FILIPHISIYUSI SOKKA

1 Kiristoosi Yesuusi borojji Phaawuloosinna Ximootewoosi, Kiristoosi Yesuusi ledo mittimma noonsarira Filiphisiyusi katamira heedhanno cimeeyyeranna songote soqqamaanora hattono qullaawootu baalunkura:

2 Maganu Anninkenna Mootichu Yesuusi Kiristoosi eltonna keeri kiꞌnera ikko.

3 Kiꞌne qaageemmo yanna baalantera Maganoꞌya galaxxeemmo; 4 hatto asseemmohu kiꞌne baalunku daafira eeggifate huuccatto assummo kiirooti. Qoleno woꞌmanka woyite eeggifate huucceemmohu hagiirrunniiti; 5 korkaatuno dancha duduwo macciishshitini barrinni kayise xaa geeshsha danchu duduwira kaaꞌlantinanni* heedhinoonni. 6 Kiꞌne mereero dancha looso hanafino Magani, Kiristoosi Yesuusi barri geeshsha konne looso umo fushshannota addaxxeemmo. 7 Kiꞌne baalunku daafira hatto yee hedaꞌya garankolla; korkaatuno usuramummo yannarano ikko danchu duduwira gaaramummonna gashshootu afinoha* assate sharramummo yannara ane ledo elto beeqqitinanniri kiꞌne wodaniꞌyanni dibaꞌinoonni.

8 Kiristoosi Yesuusi gede lubbora baxeemmoꞌne daafira, kiꞌne baalunku qalli assitinoonnieta Maganu afino. 9 Baxilliꞌne halaalaancho egennonna woꞌma wodancha ledo albinni roore lexxanni haꞌranno gede huuccatto assa diagureemmo. 10 Qoleno, roore hasiisanno coye baddine affine Kiristoosi barri geeshsha xeꞌne nooꞌnekkire ikkitinanni gedenna wolootaho guficho ikkitinannikki gede, 11 hattono Maganu ayirrannonna galatamanno gede Kiristoosi Yesuusi widoonni keeraanchimmate gumi woꞌminoꞌnere ikkitinara huuccatto asseemmo.

12 Konnira roduuwa, anera iillinori danchu duduwi halaꞌlanno gede assinota affinara hasiꞌreemmo; 13 usuramoommohu Yesuusira yee ikkinota mootete agaraasine baalanna wolu manni baalu afino. 14 Mootichaho soqqantanni noori rooru roduuwi ane usuramanni kainohunni Maganu qaale beꞌe yitukkinni mitte giddonni coyiꞌrate albinni roore worbuulle ikkitino.

15 Hige mitu Kiristoosi daafira kulannoha dancha duduwo sabbakkanni noohu hinaasotenninna heewotenniiti; wolootu kayinni dancha giddonniiti. 16 Dancha giddonni sabbakkannori ani danchu duduwira gaaramammora dooramoommota affino daafira, Kiristoosi daafira kulannoha dancha duduwo baxillunni dudubbanno; 17 kuꞌuri kayinni usurame noommohura anera qarra qaltara hedde tenne assitannohu fayyo giddonni ikkikkinni gibbo hasidheeti. 18 Tini maa assitinoyya? Baalante doogonni yaano kaphunnino ikko halaalunni Kiristoosi daafira kulannoha dancha duduwo dudumbanni gede assitino; tennera ani hagiidhoommo. Konni kaꞌano hagiidheemmo; 19 korkaatuno tini, kiꞌne eeggifattine huuccitinannie huuccattonninna Yesuusi Kiristoosi ayyaani kaaꞌlonni gato afiꞌreemmo gede assitannoeta afoommo. 20 Hakkuno, quqquxame agadheemmo coyinninna hexxoꞌya ledo sumuu yaanno garinni, mittu coyinnino saaleemmokki gedeeti; bashshi assummokkinni coyiꞌre, heeꞌrummorono reyummorono konni albaanni asseemmonte gede xaano Kiristoosi mannimmaꞌyanni ayirranno gede asseemmo.

