EFESSOONI SOKKA

1 Maganu fajjonni Kiristoosi Yesuusi soqqamaasincho ikkoommohu ani Phaawuloosi, Kiristoosi Yesuusi ledo mittimma noonsarira Efessooni katamira heedhannori ammanantino qullaawootira:

2 Maganu Anninkenna Mootichu Yesuusi Kiristoosi eltonna keeri kiꞌne ledo ikko.

3 Kiristoosi ledo noonke mittimmanni gordoho ayyaanaamittete atoote baala oye maassiꞌrinonke daafira, Mootichinke Yesuusi Kiristoosi Maganinna Annira guweenyu iillosi; 4 isi qullaawootanna minshe nookkire ikkine albasiinni baxillunni heeꞌneemmo gede, alame xintantara albaanni Kiristoosi ledo mitto ikkinammora doorinonke. 5 Qoleno hasattosinna fajjosi garinni, Yesuusi Kiristoosi widoonni oososi assiꞌrankera balaxe murino; 6 isi hatto assinohu, baxanno Beettisi widoonni shaqqillunni uyinonkete ayirrado eltosi daafira guwinsannisi gedeeti. 7 Eltosi batiꞌra ikkitino daafira, Beettisi mundeenni wodeennanke keere fulloommo; ee, saonkerano maaro afiꞌnoommo.

8 Hayyonna wodancha baalate ledo tenne elto batise uyinonke; 9 hatto assinohu fajjosita qullaawa fojo ninkera kuleeti. Tini qullaawa fojo iso hagiirsiissannotenna hedosi ledo sumuu yitannote; 10 hedosino murroonni yanna gooffanno woyite, mitto gashshoote xinte* baalanka coye yaano gordoho noo coyeno baattote noo coyeno Kiristoosinni mitteenni gamba assate. Ee, isi widoonni baalunku coyi gamba yaanno; 11 isi ledo mittimma noonkere ninke ragiꞌraasine ikkinammora doorroonninke; korkaatuno fajjosi ledo sumuu yaanno garinni baalanka coye isi murino gede assanno Magani hedosi garinni balaxe doorinonke; 12 kuni ikkinohu Kiristoosi hexxate umire ikkinoommori ninke Magano guwinseemmonna ayirrinseemmo gedeeti. 13 Ikkollana kiꞌneno halaalu qaale yaano gatoꞌne daafira kulannoha dancha duduwo macciishshitinihu gedensaanni iso hexxitinoonni. Ammantini gedensaanni qaale eꞌnoonniꞌnehu qullaawu ayyaaninni Kiristoosi widoonni sumudantinoonni; 14 kuni ayyaani Maganoho lowo guweenyi iillanno gede, umisi jajja ikkitinore wodotenni keere fushshate raggenkera balanxe uyinoonninke tajeeti.*

15 Konnira, Mootichu Yesuusira nooꞌne ammananna qullaawoota baalaho leellishshinanni baxilli daafira macciishshummo yannanni kayise, 16 kiꞌne daafira Magano galaxxa diaguroommo; konni kaꞌano kiꞌnera huucca diagureemmo; 17 huucceemmohuno, Mootichinke Yesuusi Kiristoosi Magano ikkinohu ayirradu Anni, isi daafira halaalaancho egenno afidhinanni gede, hayyote ayyaana aannoꞌne gedeetinna isi xawisanno coye huwattinanni gedeeti. 18 Isi wodanaꞌne fanino;* hatto assinohu, hiittoo hexxora woshshinoꞌnero affinanni gede, qullaawootaho ragge asse aannoti batiꞌra jiro maatiro wodanchitinanni gedeetinna 19 bayira wolqasi ninke ammanneemmorira mageeshshi geeshsha jawa ikkitinoro huwattinanni gedeeti. Wolqasi mageeshshi geeshsha jawa ikkitinoro loosisinni leeltino; 20 isi Kiristoosi reyotenni kayisinohunna gordoho qiniitesiinni ofollanno gede assinohu tenne wolqasinniiti; 21 tenne alamera* calla ikkikkinni dagganno alamerano gashshootu, silxaane, wolqanna mootimma baalate hattono suꞌminoonni suꞌmi baalunkura aleenni qolinosi. 22 Qoleno baalunku coyi lekkasi woroonni galanno gede assino; songoteno baalunku coyira umo assinosi; 23 songo isi bisooti; songote giddo woꞌminohuno isooti; baalunku coyira baalankare wonshannohuno isooti.

