UMI TESELONQE SOKKA

1 Ani Phaawuloosi, Silwaanoosinna* Ximootewoosi, Maganu Annunna Mootichu Yesuusi Kiristoosi ledo mittimma nootera Teselonqe manni songora:

Maganu eltonna keeri kiꞌne ledo ikko.

2 Kiꞌne baalunkura huuccatto assinummo kiiro, woꞌmanka woyite Magano galaxxineemmo; 3 korkaatuno ammanate loosoꞌne, baxillu kakkayiseennaꞌne daafurtinanni daafuronna Mootichanke Yesuusi Kiristoosi hexxaꞌnenni kainohunni kaajjitine uurritinoonnita Maganinkenna Anninke albaanni woꞌmanka woyite qaangeemmo. 4 Maganu baxannoꞌne roduuwa, isi doorinoꞌneta anfoommo; 5 korkaatuno sabbankummoꞌnehu danchu duduwi kiꞌnewa dayinohu, qaalunni calla ikkikkinni wolqatenninna qullaawu ayyaaninni hattono kaajjado ammananniiti; qoleno kiꞌnera yine mereeroꞌne hiittoo manna ikkine heeꞌnoommoro affinoonni. 6 Lowo qarri amadiꞌnerono, qaale qullaawu ayyaaninni afiꞌnanni hagiirrinni adhitinoonni daafira, ninkenna Mootichu faale hadhinoonni; 7 konni daafira Meqedooniyahonna Akaayyaho heedhanno ammanaasine baalantera lawishsha ikkitinoonni.

8 Yihowa* qaali kiꞌnewiinni kae macciishshaminohu Meqedooniyahonna Akaayyaho calla diꞌꞌikkino; hatteentenni, Maganoho nooꞌne ammana wole bayicho baala tuqqino; konnira ninke mittoreno coyiꞌra dihasiissannonke. 9 Korkaatuno umo kiꞌne ledo xaandoommo garanna heeshshonnihunna halaalaanchu Maganira soqqamate kaphu magannaꞌne agurtine Maganunniwa higginoonni gara insa uminsa woꞌmanka woyite coyidhanno; 10 qoleno Maganunniwa higginoonnihu, reyotenni kayisinosihanna daanno hanqinni gatisannonkeha Beettosi yaano Yesuusi gordunni daannota agadhateeti.

2 Roduuwa, ninke kiꞌnewa daanke gumiweelo ikkite gattinokkita kiꞌne umiꞌne seekkitine affinoonni. 2 Affininte gede, umo Filiphisiyusi heeꞌneenna qarru amadinonke hattono beebba assiꞌnoonninke; lowo geeshsha gimbinkerono* Maganunniha dancha duduwo kiꞌnera kulate Maganinke kaaꞌlonni ikkinummota ikkine worbimma* afiꞌnoommo. 3 Amaalleemmoꞌne amaale soꞌronnita woy busha hedota woy dogannita diꞌꞌikkitino; 4 ikkollana Maganu dancha duduwo eeggo aankera ikkadda asse kiirinonkere ikkinoommo daafira, coyiꞌneemmohu manna hagiirsiisate yine ikkikkinni wodananke qonqolche laꞌꞌanno Magano hagiirsiisateeti.

5 Isinni, beebba guwinse woy hafuurrete hasattonke maaxate yine donge egenninoommoꞌnekkita affinoonni; tennera Maganu naqaashshete! 6 Qoleno Kiristoosi soqqamaasine ikkinoommo daafira lowore fushshiinshe kiꞌnera duha ikka dandiineemmoha ikkirono, ninke kayinni kiꞌnewiinnino ikko wolu manniwiinni ayirrinye afiꞌra dihasiꞌnoommo. 7 Hatteentenni qansidhanno ama qaaqquullese baxillunni towaaxxitannonte gede, ninkeno mereeroꞌne heeꞌnoommo yannara shaqqillunni towaantoommoꞌne. 8 Konnira, godowinta banxeemmoꞌne daafira, Maganunniha dancha duduwo kulate calla ikkikkinni kiꞌnera ninkeneeto* nafa sayise aate murciꞌnoommo; korkaatuno kiꞌne lowo geeshsha banxeemmoꞌne.

