “Techo huurosi macciishshitinanniha ikkiro wodanaꞌne dilleessitinoonte” yinoonni garinniiti. 8 Iyyaasu fooliishshote bayicho masse eessinonsaha ikkoommero, Maganu hakkunni gedensaanni wolu barri daafira dicoyiꞌranno. 9 Hakko daafira Maganu mannira sambatu fooliishsho gatte noonsa. 10 Korkaatuno Maganu fooliishshowa eino manchi, Maganu loosisinni fooliishshiꞌrinte gede isino loosisinni fooliishshiꞌrino.

11 Konnira, ayino hakko manniha hajajama giwate lawishsha haꞌrunse uwannokki gede, hatte fooliishshowa eate dandaaminkere baala assino. 12 Maganu qaali heeshshonnihonna wolqaataamoho; lame afoo afidhinote aye bisenni roore iibbadoho; lubbonna* ayyaana,* mikitanna qoe bada geeshsha raqqe eanno; wodanu hedonna hasattono wodancha dandaanno. 13 Maganu illera goꞌlinohu mittu kalaqamino dino; isi illera baalunkuri xawoho reqecci yee leellanno; ninkeno xaꞌmannonke coyira dawaro qolleemmohu isiraati.

14 Hakko daafira gordo einohu rooriidihu kakkalaanote biili yaano Maganu Beetti Yesuusi noonkehura, iso ammanneemmota faajjete coyiꞌra agurroonke. 15 Korkaatuno noonkehu kakkalaanote biili laanfenkera ninke marara dandaannokkiha diꞌꞌikkino; hatteentenni, ninkente gede baalunku coyinni fonqolaminohu kakkalaanote biili noonke; ikkollana isi cubbu dinoosiho. 16 Hakko daafira kaaꞌlo hasiissannonke yannara maaronna elto afiꞌneemmo gede, Maganunnite eltote zuufaanewa ruxxi yinummokkinni shinqo.

5 Mannu mereerinni dooraminohu mittu mittunku kakkalaanote biili, cubbu daafira fushshaatenna kakkalo shiqishanno gede insa riqiwe Maganu soqqanshora shoomamanno. 2 Isi umisi laanfe noosiha ikkino daafira, afibbeelootanna sodhannore* mararrotenni* laꞌꞌansara dandaanno; 3 konninni kainohunni mannu cubbira kakkalo shiqishannonte gede, umisi cubbirano shiqisha hasiissannosi.

4 Mittu manchi konne ayirrinye afiꞌrannohu Aarooni gede Maganu woshshisiro callaati ikkinnina umisinni kae diꞌꞌikkino. 5 Kiristoosino umosi kakkalaanote biilo asse isonooto gotti gotti diassino; hatteentenni, “Ati beettoꞌyaati; techo ani atera anna ikkoommohe” yiinosi Magani gotti gotti assinosi. 6 Qoleno wole bayicho, “Ati Melketsedeqi gede hegerera kakkalaanchoho” yiino.

7 Kiristoosi uullate aana noo yannara* reyotenni gatisasira dandaanno Magano, lowo raarenninna hindiiddonni hige hige eeggifate huucciꞌrino; Magano waajjannoha ikkino daafira huuccattosino macciishshantinosi. 8 Maganu Beetto ikkirono iillinosi qarrinni hajajama rosino. 9 Guuta ikkihu gedensaanni, hajajantannosiri baalu hegere gato afidhanno gede doogo ikkinonsa; 10 korkaatuno Maganu iso Melketsedeqi gedeeha kakkalaanote biilo asse shoominosi.

11 Isi daafira coyiꞌneemmori lowori no; ikkollana maccaꞌne dunkitino daafira xawise kula qarraho. 12 Woleteemmero xaa yannara* rosiisaano ikka hasiissannoꞌneri, Maganunnihu qullaawu qaaliha umi coye galagale hanafotenni kayise rosiisannoꞌneha hasidhinanni; qoleno kaajjado sagale ita agurtine wirro ado hasiꞌrate higginoonni. 13 Ado haqaanqannihu baalu qaaqqo ikkino daafira keeraanchimmate qaali ledo diegennaminoho. 14 Kaajjado sagale hasiissannohu bushanna dancha bada dandaanno gede, wodanchate dandoonsa horoonsiꞌranni qajeelsiꞌrinohura gikki yiino manniraati.

6 Konnira, Kiristoosi daafira ronsoommohu umi rosiwiinni saꞌnoommo daafira gikki yaate sharrammo; safo galagalle sanfoonke; yaano, reyino loosiwiinni maaro eatenna Magano ammanate daafira, 2 hattono addi addi cuuama, anga aanaho worate, reyitinori kaonna hegere yoo daafira galagalle ronsoonke. 3 Maganu fajjiro konne assineemmo.

4 Konni albaanni xawaabbu xawinonsare, iimi elto qamassinore, qullaawa ayyaana adhitinore, 5 dancha ikkinoha Maganu qaalenna dagganno alamera* afiꞌnanni atoote* qamassinore, 6 yannate gedensoonni kayinni ammanatewiinni xeertidhinore maaronniwa qola didandiinanni; korkaatuno insa uminsa xaano Maganu Beetto haqqaho suttanno; gudumaalehono shollishshannosi. 7 Yannate kiiro aanase dirranno xeena aggannotinna loosiꞌranno mannira itanno laalcho laashshitanno baatto Maganu atoote afidhanno. 8 Utanna kokkoꞌle fushshitannoha ikkiro kayinni, facci assine agurranni; qoleno mulenni rumantinota ikkitanno; goofimarchohono isera giira qansanni.

9 Baxantinoonni roduuwa, togo assine coyiꞌnummorono kiꞌne insawiinni woyyitinannita yaano gato abbanno coye assitinanni heedhinoonnita dihuluullammeemmo. 10 Maganu xaano ikko albillitte qullaawootaho soqqamate loossinanni loosonna suꞌmisira leellishshinoonni baxille hawe halaale diwiranno. 11 Ikkollana huluullissannokki hexxo goofimarchu geeshsha cuꞌmiꞌra dandiitinanni gede, kiꞌne mittu mittunku hakko garinni diinaggaabbinara halchineemmo; 12 Maganu uyino hexxo ammanatenninna cincatenni ragidhannori faale hadhinara ikkinnina ceeꞌmaleeyye ikkitinara dihasiꞌneemmo.

