ROOMU SOKKA

1 Kiristoosi Yesuusi borojjichi, soqqamaasincho ikkammora woshshamoommohunna Maganunniha dancha duduwo duduwammora dooramoommohu ani Phaawuloosi soommo sokka: 2 Kuni danchu duduwi Maganu masaalaanosi widoonni Qullaawa Borro giddo balaxe kulino hexxooti; 3 qoleno, maalunni Daawiti sirchi* widoonni ilamino Beettisi daafira kulannoho. 4 Ikkollana isi qullaawu ayyaani wolqanni Maganu Beetto ikkinoti leeltino; kuni ikkinohu Mootichinke Yesuusi Kiristoosi reyotenni kai yannaraati. 5 Suꞌmisi ayirrinyira daga baalate mereero ammanatenni hajajamanno manni heeꞌranno gede, isi widoonni elto adhinoommo hattono soqqamaasine ikkinoommo. 6 Kiꞌneno Yesuusi Kiristoosire ikkitara dagate mereerinni woshshantinori widooti. 7 Maganu baxannoꞌneriranna qullaawoota ikkitinara woshshantinoonnirira Roomaho heedhinannirira kiꞌne baalunkura:

Maganu Anninkenna Mootichu Yesuusi Kiristoosi eltonna keeri iilloꞌne.

8 Ammanaꞌne daafira alame woꞌmate hasaambanni heeꞌnoonnihura, balaxe Yesuusi Kiristoosi widoonni kiꞌne baalunku daafira Maganoꞌya galaxxeemmo. 9 Huuccatto assiꞌreemmo yannara woꞌmanka woyite agurummokkinni kiꞌne daafira huucceemmo; Beettisiha dancha duduwo duduwanni, woꞌma giddoꞌyanni qullaawa soqqansho soqqameemmosi Magani tennera naqaashsheꞌyaati. 10 Maganu yeenna ikkummota ikke kiꞌnewa dayemmo faro afiꞌreemmo gede kaaꞌlaera huucciꞌranni noommo. 11 Korkaatuno, kaajjitine uurritinanni gede kaaꞌlannoꞌneha, ayyaanaamo afansha aammoꞌnera kiꞌne ledo xaadate quqquxamoommo. 12 Hakkuno ani kiꞌne ammananni, kiꞌneno ane ammananni mimmito jawaachinsheemmo gedeeti.

13 Ikkollana roduuwa, wole daga mereero guma laalummonte gede kiꞌne mereerono guma laalammora kiꞌnewa daate duucha hige hedanni keeshshoommota affinara hasiꞌreemmo. Kayinni daammora kaummo kiiro guficho ikkannori tuncu yaannoe. 14 Girikootahonna Girikoota ikkitinokkirira, hattono hayyootahonna roso rossinokkirira asalu nooe; 15 konni daafira, Roomaho heedhinannirira kiꞌnerano dancha duduwo kulate quqquxamoommo. 16 Korkaatuno ani danchu duduwinni disaalfateemmo; isinni danchu duduwi ammana noonsare baalanka, umo Ayihudoota, hakkiinni Girikoota gatissannote Maganu wolqaati. 17 Korkaatuno, “Keeraanchu manchi kayinni ammanatenni heeꞌranno” yine borreessinoonninte gede, ammana noonsari Maganu danchu duduwi widoonni keeraanchimmasi xawisannota huwattanno; tini qolte ammanansa kaajjishshanno.

18 Bunshetenni halaale beeshshitannori, loossanno cubbinna bunshe baalatenni kainohunni Maganu hanqi gordunni dirranni no; 19 korkaatuno Maganu affanno gede assino daafira, insa Maganu daafira afa dandiinannire seekkite affino. 20 Illete leeltannokkiti Maganu akatta yaano hegere wolqasinna Maganimmasi, alame kalaqantu warinni kayisse xabbe leeltanno; korkaatuno kalaqinore laꞌne akattasi wodancha dandiinanni; konnira kulte gibbannori dinonsa. 21 Insa Magano affe heedhenni, Maganimmasira malino ayirrinyenna galata diuyitinosi; hatteentenni hedonsa haafa ikkitino; wodanchannokki wodaninsano tunsino. 22 Ninke hayyootaho yiturono gowwoota ikkitino; 23 qoleno reyannokki Magani ayirrinye reyanno manchi misilera, ceate misilera, shoole lekka afiꞌrino kalaqami misileranna godowunni hadhanno saada misilera uyitu.

24 Konni daafira Maganu wodaninsa yorto garinni, manninatensa shollishshanno gede battete sayise uyinonsa. 25 Insa Maganu halaale kaphunni soorritino; qoleno Kalaqaancho agurte kalaqamaho ayirrinye uyitino,* hattono qullaawa soqqansho soqqantino; hegerera guweenyu hasiisannosihu kayinni Kalaqaanchoho. Hamiiꞌni. 26 Maganu shollishshanno siimu xaadooshshi yortora sayise uyinonsahu iseraati; meentinsa kalaqamunni rosamino garinni labballu ledo goxa agure rosaminokkire assino; 27 labballuno hattonni kalaqamunni rosamino garinni, meyate ledo goxa agurte insa insanaawa quwa saꞌino yortonni giirantu; labballu labballu ledo mancaꞌꞌa coye assitino; konnira bunshensara malinoha ikkanno geeshshi qoricha adhitanni no.

28 Magano halaalunni afa hasidhinokki daafira, assa hasiissannokkire assitanno gede Maganu gara ikkitinokki hedora sayise uyinonsa. 29 Qoleno insa finqille, cubbu, hafuurre, bunshenna dhiibbe batidhinoreeti; hattono lubbo shaanna gibbo baxxannoreeti, awaawurtannoreetinna xagaraammaho, suꞌma huntannoreeti, 30 hemaanote, Magano gibbannoreeti, xonantannoreeti, booꞌnaleeyyete, naaxxitannoreeti, busha maltannoreeti, annahonna amate hajajantannokkireeti, 31 wodancha nookkireeti, yitinowa hossannokkireeti, kalaqamu baxilli* nookkireetinna maartannokkireeti. 32 Kuni manni ‘Togoo coye assitannori reya hasiissannonsa’ yitannota keeraancho Maganu wodho seekke afinoha ikkirono, togoore assa roso assiꞌrinotano agurranna togoo coye assitannorirano kaaꞌlanno.

2 Hakko daafira koo mancho, ati ikkittohano ikkina, yoo yaattoha ikkiro kuꞌlattori dinohe; korkaatuno, yoo yaattohu ati umikki hakkonne coye assatto daafira woleho yoo yaatto woyite ateneeto busha assitanni nootto. 2 Maganu togoo coye assanno mannira yoo yaannota anfoommo; yoosino halaalaanchote.

3 Koo mancho, togoo coye assitannorira yoo yitanni heedhe atino hattoore assattoha ikkiro Maganu yoonni gatattoha lawihe? 4 Maganu shaqqillisinni maarote widira qolahera woꞌnaalanni noota afittokkinni shaqqillisi, dandaasinna cincasi batinye mayira mishatto? 5 Mokkookka ikkoottohuranna maaro ea giwootto daafira, hanqu aana hanqo lexxatto;* kuni hanqi Maganu halaalaancho yoo yaanno barra leellanno. 6 Isi mittu mittunkura loosisita aanno: 7 danchu loosinni kaajjite galata, ayirrinyenna baꞌara dandiitannokki heeshsho hasidhannorira hegere heeshsho aannonsa; 8 gibbo baxxannoriranna halaaleho hajajama gibbe bunshete hajajantannorira kayinni aarunna hanqu dirranno. 9 Bunshe assitannorira baalaho,* umo Ayihudootaho, hakkiinni Girikootaho qarrunna shetto dagganno; 10 ikkollana dancha coye assitannori baalu, umo Ayihudootu, hakkiinni Girikootu galata, ayirrinyenna keere afidhanno. 11 Korkaatuno Maganu dimallaadanno.

12 Seeru noonsakkiha cubbo loossinori baalu seeru hooginsarono baꞌanno; seeru heeꞌreennansa cubbo loossinorira baalaho kayinni seeru garinni yoo yinanninsa. 13 Korkaatuno, Maganu albaanni keeraaꞌmitannori seera macciishshitannore diꞌꞌikkitino; hatteentenni, keeraanote yinanniri seera agadhitannoreeti. 14 Seeru noonsakki daga kalaqamunni seeru giddo noore assitanno woyite, insa seeru hooginsarono giddonsa seeru noota leellishshanni no. 15 Seeru wodaninsa giddo borreessaminota leellishshannori insa umonsaati; tiiꞌꞌinsa insa ledo farciꞌranno woyite, hedonsa mito woyite busha assitannonsa, mito woyite kayinni busha diassitinoonni yitannonsa. 16 Kuni ikkannohu, ani duduweemmohu danchu duduwi garinni mannu maaxe hedannonna assanno coyira Maganu Kiristoosi Yesuusi widoonni yoo yaanno barraati.

17 Ati, ‘Ani Ayihudichaho’ yaattohu, seera hexxattohunna Maganu ledo noohe aantenni naaxxattohu, 18 isi fajjo afootto; seeru giddo noore rosootto* daafira roore hasiisanno coyeno wodanchootto; 19 ati afoo wonshite, ‘Ani ballicha massageemmoho; tunsote noorira xawaabbaho, 20 wodancha xeꞌinonsare qajeelseemmoho, qaaqquulle rosiiseemmoho’ yaattohu, Seeru giddo noo egennonna halaalita qara qara coyibba afoottoha ikkiro, 21 ati wole rosiisattohu umokki dirosiisatto? “Moortooti” yite sabbakattohu, ati mayira mooratto? 22 “Soorritooti” yaattohu, ati mayira soorratto? Kaphu maganna makkiꞌrattohu, galmuwansa mayira mulqiꞌratto? 23 Maganu seera afoommo yite naaxxattohu, Seerasi diigge iso mayira shollishatto? 24 “Kiꞌnenni kainohunni Maganu suꞌmi dagate mereero xonamanno” yine borreessinoonnihu konniraati.