2 Qoleno, kiꞌne alba saoꞌnenninna cubbiꞌnenni kainohunni reyitinoonnire ikkitinirono, Maganu heeshshonnire assinoꞌne; 2 hakkawaro kiꞌne tenne alame ikkito* haꞌrunsitine, bubbete aana silxaane noosi gashshaanchira hajajantinanni heedhinoonni; tini bubbe hajajantannokki ooso aana xa loosanni noo ayyaanaati. 3 Ee, ninke baalunku alba maalinkenna hedonke fajjo wonshinanni, maalinke yorto ledo sumuu yine mereeronsa heeꞌnoommo; wolootu gede ninkeno bashsho kalaqamunni hanqu oosooti. 4 Ikkollana maarote dureessa ikkino Magani lowo geeshsha baxannonke daafira, 5 saonkenni kainohunni reyine heeꞌnoommo yannara nafa heeshshonnire asse Kiristoosi ledo mitto assinonke; kiꞌneno gattinoonnihu eltosinniiti. 6 Qoleno Kiristoosi Yesuusi ledo mitto ikkinoommo daafira, Maganu isi ledo kayise gordoho ledosi ofollineemmo gede bayicho uyinonke; 7 hatto assinohu, Kiristoosi Yesuusi ledo mittimma noonkerira ninkera, danchummasinni leellishinonketa taalle nookkita batiꞌra eltosi dagganno alamerano* leellishara yeeti.

8 Kiꞌne gattinoonnihu ammanate widoonni tenne eltonniiti; kuni kiꞌne loosiꞌnenni afidhinoonniha ikkikkinni Maganu baꞌraarshaati. 9 Mittu manchino kuꞌle naaxxannori heeꞌrannokki gede, kuni loosunni afiꞌnannire diꞌꞌikkino. 10 Ninke Maganu anga loosooti;* qoleno Maganu Kiristoosi Yesuusi ledo noonke mittimmanni kalaqinonkehu, loonseemmo gede balaxe qixxeessinonkeha dancha looso loonsammoraati.

11 Hakko daafira alba, mannu anganni* “barcintinori” ilama dagate wido ikkitinoonnire kiꞌne “dibarcintinoreeti” yitannoꞌneta qaagge. 12 Hatte yannara Israeelete dagawiinni baxxitine, hexxote gondoorirano wosiꞌnitine, alamete giddo hexxo nooꞌnekkiha Maganiweelonna Kiristoosiweelo heedhinoonni. 13 Ikkollana kiꞌne bashsho faffine heedhinoonniri xa Kiristoosi Yesuusi ledo mittimma nooꞌnere ikkitinoonni; qoleno Kiristoosi mundeenni Maganunniwa shiqqi yitinoonni. 14 Lamenka wido mitto assinohunna alba bade noonsaha mereeronsa noo girgidda diiginohu isi keere abbinonke. 15 Lamunku widi isi ledo mitto ikkanno gede asse mitto haaro mancho kalaqaranna keere abbara, maalisi widoonni baarigaarre yaano giddosi hajajonna wodho amadinoha Muse Seera hunino; 16 qoleno lamenka wido mitto biso assara qarru haqqi* aana reye lamenka wido woꞌmunni woꞌma Maganu ledo araarsino; korkaatuno mannimmasinni baarigaarre hunino. 17 Qoleno isi daye, Maganuwiinni faffine heedhinoonnirira kiꞌneranna isiwa gamba yite noorira keerunniha dancha duduwo duduwino; 18 hakko daafira ninke lamunku widi manni isi widoonni mittu ayyaaninni Anninkewa ruxxi yinummokkinni shiqa dandiineemmo.