13 Maganu Abirihaamira hexxo uyi yannara, iso* roorinohu wolu ayino nookki daafira isiniitinni xaarino; 14 “Halaalinta maassiꞌreemmohe; sirchokkino addinta batiseemmo” yiino. 15 Hakko daafira Abirihaami cince agadhihu gedensaanni konne hexxote qaale adhino. 16 Mannu xaaranno woyite insa roorinohu suꞌminni xaaranno; xaaronsa coyidhinori halaale ikkinota leellishshanno taje ikkitanno daafira, moronsho baala hooltanno. 17 Hatteente gede, Maganu hedosi horonta soorrantannokkita hexxote qaali ragiꞌraasinera roore xawise leellisha hasiꞌri woyite, hexxote qaale xaarotenni kaajjishe buuxisino;* 18 hatto assinohu goꞌlineemmowa afiꞌrate isiwa xoonqoommori ninke, soorramannokkihunna Maganu kaphara dandaannokkihu konni lamu coyi* widoonni albankeenni noo hexxo seekkine cuꞌmiꞌrate kaaꞌlitannonketa lowo jawaante afiꞌneemmo gedeeti. 19 Lubbonkera* markaawete cifichi gede ikkitinoti tini huluullammannikkiti kaajjado hexxo noonke; tini hexxo dukko saꞌe giddoonni eꞌanno. 20 Melketsedeqi gede hegerera kakkalaanote biilo ikkinohu Yesuusi, albiidiha ikke ninke daafira hakkira eino.

7 Abirihaami mootoolla qeele higanni heeꞌreenna, Saaleemi mootenna Woꞌmunkura Aliidi Magani kakkalaancho ikkinohu kuni Melketsedeqi xaade maassiꞌrinosi; 2 Abirihaamino baalunkuri giddonni tonnunni mitte anga uyinosi.* Umihunni suꞌmisi tiro, “Keeraanchimmate Moote” yaate; qoleno Saaleemi moote yaano “Keeru Mooteeti.” 3 Isira annunna amano, sirchu kalino dinosi; dirisira hanafo, heeshshosirano gawalo dino; hatteentenni Maganu Beetto lawanno gede assinoonnisi daafira hegerera* kakkalaancho ikke heeꞌranno.

4 Maatete umo* ikkinohu Abirihaami, qafade abbiꞌrinohu umo afiꞌrino coyi giddonni tonnunni mitte anga uyinosihu kuni manchi mageeshshi geeshsha ayirrado ikkinoro laꞌe. 5 Kakkalaasine assine shoommannihu Leewi ooso gaꞌre ikkino manni, roduuwinsa Abirihaami sircho ikkiturono mannuwiinni yaano roduuwinsawiinni asaraate gamba assitanno gede Seeru hajajanno. 6 Kuni manchi insa sirchi kalinni dayinoha ikka hoogirono, Abirihaamiwiinni asaraate adhino; hattono hexxo uyinoonnisiha iso maassiꞌrino. 7 Shiimiidiha rooriidihu maassiꞌrinoti dihuluullissannote. 8 Mitto widoonni asaraate adhannohu reyanno mannaati; wole widoonni kayinni asaraate uyinannisihu heeshshonniha ikke heeꞌrannota farciꞌnoonnisi manchooti. 9 Isinni asaraate adhannohu Leewi nafa, Abirihaami widoonni asaraate baatino yaa dandiinanni; 10 Melketsedeqi Abirihaaminni xaadi yannara, Leewi albillitte ilamannoho annisi Abirihaami sirchooti.*

11 Konnira Leewi kakkalaanchimma guuta assa dandiitannoha ikkoommero, (kakkalaanchimma mannaho uyinoonni Seeri widira gaamantanno daafira) Aarooni gedeeha ikkikkinni Melketsedeqi gedeeho yinoonnihu wolu kakkalaanchi kaꞌꞌa mayira hasiissanno? 12 Korkaatuno kakkalaanchimma soorrantanno daafira, Seeruno soorrama hasiissannosi. 13 Isi daafira konne baala coye kulloonni manchi dayinohu wole gaꞌrenniiti; tenne gaꞌrenni kakkalote darga soqqame egenninohu mittuno dino. 14 Mootichinke Yihudu gaꞌrenni dayinoti egennantinote; ikkollana Muse tenne gaꞌrenni kakkalaasine daggannota dicoyiꞌrino.

15 Qoleno Melketsedeqi gedeehu wolu kakkalaanchi kaꞌꞌanno woyite kuni coyi roore xawe leellanno; 16 isi kakkalaancho ikkinohu, maalu fiixoominninna Seeru hajajonni ikkikkinni baꞌannokki heeshsho uyinosi Magani wolqanniiti. 17 Korkaatuno isi daafira, “Ati Melketsedeqi gede hegerera kakkalaanchoho” yine farciꞌnoonni.

18 Konnira albi hajajo wolqiweelonna gumiweelo ikkitino daafira hunnoonni. 19 Korkaatuno Seeru mitto coyeno guuta assa didandiino; Maganu uyinonketi woyyitino hexxo kayinni hatto assitino; isiwa shinqeemmohu tenne hexxo widoonniiti. 20 Qoleno kuni kakkalaanchi xaaro nookkiha dayinoha diꞌꞌikkino; 21 (xaaro nookkiha kakkalaano ikkino manni no; kuni kayinni kakkalaancho ikkinohu xaarotenniiti; kuni ikkinohu, “Yihowa* ‘Ati hegerera kakkalaanchoho’ yee xaarino; hedosino disoorranno”* yee isi daafira coyiꞌrino Magani xaarino xaaro garinniiti.) 22 Hatteente gede Yesuusi woyyino gondoorira woowe ikkino.* 23 Hakkiinni saeno kakkalaasine soqqantanni heedhannota reyo hooltannonsa daafira, mittu wole lekkisanni soqqamanno gede lowo manni kakkalaasine ikka hasiissannonsa; 24 isi kayinni hegerera heeshshonniha ikke heeꞌranno daafira kakkalaanchimmasi lekkisannohu dino. 25 Korkaatuno insara Magano huuccara woꞌmanka woyite heeshshonniha ikke heeꞌranno daafira, isi widoonni Maganunniwa shiqqannore woꞌmunni woꞌma gatisansara dandaanno.