9 Roduuwa, daafuronkenna hunkeenke qaagginanniti egennantinote. Maganunniha dancha duduwo sabbankummoꞌne yannara kiꞌne giddo mittohono lowore fushshiinshe duha ikkineemmoꞌnekki gede hashsha barra loonsoommo. 10 Ammanaasine ikkitinoonniri kiꞌne ledo noonke aantenni ammanammoommore, keeraanonna minshe noonkekkire ikkine heeꞌnoommotera kiꞌneno Maganuno naqaashshete. 11 Annu oososira assannonte gede, ninke kiꞌne mitto mittonka hiitto assine amaalloommoꞌnero, hiitto assine sheshifachinshoommoꞌneronna hiitto assine seejjinoommoꞌnero seekkitine affinoonni; 12 hatto assinoommohu woꞌmanka woyite, Gashshootisiranna ayirrinyisira woshshinoꞌne Maganira malino garinni heedhinanni gedeeti.

13 Magano agurrummokkinni galanteemmohu konniraati; korkaatuno Maganu qaale ninkewiinni macciishshitini woyite mannu qaali gede ikkikkinni Maganu qaali gede assitine adhitinoonni; addanko Maganu qaaleeti; ammanaasine ikkitinoonniri kiꞌne giddono loosanni no. 14 Roduuwa, Kiristoosi Yesuusi ledo mittimma noonsari Yihudaho noori Maganu songuwa lawishsha haꞌrunsitinoonni; korkaatuno insa Ayihudete manni anga qarrantanni noonte gede, kiꞌneno gobbaꞌne manni anga hattoo qarra adhitinanni heedhinoonni; 15 Ayihudootu wole agurina Mooticha Yesuusanna masaalaano nafa shitino; ninkeno beebba assidhinonke. Qoleno insa Magano hagiirsiissannore diꞌꞌikkitino; hatteentenni, manna baala miiccannoreeti; 16 gatanno gede dagate wido ikkino mannira sabbankeemmota hooltara woꞌnaaltanno. Konni garinni woꞌmanka woyite cubbu aana cubbo lexxitanno. Ikkollana hanqisi daannonsa yanna iillitino.

17 Roduuwa, ninke kayinni kiꞌnewiinni shiima yanna (wodanunni ikkikkinni maalunni) baxxinummo yannara baasa qalli yinoommoꞌne daafira, kiꞌnenni xaadate* lowo geeshsha sharrammoommo. 18 Konni daafira, kiꞌnewa daa hasiꞌnoommo; ee, ani Phaawuloosi mitte hige calla ikkikkinni lame hige daate woꞌnaaloommo; ikkollana Sheexaanu doogo cufinonke. 19 Mootichinke Yesuusi leellanno* yannara isi albaanni hexxonke woy hagiirrinke woy hagiirrinke baꞌlatto maati? Dikiꞌneeti? 20 Ee, kiꞌne ayirrinyenkeetinna hagiirrenkeeti.

3 Hakko daafira kawiinni saꞌne cinca hoongummoti,* calluwinke Ateenaho gantummoro woyyanno yine hendoommo; 2 konnira, ammanaꞌne kaajjitanno gede jawaachishaꞌneranna sheshifachishaꞌnera Ximootewoosi sonkoommoꞌne; isi rodoonkeetinna Kiristoosi daafira kulannoha dancha duduwo duduwannoho Maganu soqqamaanchooti;* 3 iso sonkoommohu, ayino konni qarrinni hembeelamannokki* gedeeti. Korkaatuno togoo qarra gata dandiineemmokkita* kiꞌne umiꞌne affinoonni. 4 Kiꞌne ledo heeꞌnoommo woyiteno, qarru iillannonketa balanxe kulloommoꞌne; yinoommo coyino ikkinota kiꞌnenni affinoonni. 5 Hakko daafira kawiinni sae cinca hoogummoti, ammanamaꞌne daafira afate iso soommo; hatto assoommohu, miteekke Jifaanchu mite doogonni jifeennaꞌne daafurinke mullawa gatanno yee waajjeeti.

6 Ikkollana, Ximootewoosi kiꞌnewiinni xa ninkewa daye ammanamaꞌnenna baxilliꞌne daafira tashshi assanno duduwo kulinonke; qoleno woꞌmanka woyite danchatenni qaagginanninketanna ninke kiꞌne laꞌꞌate quqquxammeemmonte gede kiꞌneno ninke laꞌꞌate quqquxantinannita kulinonke. 7 Hakko daafira roduuwa, qarrinkenna mitiimmanke baalate giddo kiꞌnenninna leellishshinoonni ammanamanni kainohunni sheshifantoommo. 8 Korkaatuno kiꞌne Mootichunni kaajjitine uurritiniro heeshshonke haarooꞌmitanno.* 9 Kiꞌnenni kainohunni Maganinke albaanni hagiidhinoommohu lowo hagiirrira, kiꞌne daafira Maganoho galata ma assine qola dandiineemmo? 10 Albaꞌne laꞌꞌatenna ammanaꞌne giddo xeinore wonshate, wolqanke assitu deerrinni hashsha barra eeggifante huuccineemmo.