25 Barcima kaaꞌlitannohehu seera agadhattoha ikkiro callaati; seera diigattoha ikkiro kayinni, barcimittorono barcimoottokkihu gedeeti. 26 Hakko daafira, barciminokki manchi Seeru giddo noota keeraancho wodho agadhannoha ikkiro barcima hoogasi barciminohu gede ikkite dikiirantannosi? 27 Ati borreessinoonni Seeri noohehunna barcimoottohu Seera agadhattokkiha ikkiro, Seera agadhanno manchi barcima hoogirono atera yoo yaannohe. 28 Korkaatuno addu Ayihudicha bande anfannihu gobbayidosi laꞌne diꞌꞌikkino; biso mudha calla addu barcima diꞌꞌikkitino. 29 Addu Ayihudimma wodanunnite; addu barcimano wodanunnite; togoo barcima borreessamino seera agadhatenni ikkikkinni qullaawu ayyaaninni barcimmannite. Togoo manchi ayirrinye afiꞌrannohu mannuwiinni ikkikkinni Maganuwiinniiti.

3 Ikkina Ayihudicha ikkate kaaꞌlo maati? Woy barcima maaho kaaꞌlitanno? 2 Ayihudicha ikka duucha doogonni lowore kaaꞌlitanno. Umihunni, Maganunniha qullaawa qaale eeggo uyinoonnihu insaraati. 3 Ikkina insa giddo mitoho ammana hooggunsaro, tini Magano ammannannikki gede assitannoni? 4 Horonta diassitanno! “Coyiꞌratto coyinni keeraawatto; yoote albaannino garatto” yine borreessinoonninte gede, mannu baalu kaphaancho ikkiro nafa Maganu woꞌmanka woyite halaalaanchoho. 5 Ikkollana ninke bunshe Maganu keeraanchimma luphi assite leellishshannoha ikkiro mayineemmoyya? Maganu hanqissinosire qorichishanno woyite yoo dawisino yaateni? (Coyiꞌranni noommohu mitu manni hedanno garinniiti.) 6 Deeꞌni, hatto yaa diꞌꞌikkino! Maganu yoo dawisannoha ikkiro, alamete aana hiitto asse yoo yaanno?

7 Ane kaphi Maganu halaalaanchimma xabbe leeltanno gede asse isira ayirrinye abbannoha ikkiro, cubbaataamu gede assine anera yoo yinanniehu mayiraatiyya? 8 Hatto ikkiro “Danchuri daanno gede bushare assino” mayira diyineemmo? Mitootu beebba suꞌmanke huntanni, insa hatto yite coyidhanno yitannonke. Konni manni aana yoo yaa garankolla.

9 Ninke Ayihudootu woloota roorreemmo yaateyyani? Horonta hatto diꞌꞌikkino! Korkaatuno, Ayihudootuno Girikootuno baalunku cubbu borojje ikkitinota xawinse coyiꞌne balanxe kassansoommonsa; 10 hatto ikkinohu togo yine borreessinoonni garinniiti: “Keeraanchu mittu manchi nafa dino; 11 wodancha noosihu mittuno dino; Magano hasiꞌrannohuno dino. 12 Mannu baalu Maganu doogowiinni wirri yiino; baalunku tidhitinokkire ikkitino; danchumma assannohu mittuno dino; mittu manchi nafa dino.” 13 “Afiinsa* faꞌnantino waammaati; arrawinsannino dogganno.” “Suumensara hamashshu harfi no.” 14 “Afiinsara rumonna qaraaro woꞌmitino.” 15 “Lekkansa mundee dunate rakkannote.” 16 “Dooggansara baonna qarru no; 17 keeru doogo diegentino.” 18 “Illensara Magano waajjate yinanniri dino.”

19 Muse Seeri kulannore baala wonsha hasiissannonsari konni Seerinni galtannore ikkitinota anfoommo; konne Seera uyinoonnihu mannu baalu kuꞌlannore hooge sammi yaanno gedeetinna alame woꞌma Maganu albaanni xaꞌmantanno gedeeti. 20 Konnira, Maganu albaanni Seera agadhatenni keeraaꞌmannohu mittu manchino* dino; korkaatuno cubbu maatiro seekkine huwanteemmo gede assinonkehu Seeraho.

21 Xa kayinni seeru nookkiha, Muse Seerinna Masaalaano farcidhinoti Maganu keeraanchimma xabbe leeltino; 22 ammana noonsari baalu Yesuusi Kiristoosira noonsa ammananni Maganu albaanni keeraaꞌmitanno. Korkaatuno mannu mereero badooshshu dino. 23 Mayira yiniro, mannu baalu cubbo loosino; Maganu ayirrinyeno leellisha hoogino; 24 ikkollana insa Maganu albaanni keeraano ikkitinohu, Kiristoosi Yesuusi cubbinsara wodo ikke keere fushshinonsa daafiraati; kuni, Maganu eltosinni mulla uyinonsa baꞌraaꞌraati. 25 Yesuusi mundee ammantannori baalu keeraaꞌmitanno* gede, Maganu iso kakkalo asse shiqishino. Hatto assinohu Maganu isi umisi keeraanchimma leellisharaati; korkaatuno Maganu cincasinni* albi waro loonsoonni cubbo gatona yiino. 26 Hatto assinohu, xaa yannarano Yesuusa ammananno mancho keeraanchoho yaanno woyite isi umisi keeraanchimma leellisharaati.

27 Ikkina naaxxineemmo gede assannori mayi no? Mitturino dino. Naaxxineemmokki gede assannonkehu hiikkonne seeraatiyya? Loosu seeraati? Deeꞌni, ammanate seeraati. 28 Korkaatuno, mitto mancho keeraanchoho yinannihu seeraho hajajame loosino loosinni ikkikkinni, ammanatenni ikkinota anfoommo. 29 Maganu Ayihudootu Magano calla ikkinoni? Dagate Maganono diꞌꞌikkino? Ee, dagate Maganino isooti. 30 Maganu mitto ikkino daafira, ammanatenni kainohunni barcintinore keeraanote yaannonsa; barcintinokkireno ammanansa widoonni keeraanote yaannonsa. 31 Hatto ikkiro, ammanatenni seera hunneemmo yaateni? Deeꞌni! Roorenkanni seera kaajjinsheemmo.

4 Hatto ikkiro, maalunni annanke ikkinohu Abirihaami ma afiꞌrino yineemmoyya? 2 Lawishshaho, Abirihaami keeraanchoho yinoonnisihu loosino loosinni ikkoommero, naaxxannori heeꞌrannosi; kayinni Maganu albaanni naaxxa didandaanno. 3 Qullaawa borro mayitannolla? “Abirihaami Yihowa* ammani; ammanasino keeraanchimmate kiirantusi.” 4 Loosanno manchi afiꞌrannohu hunkiisi gumi, hasiisannosi baatooshsheeti ikkinnina eltote gede assine kiirrannire diꞌꞌikkino. 5 Ikkollana umisi looso addaxxa agure cubbaataamo keeraanchu gede asse kiiranno Magano ammananno manchira ammanasi keeraanchimmate kiirantannosi. 6 Daawitino, loosino loosi nookkiha Maganu keeraanchoho yaannosi manchi hagiidhanno gara kulanni togo yee coyiꞌrino: 7 “Busha loosonsa gatona yinoonninsarinna cubbonsa agurroonninsari* hagiirraammaho; 8 Yihowa* cubbosi horonta kiirannosikki manchi hagiirraamoho.”

9 Ikkina, konne hagiirre barcintinori callanso barcintinokkirino afidhanno? Korkaatuno, “Abirihaami ammana keeraanchimmate kiirantinosi” yinoommo. 10 Ammanasi keeraanchimmate kiirantinosihu mamooteeti? Barcimihu gedensaanniitinso barcimikkinniiti? Barcimihu gedensaanni ikkikkinni barcimara albaanniiti. 11 Maganu Abirihaamira barcimanno gede kulinosi; tini, barcimara albaanni ammanasinni afiꞌrino keeraanchimmara malaateho;* hakko daafira isi, ammana noonsarira baalaho anna ikkino; insa barcima hooggurono ammanansanni kainohunni keeraanote gede assine kiirroonninsa; 12 isi barcintinorirano annaho; ikkollana barcimate seera seekkite cuꞌmidhinorira calla ikkikkinni, anninke Abirihaami barcimara albaanni noosi ammana faale hadhe amanyootunni heedhannorira baalahono annaho.

13 Korkaatuno, Abirihaami woy sirchisi* alame ragiꞌranno gede hexxo uyinoonnisihu, seera agadhino daafira ikkikkinni ammanatenni afiꞌrino keeraanchimmanniiti. 14 Ragidhannori seera seekkite agadhitannore calla ikkitoommero, ammana kaaꞌlitannori dino yaate; hexxono mullare ikkite gattanno. 15 Noore coyiꞌniro, seeru hanqo abbanno; seeru hoogiro kayinni seera saꞌꞌano diheedhanno.

16 Hakko daafira, Abirihaami hexxo afiꞌrinohu ammanatenniiti; kuni ikkinohu, hexxo Maganu elto aana xintantinota ikkitanno gedeetinna sirchisira* baalaho yaano seera seekkite agadhitannorira calla ikkikkinni ammanatenni ninke baalunku anni Abirihaami faale hadhannorira baalahono tini hexxo woꞌmitannonsa gedeeti. 17 (Hakkuno, “Lowo dagara anna assoommohe” yine borreessinoonni garinniiti.) Kuni ikkinohu Abirihaami ammanino Magani albaanniiti; Maganu reyitinore heeshshonnire assannohonna nookki coye noohu gede asse woshshannoho.* 18 Abirihaami hexxanno gede assannosiri mitturino noosikkiha ikkirono, “Sirchikki* hatto ikke batiꞌranno” yinoonnisi garinni ‘Lowo daga anna ikkatto’ yine uyinoonnisi hexxo ammanino. 19 Ammanasi shoshshoggitinokkiha ikkirono, 100 diri balla ikkinosi daafira bisisi reyinohu gede ikkinotanna Saarano lowo geeshsha geedhitino daafira ila dandiitannokkita* hedino. 20 Ikkollana, Maganu uyino hexxonni kainohunni, isira ayirrinye aanni ammanatenni kaajjino ikkinnina ammana hooge dihuluullamino; 21 qoleno Maganu uyino hexxo wonsha dandaannota woꞌmunni woꞌma ammanino. 22 Hakko daafira, “tini keeraanchimmate kiirantinosi.”

