LAYINKI QORONTOOSI

1 Maganu fajjonni Kiristoosi Yesuusi soqqamaasincho ikkoommohu ani Phaawuloosinna rodiinke Ximootewoosi, Qorontoosi katamira heedhannote Maganu songoranna Akaayya woꞌmaho heedhanno qullaawootira baalaho:

2 Maganu Anninkenna Mootichu Yesuusi Kiristoosi eltonna keeri kiꞌne ledo ikko.

3 Mararrotenna maarote Anni, shesho baalate Magani, Mootichinke Yesuusi Kiristoosi Maganinna Anni ayirro; 4 ninke Maganuwiinni afiꞌneemmo sheshonni,* duuchunku gari qarri* giddo noore sheshifachisha dandiineemmo gede, isi iillannonke qarri* baalunku giddo sheshifachishannonke. 5 Kiristoosira yine adhineemmo qarri batiꞌra ikkinonte gede, Kiristoosi widoonni afiꞌneemmo sheshono batiꞌrate. 6 Ninke qarrammeemmo woyite* kiꞌne sheshonna gato afidhinanni; ninke shesho afiꞌnummoro kayinni, ninkera iillino qarri iillannoꞌne woyite kaajjitinanni gede kaaꞌlitannoꞌne shesho afidhinanni. 7 Kiꞌne daafira noonke hexxo kaajjadote; korkaatuno, ninke ledo qarra gutantininte gede, sheshono gutantinannita anfoommo.

8 Roduuwa, Iisiyu qoqqowira amadinonke qarra affinara hasiꞌneemmo. Wolqankera aleenni ikkino qarri amadinonke daafira, ganteemmo yine nafa dihendoommo. 9 Isinni, reyote yoo yinoonninkeha lawinonke. Kuni ikkinohu, umonke ikkikkinni reyitinore kayisanno Magano addaxxineemmo gedeeti. 10 Isi togoohu buutote qarrinni kainohunni reyine hoongoommore gatisinonke; qoleno gatisannonke; konni kaꞌano isi gatisannonketa hexxineemmo. 11 Kiꞌneno ninke daafira Magano eeggifattine huuccitine kaaꞌlitinankera dandiitinanni; hatto assaꞌne, ninke lowo manni huuccinonke huuccattonni Maganu elto afiꞌneenna lowo manni iso galatanno gede assitanno.

12 Ninke naaxxineemmohu konne coye kuꞌlineeti: Alamete aana hakko iso kiꞌne mereero qullaambetenninna Maganuwiinni afiꞌnoommo sumbenni heeꞌnoommota tiiꞌꞌinke farciꞌranno; kuni ikkinohu kayinni Maganu eltonniiti ikkinnina alamete hayyonni diꞌꞌikkino. 13 Nabbawanna* huwata dandiitinannire ikkinnina wolere diborreessineemmoꞌne; albillitteno konne coye woꞌmunni woꞌma* huwattinanni yee hexxeemmo; 14 kiꞌne giddo mitu ninke kuꞌlitine naaxxa dandiitinannita huwattinoonninte gede, ninkeno Mootichinke Yesuusi barra kiꞌne kuꞌline naaxxineemmo.

15 Konne coye buuxoommo daafira, layinkimeeshsho hagiidhitinanni gede,* umo kiꞌnewa daammora hedoommo; 16 Meqedooniya haꞌreemmo woyite hakkaanni hige kiꞌne lae saꞌꞌammora hedoommo; qoleno Meqedooniyunni higanni Yihuda haꞌreemmo woyiteno kiꞌnewa dayenna geegiissitinaera hedoommo. 17 Konne coye hedoommohu mulla haafa yee lawiꞌne? Woy mitto coye assate hedeemmo woyite aneneeti injo calla hedanni, “Ee, ee” yee hakkiinni “Deeꞌni, deeꞌni” yeemmoha lawiꞌne? 18 Maganu ammanaminoha ikkinonte gede, ninke kiꞌnera coyiꞌneemmorino halaaleho. “Ee” yine kaꞌne “Deeꞌni” diyineemmo. 19 Ninke yaano ani, Silwaanoosinna* Ximootewoosi sabbankummoꞌnehu Maganu Beetti Yesuusi “Ee” yee kae “Deeꞌni” yaannoha diꞌꞌikkino; hatteentenni isi “Ee” yiinori woꞌmanka woyite “Ee” ikkanno. 20 Maganu uyino hexxo aye geeshsha batinye ikkiturono, isi widoonni “ee” ikkitino. Hakko daafira, ninke Maganoho ayirrinye uyineemmo gede, isi widoonni Maganoho “Hamiiꞌni” yineemmo. 21 Ikkollana ninkeno kiꞌneno Kiristoosire ikkinoommota buuxisinonkehunna buurinonkehu Maganoho. 22 Qoleno isi sumuda sumudinonke; daanno coyira taje ikkannore* uyinonke; hakkuno, wodaninkera nooho qullaawa ayyaanaati.

23 Xaa geeshsha Qorontoosi dayommokkihu kiꞌne roore dadillitinannita giweeti; tini halaale ikkitinota Maganu afino. 24 Kaajjitine uurritinoonnihu umiꞌne ammananni ikkino daafira, ninke kiꞌne hagiirrira ledoꞌne loonseemmoreeti ikkinnina ammanaꞌnera mootooꞌmineemmore diꞌꞌikkinoommo.

2 Galagale kiꞌnewa dayemmo woyite dadillisannori heeꞌrannokki gede murciꞌroommo. 2 Korkaatuno hagiirsiissinanniere kiꞌne dadillisummoro ane ayi hagiirsiisannoe? 3 Konni albaanni sokka borreessoommoꞌnehu, dayemmo woyite hagiirsiisa hasiissannoꞌne manni dadillissinanniekki gedeeti; ane hagiirri kiꞌne woꞌmunku hagiirre ikkinota seekke afoommo. 4 Lowo qarrinninna wodanu yaaddonni, hattono lowo hindiiddonni borreessoommoꞌnehu yaaddinara yee ikkikkinni lowo geeshsha baxeemmoꞌneta affinaraati.

5 Dadillisannore assinohu heeꞌriro, isi ane ikkikkinni mito geeshshano ikkiro kiꞌne baalanka dadillisino; hatto yoommohu kayinni coye iibbabbishate diꞌꞌikkino. 6 Togoo manchira, kiꞌne giddonni rooru seejjitinoonnisi seejjo ikkitannosi; 7 xa kuni manchi quwa sae dadille hexxo mudhannokki gede, iso shaqqillunni gatona yaanna sheshifachisha hasiissannoꞌne. 8 Hakko daafira isi baxxinannisita afanno gede assitinara eeggo yeemmoꞌne. 9 Qoleno borreessoommoꞌnehu baalunku coyira hajajantinannita leellishshinannironna teꞌee buuxate yeeti. 10 Aye manchino assino sao ikkitutano ikkituro, kiꞌne gatona yitinisiro anino gatona yeemmosi. Isinni, baalanka coye Kiristoosi albaanni gatona yoommohu (gatona yoommori heeꞌriro) kiꞌnera yeeti; 11 hatto assineemmohu, Sheexaanu eanno faro afiꞌrannokki gedeeti;* korkaatuno isi xagarro* anfoommo.

