GALAATIYU SOKKA

1 Mannunni woy manchu widoonni ikkikkinni, Yesuusi Kiristoosinninna iso reyotenni kayisinohu Maganu Annunni soqqamaasincho ikkammora dooramoommohu ani Phaawuloosinna 2 ledoꞌya noo roduuwi baalu, Galaatiyaho heedhanno songuwara:

3 Maganu Anninkenna Mootichu Yesuusi Kiristoosi eltonna keeri kiꞌne ledo ikko. 4 Maganinkenna Anninke hedo garinni, tenne busha alamenni* gatisankera Yesuusi ninke cubbira yee umosi sayise uyino; 5 hegere hegerera Maganoho ayirrinyu ikkosi. Hamiiꞌni.

6 Kiristoosi eltonni woshshinoꞌne Magano togo rakkine agurtine* wole duduwo macciishshate higginoonniti dhagge ikkitinoe. 7 Hige wolu danchu duduwi dino; ikkirono, kiꞌne qarrisannohunna Kiristoosi daafira kulannoha dancha duduwo shokkisha hasiꞌrannohu mitu manni no. 8 Ikkollana ninke giddonni mittu woy gordunni dirrino sokkaasinchi, ninke dudumboommoꞌnehunni baxxinoha danchu duduwi gede asse duduwiꞌnero rumaminoha ikko. 9 Albaanni kullummoꞌnente gede xaano lede kuleemmoꞌnena, ayino kiꞌne adhitinoonnihu danchu duduwinni baxxinore danchu duduwi gede asse kulannoꞌneha ikkiro rumaminoha ikko.

10 Xa ani woꞌnaalanni noommohu mannunso Maganu ayirrinye afiꞌrateeti? Woy sharramanni noommohu manna hagiirsiisateeti? Xaano manna hagiirsiisanni noommoha ikkiro, Kiristoosi borojjicho diꞌꞌikkoommo yaate. 11 Roduuwa, ani duduwummoꞌnehu danchu duduwi, mannuwiinni dayinoha ikkinokkita affinara hasiꞌreemmo; 12 kuni danchu duduwi Yesuusi Kiristoosi ajuujatenni xawisinoeho ikkinnina, mannu uyinoeha woy mannu rosiisinoeha diꞌꞌikkino.

13 Ayihudete ammaꞌno giddo noommo yannara ani hiittoo manchootiro macciishshitinoonni; Maganu songo buuto qarriseemmohonna* coꞌo asse hunate qodhe kaoommoho; 14 qoleno, annuwaꞌya wogara lowo geeshsha laalaateemmoha ikkoommo daafira, hatte yannara dagaꞌya mereero batinyu ane dume ikkitinorinni roore Ayihudete ammaꞌno giddo dancha gede lophanni noommoho. 15 Ikkollana amaꞌya godowi giddonni fushshinoehunna* eltosinni woshshinoe Magani 16 Kiristoosi daafira kulannoha dancha duduwo dagate duduweemmo gede, Beettosi ane widoonni xawisara hasiꞌri woyite bayichonkonni aye manchi* ledono diamaalamoommo; 17 anera albaanni soqqamaasine ikkite nooriwa Yerusaalameno dihaꞌroommo; hatteentenni Arawete gobba haꞌroommo; hakkiinni, Demaasqo higoommo.

18 Sasu diri gedensaanni, Keefa* laꞌꞌammora Yerusaalame fuloommo; hakkiicho isi ledo 15 barra keeshshoommo. 19 Ikkollana hakkiicho Mootichu rodoo Yaaqoobi agurranna wole soqqamaasine diafoommo. 20 Kuni borreessanni noommoꞌneri kapho ikkinokkita Maganu albaanni kuleemmoꞌne.

21 Hakkuyi gedensaanni Sooriyunna Kilqiyu giddo nooha addi addi qoqqowo haꞌroommo. 22 Ikkollana Yihudaho noo songuwara heedhannori Kiristoosi rosaano hakkuyira albaanni affe diegentinoe. 23 Insa, “Konni albaanni buuto qarrisannonke manchi, xa bashsho coꞌo asse hunara hasiꞌranno ammana daafira kulannoha dancha duduwo sabbakanni no” yinannalla macciishshitino. 24 Hakko daafira, anenni kainohunni Magano guwissino.