26 Ammanaminohu, fayyaaleessu, battaawinokkihu, cubbaataammuwiinni baxxinohunna gordoho aleenni gotti yiinohu, ninkera malinohu kakkalaanote biili isooti. 27 Isi, wole kakkalaanote biilla assitannohu gede balaxe umisi cubbira, hakkiinni mannu cubbira barru baala kakkalo shiqisha dihasiissannosi; mayira yiniro, isonooto kakkalo asse shiqishi woyite, mitte hige woꞌmunku woyitira ikkitannota shiqishino. 28 Korkaatuno Seeru laanfe noonsa manna kakkalaanote biilla asse shoomanno; Seeru gedensoonni xaarroonni xaaro kayinni hegerera guuta assinoonnisi Beetto shoontanno.

8 Coyinketi qara hedo tenneeti: Gordoho ayirradu Magani zuufaanera qiniitenni ofollinohu togoohu kakkalaanote biili noonke; 2 isi qullaawu darginna halaalaanchu dunkaani soqqamaanchooti;* konne dunkaana qasinohu Yihowaati* ikkinnina mancho diꞌꞌikkino. 3 Mitto mittonka kakkalaanote biilo shoommannihu afanshanna kakkalo shiqishanno gedeeti; hakko daafira konni kakkalaanote biilirano shiqishannori hasiisannosi. 4 Seeru garinni kakkalo shiqishanno manni noo daafira, isi uullate aana heeꞌroommero kakkalaancho diꞌꞌikkanno. 5 Kuni manni gordu coyira lawishshanna caale ikkitinota qullaawa soqqansho soqqamanno; kuni ikkinohuno Muse dunkaana seekkara kae heeꞌreenna, “Ilaalu aana leellinshihe akeeki garinni baalanka coye qorophite seekki” yee Maganu hajajinosi hajajo ledo sumuu yaanno garinniiti. 6 Ikkollana Yesuusi lowo geeshsha roortino soqqansho* adhino; hattonni woyyino gondoorira mereerima ikkino; kuni gondoori woyyitino hexxo aana seerunni kaajjinoho.

7 Umi gondoori xeꞌne afiꞌrinokkiha ikkoommero, layinki gondoori dihasiisanno. 8 Korkaatuno Maganu mannu aana xeꞌne afino daafira togo yee coyiꞌrino: “‘Kune Israeelete mininna Yihudu mini ledo haaro gondooro eꞌꞌeemmo yanna dagganno’ yaanno Yihowa.* 9 ‘Kuni gondoori annuwansa anga amade Gibitsete gobbanni massage fushshummonsa barra insa ledo eoommo gedee gondooro diꞌꞌikkanno; korkaatuno insa gondooriꞌyanni kaajja hooggino daafira facci asse aguroommonsa’ yaanno Yihowa.*

10 “‘Hatte yanna gedensaanni Israeelete mini ledo eꞌꞌeemmo gondoori konneetina’ yaanno Yihowa.* ‘Seeraꞌya surrensara woreemmo; wodaninsa giddono borreesseemmo. Ani Maganonsa ikkeemmo; insano mannaꞌya ikkitanno.

11 “‘Xaate insa mittu mittunku gobbansa mancho woy mittu mittunku rodoonsa, “Yihowa* afi!” yite dirosiissanno. Korkaatuno ajunni kayise akkalu geeshsha baalunku affannoe. 12 Bushu loosinsara maareemmonsa; cubbonsano xaate diqaageemmo.’”

13 “Haaro gondooro” yaanno woyite albi gondooro yanna saꞌinoha assino yaate. Hakko daafira yanna saꞌinohunna akkalanni noo gondoori baꞌꞌanno yanna gambissino.

9 Albi gondoorirano qullaawa soqqansho soqqammanni wodhonna uullate aana umisihu qullaawu dargi noosi. 2 Caabbicho worranni uduunnicho, xarapheessanna Maganu albaanni shiqinoha qullaawa tima worranniwa dunkaanunnita umi kifile seekkinoonni; tenne kifile Qullaawa Darga yinanni. 3 Layinki dukkora badheenni kayinni Qullaawa Holge yinanniti dunkaanu kifile no. 4 Tenne kifile giddo culkunni seekkinoonnihu hixaana giirranni uduunnichinna aanaanni gudinse culka xallinoonnihu gondooru taabooti no; taabootu giddo menna worroonnihu culku gambayichi, daraartinoti Aarooni siqqonna gondoorunniti bocame kinna no; 5 aanasiinni qole keeraaꞌmate tuana* guggushshitannori ayirradda kirubeele no. Ikkollana tini konne coye tittirre kullanni yanna diꞌꞌikkitino.

6 Tenne coyibba konni garinni seekkinihu gedensaanni, kakkalaano qullaawa soqqansho soqqantara dunkaanunnita umi kifile woꞌmanka woyite eꞌanno; 7 layinki kifile kayinni dirunni mitte hige kakkalaanote biili callu eanno; isi umisi cubbiranna mannu afikkinni loosino cubbira shiqishanno mundee haaꞌrikkinni dieanno. 8 Konni garinni, umi dunkaani qasame heeꞌreenna qullaawa darga massitanno doogo xaara leeltinokkita qullaawu ayyaani xawisino. 9 Kuni dunkaani tenne yannara lawishshaho; tenne qixxaawo garinni afanshanna kakkalo shiqinshanni. Ikkollana tini coyibba qullaawa soqqansho soqqamanno manchi tiia woꞌmunni woꞌma keereensa didandiitanno. 10 Tini coyibba sagaletenna agattote hattono addi addite hayishshiꞌre keeraaꞌmate* woga ledo calla xaadooshshe afidhinote. Qoleno kuri coyibba bisu daafira worroonni wogaati; tenne woga worroonnihuno coyi biddi yaannoti murroonni yanna iillita geeshshaati.

