UMI QORONTOOSI

1 Maganu fajjonni Kiristoosi Yesuusi soqqamaasincho ikkammora woshshamoommohu ani Phaawuloosinna rodiinke Soostenisi, 2 Qorontoosi katamira noote Maganu songora yaano, Kiristoosi Yesuusi ledo nooꞌne mittimmanni qullaabbinoonnirira hattono insanna ninke Mooticha ikkinohu Mootichinke Yesuusi Kiristoosi suꞌma base baalate woshshitannori baalu ledo qullaawoota ikkitinanni gede woshshinoonniꞌnerira:

3 Maganu Anninkenna Mootichinke Yesuusi Kiristoosi eltonna keeri kiꞌne ledo ikko.

4 Kiristoosi Yesuusi widoonni kiꞌnera uyino elto daafira Maganoꞌya woꞌmanka woyite galaxxeemmo; 5 korkaatuno, baalunku coyinni yaano coyiꞌrate dandoonninna egenno baalatenni Kiristoosinni durooꞌmitinoonni; 6 qoleno Kiristoosi daafira farciꞌnoommo coyi kiꞌne giddo rumuxxino; 7 hakko daafira, Mootichinke Yesuusi Kiristoosi xawanno yanna quqquxantine agadhitinanni woyite horo mitte eltono gatte dibaꞌannoꞌne. 8 Mootichinke Yesuusi Kiristoosi barra mitte minsheno heedhannoꞌnekki gede Maganu goofimarchu geeshsha kaajjitine heedhinanni gede assannoꞌne. 9 Beettisi Mootichinke Yesuusi Kiristoosi ledo mittimma* heedhannoꞌne gede woshshinoꞌne Magani ammanaminoho.

10 Konnira roduuwa, coyidhinanniri mitto gara ikkanno gedenna mereeroꞌne babbadooshshu heeꞌrannokki gede, hatteentenni hedoꞌnenna mixoꞌne woꞌmunni woꞌma mitte ikkitanno gede Mootichinke Yesuusi Kiristoosi suꞌminni eeggo yeemmoꞌne. 11 Roduuwaꞌya, mereeroꞌne sumumme nookkita mitu Qeloe mini manni kulinoe. 12 Mittu mittunku, “Ani Phaawuloosiho,” “Ani Aphiloosiho,” “Ani Keefaho,”* “Ani Kiristoosiho” yitinanni. 13 Kiristoosi bebbeehaminoni? Phaawuloosi kiꞌnera yee haqqaho sutaminoni? Woy cuuantinoonnihu Phaawuloosi suꞌminniiti? 14 Qersiphoosinna Gayiyoosi agurranna kiꞌne giddo wole mittono cuuoommokki daafira Magano galaxxeemmo; 15 konnira, “Phaawuloosi suꞌminni cuuamoommo” yaannohu wolu mittuno dino. 16 Hige Isxifaanaasi mini mannano cuuoommo. Kuri agurranna wolu cuuoommohu nooro diqaageemmo. 17 Kiristoosi soyinoehu cuuammora ikkikkinni dancha duduwo duduwammoraati; qoleno Kiristoosihu qarru haqqi* mullare ikke gatannokki gede sabbakeemmo woyite mannu hayyonni dicoyiꞌreemmo.*

18 Qarru haqqi* daafira kullanni qaali baꞌannorira gowwimmate; gatote doogora heeꞌnoommorira ninkera kayinni Maganu wolqaati. 19 Korkaatuno, “Hayyoolete hayyo huneemmo; egennaammu wodanchano tuge agureemmo” yine borreessinoonni. 20 Hayyichu manchi mama no? Seeru egennaami* hiikko no? Tenne alamera* coye egennino manchi* mama no? Maganu alamete hayyo gowwimma ikkitanno gede diassino? 21 Alame umise hayyonni Magano afa dandiitinokki daafira, Maganu hayyosinni gowwimmate gede assine kiirrannite ninke sabbankeemmo sokka widoonni ammananno manna gatisa hasiꞌrino.

22 Ayihudootu malaate laꞌꞌa hasidhanno; Girikootu kayinni hayyo halchitanno; 23 ninke kayinni haqqaho sutaminoha Kiristoosi sabbankeemmo; kuni coyi Ayihudete gufichoho; dagate qole gowwimmate. 24 Woshshantinorira kayinni, Ayihudootahono Girikootahono Kiristoosi Maganu wolqaatinna Maganu hayyooti. 25 Korkaatuno gowwimma lawannohu Maganu coyi mannu hayyo rooreho; laanfe lawannohu Maganu coyino mannu jawaante rooranno.

26 Roduuwaꞌya, woshshantini woyite kiꞌne hiittooreetiro qaagge; mannu hedo garinni Maganu woshshinori giddo rooru hayyoole, wolqaataammanna ayirradu ayiddi giddo ilantinore diꞌꞌikkitino. 27 Maganu hayyoole saalfachishara alame gowwootu gede assite kiirtannore doorino; wolqaataamma saalfachishara alame wolqiweelootu gede assite kiirtannore doorino; 28 Maganu mannaho ayirrado lawanno coye tidhinori nookkiha assara, tenne alamera shollinoha, mishaminohanna haafa coye doorino; 29 hatto assinohu mittu manchino* Maganu albaanni naaxxannokki gedeeti. 30 Kiristoosi Yesuusi ledo mitto ikkitinoonnihu Maganunniiti; Yesuusi ninkera Maganuwiinni daggino hayyo, keeraanchimmanna qullaambe ikkinonke; qoleno wodo ikke keere fushshinonke; 31 “Naaxxannohu Yihowa* kuꞌle naaxxo” yine borreessinoonnihuno iseraati.

2 Konnira roduuwa, Maganunnita qullaawa fojo kiꞌnera kulammora dayummo yannara maalaꞌlitinanni gede assanno garinni woy hayyotenni dicoyiꞌroommo. 2 Ledoꞌne noommo yannara, Yesuusi Kiristoosirenna sutamasire calla illachishate murciꞌroommo. 3 Ani kiꞌnewa dayummo woyite, wolqiweele, waajjenna mase huxiꞌranni dayommo; 4 coyiꞌroommohunna sabbakoommohuno Maganu ayyaananna wolqa leellishanno garinniiti ikkinnina busulsiꞌre hayyote qaallanni diꞌꞌikkino; 5 hatto assoommohu, ammanaꞌne mannu hayyo aana ikkikkinni Maganu wolqa aana xintantinota ikkitanno gedeeti.

6 Gikki yitinorira hayyo coyiꞌneemmo; ikkollana coyiꞌneemmohu tenne alame hayyo woy tenne alame* gashshaano hayyo diꞌꞌikkino; korkaatuno insa baꞌannoreeti. 7 Hatteentenni qullaawa fojo giddo dahaabbinota Maganu hayyo coyiꞌneemmo; tini hayyo, tini busha alame daggara albaanni Maganu ninke ayirrinyira hede worinote. 8 Tenne hayyo, tenne alame* gashshaano giddo mittuno diaffino; affinoha ikkoommero, ayirrado Mooticha disuttanno.* 9 Ikkollana kuni ikkinohu, “Maganu baxxannosirira qixxeessinore ille dilaꞌino; maccano dimacciishshitino; manchu wodanino dihedino” yine borreessinoonni garinniiti. 10 Maganu konne coye ayyaanisinni xawisinohu ninkeraati; korkaatuno ayyaanu baalanka coye, wole agurina dahaawinoha* Maganu coye nafa xawisanno.*

11 Mittu manchi giddo noo hedo hakko manchi giddo noo ayyaana agurranna mannu mereero afa dandaannohu ayi no? Hatteente gede, Maganu ayyaana agurranna Maganu hedo afinohu dino. 12 Ninke Maganu shaqqillunni uyinonke coye afa dandiineemmo gede, Maganu ayyaana adhinoommo ikkinnina alamete ayyaana diadhinoommo. 13 Qoleno konne coye coyiꞌneemmo; coyiꞌneemmohu kayinni, mannu hayyonni ronsoommo qaallanni ikkikkinni ayyaanu rosiisinonke qaallanniiti; konnira ayyaanaamo coye xawinseemmo* woyite ayyaanu rosiisinonke qaallanni coyiꞌneemmo.

14 Maalu coyira galino manchi Maganu ayyaani aannore diadhanno; korkaatuno togoo coyi isira gowwimmate; qoleno kuni ayyaanunni xiinxallinanni coye ikkino daafira isi huwata didandaanno. 15 Ikkollana, ayyaanaamu manchi baalanka coye xiinxallanno; iso kayinni aye manchino xiinxalle afa didandaanno. 16 Korkaatuno, “Rosiisannosi gede Yihowa* hedo afinohu ayeti?” yine borreessinoonni. Ninkera kayinni Kiristoosi hedo noonke.

3 Roduuwa, Kiristoosi rosira daaimu gede ikkitinoonni daafira, maalaamittete hedonni amadamino manna hasaawinsanni garinni ikkinnina ayyaanaamo manna hasaawinsanni garinni hasaawisammoꞌnera didandoommo. 2 Gikki yitinoonnikki daafira ado haqaaqoommoꞌne ikkinnina kaajjado sagale diꞌꞌitisoommoꞌne. Hige xaano gikki diyitinoonni; 3 korkaatuno xaa geeshsha maalaamittete hedonni amadantine heedhinoonni. Mereeroꞌne noo hinaasonna gibbo, maalaamittete hedonni amadantinoonnitanna alamete manni gede ikkitine heedhinannita leellishshannota diꞌꞌikkitino? 4 Mitu “Ani Phaawuloosiho,” wolu qole “Ani Aphiloosiho” yitinanni woyite, alamete manni* gede ikkitinanni diheedhinoonni?