2 Hakkiinni 14 diri gedensaanni galagale Yerusaalame fulummo woyite Barnabaasi ledoꞌya no; Titono ledoꞌya haaꞌre haꞌroommo. 2 Hakkira fuloommohu laoommo ajuuja garinniiti; hakkiinni dagate mereero sabbakanni noommoha dancha duduwo ayirraddu roduuwira egensiisummo. Ikkollana dodanni noommohu woy hakkuyira albaanni dodaꞌya mullare ikkite gattannokki gede, hatto assoommohu insa calluwu noowaati. 3 Ane ledo noohu Tito nafa Girikicha ikkirono barcimanno gede diqarrinsoonnisi. 4 Ikkollana kuni coyi kaꞌꞌanno gede assitinori, woꞌmunni woꞌma borojje assidhankera hedde Kiristoosi Yesuusi ledo noonke mittimmanni afiꞌnoommo wolapho qottara yaassanni surte eꞌinore kaphu roduuwaati; 5 ninke kayinni, danchu duduwi halaali kiꞌne giddo kaajje heeꞌrara yine, insa yitannore hili geeshsha* nafa dimacciishshinoommo.

6 Ayirraddu gede assine laꞌnanni roduuwi kayinni anera leddinoehu haaru coyi dino; Maganu manna aana lae mallaadannokki daafira, kuri ayirraddu gede assine laꞌnanni roduuwi konni albaanni ikkitu gedeereno ikkituro anera assitannoeri dino. 7 Ikkollana, Pheexiroosi barcintinorira dancha duduwo duduwara eeggo uyinoonnisinte gede, anerano barcintinokkirira dancha duduwo duduwammora eeggo uyinoonnieta affu; 8 korkaatuno, Pheexiroosi barcintinorira soqqamaasincho ikkara wolqa uyinosi Magani anerano dagate wido ikkitinorira soqqamaasincho ikkammora wolqa uyinoe; 9 qoleno heelliichote gede assine laꞌnanniri Yaaqoobi, Keefanna* Yohaannisi uyinoonnie elto huwattuti ninke daganniwa haꞌneemmo gede, insa kayinni barcintinoriwa hadhara sumuu yitinota leellishate* Barnabaasinna ane qiniiticho angansanni amaddunke. 10 Buxane hambeemmokki gedeno seekkite dhaantinonke; hakku anino diinaggaawe asseemmo coyeti.

11 Ikkollana Keefa* Antsookiya dayi yannara xabbe leeltino soꞌro loosino daafira,* albaanni borooroommosi. 12 Mitu mitu manni Yaaqoobiwiinni daara albaanni, isi dagate wido ikkino manni ledo sagale itanni no; insa dagguta kayinni barcintinori wido ikkitinore waajje ledonsa sagale itanna insawa aana aguri. 13 Gattino Ayihudootino tenne lawisiisate ikkitora isi ledo gutantu; Barnabaasi nafa tenne lawisiisate ikkitora qeelame insa ledo gutami. 14 Ikkollana danchu duduwi halaali ledo sumuu yaanno garinni hadhanni nookkita afummoti, insa baalunku albaanni Keefa* togo yuummo: “Ati Ayihudicha ikkite heedhe Ayihudootu heedhanno garinni ikkikkinni daga heedhanno garinni heeꞌrattoha ikkiro, dagate wido ikkino manni Ayihudootu woga garinni heeꞌranno gede hiitto xixxiiwatto?”