21 Heeꞌrummoro heeꞌreemmohu Kiristoosiraati; reyummoro qole woyyinore afiꞌreemmo. 22 Tenne alamera* heeꞌrummoro looseemmo loosinni lowo guma laala dandeemmo; reyatenna heeꞌrate giddo hiittee doodheemmoro kayinni dikuleemmo. 23 Konni lamunku coyi mereero makkaraaroommo; halchoꞌya keere fulatenna Kiristoosi ledo heeꞌrate; halaale coyiꞌniro lowo geeshsha roortannoti tenneeti. 24 Ikkollana kiꞌnera roore woyyannohu ani tenne alamera* heeꞌrummorooti. 25 Konne coye seekke huwatoommo daafira, lophitinanni gedenna ammanatenni hagiirre afidhinanni gede tenne alamera keeshsheemmotanna kiꞌne baalunku ledo heeꞌreemmota afoommo; 26 Kiristoosi Yesuusi haꞌrunsaano ikkitinoonni daafira, ani galagale kiꞌnewa dayemmo yannara anenni kainohunni hagiirriꞌne bae ikkanno.

27 Ani hasiꞌreemmohu, heeshshoꞌne Kiristoosi daafira kulannohu danchu duduwira maltinota ikkitaraatilla;* hakkuno, ani daye laummoꞌnerono woy kiꞌnewiinni fafe heeꞌrummorono mittimmatenni danchu duduwira nooꞌne ammana seekkitine cuꞌmidhine heeꞌrate mitte lubbonni* sharrantinanni mittu ayyaaninni kaajjitine uurritinoonnita 28 hattono diinnaꞌne waajjitine huxidhinoonnikkita macciishsheemmonna afeemmo gedeeti. Kuni coyi insa baꞌannota, kiꞌne kayinni gattinannita leellishshanno tajeeti; tenne taje aannohu Maganoho. 29 Kiꞌnera Kiristoosi ammantinanni gede calla ikkikkinni isira yitine qarra adhitinanni gedeno kaayyo uyinoonniꞌne. 30 Ani sharramanna laꞌinoonni sharro kiꞌneno sharrantinanni heedhinoonni; xaano sharramanni noommota macciishshitinoonni.

2 Konnira Kiristoosi ledo nooꞌne mittimmanni woloota jawaachisha, baxillunni sheshifachisha, ayyaanaamittete aante aana,* godowinta baxanna marara dandiitinanniha ikkiro, 2 guuta mittimmanna* mittu gari hedo nooꞌnere ikkitine hattono mitte hedonninna mittu gari baxillinni heedhine hagiirreꞌya woꞌma asseꞌꞌe. 3 Wolu manni kiꞌne roorannota joongillunni* hedde ikkinnina gibbotenni woy booꞌnatenni mitto coyeno assitinoonte; 4 mittu mittunku woleho woyyannore hedde ikkinnina, umiꞌnera woyyannore calla laꞌinoonte.

5 Kiristoosi Yesuusira nooti tini hedo kiꞌnerano heedhoꞌne; 6 isi Maganu daninni heeꞌrannoha ikkirono, Maganu ledo taalamate woꞌnaalara heda nafa dihedino. 7 Hatteentenni, isonooto mullicho asse borojjicho lawino; qoleno manna ikkino.* 8 Hakkiinni saeno, mancho ikke dayi woyite* umosi heeshshi asse reyote geeshsha yaano qarru haqqi* aana reyate geeshsha hajajamannoha ikkino. 9 Konninni kainohunni, Maganu roorino darga wore gotti gotti assinosi; suꞌma baala roorino suꞌmano shaqqillunni uyinosi; 10 hatto assinohu, iimanna uulla hattono baattote woroonni noori baalu Yesuusi suꞌminni guluphitanno gedeeti. 11 Qoleno, arrawu baalu Maganu Annu ayirrinyira Yesuusi Kiristoosi Mooticha ikkinota faajjete farciꞌranno gedeeti.