19 Konnira kiꞌne xaate wosinanna manni gobba manna diꞌꞌikkitinoonni; hatteentenni qullaawootu ledo mitte gobba mannaatinna* Maganu maate miillaati; 20 kiꞌne soqqamaasinetenna masaalaanote safo aana minantinoonnireeti; qaru safote kinchi Kiristoosi Yesuusi umosiiti. 21 Minu gudisame Kiristoosi ledo mitto ikke, baalunkuri mitteenni sikkamanna Yihowara* qullaawa mine ikkate lophanni no. 22 Kiꞌneno Kiristoosi ledo nooꞌne mittimmanni, Maganu ayyaanunni galanno bayicho ikkate mitteenni minantinanni heedhinoonni.

3 Konninni kainohunni ani Phaawuloosi, Kiristoosi Yesuusiranna dagate wido ikkitinoonnirira kiꞌnera yee usuranya ikkoommo; 2 Maganu elto adhitinanni gede, kiꞌnera soqqamate qoosso uyinoonnieta addinta macciishshitinoonni; 3 alba haranse borreessummonte gede, Maganu qullaawa fojosi xawisinoe. 4 Hakko daafira tenne sokka nabbabbinanni woyite, Kiristoosi daafira kultannota qullaawa fojo huwatoommo gara afa dandiitinanni. 5 Tini fojo xa qullaawa soqqamaasinesiranna masaalaanosira ayyaanunni xabbino garinni konni albaanni saꞌino ilama giddo heedhinote mannu oosora dixabbino; 6 fojo tenneeti: Dagate wido ikkitinori Kiristoosi Yesuusi ledo mitto ikkite, danchu duduwi widoonni ledonke ragidhannore, hattono ninke ledo mitto bisonna hexxote qaale gutantannore ikkitanno. 7 Ani Maganu eltonni tenne fojo soqqamaancho ikkoommo; isi konne baꞌraarsha mulla uyinoehu wolqasi leeltaraati.

8 Qullaawootu baalunkura woriidiha ikkoommohura anera tenne elto uyinoonnie; tenne elto uyinoonniehu, gurre gundannikkite Kiristoosi jiro daafira kulannoha dancha duduwo dagate duduweemmo gedeeti; 9 qoleno baalankare kalaqino Magani lowo diro daheesse keeshshinoti qullaawa fojo leeltanno gede assino gara mannu baalu afanno gedeeti. 10 Kuni ikkinohu, batinye doogganni leeltannoti Maganu hayyo, gordoho noo gashshootiranna roorrootira xa songote widoonni xabbaraati. 11 Tini, Maganu Mootichinke Kiristoosi Yesuusi widoonni wonshara hedinote hegere mixosi ledo sumuu yitannote; 12 Kiristoosi widoonni waajjinummokkinni coyiꞌra dandiineemmo; qoleno iso ammanneemmo daafira, Maganunniwa ruxxi yinummokkinni hawaqiꞌne shinqeemmo. 13 Konnira kiꞌnera yee qarramaꞌyanni kainohunni hexxo mudhitinannikki gede eeggo yeemmoꞌne; korkaatuno tini kiꞌnera ayirrinyeho.