12 Kiristoosi daafira kulannoha dancha duduwo duduwammora Xiroaasi iillummo yannara, Mootichu loosira waalchu faꞌnaminoe; 13 ikkollana hakkiicho rodiiꞌya Titonni xaadoommokki daafira wodaniꞌya* fooliishsho hoogino. Konnira, hakko noore keerunni yee Meqedooniya haꞌroommo.

14 Qeellete dira diramme Kiristoosi ledo haꞌneemmo gede asse woꞌmanka woyite massagannonkenna egennosi suꞌniilli ninke widoonni base baalate tanni yaanno gede assanno Maganira galatu iillosi! 15 Gatote doogoranna baote doogora noorira Kiristoosi daafira dudumbeemmori ninke Maganu suꞌniilleeti; 16 baote doogora noorira reyote widira massannoho reyote fooleeti;* gatote doogora noorira kayinni heeshshote widira massannoho heeshshote suꞌniilleeti. Togoo soqqanshora ikkado ikkannohu ayeti? 17 Ninkeeti; korkaatuno ninke lowo manni gede Maganu qaale daddalleemmore diꞌꞌikkinoommo;* hatteentenni Maganu soyinonkere ikkinoommo daafira sumbetenni coyiꞌneemmo; hatto assineemmohu Maganu albaanni Kiristoosi ledo kaaꞌlammeeti.

3 Ikkadda ikkinoommota leellishate galagalle ninkeneeto kiꞌnera egensiisa hasiissannonke? Woy mitu manni assannohu gede, tajete woraqata kiꞌnera shiqishiꞌra woy kiꞌnewiinni adha hasiissannonke? 2 Mannu baalu afinotinna nabbawannoti wodaninkera borreessantino sokkanke kiꞌne umoꞌneeti. 3 Korkaatuno kiꞌne, soqqamaano ikkinoommori ninke widoonni borreessantinoonnire Kiristoosi sokka ikkitinoonniti xabbe leeltino; tenne sokka qalametenni ikkikkinni heeshshote Magani ayyaaninni, boncoonni kinna aana ikkikkinni wodanaho borreessinoonni.

4 Kiristoosi widoonni Maganu albaanni togoo ammana noonke. 5 Uminkenni ikkadda ikkinoommohu gede assine dihendeemmo; hatteentenni hasiisanno deerrinni ikkadda ikkineemmo gede assinonkehu Maganoho; 6 isi haaru gondoori soqqamaano yaano borreessinoonni Seerira ikkikkinni ayyaanu soqqamaano ikkineemmo gede ikkadda assinonke; borreessinoonni Seeri reyo abbanno; ayyaanu kayinni heeshshonniha assanno.

7 Reyo abbannohunna kinchu aana borreessinoonni Seeri, Israeelete ooso albisi ayirrinyinni kainohunni Muse alba seekkite laꞌꞌa hoogga geeshsha ayirrinyunni yaano baꞌꞌanno ayirrinyinni dayiro, 8 ayyaanu soqqansho isinni hakkiinni roore ayirrado diꞌꞌikkitino? 9 Manna busha assitannoti Seeru soqqansho ayirrado ikkituro, keeraaꞌminanni gede assitanno soqqansho hiitto roore ayirrado ikka hoogganno? 10 Isinni, roorino ayirrinye afiꞌrinohu dayino daafira alba ayirrinyu noosihu ayirrinyesi hoogino. 11 Baꞌꞌannohu nafa ayirrinyunni dayiro, kaajje heeꞌrannohu hakkiinni roorino ayirrinye hiitto diafiꞌranno?

12 Togoo hexxo noonke daafira ruxxi yinummokkinni coyiꞌneemmo; 13 qoleno ninke, Israeelete ooso hakkonni baꞌꞌanno coyi gawalo laꞌannokki gede Muse albasi hoccunni diphanno woyite assannore diassineemmo. 14 Ikkirono insara wodaninsa dillaawino. Techo geeshsha akkala gondooro nabbambanni woyite hakku hocci diwinonsa gedeenni no; korkaatuno hakku hocci hoꞌlannohu Kiristoosi widoonni callaati. 15 Isinni techo geeshsha Muse maxaaffa nabbambi kiiro wodaninsa hoccunni diwamino gedeenni no. 16 Ikkollana mittu manchi Yihowawa* higiro hakku diwino hocci hoꞌlanno. 17 Yihowa* Ayyaanaho; Yihowa* ayyaani noowa qole wolapho no. 18 Ninke baalunku diwaminokki albinni hincilaallote gede Yihowa* ayirrinye xawinseemmo. Hatto assineemmo woyite, hakko dana lawate ayirrinyuwiinni ayirrinyunniwa soorrammeemmo; konni garinni Ayyaana ikkinohu Yihowa* assinketa ikkineemmo.

4 Konnira Maganu maarinonke maaro widoonni tini soqqansho noonke daafira hexxo dimudhineemmo. 2 Saalfachishannoha maaxamino coye agurroommo; xagarranni diheeꞌneemmo; qoleno Maganu qaale dikarsiinseemmo; hatteentenni, halaalu xawanno gede assine, Maganu albaanni mannu baalunku tiia baxisanno garinni ninkeneeto ikkadda assine shiqinsheemmo. 3 Dudumbeemmohu danchu duduwi goꞌlinoha ikkiro nafa goꞌlinohu baꞌannoriraati; 4 Maganu lawishsha ikkinohu Kiristoosire kulannohu ayirradu danchu duduwi xawaabbi xawannonsakki gede, tenne alame* magani ammaninokki manni surre ballisino. 5 Sabbankeemmohu Yesuusi Kiristoosi Mooticha ikkinotanna ninkeno Yesuusira yine kiꞌnera borojje ikkinoommotaati ikkinnina uminke daafira diꞌꞌikkino. 6 Korkaatuno, “Tunsichu giddo xawaabbu xawo” yiinohu Maganoho; konnira isi Kiristoosi albi widoonni, dhagge ikkitannoti Maganu egenno xabbannonke gede, wodaninkera xawaabba xawisino.

