QOLAASIYAASI SOKKA

1 Maganu fajjonni Kiristoosi Yesuusi soqqamaasincho ikkoommohu ani Phaawuloosinna rodiinke Ximootewoosi, 2 Qolaasiyaasi heedhannorira, Kiristoosi ledo mittimma noonsari ammanantinori qullaawootu roduuwira:

Maganu Anninke eltonna keeri kiꞌnera ikko.

3 Kiꞌnera huuccatto assineemmo yannara, Mootichinke Yesuusi Kiristoosi Anna Magano woꞌmanka woyite galanteemmo; 4 korkaatuno Kiristoosi Yesuusira nooꞌne ammananna qullaawoota baalaho nooꞌne baxille macciishshinoommo; 5 kuni ikkinohu, iima qixxaabbe nooꞌne hexxonni kainohunniiti. Kulloonniꞌnete halaalu sokka yaano danchu duduwi widoonni, konni albaanni tenne hexxo daafira macciishshitinoonni; 6 kuni danchu duduwi kiꞌnewa iillino. Danchu duduwi alame woꞌmate guma laalanninna lexxanni noonte gede, Maganu elto halaale macciishshitinihunna seekkitine huwattini barrinni kayise kiꞌne mereerono guma laalanninna lexxanni no. 7 Banxeemmosihu ledonke borojjicho ikkinohu Ephafirawiinni konne coye rossinoonni; isi, ninke riqiwe loosannoho Kiristoosiho ammanamino soqqamaanchooti. 8 Qoleno isi ayyaanaamittete baxilliꞌne* daafirano kulinonke.

9 Hakko daafira, konne coye macciishshinummo barrinni kayinse, hayyonna ayyaanaamittete wodancha baalate ledo fajjositi halaalaancho egenno woꞌmitannoꞌne gede Magano huuccanna xaꞌma diagurroommo; 10 hakkuno, danchu loosi baalunni guma laaltinanninna Maganu daafira halaalaancho egenno lexxitanni hadhannoꞌne woyite, Yihowara* malino garinni millissinanni iso woꞌmunni woꞌma hagiirsiissinanni gedeeti; 11 cincatenninna hagiirrunni woꞌmunni woꞌma kaajjitine uurra dandiitinanni gede, Maganunniti batiꞌra wolqa jawaante baala uyitoꞌne; 12 qoleno xawaabbu giddo noo qullaawooti afidhanno ragge beeqqitinanni gede ikkadda assinoꞌne Anna galatte.

13 Isi, tunsichu silxaanenni gatise baxanno Beettisi gashshootiwa sayisinonke; 14 Beettisino wodo ikke wolaphineemmo gede yaano cubbinkera maaro afiꞌneemmo gede assinonke. 15 Isi leellannokki Maganira lawishshahonna kalaqamu baalunkura bayiraho; 16 korkaatuno, iimanna uulla noohu wolu coyi baalunku, illete leellannohuno leellannokkihuno, zuufaannano mootimmano woy gashshootuno silxaannano, kalaqantinohu isi widoonniiti. Wolu coyi baalunku kalaqaminohu isi widoonniitinna isiraati. 17 Qoleno isi wolu coyi baalunkura albiidiho; wolu coyi baalunku kalaqaminohuno isi widoonniiti; 18 isi bisoho yaano songote umoho. Baalunku coyira umiha ikkanno gede isi hanafote, reyotenni kaꞌꞌateno bayiraho; 19 kuni ikkinohu, isi baalunku coyinni woꞌma ikkara Maganu hasiꞌrino daafiraati; 20 qoleno Maganu, Kiristoosi qarru haqqi* aana dunino mundee widoonni keere kalaqe wole coye baala yaano iimano uullano noo coye baala isi widoonni isiniiti ledo araarsa hasiꞌrinohuraati.

21 Hige kiꞌne bashsho, surreꞌnenni busha looso calla heddinannire ikkitinoonni daafira Maganuwiinni xeertidhinoonnireetinna diinnate; 22 xa kayinni Maganu, qullaawootanna muso nooꞌnekkire hattono busha assinanniꞌneri nookkire asse albisira shiqishaꞌnera, isonooto reyote sayise uyino manchi bisi* widoonni umisi ledo araarsinoꞌne; 23 ikkollana kuni ikkannohu, ammanatenni safote aana kaajjitine milli miliqqi yitinikkinni uurritine, macciishshitinoonnihu danchu duduwinni afidhinoonni hexxowiinni baxxitinikkinni ammanatenni kaajjitine heedhinirooti; konne dancha duduwo gordoho woroonni noo kalaqami baalunkura sabbankoonni. Ani Phaawuloosino soqqamaancho ikkoommohu konni danchu duduwiraati.

