UMI XIMOOTEWOOSI SOKKA

1 Gatisaanchinke Maganunna hexxonke ikkinohu Mootichinke Kiristoosi Yesuusi hajajonni, Kiristoosi Yesuusi soqqamaasincho ikkoommohu ani Phaawuloosi, 2 ammanatenni halaalaancho beettoꞌya ikkinohura Ximootewoosira:*

Maganu Annunna Mootichinke Kiristoosi Yesuusi elto, maaronna keeri ate ledo ikko.

3 Meqedooniya haꞌrammora kae heeꞌre Efessooni keeshshattora eegamummohente gede, mitootu kaphu roso rosiissannokki gede hajajattora xaano hakko keeshshatto gede eegameemmohe; 4 qoleno maattonna ilama kiira illachishshannokki gede hajaji. Togoo coyi mannu buunxoonnikkire coyiꞌranno gede assannota agurranna kaaꞌlannori dino; togoo coyi, Maganu ammana kaajjishate aanno coyi ledo horonta xaadooshshe diafiꞌrino. 5 Tenne hajajo* oommohu xalalu wodaninni, danchu tiiꞌꞌinninna lawisiisa nookki ammananni afiꞌnanni baxilli heeꞌrannonke gedeeti. 6 Mitu manni konni coyiwiinni baxxe gumiweelu hasaawira higino. 7 Insa seeru rosiisaano ikka hasidhanno; ikkollana coyidhanno coye woy waajjitukkinni rosiissannore dihuwattanno.

8 Mittu manchi garunni loosu aana hosiisiro, Seeru dancha ikkinota anfoommo; 9 qoleno seera uyinoonnihu keeraanchu manchira ikkikkinni, seeriweelunna finqilu mannira, Magano waajjitannokkiriranna cubbaataammaho, ammanantinokkiriranna* qullaawa coye mishshannorira, annuwansanna amuuwansa shitannorira woy lubbo shitannorira ikkinota wodancha hasiissanno; 10 qoleno foortannorira,* labbaahu ledo foortanno labballira,* manna fugge adhite hadhannorira, kaphaasinete, kaphunni xaartannoriranna halaalaancho* roso giwanno coyi baalahooti; 11 kuni rosi dayinohu hagiirraamu Maganihu ayirradu danchu duduwiwiinniiti; isi konne dancha duduwo anera eeggo uyinoe.

12 Soqqanshosira doore ammanamoommoha asse kiirinoe daafira, wolqa uyinoeha Mootichanke Kiristoosi Yesuusi galaxxeemmosi; 13 alba Magano xoneemmoha, mannasi buuto qarriseemmohanna booꞌnaleessa ikkummorono isi tenne assinoe. Qoleno alba afanna ammana hooge assoommorira maarroonnie. 14 Mootichinke elto, ammanatenninna Kiristoosi Yesuusi rosaancho ikke afiꞌroommo baxilli ledo lowo geeshsha batidhinoe. 15 “Kiristoosi Yesuusi cubbaataamma gatisara alame dayino” yaanno qaali ammaꞌninannihonna woꞌmunni woꞌma adha hasiissannoho. Cubbaataamma baala rooru cubbaataami qole aneeti. 16 Ikkollana maarroonniehu, Kiristoosi Yesuusi cubbaataammu baalunni roore cubbaataamo ikkoommaha ane lawishsha asse hegere heeshsho afiꞌrate iso addaxxitannorira cincasi baala leellishanno gedeeti.

17 Konnira hegere Mootera, baꞌꞌannokkihura, illete leellannokkihuranna isi callu Magano ikkinohura hegere hegerera ayirrinyunna guweenyu ikkosi. Hamiiꞌni.

18 Beettoꞌya Ximootewoosi, konni albaanni ate daafira kulloonni masaalo garinni tenne hajajo* eeggo eemmohe; hakkuno tenne masaalo ledo sumuu yaanno garinni dancha ola olama agurattokki gedeeti; 19 tenne assattohu ammananna dancha tiia seekkite cuꞌmidheeti; mitootu tiiansa lashshi assite agurteenna, ammanansa baaru giddo dano iilliteenna hiiqqaqqantino markaawe gede ikkite baꞌino. 20 Insa giddo mitu Hemenewoosinna Iskindiriiti; seejjante Maganoho xonote qaale coyiꞌra qorophitanno gede insa Sheexaaneho sayise oommo.