7 Ikkollana mannu wolqara aleenni ikkitino wolqa ninketa ikkitukkinni Maganunnita ikkitinoti leeltanno gede, tini muxxe jiro doru uduunnichi giddo noonke. 8 Ragu baalinni addi addi qarri iillinkerono, millo miliqqo dihoongeemmo; ragu baalu tunsinkerono fulleemmo furcho dihoongeemmo;* 9 xiimbinkerono tunge diagurroonninke; yaaddo amaddunkerono* dibaꞌnoommo. 10 Yesuusi heeshsho ninke mannimma aana leeltanno gede, woꞌmanka woyite Yesuusa amadihu gedeeha shaara dandaanno qarra mannimmankenni duqqine heeꞌneemmo. 11 Yesuusi heeshsho reyitanno mannimmanke aana leeltanno gede, ninke lubbote heeꞌnoommori Yesuusira yine barru baala reyote ledo gaarammeemmo. 12 Konni daafira ninke aana reyo, kiꞌne aana kayinni heeshsho loossanni no.

13 “Ammanoommo; hakko daafira coyiꞌroommo” yine borreessinoonni; ninkerano hattoo ammana noonkehura* ammanneemmo; konnira coyiꞌneemmo; 14 Yesuusa reyotenni kayisihu ninkeno Yesuusi ledo kayisannonketanna kiꞌne ledo mitteenni albisira shiqishannonketa anfoommo. 15 Kuni baalu coyi ikkinohu kiꞌnera yineennaati; qoleno lowo manni Magano galatanninna ayirrisanni noo daafira, batidhino elto ledde batidhanno gedeeti.

16 Konni daafira hexxo dimudhineemmo; gobbayidi mannimmanke jaabbanni hadhannoha ikkirono, giddoyidi mannimmanke kayinni barru barrunku haarooꞌmitanni hadhannota horo dihuluullammeemmo. 17 Korkaatuno iillannonke qarri* shiima yanna keeshshannohanna shota ikkirono, yannate kiiro roore lexxanni lexxanni haꞌrannoha hegere ayirrinye abbannonke; 18 ninke illete leellannore ikkikkinni illete leellannokkire illachinsheemmo. Korkaatuno illete leellannori shiima yannalla keeshshanno; illete leellannokkiri kayinni hegereho.

5 Uulla mininke kuni dunkaani diigamiro, mannu anganni minnoonni mine ikkikkinni Maganuwiinni gordoho hegere mine afiꞌneemmota anfoommo. 2 Gordu minenke* uddiꞌrate lowo geeshsha quqquxammanni konni mini giddo urranni heeꞌnoommo; 3 konnira, iso uddiꞌneemmo woyite mulloota diꞌꞌikkineemmo. 4 Isinni, konni dunkaani giddo heeꞌnoommori ninke duhu ayirreennanke urranni heeꞌnoommo; reyannohu bayicho heeshshonnihu amadanno gede, konne dunkaana fushshe hoola ikkikkinni gordu mine uddiꞌra hasiꞌneemmo. 5 Konni coyira qixxeessinonkehu Maganoho; daanno coyira ayyaana taje* asse uyinonkehuno isooti.

6 Hakko daafira tenne horonta dihuluullammeemmo; qoleno minenke ikkitinote tenne mannimmanni heeꞌnoommo geeshsha, Mootichu ledo heeꞌnoommokkita anfoommo; 7 heeꞌneemmohu* ammanatenniiti ikkinnina laꞌꞌatenni diꞌꞌikkino. 8 Ikkollana ninke horonta dihuluullammeemmo; mannimmankewiinni baxxine qaenke Mootichunniwa assiꞌra doodhineemmo. 9 Konni daafira, isi ledo heeꞌnummorono heeꞌra hoongummorono mixonke iso hagiirsiisate. 10 Korkaatuno mittu mittunku maalunni heeꞌre loosinohu danchu woy bushu coyira, loosisi garinni mixxanno gede ninke baalunku Kiristoosihu yoote barcimi albira shiqa* hasiissannonke.

11 Mooticha waajja hasiissannonketa anfoommo daafira, mannu coyiꞌneemmore adhanno gede ammansiisate woꞌmanka woyite sharrammeemmo; Maganu kayinni seekke egenninonke.* Kiꞌne tiiꞌꞌino ninke hiittooreetiro seekkitine affinanni gede kaaꞌlinoꞌne yee hexxeemmo. 12 Ninke ikkadda ikkinoommota galagalle kiꞌnera kuꞌlinanni heeꞌnoommoha diꞌꞌikkino; hatteentenni wodanu giddo noore ikkikkinni gobbaanni leellannore kuꞌlite naaxxitannorira dawaro qola dandiitinanni gede, ninke kuꞌlitine naaxxitinara kakkayinsanni heeꞌnoommoꞌne. 13 Surre fayya hoongummoro Maganoho yineeti; surre fayyo ikkinummoro kayinni kiꞌnera yineeti. 14 Mittu manchi baalunkura reyinota huwantoommo daafira, Kiristoosi baxilli xixxiiwannonke; korkaatuno baalunku balaxe reyino. 15 Lubbote noorino xaate uminsara heeꞌra agurte insara yee reyinohuranna reyotenni kainohura heedhanno gede, isi baalunkura yee reyino.

16 Konnira xaate mitto manchono mannu hedo garinni* dilaꞌneemmo. Alba Kiristoosi mannu hedo garinni* laꞌnoommoha ikkirono, xaate iso hakko garinni horonta dilaꞌneemmo. 17 Hakko daafira aye manchirano Kiristoosi ledo mittimma heedhusiro, isi haaro kalaqamaati; akkalu coyi saino; kune haaru coyi dayino! 18 Ikkollana baalunku coyi dayinohu Kiristoosi widoonni isiniiti ledo araarsinonkehunna araarsate soqqansho uyinonke Maganiwiinniiti; 19 hatto yaa Maganu Kiristoosi widoonni alame isiniiti ledo araarsino; saonsano dikiirino yaate; ninkera qole araarsate sokka eeggo uyinonke.

20 Konnira ninke Kiristoosi lekkinse loonseemmo riqiwaanooti;* Maganu ninke widoonni qole manna huuccanni noohu gedeeti. Kiristoosi riqimbe loonseemmore ikkinoommo daafira, “Maganu ledo araaramme” yine huuccineemmo. 21 Ninke Maganu albaanni keeraano ikkinammora, cubbo loose egenninokkiha, Maganu ninkera cubbu kakkalo assino.

6 Isi ledo mitteenni loonseemmore ikkinoommo daafira, Maganu elto adhitinihu gedensaanni mulla huntinannikki gede huucciꞌneemmoꞌne. 2 Korkaatuno isi, “Eltote yannaꞌyara macciishshoommohe; gatote barrano kaaꞌloommohe” yiino. Kune baxxitinoti eltote yanna xaati. Gatote barrino xaati.

