LAYINKI XIMOOTEWOOSI SOKKA

1 Kiristoosi Yesuusi widoonni afiꞌnanni heeshsho daafira eꞌnoonni qaali ledo sumuu yaanno garinni, Maganu fajjonni Kiristoosi Yesuusi soqqamaasincho ikkoommohu ani Phaawuloosi, 2 baxamino beettiꞌya Ximootewoosira:

Maganu Annunna Mootichinke Kiristoosi Yesuusi elto, maaronna keeri ate ledo ikko.

3 Albi annuwaꞌya assitunte gede keeraanchu tiiꞌꞌinni qullaawa soqqansho soqqameemmosi Magano galaxxeemmo; qoleno hashsha barra eeggifate huucciꞌreemmo woyite, ate woꞌmante yannara qaageemmo. 4 Hindiiddokki qaageemmo woyite wodaniꞌyara hagiirru woꞌmanno gede ate laꞌꞌammora quqquxameemmo. 5 Lawisiisa nookki ammanakki qaageemmo; tini ammana umo ahaahekki Loyidiranna amakki Ewunqera noote; ikkollana hatti ammana aterano nooheta dihuluullameemmo.

6 Konnira anga aanakki worummohe yannara adhoottota giddokki noota Maganu elto giirate gede qitiichishiꞌrattora qaagiisseemmohe. 7 Korkaatuno, Maganu wolqate, baxillunna wodanchate* ayyaana ikkinnina waajjillu ayyaana diuyinonke. 8 Mootichinke daafira farciꞌra saaltooti; isi daafira yee usuranya ikkoommoha aneno fokkitooti; hatteentenni Maganu wolqa addaxxite atino danchu duduwi daafira qarra adhate qixxaawi. 9 Isi ninke loosinni ikkikkinni hedosinninna eltosinni gatisinonke; qoleno qullaawa woshshatto woshshinonke. Isi tenne elto lowo diri albaanni Kiristoosi Yesuusi widoonni uyinonke; 10 xa kayinni Gatisaanchinke Kiristoosi Yesuusi xawanni tini elto xabbe leeltino; isi reyo hune danchu duduwi widoonni heeshshotenna sholannokki bisi daafira xawaabba xawisino; 11 ani sawaakicha, soqqamaasinchonna rosiisaancho ikke shoomamoommohu konni danchu duduwiraati.

12 Konne qarra adhanni noommohuno iseraati; ikkirono disaaleemmo. Korkaatuno ammanoommoha iso egennoommo; isira hadara wodhoommore yoote barri geeshsha agara dandaannotano addaxxeemmo. 13 Anewiinni macciishshoottoha halaalaanchu* rosi xinta,* Kiristoosi Yesuusi ledo noohe mittimmanni afiꞌrootto ammananna baxilli ledo seekkite cuꞌmiꞌri. 14 Konne dancha hadara giddonke noohu qullaawu ayyaaninni agadhi.

15 Iisiyu qoqqowira noori baalu agurte hadhinoeta afootto; agurte hadhueri giddo Figeloosinna Hermogeneesi no. 16 Mootichu, Onesforoosi mini mannira maaro oonsa; korkaatuno isi duucha hige jawaachishinoe; usuramoommo sansalatenni kainohunnino disaalino. 17 Isinni Roomaho noo yannara hase goofe afinoe. 18 Mootichu Yihowa* yoote barra maaro oosi. Qoleno isi Efessooni soqqamino soqqansho seekkite afootto.

2 Hakko daafira beettoꞌya, Kiristoosi Yesuusi widoonni afiꞌnanni eltonni jawaati;* 2 anewiinni macciishshoottohanna batinyu manni farciꞌrinoha konne coye ammanamino mannira eeggo uyi; insano woloota rosiisate ikkadda ikkitanno. 3 Dancha Kiristoosi Yesuusi olamaancho ikkootto daafira, atino qarra adhate qixxaawi. 4 Olamaancho ikke soqqamannohu aye manchino olaho doorinosi mancho hagiirsiisa hasiꞌranno daafira, daddalu loosinni* disakaalamanno. 5 Qolchamannohu* aye manchino qolchanshote wodho agadhe qolchama hoogiro qeellete baꞌlatto diadhanno. 6 Baatto daafure loosiꞌranno manchi laalcho balaxe qamasa hasiissannosi. 7 Coyiꞌreemmo coye woꞌmanka woyite illachishi; Mootichuno baalunku coyira wodancha* aannohe.

8 Yesuusi Kiristoosi reyotenni kainotanna Daawiti sircho* ikkinota qaagi; ani sabbakeemmohu danchu duduwi konneeti; 9 hakko daafira jaddo loosinohu gede qarramanni noommo; qoleno usuramoommo. Ikkollana Maganu qaali diusuramino. 10 Konninni kainohunni doorantinorira yee baalanka coye cince heeꞌranni noommo; hatto asseemmohu insano Kiristoosi Yesuusi widoonni afiꞌnanni gato hegere ayirrinyi ledo afidhanno gedeeti. 11 Kuni qaali ammaꞌninanniho: Isi ledo reyinummoro, isi ledo heeꞌneemmoti dihuluullissannote; 12 kaajjine heeꞌnummoro, ledosi mootoolla ikkineno gashshineemmo; kaandummosiro isino kaadannonke; 13 ninke ammanama hoongummorono, isi woꞌmanka woyite ammaname heeꞌranno; korkaatuno isi umosi kaada didandaanno.