24 Kiꞌnera yeenna iillinoe qarrinni xa hagiidhanni noommo; Kiristoosinni kainohunni maaliꞌya aana iillanno qarri xaano digoofino; kuni qarri iillanni nooehu bisisira yaano songote yeennaati. 25 Maganu qaale seekke sabbakeemmo gede, kiꞌnera yineenna Maganu eeggo uyinoe loosi ledo sumuu yaanno garinni tenne songora soqqamaancho ikkoommo; 26 kuni qaali, saꞌu alamenna* saꞌu ilamanni kayisse dahaabbe keeshshitinote qullaawa fojooti; xa kayinni tini fojo qullaawootisira xabbino; 27 Maganu dagate mereero tenne qullaawa fojota ayirrado jiro qullaawootisira xawisa hasiꞌrino; tini qullaawa fojo, kiꞌne ledo mittimma noosiho Kiristoosiiti; tenne mittimmanni kainohunni, kiꞌneno ayirrinyesi gutamate hexxo afidhinoonni. 28 Mitto mittonka mancho gikki yiinoha* Kiristoosi rosaancho assine Maganoho shiqisha dandiineemmo gede, manna baala amaallanninna hayyo baalatenni rosiinsanni, dudumbeemmohu isi daafiraati. 29 Konne coye umo fushshate, giddoꞌya loossanni noote jawaata wolqasinni danduummo geeshsha diinaggaawe loosate sharramanni noommo.

2 Kiꞌneranna Lodooqiyaho heedhannorira, hattono ane affe egentinokkirira* baalaho yee mageeshshi geeshsha jawaate sharramanni noommoro affinara hasiꞌreemmo. 2 Hatto asseemmohu, wodaninsa sheshifatanno gedeetinna sumuu yite mimmitu ledo baxillunni usurantanno gedeeti; konni garinni, batiꞌra jiro yaano woꞌmunni woꞌma buuxxinota halaalu wodancha afiꞌranna Maganunnita qullaawa fojo ikkinohu Kiristoosi daafira halaalaancho egenno afiꞌra dandiitanno. 3 Hayyonnitanna egennonnita muxxe jiro baala seekkine maanxoonnihu Kiristoosi giddooti. 4 Togo yaanni noommoꞌnehu, aye manchino aduule dogannoꞌnekki gedeeti. 5 Ledoꞌne noommokkiha ikkirono, ayyaanunni kiꞌne ledo noommo daafira dancha amanyooteꞌnenna Kiristoosira nooꞌneta kaajjado ammana lae hagiidhanni noommo.

6 Hakko daafira, Mooticha Kiristoosi Yesuusi adhitinoonninte gede, isi ledo mittimmatenni qaafa agurtinoonte; 7 rossinoonni garinni, isi aana rumuxxitinenna minantine, hattono ammanatenni kaajjitine heedhe; galatiꞌneno batiꞌro.

8 Kiristoosi aana ikkikkinni alamete hedonna mannu woga aana xintantino hayyonni, hattono haafu awaawurshinni ayino qafadannoꞌnekki* gede qorophe; 9 korkaatuno maganittete akati woꞌme bisunni heeꞌrannohu isi giddooti. 10 Hakko daafira, gashshootunna roorre baalate umo ikkinohu isi widoonni woꞌmille afidhinoonni. 11 Qoleno isi ledo nooꞌne aantenni, angatenni barcinshiinshoonnikki barcima barcintinoonni; tinino, cubbaataamo maalu biso mulqine hunne barcimmannite Kiristoosi soqqamaano barcintanno barcimaati. 12 Isi cuuamino gedee cuuama cuuantine ledosi waamantinoonni; isi ledo nooꞌne aantennino ledosi kaꞌinoonni; kuni ikkinohu, iso reyotenni kayisino Magani loosinohu dhagge ikkanno loosira nooꞌne ammananniiti.

13 Qoleno, saoꞌnenninna maaliꞌne barcima hoogatenni kainohunni reyitinoonnire ikkitinirono, Maganu isi ledo heeshshonnire assinoꞌne. Isi saonke baala shaqqillunni gatona yiinonke; 14 giddose wodho amaddinotanna gibbannonketa angatenni borreessinoonni borro feye hunino. Qarru haqqira* qole gane doogotenni hoolino. 15 Qarru haqqi widoonni* gashshootenna roorroota mulqe, insa qeellete dira dire massaganni qafadantinori gede gudumaaleho reqecci yite leeltanno gede assino.