3 Soqqanshonke mishantannokki gede, aye garinnino guficho ikkannore diassineemmo; 4 hatteentenni baalunku coyinni Maganu soqqamaano ikkanke leellinsheemmo; hatto assineemmohu lowo coye cincineeti; qarra, hoonge, shetto, 5 gannanninketa, usura, gaaronna daafursanno looso dandiine hattono goxicho hoonge gallenna sagale hoonge qatummeeti; 6 Maganu soqqamaano ikkinoommota coꞌimmatenni, egennotenni, cincatenni, shaqqillunni, qullaawu ayyaaninni, goowi aliha ikkinokki baxillinni, 7 halaale coyiꞌnenna Maganu wolqanni leellinsheemmo; qiniiticho angaranna* guracho angara* keeraanchimmanniha olu uduunne amaxxine, 8 ayirrinyeno ikko shollinye, minshanninketano naandanninketano dandiine Maganu soqqamaano ikkanke leellinsheemmo. Halaalanyoota ikkinummorono, soꞌrisiisaanote gede assine kiirroonninke; 9 egennammoommore ikkinummorono, diegennantinoreeti yinoonninke; reyinoommore lambummorono,* kune lubbotenni heeꞌnoommo; qorichinshinkerono* direyinoommo; 10 dadillaammaho yininkerono woꞌmanka woyite hagiirraammaho; buxanete yininkerono lowo manna dureeyye assinanni heeꞌnoommo; mitturino noonkekkire lambummorono baalunkuri noonke.

11 Qorontoosi roduuwa, xawinse coyiꞌnoommoꞌne;* wodanankeno halashshine fannoommoꞌne. 12 Ninke baxillenke diqankoommoꞌne; kiꞌne kayinni baxilleꞌne qakkinoonninke. 13 Oosoꞌya gede asse coyiꞌreemmoꞌnena kiꞌneno ninke assinummonte gede, wodanaꞌne halashshitine fanne.

14 Ammantinokkiri ledo doogimale* waaxantinoonte.* Keeraanchimma bunshete* ledo mayi xaadooshshe afidhino? Woy xawaabbaho tunsichu ledo mayi guti no? 15 Qoleno Kiristoosinna Beelihoori* mereero mayi sumumme no? Woy ammaninohura* ammaninokkihu ledo mayi guti noosi? 16 Maganunnihu qullaawu mini kaphu maganna ledo mayi sumumme afiꞌrino? Korkaatuno ninke heeshshote Maganiho qullaawa mineeti; Maganuno, “Insa mereero heeꞌreemmo; mereeronsa haꞌrameemmo; ani Maganonsa ikkeemmo; insano mannaꞌya ikkitanno” yiino. 17 “‘Konnira mereerinsanni fultine baxxe’ yaanno Yihowa;* ‘batte ikkinoreno kissinoonte’”;* “‘anino haaꞌreemmoꞌne.’” 18 “‘Ani anna ikkeemmoꞌne; kiꞌneno anera labballonna seenne ooso ikkitinannie’ yaanno Woꞌmanka Dandaanno Magani Yihowa.”*

7 Hakko daafira baxeemmo jaallaꞌya, tini hexxo noonke daafira maalanna ayyaana batteessanno coyi baaluwiinni umonke keereensiꞌno; qoleno Magano waajjatenni qullaambenke guuta assiꞌno.

2 Wodanaꞌne fannenke.* Ninke mittono dimiincoommo; ayeno digawajjinoommo; aye manchireno donge diadhinoommo. 3 Togo yoommohu kiꞌne busha assammora yee diꞌꞌikkino. Alba kulummoꞌnente gede, heeꞌnummorono reyinummorono kiꞌne wodaninke giddo ledonke heedhinoonni. 4 Kiꞌnera ruxxi yuummokkinni coyiꞌra dandeemmo. Kiꞌnenni lowo geeshsha naaxxeemmo. Lowo geeshshano jawaatoommo; qarrinke baalu giddono hagiirriꞌya baete.

5 Meqedooniya iillinummo yannara, ragu baalunni qarru iillinonke ikkinnina mannimmanke* fooliishsho diafidhino; gobbaanni mannu giwinonke, giddoonni yaaddo amaddinonke. 6 Ikkollana dadillitinore sheshifachishanno Magani Tito daanni sheshifanteemmo gede assinonke; 7 shesho afiꞌnoommohu Tito dayino daafira calla ikkikkinni, isi kiꞌnewiinni afiꞌrino sheshonniiti; isi galagale dayi yannara ane qalli yitinoonnita, lowo geeshsha dadillitinoonnitanna anera yaaddinannita* kulinonke; konnira albinni roore hagiidhoommo.

8 Borreesse soommoꞌne sokkanni dadillisoommoꞌneha ikkiro nafa, tennera digaabbeemmo. Umo gaabboommoha ikkirono, sokka dadillissinoꞌnehu shiima yanna calla ikkinota huwatoommo daafira, 9 xa hagiidhoommo; hagiidhoommohu dadillitinoonni daafira ikkikkinni dadillaꞌne maaro eꞌinanni gede assitinoꞌnehuraati. Dadillitinoonnihu Maganu hedo garinniiti; hakko daafira ninke yinoommori digawajjinoꞌne. 10 Maganu hedo garinni dadilla gatote widira massitanno maaro afiꞌnanni gede assitanno; tini qolte digaabbissannote; tenne alame dadilli kayinni reyo abbanno. 11 Maganu hedo garinni dadillaꞌne loosoho kakkayissinoꞌne gara laꞌe! Kiꞌneneeto keereensidhinanni gede assitinoꞌne; qoleno hiittoo hanqo, hiittoo waajja, hiittoo hixamanya, hiittoo laala giddoꞌne kalaqqinoro laꞌe! Ee soꞌroꞌne taashshidhinanni gede kakkayissinoꞌne. Konni coyinni fayyaaleeyye ikkitinoonnita duuchunku garinni leellishshinoonni. 12 Sokka borreessoommoꞌnehu sao assino manchira woy sao assinoonnisi manchira yee diꞌꞌikkino; hatteentenni ninkera hajajamate diinaggaawaꞌne kiꞌnewanna Maganu albaanni xabbe leeltanno gedeeti. 13 Ninkeno sheshifantoommohu iseraati.

Sheshifantoommotano agurranna, kiꞌne baalunku Tito wodana* fooliishshiishshinoonni daafira, isi hagiidhinohura ninkeno lowo geeshsha hagiidhinoommo. 14 Korkaatuno kiꞌne daafira Titora naade coyiꞌroommo; kiꞌneno disaalfachishshinoonnie; kiꞌnera coyiꞌnummori baalu halaale ikkinonte gede, kiꞌne daafira Titora naande kullummorino halaale ikkinoti leeltino. 15 Qoleno baalunku hajajantinoonni garanna waajjitinenna huxidhine haadhinisi gara hedanno woyite kiꞌnera noosi baxilli lexxino. 16 Anino duuchante doogonni kiꞌne addaxxoommo daafira,* lowo geeshsha hagiidhoommo.