23 Ikkollana, “kiirantinosi” yaanno qaali Abirihaamira calla borreessinoonniha diꞌꞌikkino; 24 kuni qaali, keeraanote gede assine kiirranninkerira ninkerano borreessinoonniho; korkaatuno Mootichanke Yesuusa reyotenni kayisi Magano ninkeno ammanneemmo. 25 Yesuusa cubbinke daafira sayinse uyinoonni; qoleno ninke keeraanote yinanninke gede isi reyotenni kaino.

5 Konnira xa ammanatenni keeraanote yinoonninke daafira, Mootichinke Yesuusi Kiristoosi widoonni woꞌmanka woyite Maganu ledo keere heeꞌno;* 2 qoleno Yesuusi widoonni elto adhinammora ammanatenni Maganunniwa shiqa dandiinoommo; tenne eltono xa afiꞌnoommo; Maganu ayirrinye afiꞌrate hexxo noonke daafira, lowo geeshsha hagiidhino.* 3 Hattee calla ikkitukkinni qarru giddo heeꞌneno lowo geeshsha hagiidhino;* korkaatuno qarru cinca rosiisannonketa anfoommo; 4 cincinummoro qole Maganu albaanni ayirrinye afiꞌneemmo; ayirrinye afiꞌnummoro hexxo heedhannonke; 5 hexxono diꞌꞌirraawissannonke; korkaatuno uyinoonninkehu qullaawu ayyaani widoonni Maganu baxilli wodaninkera* woꞌmino.

6 Ninke laafoota ikkine heeꞌneennanni, murroonni yanna iillituta Kiristoosi cubbaataammaho reyino. 7 Keeraanchu manchira yee reyannohu hakkeya diheeꞌranno; danchu manchira yee reyate maahoyye yaannohu kayinni miteekke heeꞌrara dandaanno. 8 Ikkollana Maganu cubbaataamma ikkine heeꞌneenna Kiristoosi ninke daafira reyanno gede asse baxannonketa leellishino. 9 Xa mundeesinni keeraanote yinoonninke daafira, isi widoonni Maganu hanqinni ganteemmota horo dihuluullammeemmo. 10 Diinna ikkine heeꞌne Beettisi reyonni Maganu ledo araarammummo geeshsha, xa araarammummohu gedensaanni Beettisi heeshshonni ganteemmoti huluullammannire diafidhino. 11 Hattee callano ikkitukkinni, Mootichinke Yesuusi Kiristoosi widoonni Maganunni hagiidhinanni heeꞌnoommo; xa Maganu ledo araarammoommohu Yesuusi widoonniiti.

12 Konnira mittu manchi widoonni cubbu alame eino; cubbu widoonni reyo daggino; baalunku cubbo loosino daafira reyo manna baalaho iillitino. 13 Seera uyinara albaanni cubbu alamete aana no; kayinni, Seeru nookkiha loosino cubbira aye manchino dixaꞌmamanno. 14 Ikkollana Addaami Maganu hajajo diige loosino gedee cubbo loossinokkirira nafa Addaaminni kayise Muse geeshsha reyo baalunku aana mookkino; Addaami, gedensoonni daannohura lawishshaho.

15 Ikkollana Maganu elto abbitino guminna cubbu abbino gumi addi addiiti. Korkaatuno mittu manchi cubbinni lowo manni reyino; Maganu eltonna isi mulla uyinonke baꞌraarshi kayinni mittu manchi yaano Yesuusi Kiristoosi elto widoonni lowo manna baasa kaaꞌlino!* 16 Qoleno Maganu mulla uyino baꞌraarshinna mittu manchi loosino cubbi abbino gumi addi addiiti. Mitte sao manna baala cubbaataamoho yine yoo yinanni gede assitino; ikkollana lowo manni sao assihu gedensaanni, Maganu keeraanote yinanninsa gede assanno baꞌraarsha uyino. 17 Mittu manchi assino saonni reyo hakko manchi widoonni mookkino; hatto ikkiro Maganunnita batiꞌra eltonna isi mulla uyinonkeha keeraanchimmate baꞌraarsha adhitannori isinni, mittu manchi yaano Yesuusi Kiristoosi widoonni heeshsho afidhe mootoolla ikkite gashshitannoti horo dihuluullissannote!

18 Hakko daafira, mitte sao duuchunku gari manna cubbaataamoho yine yoo yinanni gede assitinonte gede, mittu keeraanchimmate loosino duuchunku gari manna keeraanote yineennansa heeshsho afiꞌranno gede assino. 19 Mittu manchi hajajama giweenna lowo manni cubbaataamma ikkinte gede, mittu manchi hajajama lowo manna keeraano assitanno. 20 Seeru dayinohu mannu lowo sao assannota leellishateeti. Ikkollana cubbu batiꞌrinowa Maganu elto roore batidhanno. 21 Kuni ikkinohu mayiraati? Cubbu reyote ledo moohinonte gede, Mootichinke Yesuusi Kiristoosi widoonni hegere heeshsho afiꞌnanni gede Maganu eltono keeraanchimmate widoonni mookkaraati.

6 Ikkina mayineemmo? Maganu elto batidhanno gede cubbo loonsoommo gedeenni heeꞌno? 2 Deeꞌni! Cubbu giddonni keere fulloommori* xaate cubbu giddo hiitto ikkine heeꞌneemmo? 3 Woy Kiristoosi Yesuusi giddo cuuammoommori baalu isi reyo giddono cuuammoommota diaffinoonni? 4 Konnira Kiristoosi Annu ayirrinyinni reyotenni kainte gede, ninkeno haaro heeshsho heeꞌnammora isi reyo giddo cuuamme ledosi madaarammoommo. 5 Isite gedee reyo reyine isi ledo mitto ikkinummo geeshsha isite gedee kao kaꞌne isi ledo mitto ikkineemmotano dihuluullammeemmo. 6 Korkaatuno cubbaataame mannimmanke wolqiweeltanno gedenna xaate cubbu borojje ikkine heeꞌneemmokki gede, akkala mannimmanke isi ledo haqqaho sutantinota anfoommo. 7 Mayira yiniro, reyino manchi cubbisinni keere fulino.*

8 Qoleno Kiristoosi ledo reyinummoro isi ledo heeꞌneemmotano ammanneemmo. 9 Kiristoosi xa reyotenni kainotanna layinkimeeshsho reyannokkita anfoommo; xaate reyo isi aana dimookkanno. 10 Korkaatuno isi cubbo haaꞌre hoolara mitte hige, higge higgannokki reyo reyino; xa heeꞌranno heeshsho kayinni Maganoho heeꞌrannote. 11 Hatteente gede kiꞌneno, cubboho reyitinoonnihu gede, Kiristoosi Yesuusinni kayinni Maganoho heedhinannihu gede assitine hedde.

12 Konnira cubbu mannimmaꞌne yortora borojje ikkitinanni gede asse, reyitanno mannimmaꞌnera moohe heeꞌrara wodhitinoonte. 13 Mannimmaꞌne* bunshete uduunnicho* assitine cubboho shiqishshinoonte; hatteentenni reyotenni heeshshote saino manni gede assitine kiꞌneneeto Maganoho shiqishshe; mannimmaꞌneno* keeraanchimmate uduunnicho assitine Maganoho shiqishshe. 14 Korkaatuno kiꞌne eltote anga ikkinnina Seeru anga heedhinoonnikki daafira cubbu aanaꞌne moohara wodhitinoonte.

15 Xa mayineemmoyya? Seeru anga ikkikkinni eltote anga heeꞌnoommo daafira cubbo loonso yaateni? Horonta hatto yaa diꞌꞌikkino! 16 Borojje ikkitine hajajamate ayerano kiꞌneneeto shiqishshiniro, hakkunni hajajantinannihura borojje ikkitinoonnita diaffinoonni? Hakko daafira kiꞌne reyonniwa massanno cubbira woy keeraanchimmanniwa qolte massitanno hajajamara borojjeho. 17 Kiꞌne alba cubbu borojjeeti; xa kayinni uyinoonniꞌne rosira woꞌmu wodaninni hajajantinoonni daafira Maganoho galatu iillosi. 18 Ee, cubbu borojjimmanni wolaphitine keeraanchimmate borojje ikkitinoonni. 19 Ani manna baalaho leellanno garinni xawise coyiꞌranni noommohu, maaliꞌne laafa ikkino daafiraati; alba busha coye assate mannimmaꞌne battetenna bunshete borojje assitine shiqishshininte gede, xa kayinni qullaawa coye assate mannimmaꞌne keeraanchimmate borojje assitine shiqishshe. 20 Cubbu borojje ikkitine heedhinoonni yannara keeraanchimmate looso loossinanni diqarrantinoonni.

21 Hatte yannara laaltinoonni gumi hiittooho? Xa saalfachishannoꞌneho. Konni coyi gawalo reyote. 22 Xa kayinni cubbuwiinni wolaphitine Maganu borojje ikkitinoonni daafira, qullaambete doogora guma laaltinanni heedhinoonni; tenne doogo gawalo hegere heeshshooti. 23 Cubbu baatooshshi reyote. Mootichinke Kiristoosi Yesuusi widoonni Maganu aanno baꞌraarshi kayinni hegere heeshshooti.