11 Ikkollana Kiristoosi xa noohu danchu coyira kakkalaanote biilo ikke dayi yannara, mannu anga seekkitinokkiha yaano uullate kalaqami wido ikkinokkiha roore jawanna guuta dunkaana eino. 12 Qullaawa darga einohu meunna boottate mundee haaꞌre diꞌꞌikkino; hatteentenni umisi mundee haaꞌre mitte hige woꞌmunku woyitira eino; ninkeno hegere gato* afiꞌneemmo gede assinonke. 13 Meunna boottate mundee hattono battaawino mannira winxannihu addete buluuli maala keereense qullaawa assannoha ikkiro, 14 hegere ayyaani widoonni minshe nookkiha isonooto Maganoho shiqishinohunniti Kiristoosi mundee, heeshshote Maganira qullaawa soqqansho soqqammeemmo gede, tiianke reyote loosiwiinni hiitto roorsite keereensa hoogganno?

15 Isi haaru gondoorira mereerima ikkinohu iseraati; mereerima ikkinohuno woshshantinori hegere hexxo ragge afidhanno gedeeti; kuni baalu ikkinohuno isi reyonniiti; isi reyonni kainohunni albi gondoori hunda heedhe Seera diigginori wodotenni keere fultino. 16 Gondooru heeꞌriro, gondooro eino manchi* reyinota buuxa hasiissanno; 17 korkaatuno gondooro eino manchi lubbote noo geeshsha gondooru woꞌmannokki daafira gondooru kaajjannohu reyotenniiti.* 18 Konni daafira albi gondoorino mundee nookkiha loosu aana hosa dihanafino.* 19 Muse Seeru giddo noota mitte mittenta hajajo manna baalaho kuli woyite, boottatenna meu mundee wayi, duume xiillitte geꞌrechu ordanna garambichu ledo haaꞌre maxaafunna* mannu baalu aana wixino; 20 wixinohuno, “Maganu agadhitinanni gede hajajinoꞌneti gondooru mundee tenneeti” yeeti. 21 Dunkaanahonna qullaawa soqqanshora* horoonsiꞌnanni uduunni baalu aanano mundee wixino. 22 Ee, Seeru garinni shiima coye calla agurranna baalunkuri keeraaꞌmannohu mundeetenniiti; mundee duꞌnantukkinni maaro afiꞌra didandiinanni.

23 Hakko daafira, gordoho noo coyira lawishsha ikkinori baalu konni garinni keeraaꞌma hasiissino; gordoho noo coyira kayinni hakkiinni lowo geeshsha roortino kakkalo hasiissanno. 24 Kiristoosi einohu qullaawu dargi, mannu anga seekkitinohanna halaalaanchu qullaawu dargira lawishsha ikkino bayicho diꞌꞌikkino; hatteentenni isi xa ninke daafira Maganu albaanni leellara gordo eino. 25 Einohu kayinni kakkalaanote biili diru kiiro umisi mundee ikkikkinni saadate mundee haaꞌre qullaawa darga eannohu gede, duucha hige isonooto kakkalo asse shiqishara diꞌꞌikkino. 26 Hatto ikkoommero alame xintantuhunni kayise duucha hige qarra adha hasiissannosi. Xa kayinni umosi kakkalo asse cubbo haaꞌre hoolate, alamete* gumulora mitte hige woꞌmunku woyitira isonooto leellishino. 27 Mannu baalunku mitte hige reya noote; hakkunni gedensaanni kayinni yoo adhanno; 28 hatteente gede Kiristoosi lowo manni cubbo duqqara, mitte hige woꞌmunku woyitira kakkalamino; layinkimeeshsho leellannohu kayinni cubbo hunara diꞌꞌikkino; gato afiꞌrate quqquxante agadhitannosirino laꞌannosi.

10 Seeru albillitte daannohu danchu coyira caaleho ikkinnina isi umisi addanka hakkonne coye diꞌꞌikkino; konnira Seeru* diru kiiro mittu gari kakkalo shiqishshanni Magano magansidhannore horonta guuta assa didandaanno. 2 Dandaannoha ikkoommero kakkalo shiqisha diagurranni? Korkaatuno qullaawa soqqansho soqqamanno manni mitte hige keeraaꞌmihu gedensaanni, tiiꞌꞌinsa cubbinsanni kainohunni busha diassannonsa. 3 Ikkollana tini kakkalo diru kiiro cubbo qaanganni gede assitanno; 4 korkaatuno boottatenna meu mundee cubbo haadhe hoola didandiitanno.

5 Hakko daafira Kiristoosi alame dayi yannara togo yiino: “‘Kakkalonna fushshaate dihasiꞌrootto; hatteentenni mannimma qixxeessoottoe. 6 Woꞌmunni woꞌma shilqinshe shiqinshanni kakkalonna cubboho shiqinshanni kakkalo dihagiirsiissinohe.’ 7 Hatte yannara ani, ‘Maganoꞌya, kuneeti (maxaafu xaaxo giddo ane daafira borreessinoonni garinni) fajjokki assammora dayommo’ yoommo.” 8 Umo togo yiino: “Kakkalo, fushshaate, woꞌmunni woꞌma shilqinshe shiqinshanni fushshaatenna cubboho shiqinshanni fushshaate dihasiꞌrootto; kurino dihagiirsiisinohe;” tini Seeru kulanno garinni shiqinshanni kakkalooti. 9 Hakkiinni, “Kuneeti fajjokki assammora dayommo” yiino. Isi layinkiha xintara umiha hunanno. 10 Tenne “fajjo” garinni mitte higge woꞌmunku woyitira kakkalantinote Yesuusi Kiristoosi mannimmanni qullaamboommo.