12 Konnira baxantinoonni roduuwaꞌya, ani ledoꞌne noommo woyite calla ikkikkinni roorenkanni xa ledoꞌne noommokki woyiteno woꞌmante yannara hajajantinannire ikkitinoonninte gede, waajjatenninna huxiꞌratenni gatoꞌne umo fushshate sharramme. 13 Korkaatuno, isi hagiidhanno coyira hasattonna wolqa oye loosoho kaꞌinanni gede jawaachishannoꞌnehu Maganoho. 14 Woꞌmanka woyite baalanka coye gunguntinikkinninna heewisantinikkinni asse; 15 hatto ikkiro bushanna shokkashsho ilama mereero minshenna xuru nookkire fayyaaleeyye Maganu ooso ikkitinanni; tenne alamera xawaabba xawissannori gede waraꞌa yitine xabbinanni; 16 tenne assitinannihu heeshshote qaale seekkitine cuꞌmidhineeti. Hatto assitiniro, dodoommohunna daafure loosoommohu mulla beebba ikkinokkita huwateemmo daafira, Kiristoosi barra hagiidheemmo gede assannoere afiꞌreemmo. 17 Ammanaꞌne kakkayisseennaꞌne shiqishidhinanni kakkalonna qullaawa soqqanshoꞌne* aana agattote kakkalo gede ikke duꞌnamummoro nafa tashshi yaannoe; qoleno kiꞌne baalunku ledo hagiidheemmo. 18 Kiꞌnerano hakko garinni tashshi yooꞌne; ane ledono hagiidhe.

19 Kiꞌne duduwo macciishshe jawaateemmo gede, Mootichu Yesuusi fajjo ikkiro, mulenni Ximootewoosi kiꞌnewa soyate hedoommo. 20 Kiꞌne daafira addinta yaadannohu isi gedeehu dancha hedo noosihu wolu mittuno dinoe. 21 Wolootu baalu Yesuusi Kiristoosire ikkikkinni uminsa injo calla hasidhanno. 22 Isi kayinni annisi ledo loosanno beetti gede dancha duduwo halashshate looso ane ledo borojjichu gede ikke loose, ikkado ikkinota leellishino gara affinoonni. 23 Konnira, ani ikkeemmota afummohu gedensaanni iso rahe kiꞌnewa soyate hedoommo. 24 Isinni Mootichu fajjo ikkiro, ani umiꞌya mulenni dayemmota dihuluullameemmo.

25 Xaara kayinni, hasiisannoere asse anera soqqamara sokkinoonnieha rodooꞌya, loosu miilaꞌyanna ledoꞌya olamannoha Afiroodiixu kiꞌnewa soya woyyitanno yee hedoommo; 26 isi kiꞌne baalanka qalli yiino; qoleno dhiwaminota macciishshitinoonnita afe lowo geeshsha yaadino. 27 Addinta isi dhiwame ree hooge gatino; ikkollana Maganu maarinosi; hige iso calla ikkikkinni dadillu aana dadillu lexxannoekki gede aneno maarinoe. 28 Konni daafira kiꞌne iso laꞌine wirro hagiidhitinanni gedenna anerano yaaddo aaninni hawacci yitannoe gede, ikkummota ikke iso rahe kiꞌnewa soyemmo. 29 Bashsho Mootichu soqqamaano haadhinanni garinni isono lowo hagiirrinni haadhesi; qoleno woꞌmanka woyite isi gedee manna ayirrisse; 30 korkaatuno, isi kiꞌne muleꞌya heedhine kaaꞌla dandiitinoonniekki coye assaera yee, Kiristoosi loosi* daafira heeshshosi* sayise oye reyote geeshsha iille gatino.

3 Jeefoteno roduuwaꞌya, woꞌmanka woyite Mootichunni hagiidhe. Borreessoommoꞌnere lede borreessummoꞌnerono ane diceeꞌmishannoe; tini qolte kiꞌnera agarooshshe ikkitannoꞌne.

2 Woshshu gedee manna qorophe; gawajjanno coye assanno manna qorophe; biso muranno mannano qorophe. 3 Korkaatuno, addu barcima barcimmoommori ninkeeti; ninke Maganu ayyaaninni qullaawa soqqansho soqqammeemmo; Kiristoosi Yesuusinni naaxxineemmo; qoleno maala diaddaxxineemmo; 4 ikkollana, maala addaxxeemmo gede assannori nooe yaannohu aye manchino heeꞌriro, hakku manchi aneeti.