5 Isi Aphiloosi maati? Phaawuloosino maati? Mootichu mittu mittunkura uyinonsa looso loossanno soqqamaanootilla; kiꞌneno ammantinoonnihu insa widoonniiti. 6 Ani kaasummo; Aphiloosi waa hayikkisi; lossinohu kayinni Maganoho; 7 konnira ayirrinyu hasiisannohu kaasannohura woy hayikkisannohura ikkikkinni lossanno Maganiraati. 8 Kaasannohunna waa hayikkisannohu lamunku kaaꞌlante loossanno;* ikkollana mittu mittunku manchi loosi loosisi garinni baꞌraarshasi adhanno. 9 Korkaatuno ninke Maganu ledo mitteenni loonseemmoreeti. Kiꞌne loonsanni heeꞌnoonniho Maganu gateeti; qoleno Maganu minanni noo mineeti.

10 Maganu uyinoe elto garinni, mine minate fullahino manchi gede* ani safo safummo; wolu qole ani safoommo safo aana minanno. Ikkollana mittu mittunku tenne safo aana hiitto asse minannoro seekke heda hasiissannosi. 11 Korkaatuno sanfoonni safo agurranna aye manchino wole safo safa didandaanno; hatti safono Yesuusi Kiristoosiiti. 12 Aye manchino tenne safo aana culkunni, birrunni, dilqa kinnanni, haqqetenni, hayissotenni woy agadunni miniro, 13 fonqolu barri daanno woyite mittu mittunku manchi loosi xawo fulanno; korkaatuno giira baalanka xawo fushshitanno; qoleno mittu mittunku manchi hiitto asse mininoro giira fonqolte leellishshanno. 14 Aye manchino safote aana miꞌnino mini kaajje saisiro baꞌraarsha adhanno; 15 giiramisiro kayinni mulla anganni gatanno; isi kayinni gatanno; gatasi kayinni giirate giddonni gate fulino manchi gedeete.

16 Kiꞌne umiꞌne Maganunniha qullaawa mine ikkitinoonnitanna Maganu ayyaani giddoꞌne galannota diaffinoonni? 17 Aye manchino Maganunniha qullaawa mine diigannoha ikkiro, Maganu isono diigannosi; Maganu mini qullaawaho; hakku qullaawu minino kiꞌneeti.

18 Ayino umosi dogoonke: Kiꞌne giddo aye manchino tenne alamera* hayyicha ikkinoha lawisiro, hayyicha ikkanno gede gowwa ikkona. 19 Korkaatuno tenne alame hayyo Maganu albaanni gowwimmate; mayira yiniro, “Maganu hayyoota xagarronsanni amadannonsa” yine borreessinoonni. 20 Qoleno, “Yihowa* hayyootu hedo haafa ikkitinota afino” yine borreessinoonni. 21 Konnira aye manchino manna kuꞌle naaxxoonke; korkaatuno baalunku coyi kiꞌneho; 22 Phaawuloosino, Aphiloosino, Keefano,* alameno, heeshshono, reyono, xa noo coyino, konni kaꞌa daannorino, baalunkuri kiꞌneho; 23 kiꞌneno Kiristoosireeti; Kiristoosi qole Maganunniho.

4 Mannu ninke Kiristoosi soqqamaanonna* Maganunnita qullaawa fojo eeggo uyinoonninke towaataano gede asse laꞌꞌa hasiissanno. 2 Hakko daafira, towaataano ammanantinore ikka hasiissannonsa. 3 Kiꞌneno woy yoote ofollino mannino qoriero* tini ane assitannoeri dino. Ani umiꞌya nafa aneneeto diqoreemmo. 4 Leeltinoeti assoommo bunshe dino. Hatto yaa kayinni, ani keeraanchoho yaa diꞌꞌikkitino; ane qonqolche laꞌꞌannoehu Yihowaati.* 5 Konnira yanna iillita geeshsha mittu coyirano yoo yitinoonte; Mootichu daa geeshsha agarre. Isi tunsote goꞌle noore haaꞌre xawaabbunniwa fushshanno; mannu wodani giddo noo hedono reqecci assanno; hatte yannara mittu mittunku Maganuwiinni hasiisannosi galata adhanno.

6 Konnira roduuwa, kiꞌne kaaꞌlammora yee aneneetonna Aphiloosi lawishsha asse kule konne coye coyiꞌroommohu, “Borreessine worroonnihunni saꞌooti” yaanno seera rossinara yeeti; konnira, mitto mancho woluwiinni roorsitine booꞌnitinoonte. 7 Ate woluwiinni baxxoottoha assinohehu ayeti? Qoleno adhoottokkiri mayi no? Adhoottoha ikkiro, adhoottokkihu gede ikkite booꞌnattohu mayiraati?

8 Hasiisannoꞌnere baala afidhine kaꞌini yaate? Durooꞌmitine kaꞌinoonni? Ninke agurtine mootoolla ikkitine gashshitinanni heedhinoonni yaate? Ninkeno ledoꞌne moonkeemmo gede, mootoolla ikkitine gashsha hanaffinoommero lowo geeshsha hagiidheemmo. 9 Maganu ninke soqqamaasine reyote yoo yinoonni manni gede, jeefote baꞌre* fulleemmo gede assinonkeha lawannoe; korkaatuno alame, sokkaasinenna mannu daaꞌꞌatannore ikkinoommo. 10 Ninke Kiristoosira yine gowwinoommo; kiꞌne kayinni Kiristoosinni kainohunni busullate; ninke wolqiweelootaho; kiꞌne kayinni wolqaataammaho; kiꞌne ayirraddaho; ninke kayinni minshoonnireeti. 11 Tenne saate geeshsha ninke hudiꞌnanni, gooꞌnanninna uddiꞌneemmore hoonganni,* hattono gannannankenna* umo worreemmowa hoonge heeꞌnoommo; 12 qoleno angankenni daafurre loonseemmo. Xonnanninke woyite maassiꞌneemmo; xiimbanninke woyite cincine kaajjineemmo; 13 suꞌmanke hunnanni woyite, awu afiinni qolleemmo;* xaa geeshsha alamete xurenna fiine fushshinoonni ishine ikkinoommo.

14 Konne coye borreessanni noommoꞌnehu saalfachishammoꞌnera yee ikkikkinni, baxeemmo oosoꞌya gede asse seejjammoꞌnera yeeti. 15 Kiristoosinni awuutannoꞌnehu* 10,000 manni heeꞌriꞌnero nafa, lowo annuwa dinoꞌne; korkaatuno danchu duduwi widoonni Kiristoosi Yesuusinni ani anna ikkoommoꞌne. 16 Konnira, ane faale hadhinanni gede huucciꞌreemmoꞌne. 17 Mootichunni beettoꞌya ikkinoha baxeemmohanna ammanaminoha Ximootewoosi kiꞌnewa soyanni noommohu iseraati. Isi base baalate songo woꞌmantera rosiiseemmo woyite Kiristoosi Yesuusira soqqameemmo gara* qaagiissannoꞌne.

18 Mitootu ani kiꞌnewa dayemmokkiha laweennansa booꞌnatenni ufuufantino. 19 Ikkollana Yihowa* fajjiro muli barra kiꞌnewa dayemmo; dayemmo woyite kuri booꞌnatenni ufuufantinori coyidhannore ikkikkinni, Maganu wolqa noonsaronna teꞌee laꞌꞌa hasiꞌreemmo. 20 Korkaatuno Maganu Gashshooti leellannohu coyiꞌnanni coyinni ikkikkinni Maganu wolqanniiti. 21 Hiitti woyyitannoꞌne? Dulla adhe dayonso baxillunninna shaqqillunni dayo?

5 Mereeroꞌne foorre* noota macciishshoommo; togoo foorre* dagate mereero nafa anfe diegenninoonni; ‘Annisi galte ledo galanno manchi* no’ yinoonni. 2 Woleteemmero dadillanna konne coye assino mancho mereeriꞌnenni fushsha hasiissannaꞌne kiꞌne kayinni tennenni naaxxitinanni? 3 Ani mereeroꞌne noommokkiha ikkirono, ayyaanunni ledoꞌne noommo; qoleno konne coye assino manchira ledoꞌne noommohu gede ikke yoo yoommo. 4 Mootichinke Yesuusi suꞌminni mitteenni gamba yitinanni woyite, anino Mootichinke Yesuusi wolqanni ayyaanunni kiꞌne ledo noommota affine, 5 hakko mancho Sheexaaneho sayissine aa hasiissannoꞌne; tinino, isi songote giddora eessino bunshe baꞌanno gedenna songote ayyaani Mootichu barra baꞌꞌannokki gede assitanno.

6 Naaxxaꞌne dancha diꞌꞌikkitino. Shiima irsho lixe gudisse kayissannota diaffinoonni? 7 Haaro lixe ikkitinanni gede akkala irsho hunne. Faasiku geꞌrechinke Kiristoosi kakkalamino daafira irsho nooꞌnekkireeti. 8 Konnira, ayyaana akkala irshonni hattono bunshetenna cubbu irshonni ikkikkinni irsho nookkihu suwashshunna halaalu timinni ayirrinso.

9 Fooranno manniwa* aana agurtinanni gede sokka borreesse soyommoꞌne; 10 hatto yaaꞌya kayinni, foorannohu,* hafuurannohu, mulqiꞌrannohu woy kaphu maganna magansiꞌrannohu tenne alame manni ledo horonta xaaddinoonte yaa diꞌꞌikkitino. Hatto ikkoommero woꞌmunni woꞌma alamete giddonni fula hasiissannoꞌne. 11 Xa kayinni borreessanni noommoꞌnehu, rodooho yinanni heeꞌneennasi foorannohu* woy hafuurannohu woy kaphu maganna magansiꞌrannohu woy xonamannohu woy dimbannohu woy mulqiꞌrannohu aye manchiwano aana agurtinanni gede, wole agurina togoo manchi ledo sagale nafa ittinannikki gedeeti. 12 Gobbaanni noorira yoo yaate ane mayi eessie? Giddoonni noorira yoo kiꞌne diyitinanni? 13 Gobbaanni noorira yoo yaannohu Maganoho. “Busha mancho mereeriꞌnenni fushshe.”