15 Ninke ilama Ayihude ikkinoommorinna dagate wido ikkitino cubbaataammi gede ikkinoommokkiri, 16 mittu manchi keeraaꞌmannohu Muse Seera agadhe ikkikkinni, Yesuusi Kiristoosi ammanatenni calla ikkinota huwantoommo. Hakko daafira, Seera agadhatenni ikkikkinni Kiristoosi ammanatenni keeraaꞌmineemmo gede Kiristoosi Yesuusi ammannoommo; korkaatuno Seera agadhatenni keeraaꞌmannohu mittuno* dino. 17 Ninke Kiristoosi widoonni keeraaꞌma hasiꞌnoommo daafira cubbaataammu gede assine kiirrinkero, cubbo loonseemmo gede assannonkehu Kiristoosiiti yaateni? Horonta hatto yaa diꞌꞌikkino! 18 Konni albaanni ani umiꞌya diigoommoha galagale mineemmoha ikkiro, ani umiꞌya Seera diigeemmoha ikkoommota leellishanni noommo. 19 Korkaatuno, ani Maganoho heeꞌrammora yee seeru widoonni seeraho reyommo. 20 Ani Kiristoosi ledo haqqaho sutame noommo. Konni gedensaanni heeꞌreemmohu ane ikkummokkinni ane ledo mitto ikke heeꞌrannoho Kiristoosiiti. Xa maalunni heeꞌreemmo heeshsho heeꞌreemmohu baxinoehanna anera yee isonooto sayise uyinoha Maganu Beetto ammanatenniiti. 21 Maganu elto mullare asse diagureemmo;* keeraaꞌminannihu seeru widoonni ikkiro, Kiristoosi beebballa reyino.

3 Kiꞌne wodanchitinannikkiri Galaatiyu manna! Yesuusi Kiristoosi haqqaho sutaminoha illeꞌnenni laꞌinoonnihu gede assine xawinsoonniꞌne; ikkina xa togo asse doonsiꞌnehu* ayetiyya? 2 Hanni mitto coye xaꞌmeemmoꞌnena,* qullaawa ayyaana adhitinoonnihu seera agadhitinoonni daafiraatinso macciishshitinoonnire ammantinoonnihuraati? 3 Kageeshshi geeshsha wodanchitinannikkire ikkitinoonni yaate? Maganu ayyaani ledo sumuu yaanno garinni haꞌra hanaffinihu gedensaanni,* maalu hedo garinni guddinanni?* 4 Lowo qarri iillinoꞌnehu mulla beebbaati yaate? Anera hatto dilawannoe. 5 Ayyaana aannoꞌnehunna mereeroꞌne maalale loosannohu isi konne assannohu, seera agadhitinoonni daafiraatinso macciishshitinoonnire ammantinoonnihuraati? 6 Hakkuno, “Abirihaami Yihowa* ammani; ammanasino keeraanchimmate kiirantusi” yinoonni garinniiti.

7 Ammana seekkite cuꞌmidhinori Abirihaami ooso ikkitinota affinoonniti egennantinote. 8 Qullaawu qaali Maganu dagate wido ikkino manna ammanatenni keeraaꞌmitinoonni yaannonsata balaxe afe, “Daga baala ate widoonni maassantanno” yee Abiraamira dancha duduwo balaxe kulino. 9 Hakko daafira, ammana seekkite cuꞌmidhannori ammana noosihu Abirihaami ledo mitteenni maassantino.

10 Muse Seera agadhatenni keeraaꞌmineemmo yite hexxitannori baalu rumantinoreeti; korkaatuno, “Seeru maxaafi xaaxo giddo borreessinoonnire baala woꞌmanka woyite agadhannokkihu baalu rumaminoho” yine borreessinoonni. 11 Qoleno, “Keeraanchu manchi ammanatenni heeꞌranno” yine borreessinoonni daafira, ayino seera agadhatenni Maganu albaanni keeraaꞌmannokkiti egennantinote. 12 Seeru ammanate aana xintaminoha diꞌꞌikkino. Hatteentenni, Maganu qaali, “Seera agadhannohu baalu Seerunni kainohunni lubbotenni heeꞌranno” yaanno. 13 Kiristoosi ninke darga rumaminoha ikke Seeru rumonni keere fushshe wodinonke; korkaatuno, “Haqqaho sutamino manchi baalu rumaminoho” yine borreessinoonni. 14 Kuni ikkinohu Maganu Abirihaami maassiꞌrino maasso Kiristoosi Yesuusi widoonni dagate iillitanno gedeetinna ninkeno ammanankenni qaale eꞌnoonniha qullaawa ayyaana adhineemmo gedeeti.