2 Konnira baalunku coyinni roorsine, duuchunku gari mannira huuccatto, eeggonna galata shiqinshanni gede amaaleemmo; 2 mootoollatenna roorroota* baalahono hatto assinanni gede amaaleemmo; hakkuno woꞌmunni woꞌma Maganoho galloommore ikkine baalankare diinaggaambe loonsanni,* gaꞌlabbi yinenna wodanaaꞌmine heeꞌneemmo gedeeti. 3 Tini Gatisaanchinke Maganu albaanni danchatenna iso hagiirsiissannote; 4 isi fajjo duuchunku gari manni gatanno gedeetinna halaalunnita gara ikkitino egenno afiꞌranno gedeeti. 5 Mittu Magani no; Maganunna mannu mereero qole mittu mereerimu no; isino mancho ikkinoho Kiristoosi Yesuusiiti; 6 isi isonooto baalunkura* taalo wodo asse uyino; murroonni yannara farciꞌnanni coyi konneeti. 7 Ani sawaakichanna soqqamaasincho hattono ammanatenna halaalu daafira dagate rosiisaancho ikke shoomamoommohu tenne farciꞌrammoraati; coyiꞌranni noommohu halaaleho ikkinnina kapho diꞌꞌikkino.

8 Hakko daafira, baalankawa heedhanno labballi hanqonna heewo agurte woꞌmanka woyite ammanantino angansa kayisse huuccatto assitara hasiꞌreemmo. 9 Hatteente gede, meentu umo shurrubbisiꞌratenni woy culkunni woy inqunni woy lowo woxinni hirranni uduunninni ikkikkinni bikkunninna wodanchatenni,* kawajjaame* uddanonni seesona; 10 Maganoho galloommoreeti yaanno meentira malino garinni danchu loosinni biifona.

11 Meyati woꞌmunni woꞌma maahoyye yite galte sammi yite* rossona. 12 Meyati sammi yitara* ikkinnina rosiissara woy labbaahu aana roorre heedhasera difajjeemmo. 13 Korkaatuno balaxe kalaqaminohu Addaamiiti; hakkiinni Heewani kalaqantino. 14 Qoleno Addaami didogamino; lowo geeshsha dogantinotinna hajajo diigginoti meyate. 15 Ikkollana ise* wodanchatenni,* ammanatenni, baxillunninna qullaambetenni kaajjituro ooso ila bushu coyinni gatissannose.

3 Kuni qaali ammaꞌninanniho: Aliidi laꞌꞌaancho ikkate sharramanno manchi dancha looso halchanno. 2 Hakko daafira aliidi laꞌꞌaanchi minshanniri nookkiha, mitte galteha, jilba saꞌꞌannokkiha, fayyo hedo noosiha,* amanyoote afiꞌrinoha, wosina adhannoha, rosiisate dandoo noosiha, 3 dimbannokkiha, manna gawajjannokkiha,* yiinota cuꞌmiꞌre giwannokkiha,* giwamannokkiha, woxe baxannokkiha, 4 hajajantannorinna sirnyaataammu* ooso noosiha, hattono minisi manna danchu garinni gashsha dandiinoha ikka hasiissannosi; 5 (korkaatuno mittu manchi minisi manna gashshanno gara afa hoogiro, Maganu songo hiitto asse towaata dandaanno?) 6 booꞌnatenni ufuufameenna Daawuloosira yinoonni gedee yoo yinannisikki gede, haaro Kiristaancho ikkoonke. 7 Hakkiino sae mishamannokki* gedenna Daawuloosi woshshaado giddo uwannokki gede, gobbaanni noo manni danchummasi farciꞌrannoha* ikka hasiissannosi.

8 Songote soqqamaanono hattonni miqichaamma,* lame afoo coyidhannokkire,* woyine batisse aggannokkire, doogimale qiniite afiꞌrate hagaaggannokkire, 9 ammanannita qullaawa fojo xalalu tiiꞌꞌinni seekkite cuꞌmidhannore ikka hasiissannonsa.

10 Qoleno insa ikkadda ikkitinota buuxate balanxe fonqolle laꞌnona; hakkiinni minshanniri nookkire ikkitinota anfiro soqqamaano ikkite soqqantona.

11 Meentuno sirnyaataamma,* mannu suꞌma hunannokkire, jilba saꞌꞌannokkirenna baalunku coyinni ammanaminore ikka hasiissannonsa.