6 Kiꞌne giddo wolu ledo giwaminohu, coyesi qullaawootunniwa massiꞌra agure yoote albira shiqe Magano ammaninokki manni albaanni hiitto kassasanno? 2 Qullaawootu alamete yoo yitannota diaffinoonni? Alamete yoo yitinanniha ikkina, shiimmaadda coye hiitto tira hoogginanni? 3 Sokkaasinete nafa yoo yineemmota diaffinoonni? Ikkina xaa yannara kalaqamanno coyira yoo mayira diyitinanni? 4 Xaa yannara yoo yaa hasiissanno coyi kalaqamanno woyite songo mishshanno manna yoo yaara wortinanni? 5 Konne coye coyiꞌranni noommohu saaltinara yeeti. Halaalinta kiꞌne giddo roduuwasi araarsa dandaannohu mittu hayyichi nafa dino? 6 Mittu rodii wole rodoo kassase yoote minira massanno; hakko iso ammaninokki manni albira!

7 Mimmitu ledo kassasantine yoote minira haꞌraꞌne umise kiꞌnera saalaho. Hatteentenni kiꞌne miicantiniro diwoyyanno? Kiꞌne xagarriro diwoyyanno? 8 Kiꞌne kayinni hakko iso roduuwaꞌne miiccinanni, xagartinanni!

9 Bushuullu* Maganu Gashshoote ragidhannokkita diaffinoonni? Sodhinoonte.* Foortannori, kaphu maganna magansidhannori, soorritannori, labbaahu ledo foorate* insaneeto sayisse uyitino labballi,* labbaahu ledo siimu xaadooshshe assitanno labballi,* 10 mooraano, hafuuraammu, dimbaano, xonantannorinna mulqidhannori Maganu Gashshoote diragidhanno. 11 Kiꞌne giddo mitu mitu bashsho hattooreeti. Ikkollana Mootichu Yesuusi Kiristoosi suꞌminninna Maganinke ayyaaninni hayishshantine keeraaꞌmitinoonni, qullaawoota ikkitinoonni, hattono keeraanote yaamantinoonni.

12 Baalankare fajjinoonnie; baalunkuri kayinni kaaꞌlannoha diꞌꞌikkino. Baalankare fajjinoonnie; ikkollana mittu coyino borojjicho assiꞌraera diwodheemmo. 13 Sagale godowunnite; godowuno sagalenniho; Maganu kayinni lamenka hunanno. Mannimma Mootichunnite ikkinnina foorrennita* diꞌꞌikkitino; Mootichu qole mannimmanniho. 14 Ikkollana Maganu wolqasinni Mooticha kayisinte gede ninkeno reyotenni kayisannonke.

15 Mannimmaꞌne Kiristoosi biso ikkitinota diaffinoonni? Kiristoosi biso haaꞌre foora mancho ledo mittoonsa hasiissannoeyyani? Horonta hatto assa dihasiissannoe! 16 Foora mancho ledo mittooꞌmannohu baalu ise ledo mitto biso ikkannota diaffinoonni? Korkaatuno Maganu, “Lamunku mitto maala ikkitanno” yiino. 17 Mootichu ledo mittimma afiꞌrinohu baalu kayinni isi ledo ayyaanunni mitto ikkanno. 18 Foorretewiinni xooqqe! Mittu manchi loosannohu wolu cubbi baalu mannimmasi gobbaanniiti; fooranno* manchi baalu kayinni umisi mannimma aana cubbo loosanni no. 19 Mannimmaꞌne, giddoꞌne noohu Maganuwiinni adhitinoonnihu qullaawu ayyaani galannoha qullaawa mine ikkitinota diaffinoonni? Qoleno kiꞌne umiꞌnere diꞌꞌikkitinoonni; 20 Maganu lowo waaginni woxxinoꞌnereeti. Hakko daafira, mannimmaꞌnenni Magano ayirrisse.

7 Sokka borreessitine xaꞌmitinoonnie xaꞌmora dawaro qoleemmona, mittu manchi meyata kisa* hoogiro woyyate; 2 ikkollana foorre* batidhino daafira, mittu mittunku manchira umisi galte heedhosi; mitte mittente meyaterano umise minaanni heeꞌrose. 3 Minaanni minaamasira hasiisannosere asso; minaamano hattonni minaannisera hasiisannosire assito. 4 Minaamara bisise aana silxaane dinose; silxaane noosihu minaannaseeti; hattonni, minaannira bisisi aana silxaane dinosi; silxaane nooseti minaamasiiti. 5 Huuccatto assiꞌrate hasaabbine wodhitinoonni yanna agurranna, wole woyite mimmitoho qakkinoonte; qoleno kiꞌneneeto qeeꞌla hooggineenna Sheexaanu jifannoꞌnekki gede galagaltine mitteenni heedhe. 6 Konne coye coyiꞌroommohu kayinni, assa dandiinannire ikkinota kulateeti ikkinnina hajajate diꞌꞌikkino. 7 Ikkollana mannu baalu ane gede ikke heeꞌroommero digiwoommo. Kayinni, mittu mittunkura Maganuwiinni afiꞌrinoti umisi elto noosi; mittoho mittu gariti, woleho kayinni wolu gari elto noosi.

8 Adhantinokkirinna gunnootuno, ane gede ikkite heedhuro woyyannonsa yeemmo. 9 Insaneeto qeeꞌla hoogguro kayinni adhantona; yortotenni giiramantenni adhama woyyitanno.

10 Adhantinorira konne biddishsha eemmo; kayinni kuni biddishshi aneha ikkikkinni Mootichunniho; minaama minaannisewiinni baxxitoonke. 11 Baxxituro kayinni mine assidhukkinni heedho woy minaannise ledo araaranto; minaannino minaamasi agura dihasiissannosi.

12 Wolootaho qole togo yeemmo; hatto yeemmohu kayinni aneeti ikkinnina Mooticha diꞌꞌikkino: Mittu rodiira ammantinokki galte heedhusironna iseno ledosi heeꞌrate maahoyye yituro, aguroonkese; 13 qoleno mitte manchora ammaninokki minaanni heeꞌriseronna isi ledose heeꞌrate maahoyye yiiro, agurtoonkesi. 14 Ammaninokki minaanni minaamasinni kainohunni keeraaꞌmino; ammantinokki minaamano ammanino minaannisenni kainohunni keeraaꞌmitino; hatto ikka hoogoommero oosoꞌne battaabbanno; xa kayinni insa qullaawootaho. 15 Ammaninokki minaanni woy minaama baxxa doodhiro baxxona; hatto ikkiro, ammanino rodii woy rodoo ammaninokkihu ledo heeꞌrate digadadamanno; korkaatuno Maganu woshshinoꞌnehu keerehooti. 16 Minaama, minaannakki gatisattaha ikkannona ma afootta? Minaanna, minaamakki gatisattoha ikkannona ma afootto?

17 Ikkihano ikkiro, mittu mittunku manchi Yihowa* uyinosi qeechi garinninna Maganu woshshisi woyite noo garinni heeꞌrona. Songo baalateno konne biddishsha eemmo. 18 Barcime heeꞌre woshshaminohu no? Barciminokkihu gede ikkoonke. Barcimikkinni heeꞌre woshshaminohu no? Hatto ikkiro barcimoonke. 19 Barcima kaaꞌlitannori dino; barcima hoogano leddannori dino; qaru coyi Maganu hajajo wonshate. 20 Mittu mittunku manchi woshshami woyite noo gari ikkihano ikkiro, hakko garinni heeꞌrona. 21 Woshshamoottohu borojjichu heedheeti? Hatti yaachishshoonkehe; borojjimmatenni fula dandaatto faro noohero kayinni, hattenne faro horoonsiꞌri. 22 Borojjichu heeꞌre woshshaminohu Mootichu rosaanchi baalu, borojjimmatenni fulinoho Mootichu manchooti; woshshami woyite borojjicho ikkinokkihu baaluno Kiristoosi borojjichooti. 23 Kiꞌne lowo waaginni woxxinoonnireetina, mannu borojje ikka agurre. 24 Roduuwa, mittu mittunku manchi woshshami woyite noo gari ikkihano ikkiro, Maganu albaanni hakko garinni heeꞌrona.

25 Adhantinokkiri* daafira Mootichu hajajinoeri dino; ikkollana, Mootichu maaronni kainohunni ammanamino manchi gede ikke, ani umiꞌya hedo coyiꞌreemmo. 26 Hakko daafira xaa yannara noo qarra hendiro, mittu manchi noo garinni heeꞌriro woyya lawannoe. 27 Galte adhootto? Hatto ikkiro babbaxxite heeꞌrate heddooti. Galte dinooheho? Hatto ikkiro galte hasidhooti. 28 Ikkollana adhittorono cubbo diꞌꞌikkannohe. Seemono* mine assidhuro cubbo diꞌꞌikkannose. Ikkollana adhantannore lowo qarri amadannonsa.* Ane halcho kayinni konni qarrinni gattinanni gedeeti.

29 Qoleno roduuwa, gattino yanna harancho ikkitinota kuleemmoꞌne. Konnira xaate galte noonsari noonsakkiri gede ikkito; 30 wiꞌlitannori wiꞌlitannokkiri gede, hagiidhitannori hagiidhitannokkiri gede, hidhitannori mitturino noonsakkiri gede, 31 hattono alame horoonsidhannori, ise gudisse horoonsidhannokkiri gede ikkito; korkaatuno tenne alame ikkito soorrantanni no. 32 Konnira yaaddo gattinara hasiꞌreemmo. Adhinokki manchi Mooticha hagiirsiisanno gara hedanni Mootichu coyi daafira yaadanno. 33 Adhino manchi kayinni galtesi hagiirsiisanno gara hedanni alamete coyira yaadanno; 34 konnira wodanisi bebbeehamino. Qoleno mine assidhinokki manchono ikko seemo mannimmasennino ikko ayyaanisenni qullaawa ikkitanno gede Mootichu coyi daafira yaaddanno. Mine assidhino mancho kayinni, minaannase hagiirsiissanno gara heddanni alamete coyira yaaddanno. 35 Ikkollana hatto yoommohu kiꞌne kaaꞌlammora yeeti ikkinnina furro fuuqqo hoꞌlammoꞌnera diꞌꞌikkino; hatteentenni, gara ikkinore assitinanni gedenna hedoꞌne billaallitukkinni woꞌmanka woyite Mootichaho woꞌmu wodaninni soqqantinanni gede kakkayisammoꞌnera yeeti.