7 Roduuwa, Seeru mittu manchi aana wolqa afiꞌrannohu hakku manchi lubbote noo geeshsha calla ikkinota diaffinoonni? (Coyiꞌranni noommohu Seera afino manniraati.) 2 Lawishshaho, mine assidhino mancho minaannise lubbote noo geeshsha isi ledo seerunni usurantinote; minaannise reyanno woyite kayinni minaannise seeriwiinni tidhantanno. 3 Hakko daafira, minaannise lubbote heeꞌreenna wolu manchita ikkituro soorritino yinannise. Minaannise reyiro kayinni, isi ledo usurinose seeriwiinni tidhantanno daafira wolu manchita ikkituro soorritino diyinannise.

4 Konnira roduuwaꞌya, kiꞌneno wolunnire yaano reyotenni kainohu Kiristoosire ikkitinanni gede, isi mannimma widoonni Seeraho reyitinoonni;* kuni ikkinohu Maganoho guma laalleemmo gedeeti. 5 Korkaatuno alba maalu hasatto garinni heeꞌnoommo yannara, Seeru xawo fushshinoti cubbu yorto reyote guma laallammora mannimmanke* giddo loossanni no. 6 Xa kayinni Seeru amade millo miliqqo hoꞌlannonkekki daafira Seeruwiinni keere fulloommo;* hakko daafira borreessinoonnihu akkalu Seerinni ikkikkinni, haaru garinni qullaawu ayyaaninni Maganoho borojje ikka dandiineemmo.

7 Ikkina xa mayineemmoyya? Seeru cubbohoni? Deeꞌni! Noore coyiꞌniro, Seeru hoogoommero cubbu maatiro diafeemmo. Lawishshaho, Seeru “Yortooti” yaa hoogoommero yorto maatiro diafeemmo. 8 Ikkollana cubbu tenne Seeru hajajo widoonni faro afiꞌre duuchunku gari yorto giddoꞌya heedhanno gede assino; Seeru nookki yannara cubbu reyinoho. 9 Seeru nookki waro heeshshote noommo. Seeru hajajo dagguta kayinni cubbu galagale heeshshonniha ikki; ani kayinni reyummo. 10 Heeshshonniwa massitaera hendoonniti Seeru hajajo reyonniwa massitinoe. 11 Korkaatuno cubbu Seeru hajajo fantino faro widoonni hige soꞌrisiisinoe; qoleno tenne hajajo widoonni shiinoe. 12 Hakko daafira, Seeru qullaawaho; hajajono qullaawate, keeraanchotenna danchate.

13 Ikkina kuni danchuri anera reyo abbinoe yaateni? Deeꞌni, hatto yaa diꞌꞌikkino! Reyo abbinoehu cubboho; cubbu mayimma leeltanno gede, danchuri widoonni hige anera reyo abbinoehu cubboho; Seeru hajajono cubbu mageeshshi geeshsha busha ikkinoro leellishshino. 14 Seeru ayyaanaamo ikkinota anfoommo; ani kayinni cubboho hiramoommoho shama maalaati. 15 Maa assanni noommoro diwodancheemmoho. Korkaatuno assa hasiꞌreemmore agure giweemmore asseemmo. 16 Assa hasiꞌreemmokki coye asseemmoha ikkiro, Seeru danchaho yaanni noommo. 17 Ikkollana konne coye assannohu giddoꞌya noo cubbooti ikkinnina ane diꞌꞌikkoommo. 18 Korkaatuno giddoꞌya yaano maaliꞌya giddo mittuno danchu coyi nookkita afoommo; dancha coye assate halcho nooe; konne coye assate wolqa kayinni dinoe. 19 Assa hasiꞌreemmoha dancha coye diasseemmo; assa hasiꞌreemmokkiha busha coye kayinni asseemmo. 20 Assa hasiꞌreemmokki coye asseemmoha ikkiro, konne coye assanni noommohu ane ikkummokkinni giddoꞌya heeꞌranno cubbooti yaate.

21 Konnira kuni seeri giddoꞌya loosanni noota huwatoommo: Ani gara ikkinore assa hasiꞌreemmo woyite ledoꞌya noori kayinni bushareeti. 22 Giddoyidi mannimmaꞌya Maganu seerinni lowo geeshsha hagiidhitanno; 23 mannimmaꞌya* giddo kayinni surreꞌya seeri ledo qasamannohunna mannimmaꞌya* giddo noohu cubbu seerira usuranya asse aannoehu wolu seeri noota laoommo. 24 Ani isi hiittoo qarraataamooti! Tenne reyowa massitannoe mannimmawiinni ayi gatisannoe? 25 Yesuusi Kiristoosi widoonni gatisannoehu Maganu galatamo! Ani surreꞌyanni Maganu seerira borojjichoho; maaliꞌyanni kayinni cubbu borojjichooti.

8 Hakko daafira, Kiristoosi Yesuusi ledo mittimma noonsare busha diassinanninsa. 2 Korkaatuno Kiristoosi Yesuusi ledo mittimma noonsare, heeshsho aanno ayyaani seeri, cubbunna reyote seerinni keere fushshinonsa. 3 Maalu laanfenni kainohunni Muse Seeri wolqa hooge assa dandiinokkire Maganu assino; cubbo haaꞌre hoolara cubbaataamu manni lawishshinni Beettosi soyino; konni garinni isi maalu cubbira yoo yiino; 4 konne assinohu maalu hasatto garinni ikkikkinni ayyaanu hasatto garinni heeꞌneemmori ninke Seerunnita keeraancho wodho wonshineemmo gedeeti. 5 Maalu hasatto garinni heedhannori maalu coye illachishshanno; ayyaanu hasatto garinni heedhannori kayinni ayyaanu coye illachishshanno. 6 Maalu coye illachisha reyo abbitanno; ayyaanu coye illachisha kayinni heeshshonna keere uyitanno; 7 maalu coye illachisha Maganu diina assitanno; korkaatuno maalu Maganu seerira maahoyye yee digalanno; galarano didandaanno. 8 Hakko daafira, maalinsa yorto garinni heedhannori Magano hagiirsiisa didandiitanno.

9 Ikkollana Maganu ayyaani addinta giddoꞌne heeꞌriro, maalu ledo ikkikkinni ayyaanu ledo sumuu yitinanni. Mittu manchi Kiristoosi ayyaani noosikkiha ikkiro kayinni, kuni manchi Kiristoosiha diꞌꞌikkino. 10 Kiristoosira kiꞌne ledo mittimma heedhusiro kayinni, mannimmaꞌne cubbunni kainohunni reyitinota ikkituro nafa, keeraanchimmatenni kainohunni qullaawu ayyaani heeshsho aannoꞌne. 11 Yesuusi reyotenni kayisinohu Maganu ayyaani giddoꞌne heeꞌriro, Kiristoosi Yesuusi reyotenni kayisi Magani giddoꞌne heeꞌranno ayyaanisi widoonni, reyitanno mannimmaꞌne heeshshonnita assanno.

12 Konnira roduuwa, ninkera asalu* noonke; asalinke kayinni maalu hasatto garinni heeꞌra diꞌꞌikkino; 13 maalu hasatto garinni heedhinanniha ikkiro, reyaꞌne digattannote; maalu looso ayyaanunni shitiniro kayinni lubbotenni heedhinanni. 14 Korkaatuno Maganu ayyaaninni massagantannori baalu addinta Maganu oosooti. 15 Galagaltine waajjitinanni gede assannoꞌneha borojjimmate ayyaana diadhitinoonni; hatteentenni, Maganu oososi asse adhannoꞌne gede assanno ayyaana adhitinoonni; kuni ayyaani, “Abba,* Anna!” yine woshshineemmo gede assannonke. 16 Ninke Maganu ooso ikkinoommota kuni ayyaani umisi ayyaaninke ledo farciꞌranno. 17 Maganu ooso ikkinummoro qole ragiꞌneemmoreeti; ragge aannonkehu Maganoho; ikkollana ragiꞌneemmohu Kiristoosi ledooti; xa ledosi qarra adhinummoro ayirrinyeno ledosi adhineemmo.

18 Xaa yannara iillannonke qarri albillitte ninke aana leellanno ayirrinyi ledo taashshiniro, mullare ikkinota afoommo. 19 Kalaqamu Maganu ooso xabbanno yanna lowo geeshsha quqquxame agadhe no. 20 Kalaqamu haafu coyira sae aamamino; sae aamaminohuno uminsa hasattonni ikkikkinni haafu coyira sae aamamanno gede fajjino Magani widoonniiti; ikkollana Maganu hexxo uyino; 21 hexxono kalaqamu sholate borojjimmanni fule, Maganu ooso afidhanno gedeeta ayirrado wolapho afiꞌranno gedeeti. 22 Kalaqamu baalu xaa geeshsha mitteenni uranninna xissiisiꞌranni noota anfoommo. 23 Konne calla ikkikkinni, raggenkeha umi laalcho yaano qullaawa ayyaana adhinoommori ninkeno, wodote widoonni maalinkewiinni keere fulleenna Maganu oososi gede asse adhannonketa quqquxamme agadhinanni, giddonkeenni urranni heeꞌnoommo. 24 Gantoommohu tenne hexxonniiti; hexxinanni coyi illete leellannoha ikkiro hexxo diꞌꞌikkanno; mittu manchi laꞌꞌanni noo coye hexxannoni? 25 Illete leellannokkire hexxinummoro kayinni, hakko coye quqquxamme cincine agadhineemmo.

26 Hatteente gede, daafurreemmo woyite ayyaanu kaaꞌlannonke; mayine huucciꞌra hasiissannonkero afa hoonge qarrammeemmo woyiti no; ikkollana coyiꞌne fushshiꞌra hoonge urreemmo woyite, ayyaanu umisi ninkera huuccannonke. 27 Wodana qonqolche laꞌꞌanno Magani kayinni, ayyaanu hedo afanno; ayyaanu qullaawootaho huuccannohu qole Maganu hedo ledo sumuu yaanno garinniiti.