15 Roduuwa, mannu egenninoha mitto coye lawishsha asse coyiꞌreemmo: Mannu eino sheemaati* nafa mitte hige kaajjihu gedensaanni, ayino diigara woy aanaho ledara didandaanno. 16 Hexxote qaale kulloonnihu Abirihaamiranna sirchisiraati.* Qullaawu qaali lowo mannira coyiꞌnannihu gede asse, “sirchikkira* baalaho” diyaanno. Hatteentenni mittu manchira coyiꞌnannihu gede asse, “sirchikkira”* yaanno; hakku sirchino Kiristoosiiti. 17 Lede yeemmona, 430 diri gedensaanni uyinoonni Seeri, hakkuyira albaanni Maganu eino gondooro diige hexxote qaale huna didandaanno. 18 Ragge adhinannihu seera agadhatenni ikkoommero, hexxote qaali widoonni ikkase gattanno; ikkollana Maganu Abiraamira ragge shaqqillunni uyinohu hexxote qaali widoonniiti.

19 Seera uyinoonnihu mayiraatiyya? Seera lendoonnihu hexxo uyinoonnisi sirchi* daa geeshsha, mannu sao xawo fushshateeti; seera uyinoonnihu sokkaasinete widoonni mittu mereeri manchi angaati. 20 Mittu manchi callu noowa mereerihu dihasiisanno; Maganu qole mittoho. 21 Ikkina, Seeru Maganu uyino hexxo ledo xaada giwannoni? Horonta digiwanno! Heeshsho afiꞌnanni gede assanno seera uyinoonniha ikkoommero, keeraanchimmano seeru widoonni afiꞌnanni. 22 Ikkollana Qullaawa Borro baalanka coye cubbu usuranya assite sayisse uyitino; kuni ikkinohu, Yesuusi Kiristoosi ammanatenni afiꞌnanniha hexxote qaale, ammantannorira uyinanni gedeeti.

23 Ikkollana ammana daggara albaanni, tenne leeltara noo ammana agadhine, seeru agarannanke usuranya ikkineemmo gede sayinse uyinoonninke. 24 Hakko daafira ammanatenni keeraaꞌmineemmo gede, Seeru Kiristoosiwa iillishshanno awuuto* ikkinonke. 25 Xa kayinni hatti ammana daggino daafira, konni kaꞌa awuutote* anga digalleemmo.

26 Isinni Kiristoosi Yesuusi ammantinoonni daafira, kiꞌne baalunku Maganu oosooti. 27 Korkaatuno, cuuantine Kiristoosi ledo mitto ikkitinoonniri baalu Kiristoosi uddidhinoonni. 28 Kiꞌne baalunku Kiristoosi Yesuusinni mitto ikkitinoonnihura, Ayihudichunna Girikichu, borojjichunna borojjicho ikkinokkihu hattono labbaahunna meyate mereero badooshshu dino. 29 Qoleno Kiristoosire ikkitiniro kiꞌne addinta Abirihaami sirchooti;* hexxote qaali garinnino ragiꞌraasinete.

4 Xa ani yeemmoti tenneeti: Ragiꞌranno beetti baalunku coyira mooticha ikkirono, qaaqqu noo woyite borojjichuwiinni baxxannori dino; 2 ikkollana annisi balaxe murino barri daa geeshsha awuuttannorinna towaattannori anga keeshshanno. 3 Hatteente gede, ninkeno qaaqquullu heeꞌnoommo yannara alamete hedora borojje ikkine keeshshinoommo. 4 Ikkollana Maganu murino yanna iillituta, Beettosi soyino; isino meyatenni ilame seeru garinni heeꞌrino; 5 Maganu iso soyinohu ninke oososi gede asse adhe seerunni galtinore wode keere fushsharaati.

