LAYINKI TESELONQE SOKKA

1 Ani Phaawuloosi, Silwaanoosinna* Ximootewoosi, Maganu Anninkenna Mootichu Yesuusi Kiristoosi ledo mittimma nootera Teselonqe manni songora:

2 Maganu Anninkenna Mootichu Yesuusi Kiristoosi eltonna keeri kiꞌne ledo ikko.

3 Roduuwa, kiꞌne daafira woꞌmanka woyite Magano galatate kakkaꞌneemmo. Ammanaꞌne lophitanni noo daafiranna kiꞌne baalunku mimmitoho leellishshinanni baxilli lexxanni noohura hatto assanke garaho. 4 Hakko daafira, iillanni nooꞌne dartenna qarra* baala dandiitine cincitinoonnihuranna ammanaꞌne leellishshinoonnihura Maganu songuwa mereero ninke uminke kiꞌne daafira fenjeejjine coyiꞌneemmo. 5 Tini baala, Maganu yiino yoo keeraancho ikkitinota leellishshanno tajeeti; qoleno, Maganu Gashshootira ikkadda ikkitine kiirantinanni gede assitannoꞌnete; qarra adhitinanni heedhinoonnihuno konni Gashshootiraati.

6 Tenne hendiro Maganu, qarra abbitannoꞌnerira insarano qarra abbe rabbisasi keeraancho yooti. 7 Qarru iillanni nooꞌnerira kiꞌnera kayinni, Mootichu Yesuusi wolqaataame sokkaasinesi ledo iiminni xawanno woyite ninke ledo fooliishsho uyinanniꞌne; 8 xawannohuno wala yitanno giiranniiti; hatte yannara isi, Magano affinokkirenna Mootichinke Yesuusire kulannohu danchu duduwira hajajantannokkire rabbisanno. 9 Insa hegere bao qoricha adhite Mootichu albinni hoꞌlitanno; ayirrado wolqasino dilaꞌanno; 10 hatte yannara qullaawootisi ledo ayirrinye adhara daanno; ammantannosiri baaluno maalale assidhannosi; kiꞌneno ninke farciꞌnoommoꞌne coye ammanatenni adhitinoonni daafira insa ledo kiirantinanni.

11 Konninni kainohunni, Maganu woshshattosira ikkadda asse kiirannoꞌne gedenna hagiirsiisannosiha dancha coye baalanna ammanatenni loossinanni looso wolqasinni woꞌmunni woꞌma umo fushshanno gede kiꞌnera woꞌmanka woyite huuccatto assineemmo. 12 Hakkuno, Maganinkenna Mootichu Yesuusi Kiristoosi elto garinni, Mootichinke Yesuusi suꞌmi kiꞌnenni ayirranno gedeetinna kiꞌneno isi ledo nooꞌne mittimmanni ayirritinanni gedeeti.

2 Ikkollana roduuwa, Mootichinke Yesuusi Kiristoosi leellanno* yannanna ninke isi ledo heeꞌrate mitteenni gamba yaanke daafira mitto coye eegammeemmoꞌne; 2 ayyaanunni coyiꞌnoonni qaalinni woy afuunni kulloonni sokkanni woy ninkewiinni sonkoonnita labbanno sokkanni Yihowa* barri iillino yitine heddineenna, wodanchate dandooꞌne shiimurinni hembeelantannokki gedenna massinannikki gede qorophe.

3 Aye manchino aye garinnino soꞌrisiisoonkeꞌne; korkaatuno, balaxxe kaada daggukkinninna baote beetto ikkinohu seerimalu* manchi leellikkinni hakku barri didaanno. 4 Isi, ani maganoho yee lallawanni Maganunnihu qullaawu mini giddo ofollara, maganoho yine woshshinanniri woy magansiꞌnanni* coyi baalunkunni roore umosi gotti gotti assanno hettisamaanchooti. 5 Ledoꞌne noommo yannara konne coye kuloommoꞌneta diqaagginanni?

6 Umisi yannara leellanno gede, xa hoole* noosiri maatiro affinoonni. 7 Hige fojo ikkitinoti tini seeriweelle xaano loossanni no; ikkollana fojo ikkite keeshshitannohu, xa hoole noori doogotenni hoꞌla geeshsha callaati. 8 Hakkunni gedensaanni Mootichu Yesuusi afiisi ayyaaninni haaꞌre hoolannohunna isi leellanno* yanna xawo ikkitanno woyite coꞌo asse hunannohu seerimalu manchi leellanno. 9 Ikkollana seerimalu manchi leellannohu Sheexaanu loosinniti; kuni ikkannohuno, dhagge ikkanno loosinni, kaphu malaattanninna maalale baalatenni, 10 hattono duuchunku garite bunshete hayyonni soꞌrisiisatenniiti; baote widira higge hadhanni noori, gattanno gede halaalu baxilli giddonsa nookki daafira konne qoricha adhitanno. 11 Konninni kainohunni Maganu, soꞌrote wolqanni dogante kapho ammantanno gede fajjanno; 12 hatto assannohu, halaale ammana gibbe bunshetenni hagiidhitanno daafira, insa baalunku aana yoo yinanni gedeeti.