28 Maganu baxxannosirira yaano hedosi garinni woshshantinorira loososi baala qineesse coyi seyannonsa gede assannota anfoommo; 29 korkaatuno isi umo egennino manni, Beettisi gedeeha ikkara balaxe murino; kuni ikkinohuno lowo roduuwi giddonni Beettisi bayira ikkanno gedeeti. 30 Qoleno balaxe doorinore woshshinsa; woshshinonsareno keereensinsa. Jeefote keereensinonsarira ayirrinye uyinsa.

31 Konni coyi daafira mayinoyya? Maganu ledonke heeꞌriro qeelankera dandaannohu ayeti? 32 Beettosi nafa mararikkinni ninke baalunku daafira yee sayise uyino Magani, Beettisi ledo wole coye baala shaqqillunni diaannonke? 33 Maganu doodhinore busha assara dandaannohu ayeti? Korkaatuno insa keereensannohu Maganoho. 34 Insara yoo yaa dandaannohu ayeti? Korkaatuno reyinohu hakkiinnino sae reyotenni kainohu, Maganu qiniiteenni noohunna ninke daafira huuccannohu Kiristoosi Yesuusiiti.

35 Kiristoosi baxilliwiinni badankera dandaannori maati? Qarru, shetto, dartu, hude, kallimma, danonso bagadu? 36 Kuni ikkinohu, “Ate daafira yineenna barra baala shinoonninke; gorrinanni geꞌreewi gedeno ikkinoommo” yine borreessinoonni garinniiti. 37 Ninke kayinni baxinonkehu isi widoonni konne coye baala woꞌmunni woꞌma qeelle saꞌneemmo. 38 Korkaatuno reyono ikkituro, heeshshono ikkituro, sokkaasineno ikkituro, gashshooteno ikkiro, xa noo coyibbano ikkituro, albillitte dagganno coyibbano ikkituro, aye wolqano ikkituro, 39 alillitteno ikkituro, wororritteno ikkituro woy wole aye kalaqamano ikkiro, Mootichinke Kiristoosi Yesuusi widoonni leellinohu Maganu baxilliwiinni badankera dandaannokkita seekke afoommo.

9 Kiristoosi haꞌrunsaancho ikkoommohura, coyiꞌranni noommori halaaleho; tiiꞌꞌiꞌya qullaawu ayyaani massaganna ane ledo farciꞌranno daafira dikapheemmo; 2 lowo dadillinna agurtannokki xisso wodaniꞌya giddo no. 3 Maalu fiixaꞌya ikkitinorira roduuwiꞌyara yee ani umiꞌya rumamoommoha ikke Kiristoosiwiinni baxxoommoro digiwoommo; 4 insano Israeelete mannaati. Maganu oososi asse adhinori, ayirrinye afidhinori, qaalu gondooro eꞌnoonniri, Seera uyinoonniri, qullaawa soqqansho soqqamate faro afidhinorinna hexxo uyinoonniri insaati. 5 Insa albi annuwawiinni dagginoreeti; Kiristoosino maalunni dayinohu insawiinniiti. Woꞌmunkura aliidi Magani hegerera guweenya adho. Hamiiꞌni.

6 Ikkollana, Maganu qaali woꞌmikkinni gatino yaa diꞌꞌikkino. Korkaatuno Israeeliwiinni ilantinori baalu addinta “Israeele” diꞌꞌikkitino. 7 Abirahaami sircho* ikkitino daafira calla insa baalunku oososiiti yaano diꞌꞌikkino; hatteentenni “Sirchikki* woshshamannohu Yisaaqi widoonniiti” yine borreessinoonni. 8 Hatto yaano maalunni ooso ikkitinori addinta Maganu ooso diꞌꞌikkitino yaate; hexxotenni ooso ikkitinore kayinni Abirihaami sirchi* gede assine kiirranninsa. 9 Hexxote qaalino, “Daanno diro togoo woyite dayemmo; Saarano labbaa qaaqqo iltanno” yaannoho. 10 Hakka woyite calla ikkikkinni, Ribiqa albi anninke Yisaaqira lakkuwa godobbu woyiteno tenne hexxo uyinoonni; 11 Maganu balaxe murino garinni, isi doorshi loosunni ikkikkinni woshshattosinni ikkinota leellishate, lamenti ooso ilantukkinninna dancha woy busha coye assitukkinni, 12 Ribiqara, “Bayiru maaꞌneho borojjicho ikkanno” yinoonnise. 13 Kuni ikkinohu, “Yaaqoobi baxoommo; Eesawu kayinni giwoommo” yine borreessinoonni garinniiti.

14 Xa mayinoyya? Maganu ditaashshanno yaateni? Deeꞌni, horonta hatto yaa diꞌꞌikkino! 15 Korkaatuno isi Musera, “Maara hasiꞌreemmoha maareemmo; marara hasiꞌreemmohano marareemmo” yiino. 16 Konnira Maganu doorshi maarosinniiti ikkinnina, manchu halchonni woy diinaggaawanni* diꞌꞌikkino. 17 Qullaawu qaali Feriooni daafira kulanni, “Heeshshote heeꞌrattora wore aguroommohehu ate widoonni wolqaꞌya leellishateetinna baatto baalate suꞌmiꞌya duduwamanno gede assateeti” yaanno. 18 Konnira Maganu hasiꞌrinoha maaranno; wole kayinni wodanisi mokkookkara aguranno.

19 “Hatto ikkiro Maganu manna mayira busha assannoyya? Isi yiinori ikkannokki gede hoola dandaannohu nooni?” yaattoeha ikkara dandaanno. 20 Koo mancho, Maganoho tumo qolattohu ati ayeti? Doru uduunnichi seekkinosi mancho, “Togo assite mayira seekkittoe?” yaannoni? 21 Doru uduunne gananno manchi mittu gari dorinni mito uduunne ayirradu coyira, wole kayinni ayirrado ikkinokki coyira horoonsiꞌnanni gede asse ganate doru aana roorre noosita diafootto? 22 Maganu hanqosinna wolqasi leellisha hasiꞌrinoha ikkirono, bao maltinoha hanqu uduunne lowo geeshsha cincenna dandee noohalla ikki? 23 Hatto assinohu ayirrinyisi batinye balaxe ayirrinyeho qixxeessinohu maarote uduunnira 24 yaano ninke Ayihudete widinni calla ikkikkinni dagate widinni woshshinorira leellisharalla ikki? 25 Kuni ikkinohu Hoosei maxaafira togo yee coyiꞌrino garinniiti: “Mannaꞌya ikkitinokkire ‘mannaꞌya’ yee woshsheemmo; baxeemmokki manchono ‘baxeemmote’ yeemmo. 26 ‘Mannaꞌya diꞌꞌikkitinoonni’ yinoonninsawa hakko darganni ‘Heeshshote Magani oosooti’ yinanninsa.”

27 Isayyaasino qoonqosi naggi asse Israeelete daafira togo yee coyiꞌrino: “Israeelete ooso kiiro baaru shaafi gede batidhurono, gattannori kayinni shiima callaho. 28 Korkaatuno Yihowa* uullate aana heeꞌranno manna xaꞌmannonsa; hattono konne coye rahe umo fushshanno.” 29 Qoleno Isayyaasi balaxe coyiꞌrinonte gede, “Olantote Mootichi Yihowa* sircho* gatisa hoogoommenkero, Soddoomunna Gomooru katami gede ikkine hoongoommo.”

30 Ikkina xa mayineemmo? Dagate wido ikkino manni, keeraanchimma haꞌrunsa hoogirono ammanatenni afiꞌnanni keeraanchimma afiꞌrino; 31 Israeele kayinni keeraanchimmate seera haꞌrunsitinoha ikkirono, seera guuttinokki daafira keeraanchimma diafidhino. 32 Afiꞌra hoogginohu insa keeraanchimma ammanatenni ikkikkinni loosunni hasidhino daafiraati. Konnira “guficho ikkanno kinchinni” gufidhino; 33 kuni ikkinohu togo yine borreessinoonni garinniiti: “Kuneeti Tsiyooni, guficho ikkanno kinchonna manna karannoha jawa kincho woreemmo; iso addaxxannohu kayinni diꞌꞌirraawanno.”

10 Roduuwa, Israeelete wodaniꞌyanni halcheemmohunna insa daafira Magano huucceemmohu gattanno gedeeti. 2 Korkaatuno insa Maganoho laalaattannota ani umiꞌya farciꞌreemmonsa; ikkollana laalaattannohu addu egennonni diꞌꞌikkino. 3 Maganu keeraanchimma affinokki daafira uminsa doogonni keeraanchimma hasidhanni, Maganu keeraanchimmara maahoyye yite gala gibbino. 4 Ammana loosunni leellishannohu baalu keeraaꞌmanno gede Kiristoosi Seeraho gumulote.

5 Muse Seerunni afiꞌnanni keeraanchimma daafira, “Seera agadhanno manchi lubbotenni heeꞌranno” yee borreessino. 6 Ammanatenni afiꞌnanni keeraanchimma daafira kayinni togo yinoonni: “Wodanikkinni, ‘Gordo fulannohu ayeti?’ yitooti; hatto yaa Kiristoosi dirrisateeti; 7 woy ‘Qile dirrannohu ayeti?’ yitooti; hatto yaa Kiristoosi reyotenni kayisateeti.” 8 Qullaawa borro mayitannolla? “Qaalu atera mule no; isinni afiikkiranna wodanikki giddo no”; kuni ninke sabbankanni heeꞌnoommoho ammanate “qaaleeti.” 9 Yesuusi Mooticha ikkinota afiikkinni faajjete farciꞌrittoronna Maganu reyotenni kayisinosita wodanikkinni ammanittoro gatatto. 10 Manchu wodanisinni ammane keeraaꞌmanno; afiisinnino ammanasi faajjete farciꞌre gatanno.