11 Xaano ikkiro Maganinkenna Anninke, hattono Mootichinke Yesuusi kiꞌnewa dangeemmo gede doogo qineessitonke. 12 Qoleno ninke banxeemmoꞌnente gede, Mootichu kiꞌne kiꞌneneewanna wolu manni baalu ledo nooꞌne baxilli lexxannonna halaꞌlanno gede assoꞌne; 13 hakkuno, Mootichinke Yesuusi qullaawootisi baalu ledo leellanno* yannara, Maganinkenna Anninke albaanni wodanaꞌne kaajjishanno gedeetinna minshe nooꞌnekki qullaawoota assannoꞌne gedeeti.

4 Jeefoteno roduuwa, Magano hagiirsiisa dandiitinanni gede hiitto ikkitine heeꞌra hasiissannoꞌnero ninkewiinni rossinoonni; xa heedhinoonnihuno hakko garinniiti; konni daafira, woꞌmunni woꞌma hakko garinni heedhinanni gede Mootichu Yesuusi suꞌminni huucciꞌneemmoꞌne, hattono eeggo yineemmoꞌne. 2 Korkaatuno Mootichu Yesuusi suꞌminni uyinoommoꞌne biddishsha* affinoonni.

3 Maganu fajjo, qullaabbinanni gedeetinna foorretewiinni* xeertidhinanni gedeeti. 4 Kiꞌne giddo mittu mittunku umisi biso* eemadhe qullaambetenninna ayirrinyunni hiitto asse amaxxannoro afa hasiissannosi; 5 kunino, Magano affinokki daga gede hafuurre nootenna deerrimale siimu xaadooshshi yortonni ikka dihasiissannosi. 6 Aye manchino konni coyira quwa saꞌꞌanna rodoosi xagara dihasiissannosi; mayira yiniro, balanxe kulloommoꞌnenna duuꞌne qorophisiinsoommoꞌnente gede, Yihowa* konni coyi baalunkura qorichishanno. 7 Korkaatuno, Maganu woshshinonkehu qullaambeteeti ikkinnina battete diꞌꞌikkino. 8 Konne qorophishsha mishannohu, manna ikkikkinni qullaawa ayyaanasi aannoꞌneha Magano mishanni no.

9 Ikkollana, mimmitu ledo baxama kiꞌne umiꞌne Maganuwiinni rossinoonnihura, rodiimmate baxilli daafira kiꞌnera borreessa dihasiissannonke. 10 Qoleno, Meqedooniya woꞌmaho heedhanno roduuwi baalunkura hatto assitinanni heedhinoonni. Ikkollana roduuwa, konne coye albinni roore woꞌmunni woꞌma assitinanni heedhinanni gede eeggo yineemmoꞌne. 11 Konni albaanni hajanjummoꞌnente gede, gaꞌlabbitte heeshsho heeꞌrate, eessannoꞌnekki coyira ea hoogatenna angaꞌnenni loosiꞌrate sharramme; 12 hakkuno, gobbaanni noo manni illera amanyootunni heedhinanni gedeetinna mitturino xeannoꞌnekki gedeeti.

13 Hakkiinni saeno roduuwa, hexxo noonsakkiri wolootu dadillitanno garinni dadillitinannikki gede, reyotenni goxxe noori daafira affinikkinni gattinara dihasiꞌneemmo. 14 Yesuusi reyinotanna reyotenni kainota ammanneemmoha ikkiro, Yesuusi ledo mittimma heedheennansa reyotenni goxxinorirano Maganu heeshsho oye isi* ledo heedhanno gede assanno. 15 Yihowa* qaali garinni kulleemmoꞌne coyi konneeti: Mootichu leellanno* yanna geeshsha lubbotenni heeꞌneemmori ninke, reyotenni goxxe noore horonta dibalanxeemmo; 16 korkaatuno Mootichu umisi hajajote huuronni, sokkaasinete roorrichi huuronninna Maganu xurumbi huuronni gordunni dirranno; Kiristoosi ledo mittimma heedheennansa reyitinorino balaxxe kaꞌanno. 17 Hakkunni gedensaanni lubbotenni heeꞌne gantoommori ninke, Mootichu ledo bubbete aana xaandammora insa ledo gomichu giddora hawulukammeemmo; konni garinni, woꞌmanka woyite Mootichu ledo heeꞌneemmo. 18 Hakko daafira, konni qaalinni woꞌmanka woyite mimmito sheshifachishshe.