8 Roduuwa, Meqedooniyaho noo songuwara uyinoonnita Maganu elto affinara hasiꞌneemmo. 2 Lowo fonqoli iilleennansa buuto qarrante noo yannara, buluulte buxxe heedhenni lowo hagiirrinni uyitino; tini shaqqillinsa batiꞌra ikkinota leellishshanno. 3 Wolqansa assitu deerrinni, isinni wolqansara aleenni uyitinota farciꞌreemmo; 4 qoleno uminsanni kaꞌe, fushsho fushshite qullaawoota kaaꞌlitanno kaayyo* uyinanninsa gede, marro marro higge eeggifatte huuccidhinonke. 5 Insa hendoommohunni aleenni assitino; korkaatuno, balaxxe insaneeto Mootichaho uyitino; hakkiinni Maganu fajjo garinni ninkera uyitino. 6 Konnira alba kiꞌnewiinni shaqqillunni fushshitinanni fushsho gamba assa hanafinohu Tito konne looso umo fushshanno gede jawaachinshoommo. 7 Hakko daafira baalunku coyinni yaano ammanatenni, qaalunni, egennotenni, assitinannirira baalaho diinaggaawatenninna ninke baxillinni dureeyye ikkitininte gede, shaqqillunni aatennino dureeyye ikke.

8 Togo yaanni noommoꞌnehu hajajammoꞌnera ikkikkinni wolootu diinaggaabbanno gara affinanni gede assammoꞌneraatinna baxilliꞌne addunnihoronna teꞌee afammora yeeti. 9 Korkaatuno, Mootichinke Yesuusi Kiristoosi elto affinoonni; isi buximanni kiꞌne dureeyye ikkitinanni gede, isi dureessa ikke heeꞌrenni kiꞌnera yee buxicho ikkino.

10 Konni coyi daafira yeemmori nooe: Konne looso loosa kiꞌne kaaꞌlitannoꞌne; korkaatuno mittu diri albaanni konne looso hanafate calla ikkikkinni umo fushshateno hasatto nooꞌneta leellishshinoonni. 11 Konnira xa hanaffinoonni looso umo fushshe; looso quqquxantine hanaffininte gede, wolqaꞌne assitu deerrinni uyitine loosu umo fulanno gede asse. 12 Aate halcho heedhuro, Maganu roore hagiidhannohu mittu manchi noosikki deerrinni ikkikkinni noosi deerrinni uyirooti. 13 Tenne yoommohu wolootaho duha shaashshe kiꞌnera duha ledate diꞌꞌikkino; 14 hatteentenni, xaa yannara kiꞌnera tirfino coyi insara xeinore wonshanno gedeeti; qoleno insara tirfinori kiꞌnera xeinore wonshanno; konni garinni duha taalo beeqqa dandiitinanni. 15 Hakkuno, “Lowoha gamba assiꞌrinohura woꞌme digatinosi; shiima gamba assiꞌrinohurano xeinosiri dino” yine borreessinoonni garinniiti.

16 Ninke kiꞌne daafira yaandeemmonte gede, Tito wodanirano togoo hedo worino Magani galatamo; 17 korkaatuno isi kiꞌnewa daannohu ninke yinoommosire macciishshe calla ikkikkinni, lowo geeshsha quqquxame umisinni kaeeti. 18 Ikkollana danchu duduwira loosanno loosinni kainohunni songo baala naaddannosi rodoono ledosi sonkeemmo. 19 Hatteeno agurranna, shaqqillunni fushshinoonni fushsho beenkeemmo woyite kuni rodii miilanke ikke ledonke haꞌranno gede songuwa shoontinosi; tini fushsho Mootichu ayirranno gede assitannotenna woloota kaaꞌlate qixxaamboommore ikkinoommota leellishshannote. 20 Konni garinni tenne shaqqillunni fushshinoonni fushsho beenkeemmo woyite, mittu manchino mishannonkeri heeꞌrannokki gede qorophineemmo. 21 Korkaatuno, ‘Yihowa* albaanni calla ikkikkinni mannu albaannino baalanka coye ammanamme assineemmo.’

22 Qoleno duucha hinge fonqolle batinyu coyira diinaggaawannoha ikkinota buunxoommo rodoonkeno insa ledo sonkeemmo; isi kiꞌne lowo geeshsha addaxxanno daafira, albinni roore diinaggaawannoha ikkino. 23 Tito daafira huluullamannohu heeꞌriro, isi kiꞌne injora ledoꞌya loosanno miilaꞌyaati; woy ledosi dagganno roduuwanke huluullamannohu heeꞌriro, insa songuwate soqqamaasineetinna Kiristoosi ayirrinyeeti. 24 Insa godowinta baxxinannita leellishshe; hattono kiꞌne kuꞌline naaxxineemmohu mayiraatiro songuwa affanno gede asse.

9 Qullaawootaho soqqamate* daafira kiꞌnera sokka borreessa dihasiissannoe; 2 korkaatuno woloota kaaꞌlate qixxaabbinoonnire ikkitinoonnita afoommo; ‘Akaayyaho heedhanno roduuwi woloota kaaꞌlate diro woꞌma qixxaabbe agadhite keeshshitino’ yee Meqedooniyaho heedhanno roduuwira kiꞌne kuꞌle naaxxoommo; qoleno kiꞌne diinaggaawa insa giddonni lowo roduuwa kakkayissino. 3 Ikkollana konni coyira kiꞌne kuꞌline naaxxanke mullare ikkite gattannokki gede, kiꞌne daafira balaxe kuloommonsa garinni qixxaabbine agartinanni gede roduuwa soyemmo. 4 Hakkuyi kaꞌa Meqedooniyu roduuwi ane ledo dagge qixxaabbinoonnikkita affanno woyite, kiꞌne calla ikkitinikkinni ninkeno kiꞌne hexxankenni saalleemmo. 5 Konni albaanni uyitinara afoo fultinoonniha batiꞌra afansha qixxeessitanno gede, roduuwu ane balaxxe kiꞌnewa dagguro danchaho yee hedoommo; konni garinni uyitinanni afanshi balaxe qixxaawanno; kiꞌneno gadadinseennaꞌne ikkikkinni baxxine uyitinoonniti leeltanno.

6 Ikkollana shiima wixiꞌrinohu baalu shiima mixxanno; lowoha wixiꞌrinohu baalu kayinni lowoha mixxanno. 7 Maganu hagiidhe aannoha baxanno daafira, mittu mittunku manchi xiixamanni* woy gadadame ikkikkinni wodanisinni hedinoha oona.