6 Xa kiꞌne ooso ikkitinoonni daafira, Maganu Beettisi ayyaana wodaninke giddora soyino; kuni ayyaani “Abba,* Anna!” yaanni woshshanno. 7 Hakko daafira ati xaate beettoho ikkinnina borojjicho diꞌꞌikkootto; beetto ikkittoro qole Maganu ragiꞌraasincho assinohe.

8 Ikkollana konni albaanni Magano affinoonnikki woyite, addinta maganna ikkitinokkirira borojje ikkitine heedhinoonni. 9 Xa kayinni Magano affinoonni; Maganuno kiꞌne afinoꞌne; ikkina wolqiweelunna tidhinokki coyiwa higanna galagaltine konni coyira borojje ikka mayira baxxini? 10 Barruwanna aganna, wogganna dirra qorophitine agartine ayirrissinanni. 11 Kiꞌneri yaachishannoe; korkaatuno, kiꞌnera yee daafuroommo daafuri mullawa gatanno yee waajjeemmo.

12 Roduuwa, ane gede ikkitinara huucciꞌreemmoꞌne; korkaatuno anino bashsho kiꞌne gedeeho. Kiꞌne anera assitinoonni bunshe dino. 13 Dhiwamaꞌya, umo kiꞌnera dancha duduwo duduweemmo faro fantinoeta affinoonni. 14 Dhibbiꞌyanni kainohunni qarrantinoonniha ikkirono dimishshinoonnie woy didiqattinoonnie;* hatteentenni Maganu sokkaasinchi woy Kiristoosi Yesuusi gede assitine haadhinoonnie. 15 Konni albaanni nooꞌne hagiirri hiikka higi? Dandiinanniha ikkoommero hakkawaro illeꞌne nafa fushshitine uyitinannieta dihuluullameemmo. 16 Ikkina, xa kiꞌnera halaale coyiꞌroommo daafira diina ikkummoꞌne? 17 Mitu manni kiꞌne insawa qoꞌlara sharramanno; hatto assannohu danchare hede ikkikkinni kiꞌne anewiinni bade insa seekkitine haꞌrunsitinanni gede assateeti. 18 Ikkollana mittu manchi ani ledoꞌne noommo woyite calla ikkikkinni woꞌmanka woyite kiꞌne diinaggaawe hasannohu danchare hede ikkiro faayyaho; 19 baxeemmo oosoꞌya, Kiristoosi giddoꞌne leella geeshsha* kiꞌne daafira game galagalte amadde nooe. 20 Kiꞌne ikkito gara hawissinoe daafira, ledoꞌne heeꞌre shaqqillunni* hasaawisoommoꞌnero tashshi yaannoe.

21 Kiꞌne Muse Seerinni gala hasidhinanniri hanni kulleꞌꞌe; Seeru yaannore dimacciishshitinanni? 22 Lawishshaho, Abirihaamira lame ooso noosita, mittu borojjicho iltinoha, mittu qole borojjicho ikkitinokki mancho iltinoha ikkinota borreessinoonni; 23 ikkollana, borojjicho iltinohu wole ooso ilantanno garinnilla* ilamino; borojjicho ikkitinokki mancho iltinohu kayinni hexxote qaali garinni ilamino. 24 Kuri meenti lamu qaalu gondoorira lawishsha ikkino daafira, kuni coyi lawishshu tiro afiꞌrinoho; mitto qaalu gondooro eꞌnoonnihu Siina Ilaali aanaati; konni gondoori hunda noo ooso baala borojjeho; kuni gondoori qole Aggaarira lawishshaho. 25 Aggaari Arawete gobbara noohu Siina Ilaalira lawishshaho; ise xaa yannara noo Yerusaalame labbanno; korkaatuno, Yerusaalame oosose ledo borojjimmate giddo no. 26 Iimi Yerusaalame kayinni diborojjichote; qoleno ise amankeeti.