12 Songote soqqamaano mitte galtere, oosonsanna mininsa manna danchu garinni gashshitannore ikka hasiissannonsa. 13 Danchu garinni soqqantanno labballi suꞌnaado suꞌma afidhannotano agurranna Kiristoosi Yesuusira noonsa ammana daafira ruxxi yitukkinni coyiꞌra dandiitanno.

14 Mulenni atewa daate hedoommoha ikkirono, konne coye borreessoommohe; 15 hatto assoommohu miteekke keeshshummoro, Maganu maate yaano halaalu heelliichonna irko ikkitinote heeshshote Magani songo giddo ma garinni heeꞌra hasiissannohero afattora yeeti. 16 Addanko, tini Maganoho galanniti qullaawa fojo mitte huluullo nookkiha jawate: ‘Maalunni leellanno gede assinoonni; ayyaanunni keeraanchoho yinoonnisi; sokkaasinete leellino; isi daafira dagate mereero sabbankoonni; alamete noori ammantinosi; ayirrinyunni iimira haaꞌnoonnisi.’

4 Ikkollana ayyaanunni kulloonni qaali, gedensiidi yannara mitootu bushu ayyaaniwiinni daannoha soꞌrisiisanno coyenna* agaanintete roso illachishshe ammanatewiinni agurte fultannota xawise kulanno; 2 kuni ikkannohu ruqaꞌnino siwiilinni giirreenna bassaawino bisi gede tiiꞌꞌinsa dillaawino lawisiisaano coyidhanno kaphi widoonniiti. 3 Insa adhanna adhama hooltanno; hattono ammana noonsarinna halaale garunni huwatino manni iso galaxxe itanno gede Maganu kalaqino sagale ittinoonte yite hajajjanno. 4 Ikkollana Maganu kalaqinori baalu danchaho; galatunni adhiniro, hunnanniri mitturino dino; 5 korkaatuno Maganu qaalinninna huuccattotenni qullaawinoho.

6 Tenne amaale roduuwa amaalatenni, ammanate qaalenna seekkite haꞌrunsoottoha danchu rosi qaale seekkite sagaꞌloottoha dancha Kiristoosi Yesuusi soqqamaancho ikkatto. 7 Ikkollana geerru meenti coyiꞌranno gedeeta Maganu ayirrannokki gede assitannota kaphu xagge giwi. Hatteentenni Maganoho galate mixidhe ateneeto qajeelsi. 8 Bisu millimillo* shiima geeshshano ikkiro kaaꞌlitanno; Maganoho gala kayinni xaa heeshshorano dagganno heeshshorano hexxo uyitannota ikkitino daafira baalunku coyira kaaꞌlitanno. 9 Kuni qaali ammaꞌninannihonna woꞌmunni woꞌma adha hasiissannoho. 10 Diinaggaambe loonsanninna jawaante sharrammanni heeꞌnoommohu iseraati; korkaatuno duuchunku gari manna hakko iso ammanantinore gatisannoha heeshshote Magano hexxo assiꞌnoommo.

11 Tenne hajajo aanna insa rosiisa agurtooti. 12 Wedellicha ikkakkinni ayino mishoonkehe. Hatteentenni coyiꞌratto coyinni, amanyootunni, baxillunni, ammanatenninna coꞌichimmatenni* ammanantinorira lawishsha ikki. 13 Ani daammo geeshsha mannaho nabbawate, seekkite amaalatenna* rosiisate dandiittore baala assi. 14 Cimeeyyete bisi anga aanaho worihe woyite, masaalotenni uyinoonnihe elto lashshi assite agurtooti. 15 Lophokki manna baalaho xabbe leeltanno gede kuri coyibba hiinci; hattono woꞌmunni woꞌma kuri coyibba illachishi. 16 Ateneetiranna rosiisatto rosira woꞌmanka woyite qorophi. Kuri coyibbannino kaajji; hatto assittoro, ateneetono macciishshannohe mannano gatisatto.

5 Geerchu manchira kaajjishshe coyidhooti. Hatteentenni annu gede assite shaqqillunni amaalisi; labballo wedella roduuwu gede, 2 geerra meento amuuwu gede, aja meento roduuwikki gede assite woꞌmunni woꞌma fayyo giddonni amadi.