8 Qoleno woꞌmanka woyite, hasiisannoꞌnere ikkannoꞌne geeshshiha afidhinanni gedenna dancha looso baala loosate kaaꞌlannoꞌneri woꞌmannoꞌne gede, Maganu eltosi baala batidhannoꞌne gede assara dandaanno. 9 (Kunino, “Lowo lowoha* beehino; buxaneteno uyino. Keeraanchimmasi hegerera heedhanno” yine borreessinoonni garinniiti. 10 Wixiꞌrannohura wixa, itannohura sagale* batise aanno Magani wixidhinanni wixa halashshe aannoꞌne; keeraanchimmaꞌne gumano batisanno.) 11 Duuchunku garinni shaqqillunni uyitinanni gede, Maganu baalunku coyinni batise maassiꞌrannoꞌne; uyitinanniri ninke widoonni iillannonsa mannino Magano galaxxanno; 12 korkaatuno tini soqqantinanni soqqansho* qullaawootaho hasiisannonsare halashshine uyinanni gede assitannoha calla ikkikkinni, batinyu manni Maganoho lowo galata aanno gede assitanno. 13 Tini kaaꞌlote soqqansho mannu Magano ayirrisanno gede assitanno; korkaatuno, kiꞌne faajjete dudubbinannihu Kiristoosi daafira kulannohu danchu duduwira hajajantinanni heedhinoonni; qoleno qullaawootahono manna baalahono shaqqillunni uyitinanni. 14 Insa, Maganu uyinoꞌnete batiꞌra eltonni kainohunni kiꞌne daafira eeggifatte huuccitanni baxxannoꞌneta leellishshanno.

15 Coyiꞌne kulle anfannikkite mulla uyinonke eltosi daafira Maganoho galatu iillosi.

10 Kiꞌne ledo noommo woyite laafu gede, ledoꞌne noommokki woyite kayinni worbu gede assitine laꞌinanniehu ani Phaawuloosi, Kiristoosi joongillinninna shaqqillinni huucciꞌreemmoꞌne. 2 Dayemmo woyite, ninke alamete hedo garinni heeꞌneemmohu gede asse coyiꞌrannohu mitu manni aana, worbimmatenni kaajjado qaafo adheemmo gede assannori kalaqamannokki gede eeggo yeemmoꞌne. 3 Tenne alamera* heeꞌnoommoha ikkirono, olammeemmohu tenne alame manni olamanno garinni diꞌꞌikkino. 4 Korkaatuno olu uduunninke tenne alamehu gedeeha diꞌꞌikkino; hatteentenni qiisho diiggannota Maganu wolqa afiꞌrinoho. 5 Maganu egenno ledo sumuu yitannokkita gara ikkitinokki hedonna tenne egenno giwannoha gotti yiino coye baala diingeemmo; qoleno duuchanta hedo qafande Kiristoosira hajajantanno gede assineemmo; 6 kiꞌne woꞌmunni woꞌma hajajantinannire ikkitinoonnita leellishshinihu gedensaanni, hajajama gibbannore baala qorichishate qixxaamboommo.

7 Kiꞌne aaniido calla laꞌinanni. Aye manchino mittoreno huluullamikkinni ani Kiristoosiho yee hedannoha ikkiro, isinte gede ninkeno Kiristoosire ikkinoommota galagale huwatona. 8 Mootichu kiꞌne diigate ikkikkinni dhaawate uyinonke silxaanenni lowo geeshsha naaxxummoro nafa disaaleemmo; 9 sokkaꞌyanni waajjishiishate woꞌnaalanni noommoꞌneha lawaꞌnera dihasiꞌreemmo. 10 Mitu mitu togo yitanno: “Sokkasi ayirritannotenna kaajjadote; dayenna laꞌnanni woyite kayinni wolqiweeloho; coyiꞌreno ditidhinoho.” 11 Hatto yaanno manchi, ledoꞌne heeꞌnoommokki woyite borreessineemmo sokkanni yineemmorinna dangeemmo woyite assineemmori mereero badooshshu nookkita buuxa hasiissannosi. 12 Ninke insaneeto naaddannori widira gaamama woy ninkeneeto insa ledo taashsha dihasiꞌneemmo. Ikkollana insa insaneeto keentanno woyitenna insaneeto insaneeti ledo taashshitanno woyite wodancha noonsakkita leellishshanni no.

13 Ninke kayinni uyinoonninke danni gobbaanni noorinni dinaaxxineemmo; hatteentenni Maganu bikke* uyinonke qoqqowi giddo noorinni calla naaxxineemmo; konni qoqqowi giddo kiꞌneno heedhinoonni. 14 Qoqqowinke giddo heedhinoonnire ikkitinoonni daafira, kiꞌnewa dangummo woyite qoqqowinke gobbaanni difulloommo; Kiristoosi daafira kulannoha dancha duduwo umo kiꞌne heedhinoonniwa iillinshoommori ninkeeti. 15 Uyinoonninke danni gobbaanni wolu manni daafurinorinni naaxxinanni heeꞌnoommoha diꞌꞌikkino; ikkollana ammanaꞌne lexxitanni hadhuro, qoqqowinke giddo loonsoommo loosi halaꞌlanno yine hexxineemmo. Tini roore loonseemmo gede assitannonke; 16 balanxe wolu manchi qoqqowi giddo loonsoonni loosinni naaxxineemmokki gede, dancha duduwo kiꞌnera kaꞌaanni noo gobbuwara dudumbeemmo. 17 “Ikkollana naaxxannohu Yihowa* kuꞌle naaxxo.” 18 Korkaatuno ikkadoho yinannihu, ani ikkadoho yee hedanno mancho ikkikkinni Yihowa* ikkadoho yiinoho.

11 Gowwu gede ikkeemmo woyite cincitinaera hasiꞌreemmo. Qoleno cincitinanni heedhinoonnie! 2 Ani kiꞌnera maganittete laala* laalaatoommo; korkaatuno kiꞌne keeraancho* seemo gede Kiristoosira shiqishate mittu minaannira huuccoommoꞌne. 3 Hamashshu Heewani xagare soꞌrisiisinte gede, miteekkite kiꞌne hedono daafanteenna Kiristoosira nooꞌne sumbenna keeraanchimma* baꞌannoꞌne yee waajjeemmo. 4 Mittu manchi daye ninke sabbankoommoha agure wole Yesuusa sabbakiro woy kiꞌne adhitinoonni ayyaana agure wole haaꞌre dayiro woy kiꞌne adhitinoonniha dancha duduwo agure wole abbiro, sammi yitinaraati yaate. 5 Ani kayinni insaneeto jajjanno soqqamaasineꞌnenni mitturinnino xeoommoha dilawannoe. 6 Coyiꞌrate fullahoommoha ikka hoogummoro nafa, egenno xeꞌinoeha diꞌꞌikkoommo; baalante doogonninna baalunku coyinni tenne leellinshoommoꞌne.

