TITO SOKKA

1 Maganu borojjichinna Yesuusi Kiristoosi soqqamaasinchi Phaawuloosi soyino sokka. Soqqanshosi Maganu doodhinori ammana ledonna halaalunnite gara ikkitino egenno ledo sumuu yitannote; kuni halaali Maganoho galate ledo xaadooshshe afiꞌrinoho; 2 qoleno hegere heeshsho hexxo aana xintaminoho; tini hexxo kaphara dandaannokki Magani lowo dirira albaanni uyinote; 3 ikkollana Gatisaanchinke Maganu hajajo garinni, eeggo uyinoonniehu sabbakate loosi widoonni isi umisi yiino yannara qaalesi anfanni gede assino; 4 ammanate mittimmankenni halaalaancho beettoꞌya ikkoottohura Titora:

Maganu Annunna Gatisaanchinke Kiristoosi Yesuusi eltonna keeri atera ikko.

5 Ate Qerxeesi agure haꞌroommohu bushinore* biddi assatto gedeetinna ani hajajummohe garinni katammate cimeeyye shoomatto gedeeti. 6 Tenne assino yine minshannire afiꞌrinokkihu, mitte galtehu, hattono mancaꞌꞌanna* finqila ikkitinokkiri ammantino ooso noosiha aye manchono cimeessa assite shoomi. 7 Korkaatuno aliidi laꞌꞌaanchi Maganu looso eeggo uyinoonnisiha ikkino daafira, minshanniri nookkiha ikka hasiissannosi. Qoleno booꞌnannoha,* hanqoho muddamannoha, dimbaancho, manna gawajjannohanna* doogimale qiniite afiꞌrate hagaagannoha ikka dihasiissannosi. 8 Hatteentenni wosina adhannoha, dancha coye baxannoha, fayyo hedo noosiha,* keeraancho, ammanaminohanna isonooto qeeꞌlinoha ikka hasiissannosi. 9 Halaalaanchu* rosinni jawaachishanna* konne roso gibbannore seejja dandaanno gede, rosiisate ogimmasi horoonsiꞌranno woyite ammanamino qaale* seekke haꞌrunsannoha ikka hasiissannosi.

10 Korkaatuno hajajantannokkiri, haafa coye totaꞌannori, soꞌrisiisaano, hakko iso barcima hasiissannote yitannori batidhino. 11 Insa doogimale qiniite afiꞌrate yite rosiisa hasiissannonsakkire rosiissanni maate woꞌmate ammana huntanni noo daafira, beeshshidhanno gede assa hasiissanno. 12 Mittu gobbansa masaalaanchi, “Qerxeesi manni woꞌmanka woyite kaphaasinete, badda moyichi gedeereetinna loosiweeloota kokkaammaati” yiino.

13 Tini yaatto halaaleho. Konnira, insa seekkite seejjilla; tinino, ammanatenni fayyaaleeyye ikkitanno gede, 14 hattono Ayihudootu maattonna halaaluwiinni xeertidhinori hajajjannore macciishshitannokki gede assitannonsa. 15 Coꞌichu mannira baalunku coyi coꞌichaho; battaabbinoriranna ammana noonsakkirira kayinni coꞌichuri dino; korkaatuno surrensanna tiiꞌꞌinsa battaawinoho. 16 Magano anfoommo yite faajjete coyidhanno; loosinsanni kayinni iso kaaddanno; korkaatuno insa tiyyiꞌnannireetinna hajajantannokkireeti; hattono mittu danchu loosirano maltinokkireeti.

2 Ati kayinni woꞌmanka woyite halaalaanchu* rosi ledo sumuu yaannore coyiꞌri. 2 Geerru labballi deerra saꞌannokkire, miqichaamma,* fayyo hedo noonsare, hattono ammanatenni, baxillunninna cincatenni fayyuulle ikkitona. 3 Geerru meentino qullaawootaho malino amanyooti noonsare, suꞌma hunannokkire, woyinete quwa saꞌꞌannokkirenna danchare rosiisannore ikkona; 4 hatto ikkiro aja meento amaale,* minaannuwansa baxannore, oosonsa baxannore, 5 fayyo hedo noonsare, xalaloota, mini giddo loosannore,* danchuullenna minaannuwinsara maahoyye yee galannore ikkanno gede kaaꞌla dandaanno; tini qolte Maganu qaali xonamannokki gede assitanno.