36 Ikkollana mittu manchi seenne adhikkinni* amanyootunni heeꞌra dandaannokkiha lawisiro, hattono anjicho egemminohanna* adha hasiꞌrannoha ikkiro, hasiꞌrinore assona; tini cubbo diꞌꞌikkitannosi. Togoo manni adhona. 37 Ikkollana mittu manchi wodanisinni murciꞌrironna adha dihasiissannoe yee hediro, hattono isonooto qeeꞌla dandiironna seenne adhikkinni heeꞌrate* wodanisinni hediro dancha assanno. 38 Konnira adhannohu* baalu dancha assanno; adhannokkihu baalu qole roore dancha assanno.

39 Minaama minaannise lubbotenni noo geeshsha usurantinote. Minaannise reyiro* kayinni Mooticha ammaninohalla ikkiro baxxuhura assiꞌra dandiitanno. 40 Ane hedo gede ikkiro kayinni, noo gedeenni heedhuro roore hagiirraame ikkitanno; qoleno, anerano Maganu ayyaani nooeta seekke afoommo.

8 Kaphu magannara kakkalloonni sagale daafira, baalunkura egenno noonketa anfoommo. Egenno booꞌninanni gede assitanno; baxillu kayinni dhaawanno. 2 Mitto coye afoommo yee hedanno manchi, hakko coye afa hasiissannosi geeshsha diafino. 3 Ikkollana mittu manchi Magano baxannoha ikkiro, Maganu iso egenninosi.

4 Xa kayinni kaphu magannara kakkalloonni sagale itate daafira coyiꞌreemmo; kaphu maganna haafare ikkitinotanna mitto Magano agurranna wolu nookkita anfoommo. 5 Batinye “magannanna” batinye “mootoolla” noonte gede, gordohono baattoteno magannate yinanniri heedhurono, 6 ninkera kayinni, baalunkuri isinni ikkinohu, ninkeno isire ikkinoommohu mittu Magani Annu noonke; qoleno baalunkuri isi widoonni ikkinohunna ninkeno isi widoonni ikkinoommohu mittu Mootichi Yesuusi Kiristoosi noonke.

7 Ikkollana tenne egenno afiꞌrinohu baalanka manna diꞌꞌikkino. Mitootu konni albaanni kaphu maganna magansidhannore ikkitino daafira, kaphu magannara kakkalloonni sagale ittanno woyite kaphu maganna magansidhanni nooha lawannonsa; tiiꞌꞌinsa laafa ikkino daafira boroorannonsa.* 8 Ikkollana sagale Maganunniwa shiqqi diassitannonke; ita hoongeenna gate baꞌꞌannonkeri dino; inteennano lexxannonkeri dino. 9 Kayinni, doodhate qoossoꞌne miteekkite laafootaho guficho ikkitannokki gede qorophe. 10 Mittu manchi ati egenno noohehu kaphu maganna galmi giddo ittanna laihero, konni laafu manchi tiiꞌꞌi kaphu magannara kakkalloonni sagale itanno gede dixixxiiwannosi? 11 Hatto ikkiro, Kiristoosi reyinosihu kuni laafu rodiikki ate egennonni bai* yaate. 12 Konni garinni roduuwiꞌne aana cubbo loossinironna tiiansa madiissitiniro, Kiristoosi aanano cubbo loossinanni heedhinoonni. 13 Sagale rodiiꞌyara guficho ikkitannoha ikkiro, rodooꞌya gufiseemmokki gede xaate maala horonta diꞌꞌiteemmo.

9 Ani hasiꞌroommore assa didandeemmo? Ani soqqamaasincho diꞌꞌikkoommo? Mootichanke Yesuusa dilaoommo? Kiꞌne Mootichu loosinni afiꞌroommo guma diꞌꞌikkitinoonni? 2 Wolootaho soqqamaasincho ikka hoogummoro nafa, kiꞌnera soqqamaasincho ikkoommoti kayinni huluullammannire diafidhino! Kiꞌne, ani Mootichu soqqamaasincho ikkoommota leellishanno malaateeti.*

3 Busha assitannoerira qoꞌleemmo dawaro tenneeti: 4 Itatenna agate ninkera qoosso* dinonke? 5 Wole soqqamaasinenna Mootichu roduuwi gede hattono Keefa* gede ammantino galte* adhine ledo haꞌra didandiineemmo? 6 Woy maalaamittete looso agurate qoosso noonkekkiri Barnabaasinna ane callaatini? 7 Umisi woxinni olamaancho ikke soqqamannohu nooni? Woy woyine kaasiꞌre laalose itannokkihu ayeti? Woy saada allaale hatte saada ado gutamannokkihu nooni?

8 Coyiꞌranni noommoti mannu hedootini? Seeruno hatto diyaanno? 9 Muse Seerira, “Gide gananni noo hando afoo usurtooti” yine borreessinoonni. Maganu hatto yiinohu handate yeetini? 10 Hatto yee coyiꞌrinohu dininkera yeeti? Addanko, hatto yine borreessinoonnihu ninkera yineeti; korkaatuno hawuurannohuno gide gananno manchino loosannohu qeechaꞌya adheemmo yee hexxeeti.

11 Ninke kiꞌne mereero ayyaanaamittete coye winxummoro, kiꞌnewiinni maalaamittete coye mixxa loworeetini? 12 Wolootaho kiꞌnewiinni kaaꞌlo afiꞌrate qoosso heedhunsaro ninkera hakkiinni roortino qoosso diheedhannonke? Qoosso* noonkeha ikkirono ninke kayinni kiꞌnewiinni mittoreno dixaꞌmiꞌnoommo; hatteentenni, Kiristoosihu danchu duduwira horonta guficho ikkineemmokki gede baalanka coye cincine heeꞌnoommo. 13 Qullaawa mine soqqantannori qullaawu mini sagale ittannotanna ganyite kakkalote darga soqqantannori kakkalote darginni qeecha adhitannota diaffinoonni? 14 Hatteente gede, Mootichuno dancha duduwo dudubbannori heeshshote hasiisannonsare danchu duduwinni afidhanno gede hajajino.

15 Ani kayinni tenne qixxaawo giddo mitteno dihoroonsiꞌroommo. Hige tenne borreessoommohu ‘Kuni coyi mayira gatie?’ yee diꞌꞌikkino; korkaatuno, aye manchino kuꞌle naaxxeemmore hoogeemmo gede assaente reyummoro woyyannoe! 16 Xa dancha duduwo duduwanni noommoha ikkirono, naaxxeemmo gede assannoeri dino; mayira yiniro, baxono giwono dancha duduwo duduwa hasiissannoe. Isinni dancha duduwo duduwa hoogummoro anera aanneꞌe! 17 Konne coye umiꞌya fajjonni assummoro, baꞌraarsha afiꞌreemmo; baxummokkinni assummoro nafa Maganu konne looso eeggo uyinoe. 18 Ikkina afiꞌreemmo baꞌraarshi maati? Dancha duduwo duduweemmo woyite baatooshshiweelo mulla duduwate; hatto asseemmohu, danchu duduwi widoonni afiꞌroommo silxaane* garimale horoonsiꞌreemmokki gedeeti.

19 Ani mittu manchirano borojjicho diꞌꞌikkoommo; ikkollana danduummo deerrinni lowo manna Kiristoosi doogowa qolammora, baalunku mannira aneneeto borojjicho assoommo. 20 Ayihudoota qolammora Ayihudootaho Ayihudichu gede ikkummo; ani seerunni* galoommoha ikka hoogummorono, seerunni galtinore qolammora yee seerunni galtinorira seerunni galannohu gede ikkummo. 21 Maganu seera agadheemmohanna Kiristoosi seerinni galeemmoha ikkirono, seeru noonsakkire qolammora yee seeru noonsakkirira seeru noosikki manchi gede ikkummo. 22 Dhukiweeltinore qolammora yee dhukiweeltinorira dhukiweelinohu gede ikkummo. Dandaamie deerrinni mito manna gatisammora yee, duuchunku gari mannira duuchankare ikkoommo. 23 Dancha duduwo wolootaho kulammora, danchu duduwira yee baalankare asseemmo.

24 Qolchanshote heewora baalunku dodannota, baꞌraarsha adhannohu kayinni mitto calla ikkinota diaffinoonni? Kiꞌneno baꞌraarsha adhitinanni gede hakko garinni dodde. 25 Qolchantannori baalu* woꞌmunku coyira insaneeto eemadhitanno. Insa hatto assitannohu baꞌanno baꞌlatto adhateeti; ninke kayinni hatto assineemmohu baꞌannokki baꞌlatto adhateeti. 26 Hakko daafira, ani mulla haafa yee didodeemmo; tuntuꞌmo kayiseemmohuno diilallo ganate diꞌꞌikkino; 27 wolootaho sabbakummohu gedensaanni ani umiꞌya mishame* gateemmokki gede mannimmaꞌya hulmanni* borojjichu gede maahoyye yite galtannoe gede assiꞌreemmo.