7 Kiꞌne gotti yitinanni gede, umoꞌya heeshshi asse Maganunniha dancha duduwo woxe baantiekkinni kiꞌnera hagiirrunni duduwaꞌya cubbu gede kiirantuekka? 8 Kiꞌnera soqqamammora yee wole songuwawiinni maalaamittete hasiisannoere* adhanni insa mulqoommo. 9 Kiꞌne ledo heeꞌre qarramummo yannara Meqedooniyunni daggino roduuwi xeinoere baala wonshitinoe daafira, mittohono duha diꞌꞌikkoommo. Ee, xaa geeshsha kiꞌnera mittu coyinnino duha diꞌꞌikkoommoꞌne; albillitteno duha diꞌꞌikkeemmoꞌne. 10 Kiristoosi halaali giddoꞌya heeꞌri geeshsha, Akaayyu qoqqowi baalaho konni coyinni naaxxeemmokki gede assannoeri dino. 11 Hatto assoommoꞌnekkihu mayiraati? Baxeemmoꞌnekki daafiraati? Baxeemmoꞌneta Maganu afino.

12 Ikkollana ninke ledo taalama hasidhannorinna ninkeno soqqamaasinete yite naaxxitannori, kuꞌlite naaxxitannore hoogganno gede, xa assanni noommore konni kaꞌano asseemmo. 13 Hattoo mannooti Kiristoosi soqqamaasine lawate insaneeto soorritannoreeti, kaphu soqqamaasineetinna awaawurtanno loosaasineeti. 14 Kuni maalaꞌlinanni coye diꞌꞌikkino; Sheexaanu nafa xawaabbu sokkaasincho lawara isonooto soorranno. 15 Soqqamaanosino keeraanchimmate soqqamaano labbara insaneeto soorrituro, tini maalaꞌlinannire diafidhino. Goofimarchinsa kayinni loosinsa gedeeha ikkanno.

16 Xaano lede coyiꞌreemmona, mittu manchino ane gowwu gede asse hedoonke. Hatto yitine heddiniro nafa, anino shiima geeshsha naaxxeemmo gede gowwu manchi gede assitine haadheꞌꞌe. 17 Xa coyiꞌranni noommohu Mootichu coyiꞌranno garinni ikkikkinni gowwu manchi gede booꞌnanniiti. 18 Lowo manni maalu coyinni naaxxanno* daafira anino naaxxeemmo. 19 Ninke hayyootaho yitinina, gowwoota hiitto hagiirrunni cincitine heedhiniyya? 20 Isinni aye manchino borojje assiꞌriꞌnero, aye manchino jajjaꞌne mucuqqi asse adhiro, aye manchino nooꞌnere hawuluke adhiro, aye manchino kiꞌne mishe umosi gotti gotti assiꞌro, woy aye manchino baqqaalla qawaadiꞌnero sammi yitinanni.

21 Tenne coyiꞌra ninkera saalaho; korkaatuno mitootu ninke silxaanenke garunni horoonsiꞌra dandiineemmokki laafooti gede assite heddanno.

Mitootu gowwu gede assite laꞌuerono, wolootu booꞌna saaltannokkiha ikkiro anino saala agure booꞌneemmo. 22 Insa Ibiraawootaho? Anino Ibiraawichaho. Insa Israeelete? Anino Israeelichaho. Insa Abirihaami sirchooti?* Anino Abirihaami sirchooti. 23 Insa Kiristoosi soqqamaanooti? Wodana fayyinokki manchi gede ikke coyiꞌreemmona, ani insanni roore Kiristoosi soqqamaancho ikkoommota dhagge ikkanno garinni leellishoommo: Insanni roore lowo looso loosoommo; duucha hige usuramoommo; batinye hinge gannoonnie; duucha hige reye hooge gatoommo. 24 Ayihudootu 40te mitte gattanna halangetenni onte higge gantinoe; 25 sase hinge dullunni gannoonnie; mitte hinge kinnatenni gannoonnie; sase higge haꞌranni noommo markaawe hiqqaqqantino; mitto hashshanna mitto barra baaru aana gale hosoommo; 26 haꞌranni doogo hoseemmo, lagga woꞌmite qarrissinoe, mulqidhannori waaddinoe, manniꞌya qarrisinoe, daga waaddinoe, katamaho, halallanna baaru aana qarru amadinoe, kaphu roduuwi mereerono qarramoommo, 27 fooliishsho nookkiha loosanni daafuroommo, duucha hashsha goxummokki galoommo, hudiꞌroommo, gooꞌroommo, duucha hige sagale hooge qarramoommo, qiidu qucuccishinoe hattono kallimma* amaddinoe.

28 Kuri coyibbano agurranna songuwa baalate hajo barru baala yaachishshannoe.* 29 Daafuru amadinohu no? Ani didaafureemmohoyya? Gufiꞌrinohu no? Tini ane lowo geeshsha digiirtannoe?

30 Naaxxa hasiissuero, laanfeꞌya leellishanno coyinni naaxxeemmo. 31 Hegerera guweenyu hasiisannosihu Mootichu Yesuusi Maganinna Anni kaphanni noommokkita afino. 32 Demaasqote noommo waro, Moote Arexaasira woroonni noo gashshaanchi amadaera hasiꞌre, katamu waalchuwa agartannore worino; 33 mannu kayinni gimboolaho wore katamu huxxira noo maskoote widoonni qole dirriseennae angasinni gate fuloommo.

12 Naaxxa hasiissannoe. Kaaꞌlitannota ikka hooggurono, Mootichu leellishinoeta maalalete ajuujanna isi xawisinoe sokka coyiꞌreemmo. 2 Kiristoosi rosaancho ikkinoha mitto mancho egennoommo; kuni manchi 14 diri albaanni sayikki gordo hawulukamino; hawulukaminohu maalunniitironna teꞌee diafoommo; Maganu kayinni afino. 3 Ee, togoo mancho afoommo; maalunniitironna teꞌee kayinni diafoommo; Maganu kayinni afino. 4 Kuni manchi gannate noowa hawulukame coyiꞌra dandiinannikkitanna mannu coyiꞌrara fajjinoonnikki qaalla macciishshi. 5 Hattoo manchinni naaxxeemmo; ikkollana laanfeꞌyanni ikkinnina aneneetinni dinaaxxeemmo. 6 Coyiꞌreemmori halaale ikkino daafira, naaxxa hasiꞌrummoro nafa gowwa diꞌꞌikkeemmo. Ikkollana ayino ane aana laꞌꞌannohunninna anewiinni macciishshannohunni aleenni ikkoommohu gede asse hedannokki gede naaxxa qoropheemmo; 7 kuni dhagge ikkanno coyi xawinoe daafira calla mannu ane jaja dihasiissanno.

Booꞌneemmokki gede, maalaꞌya qasanno uticho uyinoonnie; kunino naaxxeemmokki gede duucha woyite qawaadanni* waadannoeho Sheexaanu sokkaasinchooti. 8 Kuni coyi anewiinni hoꞌlanno gede Mooticha sase hige huucciꞌroommo. 9 Isi kayinni, “Eltoꞌya ikkitannohe; korkaatuno wolqaꞌya guuta ikkitannohu wolqiweelatto woyiteeti” yiinoe. Hakko daafira, Kiristoosi wolqa dunkaanu gede ikkite aanaꞌya heedhanno gede, lowo geeshsha hagiidhanni wolqiweelleꞌyanni naaxxeemmo. 10 Konnira Kiristoosira yee wolqiweelummorono, xonnierono, angate anje amadduerono, xiimbieronna qarru amadierono tashshi yaannoe. Korkaatuno wolqiweeleemmo woyite ani wolqaataamoho.