3 Addinta gunnoota ikkino gunnoota* towaati.* 4 Mitte gunnittera ooso woy oosote ooso nooseha ikkiro, hatti ooso balaxxe uminsa maate giddo Maganoho galanna anninsaranna amansara hattono ahaahinsara woy ahaahensara galata qola rossona; korkaatuno kuni Magano hagiirsiisanno coyeeti. 5 Addinta gunnitte ikkitinotinna mitturino noosekki mancho Magano hexxo assidhanno; hattono hashsha barra agurtukkinni eeggifatte huuccatto assidhanno. 6 Maalu hagiirrira wojji yitanno gunnitte kayinni lubbote heedhurono reyitinote. 7 Hakko daafira minshanniri noonsakkire ikkanno gede konne biddishsha* aa agurtooti. 8 Mittu manchi isire ikkitinorira hakko iso minisi mannira hasiisannore shiqishannokkiha ikkiro, ammana kaadinohonna ammana noosikki manchinni roore bushaho.

9 Kaaꞌlo hasiissannonsa gunnooti ledo borreessinanni gunnitte 60 diri alita ikka hasiissannose; qoleno alba mittu minaannira calla assidhinota ikka hasiissannose; 10 hattono ooso lossidhe, wosina adhite, qullaawootu lekka hayishshite, qarrantinore kaaꞌlitenna duuchunku gariha dancha looso diinaggaabbe loosse suꞌnaadu suꞌmi nooseta ikka hasiissannose.

11 Wole widoonni kayinni, aja gunnoota kaaꞌlo hasiissannonsa gunnooti ledo borreessinoonke; korkaatuno labbaahu ledo goxate* hasattonsa Kiristoosira soqqamate guficho ikkitannonsa woyite mine assiꞌra hasiꞌranno. 12 Qoleno umiha ammanate qaalensa* diigino daafira uminsa aana yoo abbiꞌranno. 13 Hatteeno agurranna, minunni mine doyanni loosiweeloota ikkanno; loosiweeloota calla ikkikkinni hasaawa hasiissannonsakkire hasaawanni hemaanonna manni coyira eannore ikkanno. 14 Hakko daafira aju gunnooti mine assiꞌrara, ooso ilara, minensa towaaxxaranna giwannonkehu mishanno faro afiꞌranno gede assa qorophara hasiꞌreemmo. 15 Isinni mitu gunnooti konni albaanni halaale agure Sheexaanu hoode haꞌrate higino. 16 Mitte ammantino manchora gunnootu fiixi heeꞌrisero, songote duhu batiꞌrannokki gede ise kaaꞌlitonsana. Hatto ikkiro, songo addinta gunnoota ikkinore* kaaꞌla dandiitanno.

17 Danchu garinni gashshitanno cimeeyyera, hakko iso coyiꞌratenninna rosiisatenni diinaggaabbe loossannorira erote ayirrinyi hasiisannonsa. 18 Korkaatuno qullaawu qaali, “Gide gananni noo hando afoo usurtooti” hattono “Loosanno manchira daafurisi gumi hasiisannosi” yaanno. 19 Taje ikkitannoti lame woy sase naqaashshe heedhuro ikkinnina, geercho mancho* busha assine kullihero macciishshitooti. 20 Wolootaho qorophishsha ikkanno gede,* cubbo loosa roso assidhinore mannu baalu albaanni seejji. 21 Konne biddishsha mulla kae giwanna mallaada nookkiha haꞌrunsatto gede Maganu, Kiristoosi Yesuusinna doorantino sokkaasine albaanni duure hajajeemmohe.

22 Aye manchirano muddante anga aanaho wortooti;* wolootu cubbira gutantooti; coꞌichimmakki agadhi.

23 Xaate waa aggooti;* hatteentenni godowikkiranna xaa xaa kaꞌꞌannohe dhibbira shiima woyine agi.

24 Mitu manni cubbi xawe leellanno daafira bayichonkonni yoo yinanni; wolu manni cubbi kayinni gale hose leellanno. 25 Hatteente gede, danchu loosino xawe leellanno; xawe leellinokkihuno goꞌle gata didandaanno.