16 Hakko daafira, itatenna agate woy ayyaana woy haaro agana woy sambata ayirrisate daafira ayino yoo yoonkeꞌne. 17 Kuri coyibba daanno coyira caaleho; halaalaanchu coyi kayinni Kiristoosiiti. 18 Kaphu joongillinninna sokkaasine magansiꞌratenni* hagiidhannohu aye manchino baꞌraarsha adhitinannita hoolaꞌnera wodhitinoonte; togoo manchi laino coye kaima asse mitto coye “cuꞌmiꞌre giwanno.”* Qoleno maalu hedosi mulla booꞌnanno gede assitannosi; 19 togoo manchi umo ikkinoha Kiristoosi* seekke dicuꞌmiꞌrinoho; mannimma woꞌma mikitatenna diimmichu widoonni hasiisannore afidhannohunna ise iseneewa mitteenni sumuu yite sikkantannohu hattono lophitannohu konni umi widoonniiti; tenne lopho aannohu Maganoho.

20 Alamete hedo agurtine Kiristoosi ledo reyitinoonniha ikkina, umiꞌnenni wodhote gashshantine xaano alamete wido ikkitinoonnihu gede ikkitine mayira heedhinanni? 21 Wodhono, “Amaddooti, qamassooti, kissooti” yitannote; 22 kuri baalu mannu hajajonna roso ikkino daafira, loosu aana hosihu gedensaanni baꞌꞌannoreeti. 23 Kuri coyibba, meessira lawino garinni magansiꞌnanni magansiꞌranninna kaphu joongillinni, hattono mannimma gadachatenni leeltanno hayyo labburono, maalu yorto qeeꞌlate kayinni mittoreno kaaꞌlitannori dino.

3 Ikkollana, Kiristoosi ledo kaꞌini geeshsha, woꞌmanka woyite Kiristoosi Maganu qiniiteenni ofolle noowa iima noo coye hasidhe. 2 Surreꞌne ayewoteno uulla coye ikkikkinni iimi coye illachishshanno gede assidhe. 3 Korkaatuno kiꞌne reyitinoonni; heeshshoꞌneno Maganu ledo mittimma noosihu Kiristoosi ledo maaxante no. 4 Heeshshonke ikkinohu Kiristoosi xawanno yannara, kiꞌneno isi ledo ayirrinyunni xabbinanni.

5 Konni daafira, uullate aana noota bisu kifillaꞌne shiiyye; insano foorrete,* battete, deerrimale siimu xaadooshshi yortooti, busha halchootinna kaphu maganna magansiꞌra ikkitinote hafuurrete. 6 Kuri coyibbanni kainohunni Maganu hanqi daanno. 7 Kiꞌneno albi heeshshoꞌne waro* heedhinoonnihu* hakko garinniiti. 8 Xa kayinni aaraawa, hanqo, bunshenna xono baala kiꞌnewiinni hunne; maaeelu coyino afiiꞌnenni fuloonke. 9 Mimmito dogginoonte. Akkala mannimma* loosise ledo fushshitine tugge; 10 qoleno, Kalaqaanchise dani ledo sumuu yaanno garinni halaalaancho egennonni haarooꞌmitanni hadhannota haaro mannimma uddidhe; 11 togoowa Girikichu woy Ayihudichu, barciminohu woy barciminokkihu, manni gobba manchi, Iskuutesi,* borojjichu woy borojjicho ikkinokkihu mereero badooshshu dino; Kiristoosi kayinni baalankareeti; qoleno woꞌmunku giddo no.

12 Konnira Maganu doodhinoꞌnere, qullaawootanna baxannoꞌnere ikkitinoonni daafira, baxillu mararro, shaqqille, umo heeshshi assa, joongillenna cinca uddidhe. 13 Kuꞌu koꞌonni aana koffi yitinoonniri heeꞌriro nafa, mimmito dandee heeꞌranna mimmito mulla gatona yaa agurtinoonte. Yihowa* mulla gatona yiinoꞌnente gede, kiꞌneno hatto asse. 14 Ikkollana kore baalankano agurranna baxille uddidhe; korkaatuno baxillu guuta mittimmate usuraasinchooti.

15 Qoleno woshshantinoonnihu mitto biso ikkitinaranna keere heedhinara ikkino daafira, Kiristoosi keeri wodaniꞌnera mooho.* Galattinannire ikkitinoonnitano leellishshe. 16 Kiristoosi qaali hayyo baalate ledo giddoꞌne woꞌme heeꞌro. Faarsotenni, Magano guwisatenni, galataho* faarsinannite ayyaanaame faarsonni rosiisanna jawaachisha* agurtinoonte; wodaniꞌnennino Yihowara* faarse. 17 Coyidhinanniri woy assitinanniri ikkireno ikkiro, Magano Anna Yesuusi widoonni galattinanni baalanka coye Mootichu Yesuusi suꞌminni asse.