14 Qaallate daafira giwantannokki gede, Maganu albaanni rosiissanni* konne coye woꞌmanka woyite qaagiissinsa; togoo coyi macciishshanno manna gawajjannota* agurranna kaaꞌlannori dino. 15 Halaalu qaale garunni horoonsidhe, Magano hagiirsiisattohanna mitturino saalsiisannori nookki loosaasincho assite ateneeto Maganu albaanni shiqishate dandiittore baala assi. 16 Qullaawu coyi ledo sumuu yaannokkihu haafu hasaawiwiinni kayinni xeertiꞌri; korkaatuno togoo coyi mannu roore Magano waajjannokkiha ikkanni haꞌranno gede assanno; 17 togoo manni coyiꞌranno coyi, hurtannokki mada gede* halaꞌlanno. Insa giddonni mitu Hemenewoosinna Filixoosiiti. 18 Kuni manni ‘Kao biꞌrenni ikkite saꞌino’ yee coyiꞌranni halaaluwiinni xeertiꞌrino; qoleno insa mitu manni ammana diigganni no. 19 Ikkollana, “Yihowa* isire ikkitinore afino” qoleno, “Yihowa* suꞌma woshshannohu baalu bunshetewiinni xooqo” yaanno sumudi nooseti kaajjado Maganu safo sigiigge heedhanno.

20 Lowo mini giddo culkunna birru uduunni calla ikkikkinni haqqunna doru uduunnino heeꞌranno; kuri giddo mito ayirrado hajara, mito qole ayirrado ikkitinokki hajara horoonsiꞌnanni. 21 Konni daafira, aye manchino kuri gedensiidi coyibbawiinni xeertiꞌriro, ayirradu coyira horoonsiꞌnanniha, qullaawa, annisira kaaꞌlannohanna danchu loosi baalaho qixxaawino uduunnicho ikkanno. 22 Wedellimmate yortowiinni xooqi; hatteentenni, xalalu wodaninni Mooticha woshshitannori ledo keeraanchimma, ammana, baxillenna keere haꞌrunsi.

23 Qoleno gibbo kayissara dandiitannota affe, gowwimmatenna afibbeellete heewo giwi. 24 Korkaatuno, Mootichu borojjichi giwama dihasiissannosi; hatteentenni manna baalaho jooga,* rosiisate ikkadonna miincannisi woyite isonooto eemadhannoha, 25 hattono suwashsho hedo noonsakkire shaqqillunni seejjannoha ikka hasiissannosi. Miteekke Maganu, halaalunnita gara ikkitino egenno afidhanno gede maaro eꞌara* fajjansara dandaanno; 26 insano Daawuloosi fajjosi assitanno gede lubbote heedheenna woshshaadinonsata huwatte, wodaninsa raga higeenna woshshaadosi giddonni fultara dandiitanno.

3 Ikkollana, goofimarchu barruwara dandee heeꞌrate qarrisannohu baxxino diri daannota afi. 2 Korkaatuno mannu umosi baxannoha, woxe baxannoha, naaxxaleessa, booꞌnaleessa, xonamannoha, annahonna amate hajajamannokkiha, galatiweelo, ammanaminokkiha, 3 kalaqamu baxilli nookkiha, sumuu yaa giwannoha, suꞌma hunannoha, umosi qeeꞌlinokkiha, kaajjado, danchare baxannokkiha, 4 kaadaasincho, yiinota cuꞌmiꞌre giwannoha, booꞌnatenni ufuufaminoha, Magano baxantenni maalu hagiirre baxannoha ikkanno; 5 Maganoho galtinore labbanno; loosinsanni kayinni wolqasi kaaddanno;* togoo manniwiinni xooqi. 6 Minunni mine sure eanno manni kaꞌꞌannohu insa giddonniiti; kuni manni addi addi yorto haꞌrunsannoha cubbu batinyinni laafino meento qafadanno; 7 togoo meenti woꞌmanka woyite rosanno; ikkollana gara ikkitinota halaalu egenno horonta huwata didandaanno.