13 Ikkollana Yihowa* baxannoꞌne roduuwa, Maganu kiꞌne ayyaanisinni qullaawoota asse, hattono halaaleho nooꞌne ammananni gato afidhinanni gede uminni kayise doorinoꞌnehura, woꞌmanka woyite kiꞌne daafira Magano galatate kakkaꞌneemmo. 14 Mootichinke Yesuusi Kiristoosi ayirrinye afidhinanni gede, ninke dudumbeemmohu danchu duduwi widoonni isi tennera woshshinoꞌne. 15 Hakko daafira roduuwa kaajjitine uurre; hattono afuunni woy sokkankenni ninkewiinni rossinoonni wodho seekkitine cuꞌmidhe. 16 Qoleno, Mootichinke Yesuusi Kiristoosi umisi, hattono baxinonkehunna eltote widoonni hegere sheshonna dancha hexxo uyinonkehu Maganu Anninke, 17 wodanaꞌne sheshifachisho; hattono woꞌmanka woyite dancha coye assitinanni gedenna coyidhinanni gede kaajjishoꞌne.*

3 Jeefoteno roduuwa, kiꞌnewa ikkinte gede Yihowa* qaali rahe halaꞌlanni haꞌranno gedenna ayirranno gede ninkera huuccatto assa agurtinoonte; 2 bushunna gawajjanno manniwiinni ganteemmo gedeno huuccenke; korkaatuno, ammana baalunku mannira heeꞌrannore diꞌꞌikkitino. 3 Mootichu kayinni ammanaminoho; isi jawaachishannoꞌne; bushuwiinnino agarannoꞌne. 4 Hakkiinni saeno, Mootichu haꞌrunsaano ikkinoommo daafira, hajanjoommoꞌnere assitinanni heedhinoonnitanna konni kaꞌano assa agurtinannikkita addaxxineemmo. 5 Magano baxxinanni gedenna cincatenni kaajjitine Kiristoosi haꞌrunsitinanni gede woꞌmanka woyite Mootichu wodanaꞌne gara ikkino ragira qole massago.

6 Roduuwa, amanyootunni heeꞌrannokkihunna ninkewiinni* adhitinoonni wodho* haꞌrunsannokkihu aye rodiiwiinnino xeertidhinanni gede Mootichinke Yesuusi Kiristoosi suꞌminni hajajanjeemmoꞌne. 7 Ninke faale haꞌra hasiissannoꞌnehu ma garinniitiro kiꞌne umiꞌne affinoonni; korkaatuno mereeroꞌne heeꞌnoommo yannara amanyoote baino garinni dimillinsoommo; 8 aye manchi sagaleno mulla* diꞌꞌintoommo. Hatteentenni, lowore fushshiinshe kiꞌne giddo mittohono duha ikkineemmokki gede, hashsha barra daafurrenna hunkiine loonsoommo. 9 Hatto assinoommohu silxaane hoonge ikkikkinni, ninke faale hadhinanni gede kiꞌnera lawishsha ikka hasiꞌneeti. 10 Isinni, kiꞌne ledo heeꞌnoommo yannara, “Loosa baxannokkihu baalu itoonke” yine hajanjoommoꞌne. 11 Korkaatuno, kiꞌne mereero mitootu loosiweelte eessannonsakki coyira eꞌanni, amanyoote baino garinni heedhanni noota macciishshinoommo. 12 Togoo manni sammi yee loosonsa loosiꞌranno gedenna loose afiꞌrino sagale itanno gede Mootichu Yesuusi Kiristoosi suꞌminni hajanjeemmonsa hattono seejjineemmonsa.

13 Kiꞌne kayinni roduuwa, hexxo mudhitine danchare assa agurtinoonte. 14 Ikkollana tenne sokka widoonni kulloommoꞌne qaalira hajajamannokki manchi heeꞌriro, konne mancho malaatisse;* qoleno, saalanno gede isiwa aana agurre. 15 Ikkollana diinu gede assitine laꞌinoontesi; hatteentenni iso roduu gede assitine seekkitine amaala agurtinoonte.

16 Keeru Mootichi umisi duuchunku garinni woꞌmanka woyite keere ooꞌne. Mootichu kiꞌne baalunku ledo ikko.

17 Ani Phaawuloosi angaꞌyanni borreessoommohu kuni keeri iilloꞌne; kuni, sokkaꞌya baalate giddo heeꞌranno malaateeti; borreesseemmohuno konni garinniiti.

18 Mootichinke Yesuusi Kiristoosi elto kiꞌne baalunku ledo ikkito.