14 Konninni kainohunni Anninke albaanni gulupheemmo; 15 gordohonna uullate nooti mitte mittenti maate suꞌma afidhinohu isiwiinniiti. 16 Ayirrinyisi batiꞌra ikkino daafira, giddoyidi mannimmaꞌne kaajjishshanno wolqa ayyaanisinni aannoꞌne gede huucciꞌreemmo; 17 qoleno ammanaꞌne widoonni baxillu ledo Kiristoosi wodaniꞌnera heeꞌranno gede huucceemmo. Rumuxxitinanni gedenna safote aana kaajjitine heedhinanni gedeno huuccatto asseemmo; 18 hatto asseemmohu halaalu mageeshshi geeshsha halaꞌlado, hojjaameessa, seedanna diime ikkinoro qullaawootu baalu ledo woꞌmunni woꞌma seekkitine wodanchitinanni gedeetinna 19 Maganu aanno woꞌmilli baalu heeꞌrannoꞌne gede, egenno baala roorannoha Kiristoosi baxille affinaraati.

20 Konnira, giddonke loossanno wolqasi ledo sumuu yaanno garinni, huucciꞌneemmohu woy hendeemmohu baalu aleenni lowo geeshsha roorse assara dandaannohura 21 isira, songote widoonninna Kiristoosi Yesuusi widoonni, ilama baalate giddo hegere hegerera ayirrinyu iillosi. Hamiiꞌni.

4 Hakko daafira, Mootichaho yee usuranya ikkoommohu ani, woshshantinoonni woshshatto ledo sumuu yaanno garinni heedhinanni gede huucciꞌreemmoꞌne; 2 woꞌmanka woyite jooguulle,* shaqqaddanna cincaaleeyye ikke; mimmito baxillunni duqqe; 3 gamba asse xaadisannohu keeru usuraasinchinni ayyaanu mittimma agarate lowo geeshsha jawaatte. 4 Woshshantini yannara mitte hexxo noonte gede, mittu bisinna mittu ayyaani no; 5 mittu Mootichi, mitte ammana, mitte cuuama no; 6 qoleno baalunkura aliidiha ikkinohu, baalunku widoonni loosannohunna baalunku giddo loosannohu baalunku Anni mittu Magani no.

7 Kiristoosi mulla uyinonke baꞌraarshi garinni ninke mittu mittunku elto adhinoommo. 8 Korkaatuno Maganu qaali, “Iimira fuli woyite qafado haaꞌri; mannano elto asse uyi” yaanno. 9 “Iimira fuli” yaa mayyaate? Worora yaano uullarano dirrino yaate. 10 Baalanka coye wonshara gordu baalu aleenni fulihu hakkoye worora dirriho.

11 Isi mito soqqamaasine, mito masaalaano, mito wongeellaawoota,* mito allaalaasinenna rosiisaano asse uyino; 12 hatto assinohu qullaawoota biddi assitanno gede,* wolootaho soqqantanno gedeetinna Kiristoosi biso dhaabbanno gedeeti;* 13 hakkuno ninke baalunku ammanatenninna Maganu Beetti daafira gara ikkitino egenno afiꞌneenna heedhanno mittimmawa iillinammo geeshsha, hattono woꞌma mancho ikkate* yaano Kiristoosi gede woꞌmunni woꞌma gikki yaate widira iillinammo geeshshaati. 14 Konnira xaate qaaqquulle ikka dihasiissannonke; dambalu raateessannohu gede bubbete rosi baalunni, mannunnite dogate hayyonninna xagarro woꞌmitinote soꞌrisiissanno hedonni hembeelamanna kawa kaꞌa higa dihasiissannonke. 15 Hatteentenni, halaale coyiꞌne baalunku coyinni isiwa yaano umo ikkinohu Kiristoosiwa hinge baxillunni lophino. 16 Isi widoonni bisu kifilla baalanti, hasiisanno coye uyitannote mitte mittente mikita widoonni insa insanaawa sumuu yite mitteenni sikkantino. Mitte mittenti bisu kifile garunni loosase, bisu isonooto baxillunni dhaawanni lophanno gede kaaꞌlitanno.