Maala addaxxeemmo gede assannori nooe yee hedannohu wolu aye manchino heeꞌriro, anera hakkiinni roorinori nooe: 5 Settikki barra barcimoommo; ilamaꞌya Israeelete daga giddo Biiniyaami gaꞌreeti; Ibiraawe anninna ama ilinoe Ibiraawichaati; seera agadhateno ikkiro ani Farisichaho; 6 laalaatate daafira coyiꞌniro, bashsho songo buuto qarriseemmoho; seera agadhatenni afiꞌnanni keeraanchimma daafira coyiꞌnirono, minshanniri nookkiha ikkoommota leellishoommo. 7 Ikkollana alba nooe coye baala Kiristoosira yee mulluri gede asse kiiroommo.* 8 Hakkiinni saeno, Mootichiꞌya Kiristoosi Yesuusi daafira kultannota taalle nookki egenno hendiro, baalanka coye tidhinori nookkihu gede asse hedeemmo. Isira yee baalankare hoogoommo; hoogoommore baalano ishinu gede asse kiireemmo; hakkuno Kiristoosi afiꞌreemmo gedeeti; 9 qoleno, Seera agadhe afiꞌroommo keeraanchimmaꞌyanni ikkikkinni, Kiristoosi ammanatenni afiꞌnanni keeraanchimmanni yaano Maganuwiinni afiꞌnannite ammanate aana xintantino keeraanchimmanni Kiristoosi ledo mitto ikkateeti. 10 Mixoꞌya, Kiristoosinna isita reyotenni kaꞌꞌasi wolqa afatenna isi reyino gedee reyora aneneeto sayise oye qarrasi beeqqate; 11 qoleno dandaami deerrinni reyotenni balaxxe kaꞌannori wido ikkate.

12 Xaate baꞌraarsha adhoommo woy guutoommo yaa diꞌꞌikkino; ikkollana Kiristoosi Yesuusi ane konni coyira doorinoeta afoommo daafira, baꞌraarsha adhate sharramanni noommo. 13 Roduuwa, ani baꞌraarsha adhoommohu gede asse dihedeemmo; ikkollana huluullameemmokkihu mittu coyi no: Badheꞌyaanni noore hawanni albaꞌyaanni noo coyira hiixateemmo; 14 Maganu Kiristoosi Yesuusi widoonni aannoeha iimi woshshatto baꞌraarsha afiꞌrammora mixoꞌyawa iillate sharramanni noommo. 15 Hakko daafira, ninke gikki yinoommorira togoo hedo heedhonke; aye garinnino tennenni baxxitino hedo heedhuꞌnero, Maganu gara ikkitino hedo xawisannoꞌne. 16 Ikkihano ikkiro, aye geeshshano lophinoommore ikkinummoro, tenne doogora amanyootunni alba hinge qaanfo.

17 Roduuwa, baalunku ane faale hadhe; ninke lawishsha ikkinummoꞌne garinni heedhanni noore wolootano seekkitine laꞌe. 18 Korkaatuno, Kiristoosihu qarru haqqira* diina ikke heeꞌranni noohu lowo manni no; konni albaanni insa daafira duucha hige coyiꞌroommo; xa kayinni insa daafira wiꞌlanni coyiꞌreemmo. 19 Goofimarchinsa baote; godowinsa maganonsaati; saala hasiissannonsa coyinni naaxxitanno; surrensano uulla coye calla heddanno. 20 Ninkera kayinni gobbanke* iimaati; hakkiinni daanno gatisaancho yaano Mooticha Yesuusi Kiristoosi quqquxamme agadhineemmo; 21 isi bayira wolqasinni wolqiweelo mannimmanke soorre ayirrado mannimmasi labbanno gede* assanno; qoleno baalunku coyi umisira gashshamannosi gede assanno.

4 Konnira baxeemmoꞌnerinna qalli assitinannieri hattono hagiirreꞌyanna baꞌlattoꞌya ikkitinoonniri ayirraddu roduuwiꞌya, xa kulummoꞌne garinni Mootichunni kaajjitine uurre.