18 Kiꞌne minaamuwu, Mootichu haꞌrunsaano assa hasiissannonsare ikkino daafira, minaannuwiꞌnera maahoyye yitine galle. 19 Kiꞌne minaannuwu, minaamuwaꞌne baxa agurtinoonte; aaraabbineno hanqitinoontensa.* 20 Kiꞌne ooso, baalunku coyira anniꞌneranna amaꞌnera hajajamme; korkaatuno tini Mooticha hagiirsiissanno. 21 Kiꞌne annuwu, dadillaamma ikkitannokki gede* oosoꞌne caacceessitinoonte. 22 Kiꞌne borojju, manna hagiirsiisate yitine uullate aana noo mootoollaꞌne* laꞌannoꞌne woyite calla ikkikkinni woꞌmu wodaninni kaꞌine Yihowa* waajjatenni mootoollaꞌnera baalunku coyinni hajajammensa. 23 Assitinannire baala mannaho ikkikkinni Yihowara* assitinannita heddinanni woꞌma lubbonni* asse; 24 korkaatuno, ragge baꞌraarshu gede assitine adhitinannihu Yihowawiinni* ikkinota affinoonni. Mootichinke Kiristoosira borojjichu gede ikkitine soqqamme. 25 Bushare assannohu assino bunshera loososi mixxannoti egennantinote; Maganu dimallaadanno.

4 Kiꞌne mootoolla, kiꞌnerano gordoho Mootichu nooꞌneta affine, borojjeꞌne keeraanchimmatenninna halaalunni amadde.

2 Huuccattotenni woꞌmanka woyite baqqi yitine galata shiqishidhinanni, hexxo mudhitinikkinni* huuccidhe. 3 Qoleno, Kiristoosi daafira kultannota qullaawa fojo duduwa dandiineemmo gede Maganu qaalisira doogo fanankera ninkerano huuccenke; ani usurame noommohuno tennera yeeti; 4 tenne qullaawa fojo kula hasiissannoe garinni xawise kula dandeemmo gedeno huuccatto asseꞌꞌe.

5 Yannaꞌne seekkitine horoonsidhinanni,* gobbaanni noo manni ledo woꞌmanka woyite hayyotenni heedhe. 6 Mittu mittunku manchira dawaro qola hasiissannoꞌne gara affinanni gede, coyidhinanni coyi ayewoteno maxinetenni cuukkinoonnihu gede nyammo afiꞌrinoha ikko.

7 Mootichaho ammanamino soqqamaanchonna ledoꞌya borojjicho ikkinohu baxamino rodiiꞌya Tikiqoosi, ane daafira baalankare kulannoꞌne. 8 Iso kiꞌnewa soyanni noommohu, heeꞌnoommo gara affinaranna wodanaꞌne sheshifachishara yeeti. 9 Isi, alba kiꞌnewa heeꞌrannohu ammanaminohunna baxeemmo rodiiꞌya Anaasimoosi ledo daanno; insa kowiicho ikkanni noore baala kultannoꞌne.

10 Ledoꞌya usurame noohu Arisxirookoosi keere soyinoꞌne; Barnabaasi fiixi* Maarqoosino keere dhaaꞌminoꞌne (kiꞌnewa dayiro danchu garinni haadhinannisi gede biddishsha uyinoonniꞌnehu isi daafiraati); 11 Iyyoosxoosi yinannihu Yesuusino keere soyinoꞌne; kuri barcintinori widooti. Maganu Gashshootira ledoꞌya loossannori kuri callaati; insa anera sheshote buicho ikkitinoe.* 12 Alba kiꞌne ledo heeꞌrannohu Kiristoosi Yesuusi borojjichi Ephafirano keere soyinoꞌne. Maganu fajjo baalatenni gikki yitinoonnirenna* kaajjado ammana nooꞌnere ikkitine jeefote geeshsha uurritinanni gede, isi woꞌmanka woyite kiꞌne daafira huuccattotenni gaaramanni no. 13 Isi kiꞌnera, hattono Lodooqiyahonna Hirapoolisi heedhannorira lowo geeshsha daafurannota aninni farciꞌreemmo.

14 Baxaminohu xagisaanchu Luqaasi keere soyinoꞌne; Deemaasino keere dhaaꞌminoꞌne. 15 Lodooqiyaho heedhanno roduuwiranna Niimifara, hattono minese noo songora keere iillishsheꞌꞌe. 16 Tenne sokka kiꞌnewa nabbambihu gedensaanni, Lodooqiyu songorano nabbambanni gede asse; Lodooqiyunni iillitannoꞌne sokka qole kiꞌnewa nabbambanni gede asse. 17 Qoleno Arkiphara, “Mootichuwiinni adhootto soqqansho umo fushshatto gede, tenne soqqansho illachishi” yitine kullesi.

18 Ani Phaawuloosi angaꞌyanni borreessoommohu keeriꞌya iilloꞌne. Sansalatetenni usurame noommota qaagge. Maganu elto kiꞌne ledo ikkito.