5 Konnira roduuwa, yannatenna woggate daafira kiꞌnera mittoreno borreessa dihasiissanno. 2 Korkaatuno, Yihowa* barri hashsha mooraaanchu daanno garinni daannota kiꞌne umiꞌne seekkitine affinoonni. 3 “Keerunna gaꞌlabbo daggino!” yitanna, game godowinni noo mancho amaddannohu gede hakkawoyintenni hedeweelcho bao daggannonsa; aye garinnino digattanno. 4 Kiꞌne kayinni roduuwa, heedhinoonnihu tunsichu giddo ikkinokki daafira, hashshu hedeweelcho soodannosi mooraanchi gede, hakku barri hedeweelcho didaannoꞌne; 5 korkaatuno, kiꞌne baalunku xawaabbu oosootinna barri oosooti. Ninke hashshi woy tunsichu ooso diꞌꞌikkinoommo.

6 Hakko daafira, wolootu gede goxa agurre baqqi yine heeꞌno; wodanchate dandoonkeno agadhino. 7 Goxxannori goxxannohu hashshaati; dimbitannorino dimbitannohu hashshaati. 8 Barri ooso ikkinoommori ninke kayinni, woꞌmanka woyite wodanaaꞌmine hendo; qoleno ammanannitanna baxillunnita gagasu uddano uddiꞌno; gatote hexxono umoho wodhinanni gullee* gede assine wodhino; 9 korkaatuno, Maganu doorinonkehu Mootichinke Yesuusi Kiristoosi widoonni gato afiꞌnammoraati ikkinnina hanqoho diꞌꞌikkino. 10 Lubbotenni heeꞌnummorono reyinummorono* ledosi heeꞌneemmo gede isi ninkera reyinonke. 11 Hakko daafira, xa assitinanni heedhinoonninte gede mimmito jawaachishanna* mimmito dhaawa agurtinoonte.

12 Roduuwa, mereeroꞌne diinaggaabbe loossanni, Mootichu loosira biddishsha uyitanninna amaaltanni nooꞌnere ayirrissinanninsa gede huucciꞌneemmoꞌne; 13 qoleno loossanno loosi daafira, baxillunni addi shaqqille leellishshinanninsa gede huucciꞌneemmoꞌne. Mimmitu ledono keere heedhe. 14 Wole widoonni kayinni roduuwa, amanyootunni heedhannokkire qorophisiissinanni* gede, yaaddinore* sheshifachishshinanni gede, wolqiweeloota irkissinanni gedenna manna baala cincitinanni gede amaalleemmoꞌne. 15 Aye manchino mittohono bushu coyi bayicho busha asse qolannokki gede qorophe; hatteentenni, woꞌmanka woyite mimmitiꞌneranna wolu manni baalunkura dancha coye assate jawaatte.

16 Woꞌmanka woyite hagiidhe. 17 Agurtinikkinni huuccidhe. 18 Baalunku coyira galaxxe. Kiristoosi Yesuusinni Maganu kiꞌnewiinni hasiꞌranno coyi konneeti. 19 Ayyaanu giira xoyissitinoonte. 20 Masaalo mishshinoonte. 21 Baalanka coye fonqoltine laꞌe; dancha ikkinoha seekkitine cuꞌmidhe. 22 Duuchunku gari bunshewiinni xeertidhe.

23 Keeru Magani umisi woꞌmunni woꞌma qullaawoota assoꞌne. Mootichinke Yesuusi Kiristoosi leellanno* yannara baalunku raginni ayyaaniꞌne, lubboꞌnenna* bisiꞌne fayyaaleessanna minshe nookkiha ikko. 24 Woshshinoꞌnehu ammanaminoha ikkino daafira, isi addinta konne coye assanno.

25 Roduuwa, ninkera huuccatto assa agurtinoonte.

26 Roduuwa baala rodiimmate baxillinni sunqitinanni keere haadhe.

27 Tenne sokka roduuwa baalaho nabbambanni gede Mootichunni eegameemmoꞌne.

28 Mootichinke Yesuusi Kiristoosi elto kiꞌne ledo ikkito.