27 Korkaatuno togo yine borreessinoonni: “Ati ilattakkiti gaana mancho hagiidhi; ati gamaaꞌmite egennoottakki mancho qoonqokki naggi assite ilillisi; mayira yiniro, minaanni noose manchonni roore facci assine agurroonni mancho ooso batidhino.” 28 Konnira roduuwa, kiꞌneno Yisaaqi gede hexxote oosooti. 29 Ikkollana hakkawaro wole ooso ilantanno garinni* ilaminohu ayyaanunni ilaminoha qarrisa hanafinte gede, xaano hakku coyi ikkanni no. 30 Qullaawu qaali kayinni mayyaanno? “Borojjichote beetti borojjicho ikkitinokki mancho beetti ledo horonta ragiꞌrannokki daafira, borojjicho beettise ledo fushshite shorri” yaanno. 31 Konnira roduuwa, ninke borojjicho ikkitinokki mancho oosooti ikkinnina, borojjichote ooso diꞌꞌikkinoommo.

5 Kiristoosi keere fushshinonkehu togoo wolapho afiꞌneemmo gedeeti. Hakko daafira kaajjitine uurre; galagaltine borojjimmate qambari giddora eꞌine usurantinoonte.

2 Ani Phaawuloosi yeemmoꞌneti, barcintinanniha ikkiro Kiristoosi mittoreno dikaaꞌlannoꞌne. 3 Mittu mittunku barcimanno manchira, baalanka Seera agadha gidde ikkitannosita galagale kuleemmosi. 4 Kiꞌne seeru widoonni keeraaꞌmate woꞌnaaltinanni daafira, Kiristoosiwiinni baxxitinoonni; eltosiwiinnino xeertidhinoonni. 5 Ninke kayinni hexxineemmota ammanatenni afiꞌnanni keeraanchimma ayyaanunni quqquxamme agadhineemmo. 6 Kiristoosi Yesuusi ledo mittimma noonsarira barcimano barcima hoogano leddannori dino; hasiissannoti baxillunni leeltanno ammanaati.

7 Alba dancha gede doddinanni heedhinoonnire, halaaleho hajajama agurtinanni gede assiꞌnehu ayeti? 8 Togoo aduulshi woshshanni nooꞌne Maganiwiinni dayinoha diꞌꞌikkino. 9 Shiima irsho lixe gudisse kayissanno. 10 Mootichu ledo mittimma nooꞌnerira anetenni baxxitino hedo heedhannoꞌnekkita afoommo; qarra qalanni nooꞌnehu kayinni, isi ikkihano ikkiro hasiisannosi qoricha adhanno. 11 Roduuwa, ani xaano barcima hasiissanno yee sabbakeemmoha ikkoommero mannu xiiwannoeni? Hatto ikkoommero qarru haqqi* guficho diꞌꞌikkanno. 12 Qarra qalanni nooꞌne manni barcima agurina hasiꞌriro mayira mureeyye diꞌꞌikkanno!*

13 Roduuwa, kiꞌne woshshantinoonnihu wolaphitinaraati; ikkollana tenne wolapho maalu yorto wonshiꞌrate horoonsidhinoonte; hatteentenni mimmitoho baxillunni soqqamme. 14 Korkaatuno Seeru baalunku, “Olliichokki* umikki gede assite baxi” yitannote mitte hajajonni gumulamino.* 15 Kiꞌne kayinni mimmitiꞌne ledo diddishamanna itama agura hoogginiro, mimmitoꞌne adhitine baꞌinannina qorophe.

16 Ani yeemmoꞌneti kayinni, woꞌmanka woyite ayyaanunni heedhe; hatto assitiniro maalu yorto horonta diwonshitinanni. 17 Maalu hasatto ayyaanu hasatto ledo, ayyaanu hasatto qolte maalu hasatto ledo sumuu diyitanno; kuri insa insanaawa giwantanno; konnira hasidhinoonnire assa didandiitinanni. 18 Qoleno, ayyaanu massagannoꞌneha ikkiro seeru anga diheedhinoonni.