2 Mootichunni mitte hedo heedhannonsa gede Ewoodiya amaaleemmo; Sinxeekino amaaleemmo. 3 Ee, addinta loosu miilaꞌya ikkoottohu atino, Qeleminxoosinna suꞌminsa heeshshote maxaafira borreessaminori wole loosu miillaꞌya ledo danchu duduwira yee ane ledo lowo geeshsha daafurinore* kore meento kaaꞌla agurattokki gede eeggo yeemmohe.

4 Woꞌmanka woyite Mootichunni hagiidhe. Lede yeemmona hagiidhe! 5 Quwa saꞌinannikkire ikkitinoonniti* manna baalaho leelto. Mootichu mule no. 6 Mittu coyirano yaaddinoonte; hatteentenni baalunku coyira huuccattotenninna eeggifatatenni galatu ledo huuccattoꞌne Maganoho shiqishidhe; 7 wodancha baalanta roorannohu Maganu keeri Kiristoosi Yesuusinni wodanaꞌnenna surreꞌne* agaranno.

8 Jeefoteno roduuwa, halaale ikkino coye baala, ayirrado coye baala, keeraancho coye baala, xalala* coye baala, baxisanno coye baala, naandanni coye baala, dancha coye baalanna galantanni coye baala heda* agurtinoonte. 9 Anewiinni rossinoonnire, adhitinoonnire, macciishshitinoonnirenna laꞌinoonnire baala loosu aana hosiisse; keeru Maganino kiꞌne ledo ikkanno.

10 Xa galagaltine ane daafira heda hanaffinoonnihura Mootichunni lowo geeshsha hagiidhoommo. Bashshono ane daafira heddinannina, kayinni tenne leellishshinanni faro diafidhinoonni. 11 Hatto yaanni noommohu kaaꞌlo hasiꞌre diꞌꞌikkino; korkaatuno, noommo gari ikkihano ikkiro nooerinni kassi yee heeꞌra rosoommo. 12 Shiimurinnino loworinnino heeꞌra dandiinanni gara afoommo. Aye coyinninna aye garinni duumbeno hudiꞌneno, qawaaxxiꞌneno hoongeno heeꞌra dandiinanni fojo rosoommo. 13 Wolqa aannoehunni isinni baalunku coyira ikkitanno jawaante nooe.

14 Ikkirono kiꞌne qarraꞌya beeqqitinoonni daafira dancha assitinoonni. 15 Isinni kiꞌne Filiphisiyusi roduuwi, umo dancha duduwo macciishshitinihu gedensaanni ani Meqedooniyunni fulummo yannara aateno adhateno kiꞌne agurranna ane ledo wole mitte songono kaaꞌlantinokkita affinoonni; 16 Teselonqe heeꞌreenna mitte higgine calla ikkikkinni lame higgine hasiisannoere sokkinoonnie. 17 Hatto yoommohu kiꞌnewiinni mitore yore ikkikkinni, jiroꞌne* lexxitanno gede assanno guma laꞌꞌa hasiꞌreeti. 18 Ikkollana hasiisannoeri baalu, isinni hasiisannoehu aleenni nooe. Sokkinoonniere Afiroodiixuwiinni adhoommo daafira hasiisannoeri woꞌminoe; hakkuno tanni yee suꞌnaanno fooleeti, hagiirsiissanno kakkalootinna Maganu baxanno coyeeti. 19 Kiꞌnerano Maganiꞌya gawalo nookki jirosinni Kiristoosi Yesuusi widoonni hasiisannoꞌnere baala wonshe aannoꞌne. 20 Maganinkeranna Anninkera hegere hegerera ayirrinyu ikkosi. Hamiiꞌni.

21 Kiristoosi Yesuusi ledo mittimma noonsa qullaawooti baalaho keere iillishsheꞌꞌe. Ane ledo noo roduuwino keere dhaantinoꞌne. 22 Qullaawootu baalu hakko iso Qeesaari mini manni keere soyinoꞌne.

23 Giddoꞌne dancha ikkitino daafira, Mootichu Yesuusi Kiristoosi elto kiꞌne ledo ikkito.