11 Qoleno mittu mittunku kakkalaanchi qullaawa soqqansho soqqamaranna* cubbo woꞌmunni woꞌma haadhe hoola dandiitannokkita mittu gari kakkalo yannate kiiro shiqishara barru baala bayichosi uurranno. 12 Kuni manchi kayinni cubbu daafira woꞌmunku woyitira ikkitannota mitte kakkalo shiqishe Maganu qiniitenni ofollino; 13 hatte yannanni kayise diinnasi lekkasira woroonni qolla geeshsha agadhe no. 14 Korkaatuno, hakkuri qullaabbannore woꞌmunku woyitira guuta assinohu mitte kakkalo shiqisheeti. 15 Qullaawu ayyaanino ninke daafira farciꞌranno; umo togo yaanno: 16 “‘Hatte yanna gedensaanni insa ledo eꞌꞌeemmo gondoori konneeti’ yaanno Yihowa.* ‘Seeraꞌya wodaninsara woreemmo; surrensarano borreesseemmo.’” 17 Hakkiinni, “Cubbonsanna busha loosonsa xaate diqaageemmo” yaanno. 18 Cubbonna busha looso gatona yiniro, hakkunni gedensaanni cubbu daafira kakkalo shiqisha dihasiissanno.

19 Konni daafira roduuwa, Yesuusi mundee widoonni qullaawa darga massitanno doogo eate worbimma afiꞌnoommo;* 20 isi faninonketi* tini doogo haarotenna heeshshonnite; hatto assinohu dukkote yaano maalisi widoonni hige eꞌꞌeeti; 21 qoleno Maganu mine shoomaminohu bayiru kakkalaanchi noonke; 22 hakko daafira, bushu tiiꞌꞌinni keeraaꞌmate wodananke xalashshiꞌne* hattono bisonke xalalu wayinni hayishshiꞌne suwashshu wodaninninna woꞌma ammananni Maganunniwa shinqo. 23 Hexxo uyinonkehu ammanaminoha ikkino daafira, hexxonke faajjete duduwate afiꞌneemmo faro kawa kaꞌa hingummokkinni seekkine cuꞌmiꞌno. 24 Kuꞌu koꞌonne baxillehonna danchu loosira kakkayisa dandiineemmo gede mimmitoho hendo;* 25 mitootu rosicho assidhino gede, mitteenni gamba yaa lashshi assinoonke; hatteentenni mimmito jawaachinsho; qoleno barru gambise dayinota hendanni albinni roorsine hatto assino.

26 Halaalunnita gara ikkitino egenno afiꞌnummohu gedensaanni, anfanni heeꞌnenni cubbo loosa roso assiꞌneemmoha ikkiro, xaate cubbu daafira shiqqannoti wole kakkalo diheedhanno; 27 hatteentenni waajjishshanno yoonna Magano hettissannore itannohu buwanno hanqi agadhannonke. 28 Aye manchino Muse Seera diigiro, lamu woy sasu manchi farciꞌriro mararro nookkiha shinanni. 29 Ikkina Maganu Beetto mishinoha,* qullaawa assitinosita gondooru mundee mulluri gede asse kiirinohanna eltote ayyaana mishe xonino mancho hakkiinni roorino qorichi agadhannosiha dilawannoꞌne? 30 Korkaatuno “Rabba anete; ani bado qoleemmo” yiinohu ayetiro anfoommo. Qoleno “Yihowa* mannisira yoo yaanno.” 31 Heeshshote Magani anga uwa waajjishshannote.

32 Ikkollana xawaabbu xawiꞌnehu gedensaanni, qarru giddo lowo geeshsha gaarantine cincatenni kaajjitine saꞌinoonnita albi yanna woꞌmanka woyite qaagge. 33 Mannu albaanni mishamatenna qarraho reqecci assinoonniꞌne yanna no; qoleno togoo coyi iillinonsa manni qarra beeqqitinoonni* woyiti no. 34 Kiꞌne umiꞌnera woyyinohunna geedote jajji nooꞌneta affinoonni daafira, usurante noore marartinoonninsa; qoleno jajjaꞌne wolqatenni adhinanna hagiirrunni cincitine saꞌinoonni.

35 Konni daafira lowo baꞌraarsha afidhinanni gede assitanno worbimmaꞌne* oltine huntinoonte. 36 Maganu fajjo assitinihu gedensaanni, hexxote qaali woꞌmanna laꞌꞌa dandiitinanni gede kaajjitine uurra hasiissannoꞌne. 37 Korkaatuno, “Shiima yanna geeshshaati” ikkinnina “daannohu isi daanno; qoleno dikeeshshanno.” 38 “Keeraanchu soqqamaanchiꞌya kayinni ammanatenni heeꞌranno;” qoleno “waajje badhe hige haꞌrannoha ikkiro isinni dihagiidheemmo.”* 39 Konnira ninke heeshshote* wortanno ammana noonsa manni gedeereeti ikkinnina waajjite badhe higge baote widira hadhannori gedeere diꞌꞌikkinoommo.

11 Ammana hexxinoonni coye hawaqiꞌne agadhate; qoleno ammanneemmo coyi illete leellannokkiha ikkirono, addanka nooha ikkinota buuxissanno tajeeti.* 2 Hundi manni* daafira farciꞌnoonnihu ammanatenni kainohunniiti.

3 Alame* kalaqantinohu Maganu qaalinni ikkinota huwanteemmohu ammanatenniiti; hakko daafira leellanno coyi dayinohu leellannokki coyiwiinniiti.

4 Aabeeli, Qaaeelita roortino kakkalo Maganoho shiqishinohu ammanatenniiti; Maganu fushshaatesi adhino daafira* tenne ammanasinni kainohunni keeraanchoho yine farciꞌnoonnisi; isi reyirono ammanasi widoonni xaano coyiꞌranni no.