10 Roduuwa, annuwanke baala gomichu woroonni hadhinotanna baalunku baaru giddoonni saꞌinota qaagginara hasiꞌreemmo; 2 insa baalunku Muse haꞌrunsite gomichunninna baarunni cuuantino; 3 qoleno baalunku mittu garita ayyaanaamittete sagale ittino; 4 hattono baalunku mittu gariha ayyaanaamo waa aggino. Agginohuno ledonsa haꞌranni noohu ayyaanaamu kinchinniiti; hakku kinchino Kiristoosira lawishshaho.* 5 Ikkollana Maganu insa giddonni lowo manninni hagiidhinokki daafira halalla waxaaxxino.

6 Insa gawajjanno coye halchituhu gede, ninkeno hattoore halchineemmokki gede kuni coyi ninkera qorophishsha ikkinonke. 7 “Mannu itaranna agara ofolli. Hakkiinni sirbara kai” yine borreessinoonni garinni insa giddonni mitu assitunte gede, kiꞌneno kaphu maganna magansidhinannire ikkitinoonte. 8 Insa giddo mitu mitu foorteenna* mereerinsanni 23,000 manni mittu barrinni waxaaxi gede, ninkeno foorroonke.* 9 Insa giddonni mitu mitu Yihowa* jiffeenna hamasu idde gudino; ninkeno iso jinfoonke. 10 Insa giddonni mitu gungunteenna Maganu sokkaasinchi* huninonsa; kiꞌneno gunguntinannire ikkitinoonte. 11 Kuni coyi insara iillinohu ninkera lawishsha ikkaraati; borreessinoonnihuno konni diri goofimarchira heeꞌnoommorira ninkera qorophishsha ikkankeraati.

12 Konnira, uurre nooha lawannosihu uwannokki gede qoropho. 13 Manna baalaho iillanno fonqolo agurranna baxxino fonqoli diꞌꞌillinoꞌne. Ikkollana Maganu ammanaminoho; isi duqqa dandiitinannikki fonqoli iillaꞌnera wore dilaꞌꞌanno; hatteentenni fonqolu iillannoꞌne woyite kaajjitine saꞌꞌa dandiitinanni gede fultinanni furcho qixxeessannoꞌne.

14 Konnira roduuwaꞌya, kaphu maganna magansiꞌratewiinni xooqqe. 15 Konne coye coyiꞌranni noommohu wodanchanno manniraati; coyiꞌranni noommori halaalehoronna teꞌee kiꞌnenni yiiyye. 16 Magano galante galatu finiinchinni angeemmo woyite Kiristoosi mundee gutammanni heeꞌnoommoha diꞌꞌikkino? Qoleno tima hiiqqine inteemmo woyite Kiristoosi maala gutammanni diheeꞌnoommo? 17 Timu mitto ikkino daafira, ninke batinye ikkinummorono mitto bisooti; korkaatuno baalunku qamanseemmohu konne mitto timaati.

18 Hanni Israeelete manna* hedde: Kakkalloonnire ittannori kakkalote darginni beeqqitannore diꞌꞌikkitino? 19 Hatto yaaꞌya mayyaate? Kaphu magannara kakkalloonniri woy kaphu maganna umise kaaꞌlitannori no yaateni? 20 Deeꞌni; daga kakkaltannohu agaaninteteeti ikkinnina Maganoho diꞌꞌikkino yaanni noommo; agaanintete ledo gutantinarano dihasiꞌreemmo. 21 Yihowa* finiinchinninna agaanintete finiinchinni aga didandiitinanni; qoleno, “Yihowa* sagalenna” agaanintete sagale ita didandiitinanni. 22 Hatto assineemmohu ‘Yihowa* hinaasiisateeti?’ Ninke isinni roore jawaatoota ikkinoommoni?

23 Baalanka coye fajjinoonni; baalunku coyi kayinni kaaꞌlanno yaa diꞌꞌikkino. Baalanka coye fajjinoonni; baalunku coyi kayinni dhaawanno yaa diꞌꞌikkino. 24 Mittu mittunku manchi woꞌmanka woyite wolu injo ikkinnina umisi injo hasiꞌroonke.

25 Tiiꞌꞌiꞌnenni kainohunni huluullantine hiikkiinni dayinoho yitine xaꞌmitinikkinni maalu dikkonni hirroonnire baala itte; 26 korkaatuno “baattonna giddose noori baalu Yihowaho.”* 27 Ammaninokki manchi koyiseennaꞌne maahoyye yitine hadhiniro, tiiꞌꞌiꞌnenni kainohunni huluullantine hiikkiinni dayinoho yitine xaꞌmitinikkinni albaꞌneenni shiqinore baala itte. 28 Ikkollana mittu manchi, “Kuni kakkalote gorrinoonni maalaati” yiiꞌnero, hakkunni manchiranna tiiaho yitine ittinoonte. 29 Hatto yoommohu kiꞌne tiiꞌꞌi daafira ikkikkinni wolu manchi tiiꞌꞌi daafiraati. Baxummore assate qoosso nooeha ikkirono, konninni kainohunni wolu manchi tiiꞌꞌi busha assaera dihasiꞌreemmo. 30 Magano galaxxe iteemmoha ikkiro, iso galaxxoommo coyira mayira arrassameemmo?

31 Hakko daafira, ittinanninna agginanni woyite woy wole aye coyeno assitinanni woyite baalankare Maganu ayirrinyira asse. 32 Ayihudootahono, Girikootahono, Maganu songorano guficho ikkitinannikki gede qorophe; 33 ani lowo manni gatara hasiꞌreemmo daafira umiꞌya injo agure insa injo hasiꞌre, asseemmo coyi baalunkunni manna baala hagiirsiisate woꞌnaaleemmo; kiꞌneno hatto asse.

11 Ani Kiristoosi faale haꞌreemmonte gede, kiꞌneno ane faale hadhe.

2 Baalunku coyira qaagginanniehuranna rosiisoommoꞌne roso seekkitine cuꞌmidhinoonni daafira galateemmoꞌne. 3 Ikkollana, labbaahu baalunkura umu Kiristoosi, meyatera umu labbaaha, hattono Kiristoosira umu Magano ikkinota affinara hasiꞌreemmo. 4 Labbaahu umo gugguꞌle huuccannoha woy masaalo coyiꞌrannoha ikkiro umosi shollishanno; 5 meyati kayinni umo gugguꞌlitukkinni huuccitannoha woy masaalo coyidhannoha ikkiro umose shollishshanno; hatto assitannoti umo meexxitino meyate gedeeti. 6 Meyati umo gugguꞌla hoogguro haxidhona; umo haxiꞌra woy meexxa saalsiissannoseha ikkiro kayinni gugguꞌlitona.

7 Labbaahu Maganu dananna ayirrinye ikkino daafira umo gugguꞌla dihasiissannosi; meyati kayinni labbaahu ayirrinyeeti. 8 Meyati labbaahuwiinni daggino ikkinnina labbaahu meyatewiinni didayino. 9 Qoleno meyati labbaahura kalaqantino ikkinnina labbaahu meyatera dikalaqamino. 10 Konni korkaatiranna sokkaasinete daafira, meyati silxaanete maahoyye yite galtannota leellishanno malaate umoho wodhito.

11 Ikkollana Mooticha haꞌrunsitannoriwa, meyati labbaahu nookkiha, labbaahuno meyati nookkiha diheeꞌranno. 12 Meyati labbaahuwiinni dagginonte gede, labbaahuno meyate widoonni dayino; baalunku coyi dayinohu kayinni Maganuwiinniiti. 13 Hanni kiꞌnenni yiiyye: Meyati umo gugguꞌlitukkinni Magano huuccituro garahoni? 14 Labbaahu umo losse seedisiꞌra saala ikkitinota kalaqamu umisi dirosiisannoꞌne? 15 Meyatera kayinni dananchu seediro kuni isera ayirrinye diꞌꞌikkino? Korkaatuno danancho uyinoonnisehu gugguꞌlitannori dargaati. 16 Aye manchino tenne wodho agurre wole wodhonni gala hasiissannonke yee heewisama hasiꞌriro kayinni, ninkerano ikko Maganu songora tenne agurranna wole wodho dinonke.

17 Ikkollana, xaadiꞌne gawajjannota agurranna hakkeeshsha kaaꞌle yaannori nookki daafira, konne biddishsha eemmoꞌne woyite digalateemmoꞌne. 18 Umihunni, songote gamba yitinanni woyite mereeroꞌne babbadooshshu noota macciishshoommo; qoleno macciishshoommo coyi giddo gamu halaale ikkinota ammanoommo. 19 Hakko daafira mereeroꞌne wole ammaꞌnote gaamo kalaqamase digattanno; tini kiꞌne giddo Maganu albaanni ayirrinye afidhinore bande anfanni gede assitanno.

20 Gamba yitinanni woyite xaaddinannihu amanyootunni Mootichu Hurbaate ittinara diꞌꞌikkino. 21 Mootichu Hurbaate ittinanni woyite, kiꞌne giddo mitu uminsa hurbaate balaxxe ittanno daafira, mitu hudiꞌre heeꞌreenna mitu dimbanno. 22 Ittinannihunna agginannihu minu dinoꞌne? Maganu songo mishshinannihunna mitturino noonsakkire saalfachishshinannihu mayiraati? Kiꞌne mayyuummoro woyyanno? Galatoꞌneni? Tennera digalateemmoꞌne.

23 Ani Mootichuwiinni adhoommore kiꞌnera sayisoommo; Mootichu Yesuusi sayinse uyinisi hashsha tima haaꞌre, 24 Magano galatihu gedensaanni hiiqqaqqe, “Kuni kiꞌne daafira yee eemmo maaliꞌyara lawishshaho. Konne woꞌmanka woyite ane qaagooshshira asse” yii. 25 Hurbaate ittuhu gedensaanni finiinchono haaꞌre hatto assi; hakkiinni togo yii: “Kuni finiinchi mundeeꞌyanni kaajjannohu haaru gondoorira lawishshaho. Konni finiinchinni agginanni yanna baalantera, woꞌmanka woyite konne ane qaagooshshira asse.” 26 Konne tima ittinanninna konni finiinchinni agginanni yanna baalantera, Mootichu daa geeshsha reyosi dudubbinanni.