17 Konnira daga haafa* hedonni heedhannohu gede, kiꞌneno xaate hakko garinni heedhinannikki gede Mootichu suꞌminni coyiꞌreemmo; hattono seejjeemmoꞌne. 18 Balallensanninna wodaninsa dillaawanni kainohunni surrensa tunsitino; Maganunniwiinni afiꞌnanni heeshshowiinnino xeertidhino. 19 Saala baꞌinore ikkitino daafira, duuchunku garihu battete loosiranna mancaꞌꞌa ikkitora* hafuurretenni insaneeto sayisse uyitino.

20 Kiꞌne kayinni Kiristoosi hattooha ikkinokkita rossinoonni hattono affinoonni; 21 kuni ikkannohu, Yesuusi rosiisino halaali ledo sumuu yaanno garinni isi yaannore macciishshitinironna isiwiinni rossinirooti. 22 Albi heeshshoꞌne ledo sumuu yitannotanna dogganno yortose garinni maaeeltanni hadhannota akkala mannimma fushshitine huntinanni gede rossinoonni. 23 Qoleno hedoꞌne* haarooꞌmitanni hadho; 24 hattono Maganu fajjo garinni kalaqantinotanna halaalaancho keeraanchimmanna ammanama ledo sumuu yitannota haaro mannimma uddiꞌra hasiissannoꞌne.

25 Konnira kapho agurtinoonni daafira, mittu mittunku olliichiꞌne* ledo halaale coyidhe; korkaatuno ninke baalunku mitto bisooti. 26 Hanqa hanqena, cubbo kayinni loossinoonte; hanqitine heedhineenna arrishsho eꞌoonke; 27 Daawuloosira faro fantinoonte. 28 Moorannohu xaate mooroonke; hatteentenni qarrantinorira aannori heeꞌrannosi gede, angasinni danchare assanni diinaggaawe looso. 29 Hasiisanno garinni manna dhaawannorenna macciishshanno mannira kaaꞌlannoha dancha coye coyidhe ikkinnina sholino qaali afiiꞌnenni fuloonke. 30 Qoleno Maganunniha qullaawa ayyaana dadillissinoonte; korkaatuno wodotenni keere fultinanni barrira sumudantinoonnihu konni ayyaaninniiti.

31 Aaraawa, hanqo, giirama, raarenna xono baala hattono bunshe baala kiꞌnewiinni hunne. 32 Kuꞌu kuꞌuyira shaqqadda ikke; mimmito godowinta mararre; qoleno Maganu Kiristoosi widoonni mulla gatona yiinoꞌnente gede, kiꞌneno mimmito mulla gatona yiiyye.

5 Konni daafira, Maganu baxanno ooso gede ikkitine, isi faale hadhe; 2 Kiristoosi baxinonkenna* Maganoho tanni yite suꞌniitanno kakkalo asse umosi ninke daafira* sayise uyinonte gede, kiꞌneno woꞌmanka woyite baxillunni heedhe.

3 Qullaawu mannira hasiissannokkita ikkitino daafira, foorrenna* duuchunku gari batte woy hafuurre mereeroꞌne hasaawama nafa hasaawantoonke; 4 saalimale ikkito, balallete hasaawinna mancaꞌꞌa haariimono dihasiisannoreeti; hatteentenni Maganoho galata uyiyye. 5 Foorannohu* woy battaawinohu woy hafuuraamu manchi yaano kaphu maganna magansiꞌrannohu Kiristoosinna Maganu Gashshooti giddo horonta ragge afiꞌrannokkita affinoonni; hattono seekkitine huwattinoonni.