5 Heenooki reyo laꞌꞌannokki gede ammanatenni wolewa massinoonni; Maganu wolewa massinosi daafira iso mittowano dianfoonni; korkaatuno isi wolewa massinasira albaanni Magano lowo geeshsha hagiirsiisinota farciꞌnoonnisi. 6 Qoleno ammana nookkiha Magano seekkine hagiirsiisa didandiinanni; mayira yiniro, Maganunniwa shiqannohu aye manchino isi nootanna woꞌmu wodaninni hasidhannosire baꞌraasannoha ikkinota ammana hasiissannosi.

7 Nohi, Maganu xaara leellinokki coyi daafira uyinosi qorophishsha adhihu gedensaanni, Magano waajjannota leellishinohunna minisi manna gatisate markaawe seekkinohu ammanatenniiti; tenne ammana widoonni alame cubbishino; ammanatenni afiꞌnanni keeraanchimmano ragiꞌrino.

8 Abirihaami woshshami yannara albillitte ragge asse adhanno bayicho haꞌre ammanatenni hajajamino; hiikka haꞌrannoro afa hoogirono heeꞌrannowiinni agure fulino. 9 Manni gobbara heeꞌranno wosinchi gede hexxote gobbara ammanatenni heeꞌrino; qoleno ledosi konni hexxote qaali ragiꞌraasine ikkitinori Yisaaqinna Yaaqoobi ledo dunkaanaho heeꞌrino. 10 Hatto ikkinohu Maganu akeekinohanna mininoha halaalaancho safo afiꞌrino katama agadhe noo daafiraati.

11 Saarano hexxo uyinohu Isi ammanaminoha* ikkinota heddino daafira, dirise sainoha ikkirono sircho* godowate ammanatenni wolqa afidhino. 12 Konninni kainohunni reyinohu gede assine kiirrannihu mittu manchiwiinni, gordu beeddahe gede batidhinotinna baaru qaccera noo shaafi gede kiira dandiinannikki ooso ilantino.

13 Kuri baalunku hexxote qaali woꞌmanna laꞌinokkiha ikkirono, ammanansanni kaajjite heedhe reyitino; ikkirono xeertote heedhe laꞌe hagiidhite adhitino; qoleno heedhino gobbara wosina ikkitinotanna yannate geeshsha calla heedhannota faajjete coyidhino. 14 Hatto yee coyiꞌranno manni uminsa bayicho hixamanye hasiꞌrannota leellishanno. 15 Ikkollana agurte daggino base xaa xaa heddannoha ikkoommero galagalte higganno faro afidhanno. 16 Xa kayinni woyyinoha yaano gordunniha ikkino bayicho afiꞌrate sharrantanno. Maganu katama qixxeessinonsa daafira, insa Maganonke yite woshshidhannosita difokkanno.

17 Abirihaami fonqolami yannara, ammanatenni Yisaaqi kakkalo asse shiqishate geeshsha iillino; hexxote qaale hagiirrunni adhinohu kuni manchi afiꞌrinoha mitto beettosi kakkalo asse shiqishara kaino; 18 hatto assinohu, “Sirchikki* woshshamannohu Yisaaqi widoonniiti” yine kulle heeꞌneennasinniiti. 19 Isi kayinni Maganu beettosi reyotenni nafa kayisa dandaannota wodanchino; qoleno lawishsha ikkanno garinni beettosi reyote afiinni qole adhino.

20 Yisaaqino albillitte ikkannori daafira Yaaqoobinna Eesawu ammanatenni maassiꞌrino.

21 Yaaqoobi reyara rahe heeꞌre mitte mittenta Yooseefi ooso maassiꞌrinohunna siqqichosi birxe siqqiꞌre heeꞌre Magano magansiꞌrinohu ammanatenniiti.

22 Yooseefi reyara rahe heeꞌre, Israeeli ooso Gibitsetenni fultannota ammanatenni coyiꞌrino; miqqasi* daafirano biddishsha* uyino.

23 Muse ilamihu gedensaanni annisinna amasi qaaqqu xuma ikkinota laꞌe, mootete hajajo waajjitukkinni iso sase agana maaxxinohu ammanatenniiti. 24 Muse lophihu gedensaanni Feriooni beetto beettooti yinannisita ammanatenni giwino; 25 cubbunni afiꞌnannihu yannate geeshshi hagiirrinni roore Maganu manni ledo qarrama doodhino; 26 korkaatuno uyinannisi baꞌraarsha seekke laino daafira, Buuraminoha* ikke mishama Gibitsennita muxxe jiro roortannota hedino. 27 Qoleno ammanatenni Gibitse agure fulino; ikkollana fulinohu mootete hanqo waajje diꞌꞌikkino; korkaatuno illete leellannokki Magano lainohu gede asse hede kaajje heeꞌrino. 28 Hunannohu* bayiruudde oosonsa gawajjannokki gede,* Muse Faasika ayirrisinohunna mundee wixinohu ammanatenniiti.

29 Israeelootu moola baatto aana hadhanni noohu gede ikkite Duumo Baara tayisse saꞌinohu ammanatenniiti; ikkollana Gibitsootu hatto assate woꞌnaaltu yannara itante baꞌino.

30 Israeelootu Iyyaarkote huxxa lamala barra doyituhu gedensaanni huxxu uwinohu ammanatenniiti. 31 Foora mancho* Reaabi hajajantannokkiri ledo baꞌukkinni gattinohu ammanatenniiti; korkaatuno ise qotaano hagiirrunni* haadhino.