27 Konnira, hasiisisikkinni tima itannohunna Mootichu finiinchinni agannohu baalu Mootichu maalinna mundee daafira xaꞌmamanno. 28 Mittu manchi hasiisannosironna teꞌee buuxate, balaxe isonooto seekke layiꞌro; tima itanna finiinchunni aga dandaannohu hatto assiro callaati. 29 Korkaatuno, bisu mayi tiro afiꞌrinoro huwatikkinni itannohunna agannohu, itannorinninna agannorinni umisi aana yoo abbiꞌranni no. 30 Kiꞌne giddo lowo manni wolqiweelinohunna dhiwaminohu, haammatu manni qole reyinohu* iseraati. 31 Ninkeneeto layiꞌne ayimmanke anfoommoro kayinni yoo diyinanninke. 32 Ikkollana yoo yinanninke woyite, alamete ledo qorichishammeemmokki gede Yihowa* seejjanni noonke. 33 Konnira roduuwaꞌya, Mootichu Hurbaate itate gamba yitinanni woyite mimmito agarre. 34 Gamba yitinanni woyite yoo yinanniꞌnekki gede, hudiꞌrinohu heeꞌriro minesi ito. Gatino coye kayinni dayemmo woyite biddi asseemmona.

12 Roduuwa, ayyaanu elto daafirano seekkitine affinara hasiꞌreemmo. 2 Dagate wido ikkitine heedhinoonni waro,* huuro afidhinokkite kaphu maganna hoode hadhinanni insa qoltuꞌnewa baalawa higginanni raataabbinoonnita affinoonni. 3 Hakko daafira konne coye affinara hasiꞌreemmo: Maganu ayyaaninni coyiꞌranni, “Yesuusi rumaminoho!” yaannohu mittuno dino; qoleno qullaawu ayyaaninni ikkiro ikkinnina, “Yesuusi Mootichaho!” yaa dandaannohu dino.

4 Addi addi elto no; qullaawu ayyaani kayinni mittoho; 5 addi addi soqqansho no; soqqammanni Mootichi kayinni mittoho; 6 addi addi loosi no;* baalunku manni konne looso loosanno gede assannohu kayinni mitto Maganooti. 7 Ikkollana qullaawu ayyaani kaaꞌlo mittu mittunku manchi aana xabbe leeltanno; Maganu ayyaana aannohu baalunku manni injoraati. 8 Mitoho qullaawu ayyaaninni hayyo* coyiꞌrate dandoo uyinanni; woleho qole hakko ayyaaninni egennotenni coyiꞌrate dandoo uyinanni; 9 hakko ayyaaninni mitoho ammana uyinanni; mitoho hakko ayyaaninni hursate elto uyinanni; 10 mitoho maalale loosate, mitoho masaalo coyiꞌrate, mitoho qullaawu ayyaaninni coyiꞌnoonnire huwatate, mitoho addi addiha haaro qaale* coyiꞌrate, mitoho addi addiha haaro qaale tirate dandoo uyinanni. 11 Ikkollana konne baalanka coye assannohu hakkonne mitto ayyaanaati; kuni ayyaani fajjosi garinni mittu mittunkura elto beehanno.

12 Bisu mitto ikkirono bisu kifilla kayi batinyete; konni bisi kifilla baalanti batinye ikkite heedhenni mitto biso ikkitinonte gede, Kiristoosino hattooti. 13 Ayihudootuno Girikootuno, borojjootuno borojje ikkinoommokkirino, ninke baalunku mitto biso ikkinammora mittu ayyaaninni cuuammoommo; qoleno ninke baalunkura angammora mitto ayyaana uyinoonninke.

14 Mannimma mitte bisu kifile calla ikkikkinni batinye bisu kifilla afidhino. 15 Lekka, “Ani anga ikkoommakki daafira bisu kifile diꞌꞌikkoomma” yituro, hatto yitino daafira bisu kifile ikkase digattanno. 16 Qoleno macca, “Ani ille ikkoommakki daafira bisu kifile diꞌꞌikkoomma” yituro, hatto yitino daafira bisu kifile ikkase digattanno. 17 Mannimma gudisante ille ikkitoommero mayinni macciishshinanni? Mannimma gudisante macca ikkitoommero mayinni suꞌniissinanni? 18 Ikkollana Maganu mitte mittenta bisu kifile hasiꞌrino darga worino.

19 Bisu kifilla baala mitto gara ikkitoommero mannimma heedhannoni? 20 Ikkollana bisu kifilla batinye ikkiturono bisu kayinni mittoho. 21 Ille anga, “Ani ate dihasiꞌreemma” yite diaffanno; woy umu lekka, “Ani ate dihasiꞌreemmo” yee diafanno. 22 Isinni, mullare labbannoti bisu kifilla lowo geeshsha hasiissannote; 23 hakkeya diayirradote yine hendeemmota bisu kifilla roore ayirrinseemmo; hakko daafira, laꞌꞌate saallannita bisu kifilla kawajjinshe amaxxineemmo; 24 baxissannote bisu kifillankera kayinni hattoo towaanyo dihasiissannonsa. Ikkollana Maganu minshoonnite bisu kifillara roore ayirrinye oye biso kalaqino; 25 hatto assinohu mannimmate mereero babbadooshshu heeꞌrikkinni, bisu kifilla tiꞌi teꞌee taalo marartanno gedeeti. 26 Mitte bisu kifilera xissiro, wole baalante bisu kifillara mitteenni xissanno; woy mitte bisu kifile ayirrinye afidhuro, wole bisu kifilla baalano mitteenni hagiidhitanno.

27 Kiꞌne Kiristoosi bisooti; qoleno kiꞌne mittu mittunku bisisi kifileeti. 28 Maganu addi addita bisu kifilla: umihunni soqqamaasine, layinkihunni masaalaano, sayikkihunni rosiisaano, hakkiinni maalale loossannore, hakkiinni hursate elto noonsare, manna kaaꞌlitannore, massagate dandoo noonsare, addi addiha haaro qaale coyidhannore songote giddo worino. 29 Baalunku soqqamaasineteni? Baalunku masaalaanoteni? Baalunku rosiisaanoteni? Baalunku maalale loossannoni? 30 Baalunkura hursate elto noonsani? Baalunku haaro qaale coyidhannoni? Baalunku haaru qaalinni coyiꞌnoonnire tirtannoni? 31 Ikkollana baalanta roortino elto afiꞌrate sharrama* agurtinoonte. Ani baalanta roortino doogo leellisheemmoꞌne.

13 Mannunna sokkaasinete qaalinni coyiꞌrummoro, baxillu hoogiero kayinni luulanno bilbilinna qililli yitanno simbaale* gedeeti. 2 Masaalo coyiꞌrate elto heedhuero, qullaawa fojo baalanna egenno baala huwata danduummoro, ilaala darginni kayissanno* geeshshi ammana heedhuero, baxillu hoogiero kayinni waagu dinooeho.* 3 Manna itisate nooere baala uummoronna naaxxeemmo gede mannimmaꞌya sayise uummoro, baxillu hoogiero kayinni afiꞌreemmori mitturino dino.

4 Baxillu cincahonna shaqqadoho. Baxillu dihinaasanno. Baxillu umosi dibokkeessanno; baxillu dibooꞌnanno; 5 baxillu seerimale gede diꞌꞌikkanno;* baxillu umisi injo dihasiꞌranno; baxillu dicaaccaawanno. Baxillu koma* dikiidhanno. 6 Baxillu halaalunni hagiidhanno ikkinnina, bunshetenni dihagiidhanno. 7 Baxillu baalankare dandee saꞌꞌanno; baalankare ammananno; baalankare hexxanno; baalankare cince heeꞌranno.

8 Baxillu hegerera heeꞌranno. Masaalo coyiꞌrate elto, haaro qaale coyiꞌratenna* egennote elto kayinni gattanno. 9 Egennonke xeate; coyiꞌneemmo masaalono woꞌma diꞌꞌikkitino; 10 woꞌmu daanno woyite kayinni xeu hoꞌlanno. 11 Qaaqqu noommo waro qaaqqu gede ikke coyiꞌreemmo, qaaqqu hedanno garinni hedeemmo, hattono qaaqqu huwatanno garinni huwateemmo; xa kayinni anje gudoommo daafira, qaaqqu gede ikka aguroommo. 12 Xaa yannara, siwiilunni seekkinoonni hincilaallonni laꞌnannihu gede xawe leellinkekki laꞌnanni heeꞌnoommo; hakkawoyite kayinni albankeenni noohu gede ikke xawe leellannonke. Xa nooe egenno xeate; hakka woyite kayinni ane Maganu seekke egenninoe garinni anerano woꞌma egenno heedhannoe. 13 Ikkollana kuni sasu coyi yaano ammana, hexxonna baxillu noo gedeenni heeꞌranno; kuri sasunku giddo rooru kayinni baxilleho.

14 Baxillu hoode hadhe; ikkirono ayyaanu elto, roorenkanni masaalo coyiꞌrate elto afiꞌrate sharramme.* 2 Haaro qaale* coyiꞌrannohu, mannaho ikkikkinni Maganoho coyiꞌranno; isi ayyaanunni qullaawa fojo coyiꞌrirono, mittuno macciishshannohu dino. 3 Ikkollana, masaalo coyiꞌrannohu coyiꞌrannorinni manna dhaawanno, jawaachishanno, hattono sheshifachishanno. 4 Haaro qaale coyiꞌrannohu isonooto dhaawanno; masaalo coyiꞌrannohu kayinni songo dhaawanno. 5 Baalunku haaro qaale coyidhinara hasiꞌreemmo; masaalo coyidhiniro kayinni roore baxeemmo. Masaalo coyiꞌrannohu haaro qaale coyiꞌrannoha rooranno; mayira yiniro, haaro qaale coyiꞌrannohu coyiꞌrannore tira hoogiro songo dhaawa didandaanno. 6 Xa kayinni roduuwa, ani kiꞌnewa daye Maganu xawisinoere woy baxxitino egenno woy masaalo woy roso kulummoꞌnekkinni, haaro qaale coyiꞌrummoro maricho kaaꞌleemmoꞌne?