11 Gowwa mancho ikkoommo. Hattooha ikkeemmo gede assitinoonnieri kayinni kiꞌneeti; korkaatuno kiꞌne ane daafira difarcidhinoonni. Tidhoommori nookkiha ikkummoro nafa, insaneeto jajjanno soqqamaasineꞌnenni mitturinnino xeoommori dino. 12 Qoleno soqqamaasincho ikkoommota lowo cincanni, malaattatenni hattono dhaggenna maalale loosatenni leellishoommoꞌne. 13 Kiꞌnera duha ikka hoogaꞌya agurranna kiꞌne wole songuwawiinni mayinni ajjinoonni? Hatto ikkiro, kiꞌnera duha ikka hoogaꞌyara shaqqillunni gatona yiiyyeꞌꞌe.

14 Kune kiꞌnewa daate qixxaawanna tini sayikkite; kiꞌnera duha diꞌꞌikkeemmo. Ani kiꞌne ikkinnina woxeꞌne dihasiꞌreemmo; oosonsara woxe miinja hasiissannonsari annahonna amate ikkinnina ooso annahonna amate woxe dimiinjitanno. 15 Ani kiꞌnera* nooere baala wole agurina aneneeto sayise uummoro nafa lowo geeshsha tashshi yaannoe. Ani kiꞌne togo lubbora baxummoꞌnena, kiꞌneno ane hakko garinni baxa dihasiissannoꞌne? 16 Ikkihano ikkiro, ani duha diꞌꞌikkoommoꞌne. Kiꞌne kayinni ane “xagaraamunna” “doge” woshshaadoommoꞌnehu gede assitine coyidhinanni. 17 Kiꞌnewa soommo manni giddo mittu widoonni nafa woxeꞌne hanaaqe adhoommoni? 18 Tito kiꞌnewa daanno gede huuccoommo; rodoonkeno isi ledo soommo. Ikkina Tito woxeꞌne hanaaqe adhinoni? Isinna ani mittu gari hedo noonkere diꞌꞌikkinoommo? Qaafonkeno mitte diꞌꞌikkitino?

19 Xaa geeshsha heddinannihu kiꞌnera gargarooshshu dawaro qoꞌlinanni heeꞌnoommohu gede assitineeti? Kiristoosire ikkinoommo daafira coyiꞌneemmohu Maganu albaanniiti. Ikkollana baxantinoonni roduuwa, baalanka coye assineemmohu kiꞌne dhaawateeti. 20 Kiꞌnewa dayemmo woyite, miteekke ani hasiꞌreemmo gede ikkitinikkinni, anino kiꞌne hasidhinanni gede ikkummokkinni xaandeemmo yee waajjeemmo; qoleno gibbo, hinaaso, aaru, heewo, suꞌma huna, heme, booꞌnanna cancu heeꞌranno yee waajjeemmo. 21 Galagale dayemmo woyite, miteekke Maganiꞌya kiꞌne albaanni shollishannoe yee yaadeemmo; qoleno konni albaanni cubbo loosse assitino battera, foorreranna* mancaꞌꞌa ikkitonsara* maaro eꞌinokkiri daafira dadillu amadannoe yee waajjeemmo.

13 Kiꞌnewa dayemmo yaanna tini sayikkite. “Aye coyino lame woy sase naqaashshe* farcidhannorinni kaajjanno.” 2 Xa kiꞌne ledo noommokkiha ikkirono, layinkimeeshsho kiꞌne ledo noommohu gede assitine heddine coyiꞌranni noommore adhe; qoleno galagale dayummoro konni albaanni cubbo loossinoreno gattinore baalankano seejjummokkinni agureemmokkita xa balaxe qorophisiiseemmo; 3 hatto asseemmohu, kiꞌne mereero laanfetenni ikkikkinni wolqatenni loosannohu Kiristoosi ane widoonni coyiꞌrannota leellishshanno taje hasidhinoonni daafiraati. 4 Hige isi haqqaho sutaminohu wolqiweele heeꞌreeti; ikkirono Maganu wolqanni heeshshonniha ikkino. Ninkeno isi ledo wolqiweelootaho; ikkirono kiꞌne aana loossanni noote Maganu wolqanni kainohunni isi ledo heeꞌneemmo.

5 Ammanatenni kaajjitine heedhinoonnironna teꞌee buuxiꞌrate, woꞌmanka woyite kiꞌneneeto qonqolchitine layidhe; qoleno ayimmaꞌne afate woꞌmanka woyite kiꞌneneeto layidhe. Maganu albaanni ayirrinye hoogginoonniha ikkiro ikkinnina, Kiristoosira kiꞌne ledo mittimma noosita diaffinoonni? 6 Ninke kayinni Maganu albaanni ayirrinyu noonkere ikkinoommota huwattinanni yee hexxeemmo.

7 Busha coye assitinannikki gede Magano huuccineemmo; hatto assineemmohu wolootu albaanni danchuulle lawate diꞌꞌikkino. Hatteentenni wolootu albaanni danchuulle lawa hoongummoro nafa kiꞌne danchare assitinara hasiꞌneemmo daafiraati. 8 Ninke halaaleho halammeemmo ikkinnina halaalu ledo sumuu yaannokkiha mitto coyeno assa didandiineemmo. 9 Wolqiweeloota ikkine heeꞌnoommo yanna baalantera kiꞌne wolqaataamma ikkitiniro woꞌmanka woyite tashshi yaannonke. Qoleno huuccatto assineemmoꞌnehu biddi yitinanni gedeeti. 10 Kiꞌnewiinni fafe heeꞌre konne coye borreessanni noommoꞌnehu, dayemmo woyite kaajjado qaafo adheemmokki gedeeti; Mootichu silxaane uyinoehu kiꞌne dhaawammoraati ikkinnina diigammora diꞌꞌikkino.

11 Jeefoteno roduuwaꞌya, woꞌmanka woyite hagiidha, biddi yaa, shesho adha, hedoꞌne mittu garita assiꞌra, hattono keere heeꞌra agurtinoonte; baxillunna keeru Magani ledoꞌne ikkanno. 12 Rodiimmate baxillinni sunqantinanni mimmito keere haadhe. 13 Qullaawootu baalu keere sokkinoꞌne.

14 Mootichu Yesuusi Kiristoosi eltonna Maganu baxilli hattono mitteenni adhinoommohu qullaawu ayyaani kiꞌne baalunku ledo ikko.