6 Konni coyinni kainohunni hajajantannokki ooso aana Maganu hanqi daanno daafira, ayino haafare coyiꞌre dogoonkeꞌne. 7 Hakko daafira, togoo manni ledo gutu heeꞌroonkeꞌne; 8 kiꞌne alba tunsichoho heedhinoonni;* xa kayinni Mootichunnire ikkitinoonni daafira xawaabbaho heedhinoonni.* Woꞌmanka woyite xawaabbu ooso gede ikkitine heedhe; 9 korkaatuno xawaabbu laalo duuchunku gari danchumma, keeraanchimmanna halaale amaddinote. 10 Mooticha hagiirsiisannori maatiro woꞌmanka woyite buuxxine affe; 11 guma afiꞌrinokkihu tunsichu loosira insa ledo gutama agurre; hatteentenni insa xawo fushshe. 12 Korkaatuno insa maaxante assitannori coyiꞌrate nafa saalsiisannoreeti. 13 Baalunku coyi xawo fulanno gede assannohu xawaabbaho; hakko daafira xawo fulino coyi baalu xawaabba ikkanno. 14 Konnira, “Ati goxoottohu baqqi yii! Reyotennino kai! Kiristoosi ate aana xawisannohena” yinoonni.

15 Gowwootu gede ikkikkinni hayyootu gede ikkitine heedhinoonnironna teꞌee woꞌmanka woyite seekkitine layidhe; 16 diru bushahona* yannaꞌne seekkitine horoonsidhe.* 17 Yihowa* fajjo maatiro wodanche ikkinnina wodancha xeꞌinoꞌnere ikkitinoonte. 18 Qoleno maaeelsitannoꞌnena* woyinete xajje aggine dimbitinoonte; hatteentenni woꞌmanka woyite qullaawu ayyaani woꞌmoꞌne. 19 Faarsotenni, Magano guwisatenninna ayyaanaame faarsonni mimmitu ledo* hasaabbe; wodaniꞌnennino Yihowara* guweenyu faarso faarse; 20 woꞌmanka woyite baalunku coyira, Mootichinke Yesuusi Kiristoosi suꞌminni Maganonkenna Annanke galattesi.

21 Kiristoosi waajjitine mimmitiꞌnera maahoyye yitine galle. 22 Minaamuwu Mootichaho maahoyye yee galannonte gede, minaannuwinsarano maahoyye yee galo; 23 korkaatuno Kiristoosi bisosi ikkitinoteranna gatisaanchose ikkino songora umo ikkinonte gede, minaannino minaamasira umoho. 24 Qoleno songo Kiristoosira maahoyye yite galtannonte gede, minaamuwuno baalunku coyinni minaannuwinsara maahoyye yee galo. 25 Minaannuwa, Kiristoosi songo baxinonna isonooto songote sayise uyinonte gede, kiꞌneno woꞌmanka woyite minaamuwaꞌne baxxe; 26 Kiristoosi hatto assinohu qaalu widoonni songo wayinni hayishshe keereense qullaawa assaraati; 27 hakkuno songo xuru woy bisu shoccoorraawa woy woluri togoori noota ikkitukkinni, qullaawanna muso nookkita asse xummese baꞌukkinni umisiwa shiqishiꞌrateeti.

28 Hatteente gede, minaannuwu minaamuwansa uminsa bisi gede assite baxa hasiissannonsa. Minaamasi baxanno manchi umosi baxannoho; 29 Kiristoosi songote assannonte gede, bisosi* itisannonna mararanno ikkinnina bisosi giwannohu mittu manchino dino; 30 korkaatuno ninke Kiristoosi bisooti. 31 “Konni daafira manchu annasinna amasi agure minaamasi ledo quraanyamanno;* lamunku mitto maala ikkitanno.” 32 Tini qullaawa fojo jawate. Xa ani coyiꞌranni noommohu Kiristoosinna songote daafiraati. 33 Ikkollana kiꞌne giddo mittu mittunku umosi baxannonte gede, minaamasino baxo; minaama kayinni minaannase lowo geeshsha ayirrisso.

6 Ooso, Mootichu fajjo ledo sumuu yaanno garinni anniꞌneranna amaꞌnera hajajamme; korkaatuno tini Maganu albaanni keeraanchimmate. 2 “Annakkinna amakki ayirrisi” yitanno hajajo, togo yitanno hexxo giddo amaddinote umi hajajooti: 3 “Kunino seyannohe* gedenna dirikki uullate aana seedanno gedeeti.” 4 Annuwa, oosoꞌne caacceessitinoonte; hatteentenni Yihowa* seejjonninna amaalenni* lossensa.