11 Qullaawu qaali, “Iso addaxxannohu baalu diꞌꞌirraawanno” yaanno. 12 Ayihudootunna Girikootu mereero badooshshu dino. Baalunku Mootichi mittoho; isi woshshidhannosirira baalaho lowo atoote aannonsa. 13 Korkaatuno, “Yihowa* suꞌma woshshannohu baalu gatanno.” 14 Ikkollana iso ammantukkinni hiitto assite woshshitasira dandiitanno? Isi daafira macciishshitukkinni hiitto ikkite ammantasira dandiitanno? Sabbakannohu nookkiha hiitto ikkite macciishshitanno? 15 Sonkinsakkinni hiitto ikkite sabbakkanno? “Dancha duduwo dudubbannori lekka hiitto biiffinote!” yine borreessinoonni gedeeti.

16 Ikkollana, danchu duduwira hajajantinori baalanka diꞌꞌikkitino. Korkaatuno Isayyaasi, “Yihowa,* ninkewiinni macciishshinore* ayi ammanino?” yiino. 17 Konnira ammana macciishshatenni dagganno. Macciishshinannihuno Kiristoosi daafira kulanno qaaleeti. 18 Ani mitte xaꞌmeemmona, insa macciishshitukkinni gattinokka? Deeꞌni macciishshitino; korkaatuno, “Qoonqonsa baatto baalate macciishshantu; sokkansano baattote qacce geeshsha iillitu” yinoonni. 19 Israeele affukkinni gattinokka? Hatto yinannikki gede, Muse umo asse, “Mannaꞌya ikkitinokki daganni hinaasiiseemmoꞌne; wodanchitannokki dagannino lowo geeshsha hanqiseemmoꞌne” yiino. 20 Isayyaasino mitte giddonni, “Hasidhinoekkiri afidhue; xaꞌmidhinoekkirirano leellummonsa” yiino. 21 Ikkollana isi Israeelete daafira coyiꞌranni, “Hajajantannokkiriranna mokkookku mannira barra woꞌma angaꞌya diriirsoommo” yiino.

11 Xaano xaꞌmeemmona, Maganu mannasi agurinoni? Horonta diagurino! Korkaatuno ani umiꞌya Israeelichaho; Biiniyaami gaꞌrenni ilamoommoho Abirihaami sirchooti.* 2 Maganu balaxe doodhinoha mannasi diagurino. Qullaawu qaali, Eeliyaasi Israeele assitinore Maganoho xissiisiꞌre kuꞌli woyite ikkinore kulanni mayyaannoro diaffinoonni? 3 Isi, “Yihowa,* masaalaanokki shitino; kakkalote dargakkino diiggino; kune ani callu gatoommo; aneno* shitaera hassanni no” yiino. 4 Ikkollana Maganu mayyee qolisiyya? “Baꞌꞌaalira kumbuulinokkihu 7,000 manni nooe” yiino. 5 Konni garinni eltotenni doorante gattinori xaa yannarano no. 6 Doorantinohu eltotenni ikkiro loosunni doorama gattino yaate; hatto ikkoommero tini elto elto ikkase gattanno.

7 Xa mayinoyya? Israeele hixamanyite hasidhinore diafidhino; doorantinori kayinni afidhino. Gattinorira qole wodaninsa dillaawino; 8 kuni ikkinohu, “Techo geeshsha Maganu goxichu ayyaana naqinonsa; laꞌannokki illenna macciishshitannokki macca uyinonsa” yine borreessinoonni garinniiti. 9 Daawitino togo yiino: “Hurbaatinsa woshshaado, gufichonna qoricha ikkonsa. 10 Laꞌannokki gede illensa tunsito; hallinsano hegerera ukko.”

11 Xaano lede xaꞌmeemmona, Israeele gufidhinohu ubbino gedeenni gattaraatini? Deeꞌni, horonta hatto diꞌꞌikkino! Isinni insa seera diiggino daafira dagate gatote doogo faꞌnantino; kuni ikkinohu Israeele hinaasiisateeti. 12 Insa seera diiggino daafira alame atoote afidhino; insa aja qolte dagate maasso ikkitino; kiironsa woꞌmituro isinni hakkiinni saino atooti daanno!

13 Xa coyiꞌreemmohu kiꞌne dagate wido ikkitinoonniriraati. Dagate soqqamaancho ikkoommo daafira soqqanshoꞌya ayirriseemmo;* 14 hatto asseemmohu mannaꞌya* ikkitinore Ayihudoota hinaasiise, insa giddonni mito mito gatisa dandaammokka yeeti. 15 Maganu insa tugita, alame isi ledo araarantanno faro afidhino; Maganu haaꞌrannonsa woyite isinni tini reyotenni heeshshote widira saꞌꞌa diꞌꞌikkitino? 16 Lixete giddonni umite gede assine haaꞌnoonniti qullaawa ikkituro, lixe baala qullaawate yaate; qoleno rumushshu qullaawa ikkiro sinnano qullaawate.

17 Ikkollana sinnate giddonni mitu hiiqqameenna, ate dubbu ejersa ikkoottoha abbine insa mereero qaꞌminsihero hattono ejersu hunda noo atoote gutamittoro, 18 hiiqqantino sinnara booꞌnitooti.* Insara booꞌnattoha* ikkiro kayinni, ate duhe noohu rumushshoho ikkinnina ati rumushsho duhoottokkita qaagi. 19 “Sinna hiiqqantinohu darginsara ani qaꞌmiꞌreemmo gedeeti” yaattoha ikkara dandaanno. 20 Hatti halaaleho! Insa ammana hooggino daafira hiiqqantino; ati kayinni uurrite noottohu ammanatenniiti. Ikkollana waajja ikkinnina booꞌna dihasiissannohe. 21 Korkaatuno Maganu kalaqamu sinna mararinokkihu ateno dimararannohe. 22 Konnira Maganu shaqqillenna kaajjille lai. Ati kayinni Maganu shaqqille leellishanno gedee mancho ikkite heeꞌritto geeshsha, isi shaqqillesi leellishannohe; hakkunni kaꞌa ateno murre tungannihe. 23 Insano galagalte ammana noonsare ikkituro qaꞌmidhanno; Maganu galagale qaꞌmisansara dandaanno. 24 Ati kalaqamunni dubbu ejersinni murante kalaqamu gobbaanni ikkino garinni gati ejersi aana qaꞌmiꞌra dandiittoro, gati ejersi sinna haqqichonsawa higge qaꞌmiꞌra roore didandiitanno?

25 Roduuwa, hayyoota ikkitinoonniha lawannoꞌnekki gede tenne qullaawa fojo affinara hasiꞌreemmo; dagate kiiro woꞌmita geeshsha Israeelete manni gama wido dillaawino; 26 konni garinni Israeele baala gattanno. Kuni ikkannohu togo yine borreessinoonni garinniiti: “Gatisaanchu Tsiyooninni fulanno; Yaaqoobi sirchono bushu loosinsawiinni qolanno. 27 Cubbonsa haaꞌre hooleemmo woyite insa ledo eꞌꞌeemmo gondoori konneeti.” 28 Hige insa dancha duduwo gibbino daafira Maganu diinnaati; tini qolte kiꞌne kaaꞌlitino; ikkollana Maganu albi annuwansara eino qaalira yee insa giddonni mitu jaallasi ikkitara doodhino. 29 Maganu baꞌraarsha uyihunna manna woshshihu gedensaanni assino coyira digaabbanno. 30 Kiꞌne alba Maganoho dihajajantinannireeti; xa kayinni Ayihudootu hajajama gibbino daafira kiꞌne maaro afidhinoonni; 31 konnira insa hajajama gibbeenna Maganu kiꞌne maarinoꞌne; konnira xa isi insano maaransara dandaanno. 32 Maganu insa baalanka maarara yee baalanka hajajama giwate usuranya assino.

33 Maganu jiro, hayyosinna egennosi hiitto batiꞌrate!* Yoosino xiinxalline dianfannite; dooggasi anfe digundannite! 34 Korkaatuno togo yine borreessinoonni: “Yihowa* hedo afa dandiinohu ayeti? Woy amaalaanchosi ikkinohu ayeti?” 35 Woy “Maganoho liqiissinohunna iso asale yaaꞌnannohu ayeti?” 36 Baalunkuri dayinohu isiwiinniiti; heeꞌrannohuno isinniitinna isiraati. Isira hegerera ayirrinyu iillosi. Hamiiꞌni.

12 Konnira roduuwa, mannimmaꞌne lubbote noota, qullaawanna Magano hagiirsiissanno kakkalo assitine shiqishshinanni gede Maganu shaqqillinni huucciꞌreemmoꞌne; tini kakkalo woꞌma surreꞌnenni soqqantinannite qullaawa soqqanshooti. 2 Qoleno tini alame huntaꞌnera* wodhitinoonte; hatteentenni dancha, hagiirsiissannotanna guuta Maganu fajjo buuxidhinanni gede surreꞌne haaroonsidhine soorramme.

3 Mittu mittunku manchi umisi daafira hasiisannohura aleenni hedanni booꞌnoonke; hatteentenni mittu mittunku Maganu uyinosi* ammana bikkinni fayyo hedo noosita leellishanno garinni hedanno gede, mereeroꞌne nooha mitto mittonka mancho Maganu uyinoe eltonni amaaleemmo. 4 Mittu bisira batinye bisu kifilla noonke; ikkollana baalanti bisu kifilla loossanno loosi mitto diꞌꞌikkino; 5 hatteente gede, ninkeno batinye ikkinummorono Kiristoosi ledo noonke mittimmanni mitto bisooti; mitti mittinke kayinni kuꞌu koꞌonni bisooti. 6 Uyinoonninke elto garinni addi addi aamamooshshi noonke; konnira aamamooshshinke masaalo coyiꞌra ikkiro, ammananke bikkinni masaalo coyiꞌno; 7 soqqama ikkiro, jawaante soqqammo; rosiisannohuno rosiisa aguroonke; 8 jawaachishannohuno* jawaachisha* aguroonke; aannohuno* badhera qoꞌlikkinni oona; gashshannohu* jawaate* gashshona; maarannohu hagiidhanni maarona.