32 Kawiinni sae hige mayyeemmo? Geediyooni, Samsooni, Yoftahe, Daawiti hattono Saamueelinna wole masaalaano daafira odeesseemmokki gede yanna ajjinoe. 33 Insa ammanatenni mootoolla qeeltino; keeraanchimma abbitino; hexxote qaale adhitino; doobbiyu afoo cuffino; 34 giirate wolqa huntino; bisete qarinni gatte saꞌino; wolqiweeltinori jawaattino; olaho wolqaataamma ikkitino; horritanno olantono shorritino. 35 Meentu shiiꞌrinore reyotenni kaeenna adhino; wolu labballi kayinni wodotenni wolassinansara hasidhinokki daafira lowo geeshsha shetinsoonninsa; tenne gibbinohu woyyitino kao afiꞌrate yiteeti. 36 Ee, woloota qacifantoonninsa, halangetenni gannoonninsa, hakkiino saꞌne amande usuru minira eessinoonninsa; insa konni garinni jifantino. 37 Kinnatenni awwalloonninsa, jifantino, magaazetenni lamewa darroonninsa, bisetenni gorrinoonninsa, geꞌreewu landenna meu lande uddidhe raataabbino; buxxe, qarrantenna gadadante heedhino; 38 alame insa gedee mannira maltinota diꞌꞌikkitino. Insa halalla, ilaallate, goddatenna uullate aana noo ballara raataabbino.

39 Ikkollana kuri baalunku ammanansanni kainohunni danchare farciꞌnoonninsaha ikkirono, hexxote qaali woꞌmanna dilaꞌino; 40 insa ninkeweelo guuta ikka dandiitannokki daafira, Maganu balaxe ninkera woyyinore hedino.

12 Konnira togoohu jawu farciꞌraasinete gomichi gaangeesse noonke daafira, ninkeno duha ikkannore baalanna rahe xaxxawe amadannonke cubbo aaninkenni tunge hunno; albankeenni noo qolchanshorano cincatenni kaajjine dondo; 2 dondeemmohuno ammanankera Qara Riqiwaanchonna Guutisaancho ikkinoha Yesuusa hixamanyine laꞌnanniiti. Isi albasiinni noo hagiirrira yee shollinye mitturirano kiirikkinni, qarru haqqi* aana reyate geeshsha cince kaajjino; qoleno Maganu zuufaanera qiniitenni ofollino. 3 Konni daafira, daafurtinannikki gedenna hexxo mudhitinannikki gede,* cubbaataammu umonsa gawajjannoha busha qaale coyidhanna cincatenni kaajje sainoha iso seekkitine hedde.

4 Kiꞌne konni cubbi ledo sharrantinanni heedhinoonni sharrora, xaara mundeeꞌne duꞌnanta geeshsha disharrantinoonni. 5 Qoleno ooso ikkitinoonni daafira amaalloonniꞌneta togo yitanno amaale coꞌonta habbinoonni: “Beettoꞌya, Yihowa* seejjannohe seejjo mishshooti; biddi assannohe woyiteno hexxo mudhitooti; 6 korkaatuno Yihowa* baxannore seejjanno; isinni beettosi asse adhannoha baala qorichishanno.”*

7 Seejjinanniꞌneti* mitte doogo tenne ikkitino daafira, qarru iillannoꞌne woyite cincatenni kaajja hasiissannoꞌne. Maganu oososi gede asse amadinoꞌne. Hige annu seejjannokki beetti nooni? 8 Ikkollana kiꞌne baalunku tenne seejjo adhitinannikkiha ikkiro, baanaho ikkinnina ooso diꞌꞌikkitinoonni. 9 Hakkiinni saeno iltinonke annuwa* seejjitinonke; ninkeno ayirrinsoommonsa. Hatto ikkina, ayyaanaame heeshsho Annanke ikkinohura roorsine uminke fajjonni maahoyye yine galle heeshshotenni heeꞌra dihasiissannonke? 10 Insa dancha lawinonsa garinni shiima yanna geeshsha seejjitinonke; isi kayinni qullaambesi gutammeemmo gede, ninkera seekkankera yee seejjannonke. 11 Hige aye seejjono umi qara hagiirsiissannota dilabbanno; hatteentenni xissiissanno;* gedensoonni kayinni seejjotenni qajeelino mannira keeraanchimmanniha keeru guma laaltannonsa.

12 Konni daafira, shaqqitino anganna daafurtino gulubba jawaachishshe; 13 miicamme hurtanno gede ikkinnina mikitatewiinni fulte leqe yitannokki gede, woꞌmanka woyite lekkaꞌnera doogo suwashsho assidhe. 14 Mannu baalu ledo keere heeꞌrate sharramme; qoleno qullaambe hasidhe; qullaambe nookkiha aye manchino Mooticha laꞌꞌa didandaanno. 15 Ayino Maganu elto hoogannokki gede hattono hadho afiꞌrino rumushshi ciire qarra qalannokki gedenna lowo manna daafannokki gede qorophe; 16 mereeroꞌne fooranno manchino* ikko mittu woyiti sagalera yee bayirreenyu qoossosi sayise uyihu Eesawu gede, qullaawa coye naadannokki manchi heeꞌrannokki gede qorophe. 17 Korkaatuno, gedensoonni Eesawu maasso ragiꞌrara hasiꞌri woyite gimboonnisita affinoonni; annisi hedo soorrate wiꞌlanni lowo geeshsha sharraminoha ikkirono diqiniinosi.

18 Kiꞌne shiqqinoonnihu laꞌꞌanna kisa dandiinannihu buwanni noo ilaaliwa, kolishshu gomichiwa, xiꞌmo tunsichiwa, hambabalattenniwa, 19 xurumbu luuliwanna qaale coyidhanni noo huurowa diꞌꞌikkino; mannu tenne huuro macciishshiti wolere lende coyiꞌnanninsakki gede huucciꞌrino. 20 Korkaatuno, “Saada nafa ilaala kissuro, kinnatenni ganne shinona” yitanno hajajo waajjishshinonsa. 21 Qoleno hakko leellino coyi lowo geeshsha waajjishannoha ikkino daafira Muse, “Ani waajjoommo; huxiꞌroommo” yiino. 22 Kiꞌne kayinni shiqqinoonnihu Tsiyooni ilaaliwa, heeshshote Magani katama ikkitinote gordu Yerusaalamewa, tunsote tunso sokkaasine 23 mitteenni gamba yitinowa, gordoho borreessantinori bayirraaddu songowa, baalunkura yoo yaanno Maganiwa, guuta assinoonni keeraanotewa ayyaanaame heeshshowa, 24 haaru gondoorira mereerima ikkinohu Yesuusiwanna Aabeeli mundeenni roore woyyino garinni coyidhannote winxoonni mundeewaati.