7 Suusulletenna gingilaatu gedeehu huuro fushshannohu lubbo afiꞌrinokki uduunnino hattooti. Giddonsanni fultanno huuro badooshshi xawe leella hoogiro, suusullete woy gingilaatu giddonni fultanno huuro hiitto assine bada dandiinanni? 8 Xurumba ufuunfeenna fultanno huuro bade afate qarrissannota ikkituro, olaho ayi qixxaawanno? 9 Hatteente gede, afiiꞌnenni fulanno qaali huwatate qarrisannoha ikkiro, mayitinanni heedhinoonniro ayi afanno? Hatto ikkiro, bubbete coyidhinanni heedhinoonni. 10 Alamete aana duuchu gari qaali no; ikkollana tiro afiꞌrinokki qaali dino. 11 Mittu manchi coyiꞌranno qaali leella hoogiero, ani hakkunni coyiꞌranno manchira wosiꞌneemmosi; isino anera wosiꞌnannoe. 12 Konnira, kiꞌneno ayyaanu elto afiꞌrate lowo geeshsha halchitinanni daafira, songo dhaabbanno elto woꞌmitannoꞌne gede hasidhe.

13 Hakko daafira, haaro qaale coyiꞌranno manchi coyiꞌrannore tira dandaanno gede huuccatto assiꞌro. 14 Korkaatuno haaru qaalinni huucceemmoha ikkiro, huuccitanni nooti ayyaanu eltoꞌyaati; huucceemmohu kayinni tirose leelteennae diꞌꞌikkino. 15 Ma assiniro woyyannoyya? Ayyaanu eltonni huucceemmo; huucceemmohu kayinni tirose leelteennaeeti; ayyaanu eltonni Maganoho faarsiꞌreemmo; faarsiꞌreemmohu kayinni tirose leelteennaeeti. 16 Hatto ikka hoogiro, ati ayyaanu eltonni Magano galatittoro mereerokki noohu mittoreno afinokki manchi coyidhanni noottori leellinosikki daafira galatakki mama afe “Hamiiꞌni” yaanno? 17 Assattoti galatu huuccatto danchate; wole manna kayinni didhaabbanno. 18 Ani kiꞌne baalunkunni roore lowoha haaro qaale coyiꞌreemmo daafira Magano galaxxeemmo. 19 Songote giddo haaru qaalinni tonne kume qaalla coyiꞌrammonte, wolootano rosiisa* dandeemmo gede surreꞌyanni* onte qaalla coyiꞌra woyyitannoe.

20 Roduuwa, qaaqquullu hedanno garinni heddinoonte; bushu coyira kayinni qaaqquullu gedeere ikke; jajjabbu manni hedanno garinni hedde. 21 Seeru giddo togo yine borreessinoonni: “‘Konni mannira, manni gobba qaalinninna wosinu afiinni coyiꞌreemmo; insa kayinni hakkawoyiteno dimacciishshitannoe’ yaanno Yihowa.”* 22 Hakko daafira, haaro qaale coyiꞌra ammantinorira ikkikkinni ammantinokkirira malaateho; masaalo coyiꞌnannihu kayinni ammantinokkirira ikkikkinni ammantinoriraati. 23 Konnira songo woꞌma mitteenni gamba yite noowa baalunku addi addiha haaro qaale coyiꞌrannoha ikkiro, mittore afinokkihu woy ammaninokki manni eanno woyite, ‘Kuri macharaartinoreeti’ diyaannoꞌne? 24 Ikkollana kiꞌne baalunku masaalo coyidhinanni heedhineenna, ammaninokkihu woy mittore afinokki manchi eiro, coyidhinanni coyinni seejjamanno, hattono isonooto qonqolche layiꞌranno. 25 Hatte yannara wodanisi giddo maaxame noori xawo fulanno; konnira alba hige kumbuule, “Halaalinta Maganu kiꞌne mereero no” yaanni Magano magansiꞌranno.

26 Roduuwa, ma assiniro woyyannoyya? Mitteenni gamba yitinanni woyite mitu faarsanno, wolu rosiisanno, mitu ajuujatenni lainore kulanno, wolu haaro qaale coyiꞌranno, wolu qole tiranno. Baalunku coyi dhaawannoha ikko. 27 Haaro qaale coyidhannori heedhuro, lame woy sase saꞌoonke; qoleno bado bado coyidhona; coyidhannoreno wolu manchi tirona. 28 Tirannohu hoogiro kayinni, songote giddo sammi yite, uminsaranna Maganoho coyidhona. 29 Lame woy sase masaalaano coyidhona; wolootu kayinni insa coyidhannore huwatate woꞌnaaltona. 30 Ikkollana mittu manchi hakko ofolle heeꞌre ajuuja lairo, balaxe coyiꞌranni noohu sammi yoona. 31 Woꞌmunku rosanno gedenna woꞌmunku jawaatanno gede, kiꞌne baalunku masaalo bado bado coyidhe. 32 Masaalaano ayyaanu elto garunni horoonsiꞌra hasiissannonsa. 33 Korkaatuno, Maganu keeru Maganooti ikkinnina luulu Magano diꞌꞌikkino.

Qullaawootu songo baala assitannonte gede, 34 meentu songote giddo coyiꞌrara fajjinoonnikki daafira sammi yoona. Seeru yaannonte gede, maahoyye yee galona. 35 Leellinonsakkiri heeꞌriro mine minaannansa xaꞌmona; korkaatuno meyati songote giddo coyiꞌra saalaho.

36 Maganu qaali dayinohu kiꞌnewiinniiti? Woy kiꞌnewa calla iillino?

37 ‘Ani masaalaanchoho’ woy ‘Anera ayyaanu elto nooe’ yee hedannohu heeꞌriro, kuni borreessoommoꞌneri Mootichu hajajo ikkinota ammane adhona. 38 Konne coye lashshi assannohu heeꞌriro kayinni, isono lashshi assinannisi.* 39 Konnira roduuwaꞌya, masaalo coyiꞌrate diinaggaabbe; haaro qaale coyiꞌrano hooltinoonte. 40 Ikkollana, baalunku coyi seerunninna amanyootunni ikko.

15 Roduuwa, xa qole alba kuloommoꞌneha dancha duduwo qaagiisseemmoꞌne; kuni danchu duduwi kiꞌneno adhitinoonnihonna halantinoonniho. 2 Qoleno kuloommoꞌneha dancha duduwo seekkitine cuꞌmidhiniro, danchu duduwinni gattinanni; hakkuyi kaꞌa kayinni ammantinoonnihu beebbaatilla.

3 Ani adhoommoha qara coye kiꞌnera sayisoommo; hakkuno, Qullaawa Borro kultanno garinni Kiristoosi ninke cubbira yee reyino; 4 hakkiinni madaaramino; qoleno Qullaawa Borro yitanno garinni sayikki barra kaino; 5 Keefara* leellihu gedensaanni Tonaalame soqqamaasinesirano leellino. 6 Hakkunni gedensaanni, 500 saꞌanno roduuwira mitte hige leellino; kuri giddo rooru xaano ledonke no; mitootu kayinni reyitino.* 7 Hakkiinni Yaaqoobira leellihu gedensaanni soqqamaasine baalantera leellino. 8 Jeefoteno, aleesu gede ikkoommohura anera leellinoe.

9 Bashsho Maganu songo waadeemmoha ikkoommo daafira, ani soqqamaasine baalantera woriidihonna soqqamaasincho ikke woshshama dihasiissannoeho. 10 Ikkollana xa ikkoommota ikka dandoommohu Maganu eltonniiti. Uyinoe eltono mullawa digattino; isinni, insa baalunkunni roore daafure loosoommo; ikkollana konne assitinoti ledoꞌya noote Maganu eltooti ikkinnina ane diꞌꞌikkoommo. 11 Hakko daafira anino insano sabbankeemmohu konni garinniiti; kiꞌne ammantinoonnihuno konni garinniiti.

12 Kiristoosi reyotenni kainota sabbankanni heeꞌnoonniha ikkiro, kiꞌne giddo mitootu reyitinori dikaꞌanno hiitto yitanno? 13 Reyitinori kaꞌannokkiha ikkiro, Kiristoosino dikaino yaateyya! 14 Kiristoosi kainokkiha ikkiro, sabbakanke beebbatella; ammanaꞌneno beebbate daafurooti. 15 Hakkiinni saeno reyitinori addinta kaꞌannokkiha ikkiro, Maganu Kiristoosi kayisinosikkiha reyotenni kayisinosi yine farciꞌnoommohura kaphaasine Maganu farciꞌraasine ikkinoommo yaate. 16 Korkaatuno reyitinori kaꞌannokkiha ikkiro, Kiristoosino dikaino yaate. 17 Kiristoosi reyotenni kainokkiha ikkiro qole, ammanaꞌne kaaꞌlitannori dino; kiꞌneno cubbiꞌne giddonni fultinikkinni heedhinanni. 18 Kiristoosi ledo mitto ikkite heedhe reyitinorino baꞌe gattino yaate. 19 Kiristoosi hexxinoommohu xaa heeshshora calla ikkiro, ninke wolu manni baalunni roore mararsineemmoreeti.