5 Borojje, Kiristoosira hajajantinanni garinni uullate aana noo mootoollaꞌnerano ayirrinyunninna waajjatenni hattono woꞌmu wodaninni hajajammensa; 6 manna hagiirsiisatenna mulla leellamate yitine ikkikkinni, Kiristoosi borojji gede Maganu fajjo woꞌma lubboꞌnenni* wonshitine hajajammensa. 7 Mannaho ikkikkinni Yihowara* soqqantinannihu gede dancha giddonni soqqamme; 8 borojjichuno borojjicho ikkinokki manchino, mittu mittunku assannohu danchu coyi baalaho Yihowawiinni* baꞌraarsha adhannota affinoonni. 9 Kiꞌne mootoollano, borojjiꞌnera hatto assensa; insanna kiꞌne Mootichi iima gordoho nootanna mallaadannokkiha ikkinota affinoonni daafira waajjishiishshinoontensa.

10 Hakkiinni saꞌuta, Mootichunna jawa wolqasinni jawaante afiꞌra agurtinannikki gede qaagiisseemmoꞌne. 11 Daawuloosi xagarro* ittisa dandiitinanni gede, Maganunniha olu uduunne woꞌma uddidhe; 12 sharrammeemmohu mundeetenna maalu ledo ikkikkinni, gashshootu ledo, silxaannate ledo, tenne tunsichu alame gashshaano ledonna iimiidi basera noori busha ayyaanna olanto ledooti. 13 Bushu barri daanno woyite gargadha dandiitinanni gedenna baalankare wonshitinihu gedensaanni, kaajjitine uurra dandiitinanni gede, Maganu aannoha olu uduunne woꞌma uddidhe.

14 Konni daafira, halaalu qawatto halliꞌnera qodhitine, hattono keeraanchimmannita gagasu uddano uddidhine kaajjitine uurre; 15 qoleno keerunniha dancha duduwo caammu gede lekkaꞌnera wodhitine qixxaabbine uurre. 16 Kore baalankano agurranna, wala yaannoha bushu maxxicho baalanka xoyissate kaaꞌlitannoꞌneta jawa ammanate wonqo wonqidhe. 17 Qoleno gatonnita umu gullee* wodhe; hattono ayyaanu bise yaano Maganu qaale adhe; 18 baalunku gari huuccattonninna eeggifatanni woꞌmanka woyite ayyaanunni huucciꞌra agurtinoonte. Konni garinni baqqi yitine heedhe; hattono qullaawoota baalaho woꞌmanka woyite eeggifattine huucce. 19 Qoleno danchu duduwita qullaawa fojo waajjummokkinni wolootaho kula dandeemmo gede, afooꞌya faneemmo woyite coyiꞌreemmore uyinannie gede anerano huucceꞌꞌe; 20 dancha duduwo duduwammora soyinoehu Maganoho; sansalatetenni usurame noommohuno iseraati; danchu duduwi daafira coyiꞌra hasiissannoe garinni, waajjummokkinni coyiꞌreemmo gede huucceꞌꞌe.

21 Ane daafiranna assanni noommori daafira kiꞌneno affinanni gede, baxamino rodiinkenna Mootichaho ammanamino soqqamaanchi Tikiqoosi baalankare kulannoꞌne. 22 Ikkine heeꞌnoommota affinaranna sheshifachishaꞌnera yee iso kiꞌnewa soyemmo.

23 Maganu Anninkenna Mootichu Yesuusi Kiristoosi keerinna baxilli ammanate ledo roduuwaho iillo. 24 Mootichanke Yesuusi Kiristoosi baꞌꞌannokki baxillinni baxxannori baalu ledo elto ikkito.