9 Baxilliꞌne goowi aliha ikkoonke. Busha coye tiyyidhine gibbe; dancha coye kayinni seekkitine cuꞌmidhe. 10 Mimmitu ledo rodiimmate baxillinni lubbora baxamme. Mimmito ayirrisate umire ikke.* 11 Chaachaaroota* ikke ikkinnina ceeꞌmaleeyye* ikkitinoonte. Ayyaanunni huffi yitine iibbe. Yihowara* borojjichu gede ikkitine soqqamme. 12 Hexxotenni tashshi yooꞌne. Qarru yannara kaajjitine uurre. Huuccattote jawaatte. 13 Hasiisannonsare hoogge qarrantino qullaawootira nooꞌnere beekkensa. Wosina adha roso assidhe. 14 Xiibbannoꞌnere maassidhe; maassidhe ikkinnina runtinoonte. 15 Hagiidhitannori ledo hagiidhe; wiꞌlitannori ledo wiꞌle. 16 Wole manna kiꞌneneeto laꞌinanni garinni laꞌe; surreꞌne giddo booꞌna heedhannokki gede qorophe; qoleno wodaniꞌnenni jooguulle ikke. Kiꞌneneeto hayyootu gede assitine heddinoonte.

17 Aye manchino busha coye assiꞌnero busha assitine qoltinoonte. Mannu baalu hedora* dancha ikkinore assate sharramme. 18 Dandaamiꞌne deerrinni kiꞌne widiidita mannu baalu ledo keere heedhe. 19 Roduuwaꞌya, kiꞌne rabbisidhinoonte; hatteentenni darga Maganu hanqira agurre; korkaatuno, “‘Rabba anete; ani bado qoleemmo’ yaanno Yihowa”* yine borreessinoonni. 20 “Baarigaarikki hudiꞌriro itisisi; gooꞌriro agannore uyisi; hatto assittoro umisira kashilo duunatto.”* 21 Woꞌmanka woyite busha danchunni qeeli ikkinnina bushunni qeelantooti.

13 Mannu* baalu aliidi gashshaanora maahoyye yee galona; korkaatuno silxaane baala afiꞌnannihu Maganuwiinniiti; gashshite noori quwu noota* silxaanensa afidhinohu Maganuwiinniiti. 2 Hakko daafira, silxaane noonsarira hajajama giwannohu baalu Maganu qixxaawo giwanno; tenne qixxaawo gibbannori qoricha adhitanno. 3 Gashshaasine busha assitannore ikkinnina dancha assitannore diwaajjishshanno. Konnira gashshaancho waajja hasiꞌrattokkiha ikkiro, woꞌmanka woyite danchare assi; hatto assittoro isi galatannohe; 4 korkaatuno isi ate kaaꞌlanno gede Maganu worino soqqamaanchooti. Gashshaanchu bise mulla diqodhinona, busha assattoha ikkiro iso waajji. Isi busha assitannore qorichishe* rabbisannoho Maganu soqqamaanchooti.

5 Konnira hanqo waajjitine calla ikkikkinni tiiꞌꞌiꞌnera yitine maahoyye yitine gala hasiissannoꞌne. 6 Qaraxo murtinannihuno iseraati; korkaatuno insa woꞌmanka woyite manna baalaho soqqantannoreeti Maganu soqqamaanooti. 7 Baalunkura hasiisannore uyiyye: qaraxo xaꞌmannohura qaraxo, giwire xaꞌmannohura giwire uyiyye; waajjinasira hasiꞌrannoha waajje; ayirrinsasira hasiꞌrannoha ayirrisse.

8 Mimmitu ledo baxama agurranna ayerano asalu heeꞌroonkeꞌne; manna baxannohu baalu seera wonshino. 9 Korkaatuno, “Soorritooti, shitooti, moortooti, yortooti” yaanno seeranna wole baalanta hajajo “Olliichokki* umikki gede assite baxi” yitanno hajajo xaphi assite amaddino. 10 Baxillu olliichisira busha coye diassanno; hakko daafira manna baxannohu seera wonshino.

11 Heeꞌnoommo yanna affinoonni daafira konne coye asse; ammaꞌninummo yannanni roore xa gatonke gambissino daafira goxichunni baqqi yitinanni saate xaati. 12 Hashshu saꞌꞌaraati; barruno gambisino. Konnira tunsichu looso fushshine hunne xawaabbunniha olu uduunne uddiꞌno. 13 Barra xawaabbaho haꞌramanno manni gede danchu amanyootinni millinso ikkinnina jila jille ikkinannikkita ikka,* dimba, foorre, mancaꞌꞌa ikkito,* gibbonna hinaaso agurro. 14 Mooticha Yesuusi Kiristoosi uddidhe; maalu hasatto wonshiꞌrate mixo fushshidhinoonte.

14 Ammanatenni jawaatinokki mancho haadhesi ikkinnina hedosi* bushate yitinoonte. 2 Ammanatenni jawaatinohu baalankare itanno; ammanatenni jawaatinokkihu kayinni akaakilte calla itanno. 3 Baalankare itannohu itannokkiha mishoonke; itannokkihuno itannohura yoo yoonke; korkaatuno Maganu iso anga fane haaꞌrinosi. 4 Wolu soqqamaanchira yoo yaattohu ati ayeti? Isi uurrirono uwirono mootichisiraati. Isinni Yihowa* uurrisasira dandaanno daafira uurranno.

5 Mittu manchi mitto barra wolu barrinni roorinohu gede asse hedanno; wolu qole mittu barri wolu baalunku barri ledo taaloho yee hedanno; konnira mittu mittunku manchi seekke ammanino coye assona. 6 Mitto barra ayirrisannohu Yihowara* yee ayirrisanno. Itannohu Magano galatanno daafira Yihowara* yee itanno; itannokkihuno itannokkihu Yihowara* yeeti; ikkirono Magano galatanno. 7 Ninke giddo umisira calla heeꞌrannohu dino; umisira calla reyannohuno dino. 8 Korkaatuno heeꞌnummoro, heeꞌneemmohu Yihowaraati;* reyinummorono reyineemmohu Yihowaraati.* Konnira heeꞌnummorono reyinummorono ninke Yihowareeti.* 9 Kiristoosi reyinohunna galagale heeshshonniha ikkinohuno iseraati; yaano reyitinorirano lubbote noorirano Mooticha ikkaraati.

10 Ikkina rodiikkira yoo yaattohu mayiraati? Woy rodookki mishattohu mayiraati? Korkaatuno ninke baalunku Maganu yoo barcimi albaanni uurrineemmo. 11 Togo yine borreessinoonni: “Yihowa* togo yaanno: ‘Ani heeshshonniha ikkoommoti huluullissannokkinte gede, guluchu baalu anera guluphanno; arrawu baaluno ani Magano ikkoommota faajjete coyiꞌranno.’” 12 Hakko daafira ninke mittu mittunku Maganu albaanni uminke daafira dawaro qolleemmo.

13 Konnira xaate kuꞌu koꞌonnira yoo yinoonke; hatteentenni mittu rodii albaanni sarraaqanno coye woy guficho ikkannore worreemmokki gede murciꞌno. 14 Mootichu Yesuusi rosaancho ikkoommo daafira mittu coyino kalaqamunni batte ikkinokkita afoommo, qoleno ammanoommo; mittu coyi mittu manchira batte ikkannohu hakku coyi battete yee hediro callaati. 15 Sagaletenni kainohunni rodiikki koffi yaanno gede assattoha ikkiro, baxillunni millisa agurootto yaate. Kiristoosi reyinosiha konne mancho itatto sagalenni huntooti.* 16 Konnira danchaho yitine assitinoonni coyi bushatenni kaꞌꞌannokki gede qorophe. 17 Maganu Gashshooti qullaawu ayyaaninni afiꞌnanni keeraanchimmaati, keereetinna hagiirreeti ikkinnina itunna agu hajo diꞌꞌikkino. 18 Konni garinni Kiristoosira borojjichu gede ikke soqqamannohu baalu Magano hagiirsiisanno; mannuno ayirrisannosi.

19 Konnira keeru heeꞌranno gede assannorenna mimmito dhaawannore assate dandaaminkere baala assino. 20 Sagalete yitine Maganu looso diiga agurre. Hige baalunku coyi keeraanchoho; ikkollana mittu manchi wolootu gufidhanno gede assitanno sagale itiro hatti bushate.* 21 Rodookki gufisannoha ikkiro, maala ita woy woyine aga woy wole aye coyeno assa agura woyyate. 22 Noohe ammana atenna Maganu mereero heedho. Danchaho yee ammaninore asse kae isonooto bushiishannokki manchi hagiirraamoho. 23 Huluullamanni itiro kayinni itinohu ammanatenni ikkinokki daafira wonanni cubbame kaino. Qoleno ammanatenni assinannikki coyi baalu cubboho.

15 Ninke ammanatenni jawaantoommori jawaattinokkiri laanfe duqqa hasiissannonke ikkinnina ninkeneeto hagiirsiinseemmore ikka dihasiissannonke. 2 Mittu mittunku wole manna* kaaꞌlannorenna dhaawannore assine hagiirsiinsonsa. 3 Korkaatuno Kiristoosi nafa isonooto dihagiirsiisino; kuni ikkinohu, “Mannu ate xonino xono anera iillitu” yine borreessinoonni garinniiti. 4 Konni albaanni borreessinoonnire baala roso ikkankera borreessinoonni; hatto assinoonnihu cincankenninna Qullaawa Borronni afiꞌneemmo sheshonni hexxo heedhannonke gedeeti. 5 Cincanna shesho aanno Magani kiꞌne baalunkura Kiristoosi Yesuusite gedee hedo ooꞌne; 6 kunino mittimmatenni mitto afoo* ikkitine Mootichinke Yesuusi Kiristoosi Maganonna Anna ayirrissinanni gedeeti.