20 Ikkollana Kiristoosi reyitinorira umiha* ikke addinta reyotenni kaino. 21 Reyo mittu manchi widoonni dagginonte gede, reyotenni kaꞌꞌano mittu manchi widoonni dagganno. 22 Addaaminni kainohunni mannu baalu reyannonte gede, Kiristoosinni kainohunnino mannu baalu heeshshonniha ikkanno. 23 Ikkollana mittu mittunku bado badosinni ikkanno: Umihu* Kiristoosiiti; hakkiinni, Kiristoosi leellanno yannara isire ikkitinori heeshshonnire ikkitanno. 24 Hakkiinni gashshoote, silxaanenna wolqa baala hune Gashshoote Maganisiranna Annisira qolanno woyite goofimarcho ikkanno. 25 Korkaatuno, Maganu diinna baala lekkasira woroonni qola geeshsha moote ikke gashsha hasiissannosi. 26 Goofimarchoho baꞌꞌanno diini reyote. 27 Maganu “baalunku coyi lekkasi woroonni gashshamanno gede assino.” Ikkollana, ‘Baalunku coyi gashshamannosi’ yinanni woyite, baalunkuri gashshamannosi gede assinoha Maganono ledo yinanni heeꞌnoonniha diꞌꞌikkino. 28 Baalunkuri gashshamisihu gedensaanni, Beettu umisi baalunkuri gashshamannosi gede assino Maganira gashshamanno; hakkuno, Maganu baalunkura baalankare ikkanno gedeeti.

29 Hakkuyi kaꞌa, reyate yite cuuantannori maa afidhanno? Reyitinori horonta kaꞌannokkiha ikkiro, insa reyate yite mayira cuuantanno? 30 Ninkeno ikkinummoro, woꞌmante yannara* heeshshonke qarru giddo mayira tungeemmo? 31 Barru baala reyote ledo gaarameemmo. Roduuwa, Mootichinke Kiristoosi Yesuusi rosaano ikkitinoonnirinni kiꞌnenni hagiidheemmoti* halaale ikkitinonte gede, tinino halaaleho. 32 Wolu manni gede* Efessooni katamira moyichu ledo sharramaꞌya maa kaaꞌlitannoe? Reyitinori kaꞌannokkiha ikkiro “gaꞌa reyineemmo daafira into ango.” 33 Dogantinoonte. Bushu jaaloomi dancha amanyoote* hunanno. 34 Hedoꞌne biddi assidhine keeraanchimmate looso loosse; cubbo loosa roso assidhinoonte; kiꞌne giddo mitu Maganu daafira diaffino. Hatto yaanni noommohu saaltinara yeeti.

35 Ikkollana mittu manchi, “Mannu reyotenni hiitto ikke kaꞌꞌanno? Reyotenni kaꞌꞌanno woyite hiittoo mannimma heedhannosi?” yaara dandaanno. 36 Ati wodanchattokkihu! Wixiꞌroottori balaxe reya hoogiro heeshsho diafiꞌranno. 37 Sinde woy wole gide wixatto woyite, wixattohu gedensoonni lophanno biso ikkikkinni gumaho; 38 Maganu kayinni wixaho hasiꞌrino biso aanno; mittu mittunku wixirano umisi biso aanno. 39 Maalu baalu mittu daniha diꞌꞌikkino; mannu maali no, lalu maali no, ceate maali no, qulxuꞌmete maalino no. 40 Qoleno gordoho heeꞌranno bisinna uullate heeꞌranno bisi no; ikkollana gordoho heeꞌranno bisira umisi ayirrinyi noosi; uullate heeꞌranno bisirano addi ayirrinyi noosi. 41 Arrishshote ayirrinyi addiho; aganu ayirrinyi addiho; beeddahete ayirrinyino addiho; isinni, mitte beeddakko ayirrinyi wole beeddakko ayirrinyiwiinni baxxanno.

42 Reyotenni kaꞌannorino hattooti. Winxannihu sholannoho; kaꞌꞌannohu kayinni sholannokkiho. 43 Winxannihu shollinyunniiti; kaꞌꞌannohu kayinni ayirrinyunniiti. Winxannihu wolqiweeloho; kaꞌꞌannohu kayinni wolqatenniiti. 44 Winxannihu maalu bisooti; kaꞌꞌannohu kayinni ayyaanaamo bisooti. Maalu bisi heeꞌri geeshsha ayyaanaamu bisino no. 45 Hakko daafira, “Umi manchi Addaami heeshshote noo mancho* ikki” yine borreessinoonni. Gedensiidi Addaami heeshsho aanno ayyaana ikkino. 46 Ikkollana umihu ayyaanaamo diꞌꞌikkino; umihu maala uddiꞌrinoho; gedensiidihu kayinni ayyaanaamoho. 47 Umi manchi uullahonna bushshunni kalaqaminoho; layinki manchi kayinni iimiho. 48 Bushshunni kalaqantinori bushshunni kalaqaminohu gedeereeti; iimirino iiminni dayinohu gedeereeti. 49 Dana bushshunni kalaqamino mancho lambummonte gede, iiminni dayihu danano lambeemmo.

50 Ikkollana roduuwa mitto coye kuleemmoꞌnena, maalunna mundee Maganu Gashshoote diragidhanno; sholannohuno sholannokkiha diragiꞌranno. 51 Kune mitte qullaawa fojo kuleemmoꞌne: Ninke baalunku reyineemmo yaa diꞌꞌikkino; ikkollana baalunku soorrammeemmo; 52 jeefote xurumba ufuunfanni woyite, hedeweelcho illete lipheessi giddo* soorrammeemmo. Xurumba ufuunfanni; reyitinori sholtannokkire ikkite kaꞌanno; ninkeno soorrammeemmo. 53 Korkaatuno kuni sholannohu sholannokkiha uddiꞌra hasiissannosi; kuni reyannohuno reyannokkiha uddiꞌra hasiissannosi. 54 Ikkollana kuni sholannohu sholannokkiha uddiꞌranno woyitenna kuni reyannohu reyannokkiha uddiꞌranno woyite “Reyo hegerera egemmantu” yine borreessinoonni qaali woꞌmanno. 55 “Tee reyo, qeellekki mama no? Tee reyo, iddattati wolqakki mama no?” 56 Reyo abbanno iddi cubboho; cubboho wolqa aannohu qole Seeraho. 57 Ikkollana, Mootichinke Yesuusi Kiristoosi widoonni qeelle aannonke daafira Maganoho galatu iillosi!

58 Konnira baxantinoonni roduuwaꞌya, kaajjitine uurre; shashshafantinoonte; Mootichaho soqqantinanni daafurtinanni daafuri mullawa gatannokkita affine, woꞌmanka woyite Mootichu loosi woꞌminoꞌnere ikke.

16 Qullaawootaho fushshinanni fushsho daafira, Galaatiyaho noo songuwara oommo biddishsha haꞌrunsa dandiitinanni. 2 Woxe ani daye kaeenna gamba assinannikki gede, kiꞌne giddonni mittu mittunku lamalate umi barra angasi assitu deerrinni aanno woxe bade wodhona. 3 Ani hakkira dayemmo woyite, shaqqillunni fushshitinoonni fushsho Yerusaalame massitanno gede, addaxxineemmoreeti yitine sokka borreessitine kultinoonnie manna soyemmo. 4 Anino haꞌra hasiissuero kayinni ledoꞌya hadhanno.

5 Ikkollana Meqedooniyu widoonni hige saeemmo daafira, hakkaanni hige kiꞌnewano dayemmo; 6 haꞌreemmowa shiima doogo geeshsha geegiissitinannie gede, kiꞌnewa keeshshummokki digateemmo; isinni hawado kiꞌnewa sayisammora dandeemmo. 7 Yihowa* fajjiro kiꞌne ledo shiima yanna keeshsheemmo yee hede noommo daafira, mulla doogo saoommo widoonni calla laꞌꞌammoꞌnera dihasiꞌreemmo. 8 Phenxeqostete Ayyaani geeshsha kayinni Efessooni katamira keeshsheemmo; 9 korkaatuno halaꞌladu loosu waalchi faꞌnaminoe; ikkollana gibbannori batidhino.

10 Ximootewoosi dayiro kiꞌne ledo huxuxxi yiikkinni heeꞌranno gede assesi; korkaatuno isi anente gede Yihowa* looso loosannoho. 11 Hakko daafira mittuno mishoonkesi. Roduuwu ledo agare noommosi daafira, anewa keerunni daanno gede geegiissesi.

12 Rodiinke Aphiloosi roduuwu ledo kiꞌnewa daanno gede hige hige huuccoommo. Isi kayinni xa daara dihedino; ikkollana konni kaꞌa injiisiro daanno.

13 Baqqi yitine heedhe; ammanatenni kaajjitine uurre; labballo* ikke; jawaatoota ikke. 14 Assitinannire baala baxillunni asse.

15 Roduuwa, mitto coye qaagiisseemmoꞌne: Isxifaanaasi mini manni Akaayyaho umi rosaano* ikkinotanna qullaawootaho soqqamate umonsa sayise uyinota affinoonni. 16 Kiꞌneno insa gedee manniranna ninke ledo kaaꞌlantannorira, hattono diinaggaabbe loossanni noorira baalaho maahoyye yitine galle. 17 Isxifaanaasi, Ferxunaaxoosinna Akayiqoosi kawira daggino daafira lowo geeshsha hagiidhoommo; korkaatuno insa, kiꞌne hooga xeissinoere wonshitinoe. 18 Insa anehano kiꞌne wodanano* fooliishshiishshino. Konnira hattoo manna galatte.

19 Iisiyaho noo songuwa keere dhaantinoꞌne. Aqiilanna Phirisqillano minensa gamba yitanno songo ledo iibbado Kiristaanu keere sokkinoꞌne. 20 Roduuwu baalu keere sokkinoꞌne. Rodiimmate baxillinni sunqantinanni mimmito keere haadhe.

21 Ani Phaawuloosi angaꞌyanni borreessoommohu kuni keeriꞌya iilloꞌne.

22 Mooticha baxannokkihu heeꞌriro rumaminoha ikko. Mootichanke ballo, amo! 23 Mootichu Yesuusi elto kiꞌne ledo heedho. 24 Kiristoosi Yesuusi ledo mittimma nooꞌnerira baalaho baxilliꞌya iilloꞌne.