19 Maalu loosi egennaminoho; hakkuno: foorrete,* battete, mancaꞌꞌa ikkitooti,* 20 kaphu maganna magansiꞌrate, agaanintete loosooti,* manna giwate, gibbote, hinaasate, hanqe boolaqiꞌrate, heewote, gosoomate, babbadamate, 21 dhiibbete, dimbate, jila jille ikkinannikkita ikkatenna* woleno togoo coye assate. Konni coyi daafira albaanni qorophisiisummoꞌnente gede, xaano qorophisiiseemmoꞌne; togoo coye assitannori Maganu Gashshoote diragidhanno.

22 Ayyaanu laalo kayinni baxilleho, hagiirreho, keereho, cincate, shaqqilleho, danchummate, ammanate, 23 joongilleho, meessaneeto qeeꞌlate. Togoore hoolanno seeri dino. 24 Qoleno, Kiristoosi Yesuusire ikkitinori maala busha hasattosinna yortosi ledo haqqaho suttino.

25 Ayyaanunni heeꞌneemmore ikkinummo geeshsha, ayyaanu massagannanke woꞌmanka woyite amanyootunni millinso. 26 Mimmitonke heewote kakkayinsanninna kuꞌu koꞌonnira dhiibbifantanni mulla haafa booꞌninoonke.

6 Roduuwa, mittu manchi afikkinni gara ikkitinokki doogo haꞌriro, ayyaanaamittetenni gikki yitinoonniri kiꞌne, togoo mancho shaqqillunni raga qolate woꞌnaalle. Ikkollana kiꞌneno jifantinannikki gede qorophe. 2 Mimmitunniha ayirranno duha duqqe; hakko garinni Kiristoosi seera wonshitinanni. 3 Mittu manchi gariha ikkikkinni ani gariho yee hedannoha ikkiro umosi doganni no. 4 Hatteentenni mittu mittunku manchi umisi looso fonqole layiꞌro; hatto assiro, isonooto wolu manchi ledo heewisiisikkinni umisi loosinni hagiidhannore afiꞌranno. 5 Korkaatuno, mittu mittunku umisi duha duqqanno.

6 Qoleno Maganu qaale rosanni* noohu baalu, hakkonne roso rosiisannosi* manchi ledo dancha coye baala beeqqo.

7 Sodhinoonte: Magano arrassa didandiinanni. Mittu manchi wixiꞌrireno wixiꞌriro, hakkonne wixiꞌrinore mixxanno; 8 korkaatuno, maalisira yee wixiꞌrannohu maalisinni reyo* mixxanno; ayyaanaho yee wixiꞌrannohu kayinni ayyaanunni hegere heeshsho mixxanno. 9 Ceeꞌmine* agura hoongummoro yanna iillituro mixxineemmo daafira, hexxo mudhine dancha looso loosa agurroonke. 10 Konni daafira, faro* afiꞌnummo geeshsha baalunku mannira roorenkanni ammanatenni fiixxannonkerira danchare assino.

11 Angaꞌyanni keeꞌmadda fidallanni borreessoommoꞌne gara laꞌe.

12 Manna hagiirsiisa hasidhannori baalu* barcintinanni gede giddeessitannoꞌne; hatto assitannohu Kiristoosihu qarru haqqira* yiteenna xiimbanninsakki gedeeti. 13 Insa barcintinara hasidhannohu kiꞌnenni* naaxxitara yiteeti ikkinnina, barcintinori insa nafa Seera diagadhitino. 14 Mootichinke Yesuusi Kiristoosihu qarru haqqinni* agurranna wolurinni horo naaxxa dihasiꞌreemmo; isinni kainohunni ane hedora alame reyitino;* alamete hedora qole ani reyommo. 15 Kaaꞌlitannoti haaro kalaqama ikkate ikkinnina barcimano barcima hoogano kaaꞌlitannori dino. 16 Tenne wodho garinni amanyootunni heedhannorira baalaho yaano Maganu Israeelera keerunna maaro ikkitonsa.

17 Yesuusi borojjicho ikkoommota leellishanno malaati bisiꞌya aana noo daafira, xaate ayino qarrisoonkeꞌꞌe.

18 Roduuwa, giddoꞌne dancha ikkitino daafira Mootichinke Yesuusi Kiristoosi elto kiꞌne ledo ikkito. Hamiiꞌni.