25 Coyiꞌranni nooha iso macciishsha gibbinannikki gede qorophe. Uullate aana Maganu qorophishsha aanni noonsaha macciishsha gibbinori qorichunni gattinokkiha ikkiro, ninke gordoho heeꞌre coyiꞌrannoha iso macciishsha gimbe badhe wodhinummoro, qorichunni hiitto ikkine gata dandiineemmo? 26 Hatte yannara huurosi baatto shaffino; xa kayinni, “baatto calla ikkikkinni gordono galagale shafeemmo” yee qaale eino. 27 “Galagale” yitanno yaatto, shafamannokki coyi kaajje heeꞌranno gede, shafamannori yaano Maganu kalaqinokkiri baꞌꞌannoha ikkinota leellishshanno. 28 Hakko daafira, ninke shafamara dandaannokki Gashshoote adhineemmota anfoommohura, eltosi adha agurroonke; hakkuno eltosi widoonni Magano waajjatenninna lowo geeshsha ayirrisatenni, iso hagiirsiisanno garinni Maganoho qullaawa soqqansho soqqama dandiineemmo gedeeti. 29 Korkaatuno Maganinke ittanno giiraati.

13 Rodiimmate baxillinni baxama agurtinoonte. 2 Wosina adha* habbinoonte; korkaatuno mitootu hatto assitanni affukkinni sokkaasine wosinsidhino. 3 Usuru mine noore kiꞌneno ledonsa usurantine heedhinoonnihu gede assitine heddine, woꞌmanka woyite qaaggensa; kiꞌneno maalunni heedhinoonni daafira* beebba assiꞌnanni heeꞌnoonninsare deꞌinoonte. 4 Mannu baalunku adhanna adhama ayirriso; adhantinori maꞌnano battaabbinokkita ikkito; korkaatuno Maganu foorannonna* soorranno manni aana yoo yaanno. 5 Heeshshoꞌne woxu baxilli nookkita ikkito; nooꞌnerinni kassi yitine heedhe. Korkaatuno isi, “Horonta diagureemmohe; horonta ditugeemmohe” yiino. 6 Hakko daafira woꞌma giddonni, “Yihowa* kaaꞌlaanchoꞌyaati; diwaajjeemmo. Mannu ma assaera dandaanno?” yineemmo.

7 Maganu qaale kultinoꞌnere mereeroꞌne albisa ikkite soqqantannore hedde; amanyootinsa abbinoha dancha guma seekkitine heddine ammanatenni insa faale hadhe.

8 Yesuusi Kiristoosi berono, techono, hegererano isoontilla.

9 Addi addihu wosinchu rosinni dogantinoonte; korkaatuno wodaninke sagaletenni* ikkikkinni Maganu eltonni kaajjiro danchaho; tennera quwa saꞌinori afidhino horo dino.

10 Ninkera, dunkaanu giddo qullaawa soqqansho soqqantannori aanisinni adhite ita dandiitannokkihu kakkalote dargi noonke. 11 Korkaatuno kakkalaanote biili saadate mundee cubbu kakkalo asse qullaawa darga haaꞌre eessanno; maala kayinni qachu gobbaanni giirranni. 12 Hakko daafira, Yesuusino mundeesinni manna qullaawa assara yee katamu waalchi gobbaanni qarra adhino. 13 Konnira ninkeno isi duqqino shollinye duqqine qachu gobbaanni isiwa marro; 14 korkaatuno kowiicho geedote katami dinonke; hatteentenni albillitte daanno katama quqquxamme agadhine heeꞌnoommo. 15 Hakko daafira, Yesuusi widoonni woꞌmanka woyite Maganoho guweenyu kakkalo shiqishiꞌno; tini kakkalo suꞌmasi faajjete dudumbe shiqishiꞌneemmote suumenke gumaati. 16 Qoleno dancha coye assanna nooꞌnere wolootaho beeha habbinoonte; korkaatuno Maganu togoo kakkalonni lowo geeshsha hagiidhanno.

17 Woꞌmanka woyite agartannoꞌne daafiranna* tennera xaꞌmantannohura, mereeroꞌne albisa ikkite soqqantanni noorira hajajamme hattono maahoyye yitine galle; hatto ikkiro, insa loosonsa hagiidhitanni loossanno; hakkuyi kaꞌa dadillitanni loossanno; tini qolte kiꞌne gawajjitannoꞌne.

18 Ninkera huuccatto assa agurtinoonte; korkaatuno ammanamino* tiiꞌꞌi noonketa dihuluullammeemmo; qoleno baalunku coyira ammanammoommore ikkine heeꞌra hasiꞌneemmo. 19 Roorenkanni galagale mulenni kiꞌnewa dayemmo gede huuccatto assitinaera kuꞌleemmoꞌne.

20 Bayiru geꞌreewu allaalaanchi Mootichinke Yesuusi, hegere gondoori mundee haaꞌre reyotenni kaꞌꞌanno gede assinohu keeru Magani, 21 fajjosi assitinanni gede dancha coye baala qodhisiisoꞌne; isi albasiinni hagiirsiisannore assineemmo gede Yesuusi Kiristoosi widoonni kakkayisannonke; hegere hegerera isira ayirrinyu ikkosi. Hamiiꞌni.

22 Roduuwa, tini borreessoommoꞌne sokka harancho ikkitino daafira, konne jawaachishanno qaale cincitine macciishshitanni gede amaaleemmoꞌne. 23 Rodiinke Ximootewoosi tidhaminota affinara hasiꞌreemmo; isi rahe dayiro ledo dange laꞌneemmoꞌne.

24 Mereeroꞌne albisa ikkite soqqantanni noorira baalahonna wolu qullaawooti baalunkura keere iillishsheꞌꞌe. Ixaaliyaho heedhannori keere sokkinoꞌne.

25 Maganu elto kiꞌne baalunku ledo ikkito.