7 Konnira Kiristoosi kiꞌne haaꞌriꞌnente gede, kiꞌneno Maganu ayirranno gede mimmito anga fantine haadhe. 8 Kiristoosi, Maganu ammanaminoha ikkinota leellishate barcintinorira soqqamaancho ikkinota kuleemmoꞌne; qoleno soqqamaancho ikkinohu Maganu annuwansara eino qaali addaxxinanniha ikkinota buuxisaraatinna 9 maarosi daafira daga Magano ayirrissanno gedeeti. Kunino, “Dagate mereero faajjete guwiseemmohehunna suꞌmikkira guweenyu faarso faarseemmohu iseraati” yine borreessinoonni garinniiti. 10 Qoleno, “Kiꞌne daga, mannisi ledo hagiidhe” yinoonni. 11 Xaano lende, “Daga baala, Yihowa* guwisse; mannu baalu iso guwisona” yinoonni. 12 Isayyaasino, “Isseyi rumushshinni daannohu daga gashshara kaꞌꞌanno; dagano iso hexxitanno” yiino. 13 Iso hexxitinoonni daafira, qullaawu ayyaani wolqanni hexxo batidhannoꞌne gede* hexxo aanno Magani hagiirrenna keere baala wonshoꞌne.

14 Roduuwaꞌya, kiꞌne danchumma woꞌmitinoꞌnere, woꞌma egenno nooꞌnerenna mimmito seejja* dandiitinannire ikkitinoonnita ani umiꞌya buuxoommo. 15 Ikkollana mito coye mittoreno maaxummokkinni xawise borreessoommoꞌnehu lede qaagiissammoꞌnera yeeti; hatto asseemmohu Maganu uyinoe eltonniiti; 16 tenne elto uyinoonniehu dagate Kiristoosi Yesuusi soqqamaancho ikkeemmo gedeeti. Maganunniha dancha duduwo duduwe qullaawa looso loosanni noommohu, kuri daga qullaawu ayyaaninni qullaabbe Magano hagiirsiissanno kakkalo ikkitanno gedeeti.

17 Konnira Kiristoosi Yesuusi rosaancho ikkoommo daafiranna Maganu looso loosanni noommohura tashshi yaannoe. 18 Daga hajajantanno gede Kiristoosi ane widoonni assino coye agurranna wolere coyiꞌra dihasiꞌreemmo; konne assinohu ani coyiꞌroommorinna assoommorinni, 19 addi addi malaattanninna maalalenni qoleno Maganu ayyaani wolqanniiti; konnira Yerusaalametenni kayise Iliwariqooni geeshsha Kiristoosiha dancha duduwo seekke duduwoommo. 20 Hakko garinni konni albaanni Kiristoosi suꞌma kulloonniwa dancha duduwo duduweemmokki gede dandaamiere baala assoommo; hatto assoommohu wolu manchi safinowa mineemmokki gedeeti; 21 kuni ikkinohuno, “Isi daafira kulloonninsakkiri laꞌanno; macciishshitinokkirino wodanchitanno” yine borreessinoonni garinniiti.

22 Duucha hige hedoommoha ikkirono, kiꞌnewa dayummokki gatoommohuno iseraati. 23 Xa kayinni konni qoqqowira sabbakoommokki qooxeessi dino; qoleno lowo diro* kiꞌnewa daate halchanni keeshshoommo. 24 Hakko daafira Ispeene haꞌreemmo woyite kiꞌnenni xaade ledoꞌne shiima yanna keeshshe sinsinne gudummohu gedensaanni shiima doogo geeshsha geegiissitinannie yee hexxeemmo. 25 Xa kayinni qullaawootaho soqqamammora Yerusaalame haꞌrammoraati. 26 Korkaatuno Meqedooniyahonna Akaayyaho heedhanno roduuwi Yerusaalamete heedhanno qullaawooti giddonni buxanete noonsare fushshite hagiirrunni uyitino. 27 Hige insa hatto assitinohu baxxeeti; qoleno insahu asalu noonsa; korkaatuno daga insaha ayyaanaamittete coye beeqqitu geeshsha dagateno insara hasiisannoha maalaamittete coye aate asali noonsa. 28 Konne fushshaate* haaꞌre masse insara iillishummohu gedensaanni kiꞌne widoonni hige Ispeene haꞌreemmo. 29 Qoleno kiꞌnewa dayemmo woyite Kiristoosiha gurre gundoonnikki atoote haaꞌre dayemmoꞌneta afoommo.

30 Konnira roduuwa, ane ledo Magano jawaattine huuccitinannie gede, Mootichinke Yesuusi Kiristoosinna ayyaanunni afiꞌnanni baxillinni huucciꞌreemmoꞌne; 31 Yihudaho heeꞌrannohu ammaninokki manni anganni gateemmo gedenna Yerusaalamete heedhanno qullaawooti soqqanshoꞌya* hagiidhite adhitanno gedeno huuccatto asseꞌꞌe; 32 hatto ikkiro, Maganu yiiro kiꞌnewa hagiirrunni daye ledoꞌne fooliishshiꞌreemmo. 33 Keere aanno Magani kiꞌne baalunku ledo ikko. Hamiiꞌni.

16 Kinkiraoosi songora soqqantannota rodoonke Feweni egensiiseemmoꞌne; 2 ise kiꞌnente gede Mooticha ammantannota ikkitino daafira, qullaawoota haaꞌnanni garinni haadhese; qoleno hasiisannosere baala uyitine kaaꞌlese; korkaatuno ise anerano wolu batinyu roduuwirano hale ikkitinonke.

3 Ledoꞌya Kiristoosi Yesuusi looso loossannorira Phirisqillaranna Aqiilara keere iillishsheꞌꞌe; 4 insa anera* yite heeshshonsa* sayisse uyitino; ane calla ikkummokkinni dagate giddo noo songuwa baalano galattannonsa. 5 Minensa gamba yitanno songorano keere iillishsheꞌꞌe. Qoleno Iisiyaho umo Kiristoosi rosaancho ikkinohura baxeemmohu Ephineexoosira keere iillishsheꞌꞌe. 6 Kiꞌne daafira lowo geeshsha daafurtinotera Maariyaamira keere iillishsheꞌꞌe. 7 Fiixaꞌya ikkitinoriranna ane ledo usurantinorira Andironikoosiranna Yuuniyaasira keere iillishsheꞌꞌe; insa soqqamaasine ayirrissannonsareetinna ane balaxxe Kiristoosi rosaano ikkitinoreeti.

8 Mootichunni baxeemmohu Amphiliyaaxoosira keere iillishsheꞌꞌe. 9 Ledonke Kiristoosi looso loosannohura Urbaanoosiranna baxeemmohu Isxaakuusira keere iillishsheꞌꞌe. 10 Kiristoosi hagiirsiisinohu Aphileesira keere iillishsheꞌꞌe. Arisxobuloosi mini mannirano keere iillishsheꞌꞌe. 11 Fiixaꞌya ikkinohura Heroodiyoonira keere iillishsheꞌꞌe. Mooticha haꞌrunsannohura Naarkisesi mini mannirano keere iillishsheꞌꞌe. 12 Mootichu looso diinaggaawe loosannori Xirayifiinanna Xirayifoosa yinanni meentira keere iillishsheꞌꞌe. Mootichu loosira lowo geeshsha daafurtino daafira banxeemmotera Phersiisira keere iillishsheꞌꞌe. 13 Worbu Mootichu soqqamaanchi Rufoosiranna amaꞌya gede asse laeemmotera amasira keere iillishsheꞌꞌe. 14 Asinqirixoosira, Fileegonira, Hermeesira, Phaxirobaanira, Hermaasiranna insa ledo noo roduuwira keere iillishsheꞌꞌe. 15 Filologoosiranna Yuuliyara, Neeriyuusiranna rodoosira, Olimphaasiranna insa ledo noo qullaawootira baalaho keere iillishsheꞌꞌe. 16 Rodiimmate baxillinni sunqantinanni mimmito keere haadhe. Kiristoosi songo baala keere sokkinoꞌne.

17 Konnira roduuwa, babbadooshshe kalaqqannorenna guficho ikkanno coye assitannore qorophitinanni gede eeggo yeemmoꞌne; kuni coyi kiꞌne rossinoonni rosi ledo dixaadannoho; hakko daafira insawiinni xooqqe. 18 Korkaatuno togoo manni Mootichinke Kiristoosira ikkikkinni uminsa yortora* borojjeho; insa awu afiinni dogge jajje beebbaataammu wodana soꞌrisiissanno. 19 Hajajantinannire ikkitinoonnita mannu baalu afino; hakko daafira ane lowo geeshsha hagiirsiissinoonnie. Ikkollana danchu coyira hayyoota, bushu coyira kayinni afibbeeloota ikkitinara hasiꞌreemmo. 20 Keere aanno Magani muli yannara Sheexaane lekkaꞌnera woroonni cancananno. Mootichinke Yesuusi elto kiꞌne ledo ikkito.

21 Ledoꞌya loosannohu Ximootewoosi keere soyinoꞌne; fiixiꞌya Lukiyoosi, Yaasooninna Sosiphaxiroosino keere dhaantinoꞌne.

22 Phaawuloosi kulanna tenne sokka borreessoommohu ani Xerxiwoosino Mootichu suꞌminni keere soyommoꞌne.

23 Ane wosinsannohunna songo woꞌma minesi xaaddannohu Gayiyoosi keere soyinoꞌne. Katamunnihu miinju mini sooreessi Erisxoosinna rodiisi Quasxiroosi keere dhaaꞌmitinoꞌne. 24* ——

25 Ani duduweemmohu danchu duduwinna Yesuusi Kiristoosi daafira sabbankanni sokka widoonni, Maganu kaajjitine uurritinanni gede assaꞌnera dandaanno. Tini sokka lowo diro dahaabbe keeshshite xawo fultinote qullaawa fojo ledo xaadooshshe afidhinote. 26 Xa kayinni tini fojo xawo fultino. Qullaawa Borro giddo noo masaalo widoonni daga baala tenne qullaawa fojo affino. Tini hegerera heeꞌranno Magani hajajo ledo sumuu yitannote. Isi hedo daga baala iso ammantanno gedeetinna isira hajajantanno gedeeti. 27 Isi callu hayyicha ikkino Maganira Yesuusi Kiristoosi widoonni hegerera ayirrinyu iillosi. Hamiiꞌni.