6 Wedellu labballino, fayyo hedo noonsare ikkitanno gede amaali; 7 dancha looso loosatenni baalunku coyinni lawishsha ikki. Xalala coye haja assite rosiisi.* 8 Gibbannonkeri ninke daafira haadhe coyidhannoha busha coye hoogge saaltanno gede, minshanniri nookki garinni danchare* coyidhe rosiisi. 9 Borojjootu baalunku coyinni mootoollansara maahoyye yite galtona; qoleno insa hagiirsiisate sharrantona; mootoollansara tumo qoltoonke, 10 hattono insare moortoonke; hatteentenni Gatisaanchinke Maganu roso woꞌmante doogonni gaamaarsa dandiitanno gede, woꞌmunni woꞌma ammaꞌninannire ikkitona.

11 Maganu elto xabbe leeltino; tini elto, duuchunku gari manni gato afiꞌranno gede assitanno. 12 Qoleno, Maganiweelo heeshshonna alamete yorto agurre, tenne alame aana* fayyo hedonni, keeraanchimmatenninna Maganoho galatenni heeꞌneemmo gede qajeelsitannonke. 13 Konni garinni, hagiirsiissanno hexxo hattono bayiru Maganinna Gatisaanchinke Yesuusi Kiristoosi ayirrinyunni xabbanno yanna agadhineemmo. 14 Kiristoosi seeriweelu coyi baalunkuwiinni keere fushshankeranna* danchu loosira laalaatannoha baxxino jajjasi ikkino manna isiniitira keereensiꞌrara heeshshosi ninkera sayise uyino.

15 Konne coye woꞌma silxaanenni rosiisa, seekkite amaalanna* seejja agurtooti. Mittu manchino horo mishoonkehe.

3 Gashshootehonna roorrootaho maahoyye yite galtanno gedenna hajajantanno gede, hattono danchu loosi baalaho qixxaabbinore ikkitanno gede qaagiissa agurtooti. 2 Qoleno mittu manchi daafirano bushare coyidhannokki gede, giwantannokki gede, hatteentenni quwa saꞌannokkirenna* manna baalaho woꞌmunni woꞌma jooguulle ikkitanno gede qaagiissinsa. 3 Bashsho ninkeno wodancha noonkekkireeti, hajajammeemmokkireeti, dogammeemmoreeti, addi addi yortoranna maalu hagiirrira borojje ikkinoommoreeti, bunshenna hinaaso roso assiꞌnoommoreeti, tiyyiꞌnanninkereetinna mimmito gimbeemmoreeti.

4 Ikkollana, Gatisaanchinke Maganu shaqqillinna mannu oosora noosi baxilli xawi yannara, 5 (ninke loonsoommohu keeraanchimmate loosinni ikkikkinni isi maaronni) hayishshe heeshshonnire asse hattono qullaawu ayyaaninni haaroonse gatisinonke. 6 Isi, Gatisaanchinke Yesuusi Kiristoosi widoonni konne ayyaana atootise* duninonke. 7 Hatto assinohu, eltosinni keeraanote yininkehu gedensaanni hexxonke ledo sumuu yaanno garinni hegere heeshsho ragiꞌneemmo gedeeti.

8 Kuni qaali ammannanniho; qoleno, Magano ammantinori woꞌmanka woyite dancha looso illachishshanno gede, konne coye higge higge kaajjishshe kulattora hasiꞌreemmo. Kuni coyi danchahonna manna kaaꞌlannoho.

9 Gowwimmate heewo, ilama kiira, yekkeeramanna Seeru daafira giwama kayinni effidhe giwi; korkaatuno togoo coyi kaaꞌlannori dino; gumano diafiꞌrinoho. 10 Kaphu roso halashshanno mancho mitte lame higge seekkite seejji;* macciishsha giwiro kayinni isiwiinni xeertiꞌri; 11 togoo manchi halaalu doogonni fulinotanna cubbo loosanni noota, hattono umisi aana yoo yiiꞌrinota afi.

12 Arxemaasi woy Tikiqoosi atewa soyemmo woyite, ikkittota ikkite ani noommowa Niqopoliisi daate woꞌnaali; hawado hakko sayisate hedoommona. 13 Seeru egennaami Zeenaasinna Aphiloosi doogo hadhanno woyite, mitturino xeannonsakki gede dandiittore baala assi. 14 Ikkollana, ninke mannino quuxxo dagganno woyite kaaꞌla dandaanno gedenna gumiweele gatannokki gede, dancha looso diinaggaawe loosa rosona.

15 Ledoꞌya noori baalu keere sokkinohe. Baxxannonkeri ammanate roduuwinkera keere iillishie.

Maganu elto kiꞌne baalunku ledo ikkito.