8 Iyyaaneesinna Iyyaanibereesi Muse hettissunte gede, kurino halaale hettissannoreeti. Togoo mannira surrensa woꞌmunni woꞌma daafantinotano agurranna, ammanatenni millissannokki daafira Maganu albaanni ayirrinye hooggino. 9 Ikkollana, kuri lamunku manni gowwimma manna baalaho xawoho reqecci yite leeltunte gede, konni manni gowwimmano xawo fultanno daafira kawiinni saꞌe assite affannori dino. 10 Ati kayinni rosoꞌya, heeꞌreemmo gara, mixoꞌya, ammanaꞌya, cincaꞌya, baxilleꞌyanna kaajje uurraꞌya seekkite haꞌrunsootto; 11 Antsookiyaho, Iqooniyooninna Lisxiraho iillinoe dartenna qarra afootto. Konne baala darte cince saoommo; Mootichuno konni baalunkunni gatisinoe. 12 Hige Kiristoosi Yesuusi rosaano ikkite Maganoho gala hasidhannorira baalaho dartu iillannonsa. 13 Ikkollana, bushu manninna lawisiisaano soꞌrisiissanninna sodhanni bunshete aana bunshe leddanni hadhanno.

14 Ati kayinni, rosoottonna ammante adhootto coyinni kaajjite heeꞌri; korkaatuno kuri coyibba ayeoowiinni rosoottoro afootto; 15 qoleno, Kiristoosi Yesuusi ammante gato afiꞌratto gede assitannohe hayyo heedhannohe gede kaaꞌlitannoheta qullaawa borro muꞌru heedhenni afootto. 16 Qullaawa Borro baala Maganu ayyaani massaganna borreessinoonnite; qoleno rosiisate, seejjate, coye suwisatenna* keeraanchimmatenni amaalate kaaꞌlitanno; 17 hakkuno, Maganu manchi danchu loosi baalunkura dancha gede qajeele woꞌmunni woꞌma ikkado ikkanno gedeeti.

4 Maganu albaanni hattono heeshshote nooriranna reyitinorira yoo yaannohu Kiristoosi Yesuusi albaanni duure hajajeemmohe; qoleno isi xawanna Gashshootisi widoonni hajajeemmohe: 2 Qaale sabbaki; injiitanno yannarano qarru yannarano wiinante soqqami; lowo cincanninna rosiisate hayyonni boroori, seejji hattono seekkite amaali. 3 Korkaatuno mannu halaalaancho* roso macciishsha baxannokki yanna dagganno; hatteentenni halchonsa ledo sumuu yaanno garinni maccansa kurkurtanno gede* mulensa rosiisaano gamba assidhanno. 4 Insa halaale macciishsha gibbe maccansa maattote widira qoltanno. 5 Ati kayinni baalanka coye wodanaaꞌmite hedi; qarra cincite kaajji; wongeellaawichu looso loosi;* hattono soqqanshokki baala guuti.*

6 Ani agattote kakkalo gede ikke duꞌnamanni noommo; qoleno keere fuleemmo yanna gambissino. 7 Dancha gaaro gaaramoommo; qolchanshoꞌya gumuloommo; ammanaꞌya agadhoommo. 8 Xaate keeraanchimmate baꞌlatto qixxaabbe nooe; keeraancho daanya ikkinohu Mootichu yoote barra tenne baꞌlatto baꞌraarshu gede asse aannoe; ikkollana aannohu anera calla ikkikkinni isi xawa baxxannorira baalahooti.

9 Anewa rakke daate dandiittore baala assi. 10 Korkaatuno, Deemaasi tenne alame* baxe ane agure Teselonqe haꞌrino; Qerqiisi Galaatiya, Tito kayinni Dilmaaxiya haꞌrino. 11 Ane ledo noohu Luqaasi callaati. Maarqoosi soqqanshote kaaꞌlannoe daafira ledokki haadhe amo. 12 Tikiqoosi kayinni Efessooni soommo. 13 Daatto woyite Xiroaasi, Karphoosiwa agure dayommo kaabbanna* maxaafu xaaxo roorenkanni biraanna* haadhe amoe.

14 Iskindiri yinannihu camote siwiila daashshannohu lowo geeshsha gawajjinoe. Isira Yihowa* loosisita aannosi. 15 Isi sokkanke lowo geeshsha giwanno daafira, atino iso qorophi.

16 Umo gargarooshshe shiqishiꞌrummo yannara baalunku hunte hadhinoe ikkinnina kaaꞌlinoehu mittuno dino; tennera Maganu gatona yoonsa. 17 Ikkollana sabbakate loosi woꞌmunni woꞌma ane widoonni gumulamanno gedenna daga baala macciishshitanno gede, Mootichu muleꞌya uurre wolqa uyinoe; doobbiichu afiinnino gatoommo. 18 Mootichu bushu loosi baaluwiinni gatisannoe; gatiseno iimi Gashshootisiwa iillishannoe. Hegere hegerera isira ayirrinyu ikkosi. Hamiiꞌni.

19 Phirisqillaranna Aqiilara hattono Onesforoosi mini mannira keere iillishie.

20 Erisxoosi Qorontoosi gatino; Xiroofimoosi kayinni dhiwameenna Milixiini aguroommo. 21 Hawadu eikkinni daate dandiittore baala assi.

Ewubuloosi, Phudeesi, Linoosi, Qilaawudiyanna roduuwu baalu keere sokkinohe.

22 Giddokki dancha ikkitino daafira Mootichu ledokki ikko. Eltosino kiꞌne ledo ikkito.