6 Maganu suꞌminna Maganu rosi horonta xonamannokki gede, borojjimmate qambari giddo noori mootoollansa woꞌmunni woꞌma ayirrisa hasiissannonsata huwatto. 2 Qoleno ammantino mootoolla noonsa borojjooti, mootoollansa roduuwankeetina yite mishshoonke. Hatteentenni, dancha soqqanshonsanni qiniite afidhanni noori banxannire ammanate roduuwansa ikkitino daafira, roore diinaggaabbe soqqantonsana.

Konne coye rosiisanna tenne amaale aa agurtooti. 3 Mittu manchi baxxino roso rosiisiro hattono Mootichinke Yesuusi Kiristoosi rosiisinohu halaalaanchu* rosinna Maganoho gallanni gede kakkayisanno rosi ledo sumuu yaannokkiha ikkiro, 4 kuni manchi booꞌnatenni ufuufaminohonna mittoreno wodanchannokkiho. Qaallate daafira heewisamatenna nyerri yaate araado* amaddinosiho. Togoo coyi dhiibbe, gibbo, suꞌma hunanna* busha huluullo kakkayisanno; 5 qoleno, Maganoho gala qiniite afiꞌnanni faro gede assite heddannori, surrensa daafantinorinna halaale wodancha agurtinori, tidhinokki coyira ganyite heewisantanno gede assanno. 6 Halaale coyiꞌniro, Maganoho galanna noonkerinni kassi yaa lowo atoote abbitanno. 7 Tenne alame adhine dangoommori mitturino dino; qoleno mittoreno adhine haꞌra didandiineemmo. 8 Hakko daafira, sagalenna uddano* heedhunkero kurinni kassi yine heeꞌneemmo.

9 Dureeyye ikkate murcidhe kaꞌinori kayinni, jifamatenna woshshaadote giddo ubbanno; qoleno haafanna gawajjitannoti lowo yorto amaddannonsa; togoo yorto manna baotenna shettote giddora eessitanno.* 10 Korkaatuno woxu baxilli gawajjannohu duuchunku gari coyira rumushshoho; mitootu konni baxillinni amadante ammanate doogonni fultino; hattono insaneeto lowohu xissiisanno coyinni qassino.

11 Maganu mancho, ati kayinni konni coyiwiinni xooqi; hatteentenni keeraanchimma, Maganoho gala, ammana, baxille, cincanna shaqqille haꞌrunsi. 12 Dancha ammanate gaaro gaarami; woshshamoottotanna batinye farciꞌraasine albaanni dancha gede assite faajjete farciꞌroottota hegere heeshsho seekkite cuꞌmiꞌri.

13 Baalanka coye heeshshonniha asse woranno Maganinna Phaanxiyoosi Philaaxoosira dancha gede asse farciꞌrinohu Kiristoosi Yesuusi albaanni hajajeemmohe; 14 Mootichinke Yesuusi Kiristoosi xawa geeshsha oommohe hajajo xeꞌnenna minshe nookkiha agadhi; 15 hagiirraamunna isi callisi wolqaataamo Gashshaancho ikkinohu, murroonni yannara isonooto leellishanno. Isi gashshaasine baalate Gashshaanchootinna mootoolla baalate Mootichaati; 16 reyannokkihu iso callaati; isi gamba yaa dandiinannikki xawaabbi giddo heeꞌranno; iso lainohu woy laꞌꞌa dandaannohu mittu manchino dino. Ayirrinyunna hegere wolqa isira ikkito. Hamiiꞌni.

17 Tenne alamera* dureeyye ikkitinore, booꞌnitannokki gedenna baꞌanno jiro hexxa agurte hagiirsiisannonkere baala halashshe aannonke Magano hexxitanno gede hajaji. 18 Dancha coye assitanno gede, danchu loosinni dureeyye ikkitanno gede, shaqqaddanna noonsare wolootaho beehate qixxaabbinore ikkitanno gede amaalinsa; 19 addu heeshsho seekkite cuꞌmiꞌra dandiitanno gede, uminsara baꞌannokkita muxxe jiro duuꞌna yaano albillittete yannara dancha safo safiꞌra agurtoonke.

20 Ximootewoosi, eeggo uyinoonnihe coye seekkite agadhi; hatto assate, qullaawu coyi ledo sumuu yaannokkihu haafu hasaawiwiinninna ise iseneewa kiphi yitannote kaphunni “egennote” yinanni hedowiinni xeertiꞌri. 21 Mitootu togoo egenno leellishidhanni, ammanate doogonni fultino.

Maganu elto kiꞌne ledo ikkito.