MAARQOOSI WONGEELLA

1 Maganu Beetti Yesuusi Kiristoosi daafira kulannohu danchu duduwi hanafannohu aane noo garinniiti: 2 Masaalaanchu Isayyaasi maxaafira togo yine borreessinoonni: “(Kuneeti doogokki qixxeessanno gede atera albaanni sokkaanchoꞌya soyemmo.) 3 Mittu manchi halalla, ‘Yihowa* doogo qixxeesse! Dooggasino taashshe’ yaanni lallawanno.” 4 Cuuaanchu Yohaannisi halalla, Maganu cubbonsa gatona yaanno gede mannu maaro einota leellishate cuuamanno gede sabbakino. 5 Hatte yannara, baalante Yihudu gobba manninna Yerusaalamete heeꞌranno manni baalu isiwa dayi; isino, cubbonsa faajjete kultanna Yordaanoosi Lagira cuuinsa.* 6 Yohaannisi gaalu ordanni gannoonni uddano uddiꞌranno; halloho gogunni seekkinoonni qawatto qodhanno; kanchafarenna dubbu malawo itanno. 7 Qoleno isi togo yaanni sabbakanno: “Ane gedensaanni ane rooru daanno; ani heeshshi yee caammisi meqeerricho* nafa tirate diꞌꞌikkoommoho. 8 Ani wayinni cuuoommoꞌne; isi kayinni qullaawu ayyaaninni cuuannoꞌne.”

9 Hatte yannara Yesuusi, Galiilu gobbara noohu Naaziretete kataminni dayenna Yohaannisi Yordaanoosi Lagira cuuisi. 10 Bayichonkonni wayi giddonni fulanni heeꞌrenni, gordu faꞌnameenna qullaawu ayyaani lembooli gede ikke aanasi dirranna lai. 11 Hakkiinni gordunni, “Tashshi assattoehu baxeemmo Beettiꞌya ateeti” yitanno huuro daggu.

12 Bayichonkonni qullaawu ayyaani Yesuusa halallira haꞌranno gede kakkayisisi. 13 Isino halalla 40 barra keeshshi; hakkiicho Sheexaanu jifisi; heeꞌrinohuno moyichu ledooti; ikkirono sokkaasine soqqantinosi.

14 Yohaannisi usuramihu gedensaanni, Yesuusi Maganunniha dancha duduwo sabbakara Galiila haꞌri; 15 togo yaanni sabbaki: “Masaalloonni yanna iillitino; Maganu Gashshootino gambisino. Maaro eꞌe; dancha duduwono ammanne.”

16 Galiilu Baari muleenni hige saꞌꞌanni heeꞌre, Simooninna Simooni rodoo Indiriyaasi afi; insa qulxuꞌme woshshaaxxitannore ikkitino daafira, woshshaadonsa baaru giddo tugganni no. 17 Hakkiinni Yesuusi, “Ane hoode amme; ani manna woshshaaddinannire asseemmoꞌnena” yiinsa. 18 Insano, hakkawoyintenni woshshaadonsa agurte hoodesi hadhu. 19 Hakkiinni shiimare sae, Zebidewoosi beetti Yaaqoobinna rodiisi Yohaannisi yowolonsa giddo heedhe woshshaadonsa gophitanna lai; 20 isino hakkawoyintenni woshshinsa. Insano, annansa Zebidewoosi kiranyootu ledo yowolote giddo agurte haꞌrunsitusi. 21 Hakkiinni Qifirinaahoomi hadhu.

Sambatu eanni heeꞌreennanni xaadu minira haꞌre rosiisa hanafi. 22 Borreessaanote gede ikkikkinni silxaane noosi manchi gede ikke rosiisinonsa daafira, rosiisino gara lowo geeshsha dhagge assidhu. 23 Hatte yannara xaadu minensa noohu mittu battete ayyaani amadino manchi togo yaanni canci: 24 “Naaziretete Yesuusa, ninkera ate ledo mayi noonke? Hunattonkera dayotto? Ati ayetiro seekke afoommo; ati Qullaawa Maganu soqqamaanchooti!” 25 Yesuusi kayinni, “Sammi yii; manchuwiinni fuli!” yee ufi. 26 Battete ayyaanino mancho tuge fittifachishihu gedensaanni lowo geeshsha raare isiwiinni fuli. 27 Hakko noo manni baalu dhagge assiꞌre insa insaneewa togo yaanni hasaawi: “Kuni maatikka? Rosiisanno gari dhaggete! Battete ayyaanna nafa roorretenni hajajanno; insano hajajantannosi.” 28 Konnira, isi duduwi hakkawoyintenni Galiilu gobba woꞌmate raga baala iilli.

29 Xaadu mininni fultuhu gedensaanni, Yaaqoobinna Yohaannisi ledo Simooninna Indiriyaasi minira hadhu. 30 Hatte yannara Simooni ballo biso iibbabbite goxxe no; insano bayichonkonni ise dhiwante noota Yesuusira kultu. 31 Yesuusino ise noowa mare anga amade gotti assise. Iseno iibbabbo higgeennase kaꞌe soqqantunsa.

32 Arrishsho eꞌuhu gedensaanni hashsha, mannu dhiwantinorenna agaaninte amaddinore baala isiwa haaꞌre dayi; 33 katamu manni baaluno nafara gamba yee no. 34 Yesuusino addi addi dhibbi amadinoha lowo manna hursi; hattono lowo agaaninte fushshi; ikkollana, agaaninte isi Kiristoosi ikkinota affino daafira* coyidhannota hooli.

35 Yesuusi soodo tunse heeꞌreenna gute kae, mininni fule mannu nookkiwa haꞌre huuccatto assiꞌri. 36 Ikkollana Simooninna ledosi noori iso hixamanyite hassu; 37 iso affuhu gedensaanni, “Mannu baalu hasanni noohe” yitusi. 38 Yesuusi kayinni togo yiinsa: “Hakkiichono sabbakeemmo gede, kaꞌe qooxeessaho noota wole katamma haꞌnona; korkaatuno dayommohu iseraati.” 39 Hakkiinni isi xaadu minnansara sabbakanninna agaaninte fushshanni Galiilu gobba baala tuqi.

40 Hatte yannara mittu dhiigu dhibbi amadinosi manchino isiwa daye guluphe, “Hasiꞌrittoro hursattoera* dandaattowe” yee huucciꞌri. 41 Yesuusino lowo geeshsha marare angasi diriirse mancho amammade, “Hasiꞌreemmona huri!”* yiisi. 42 Manchuno bayichonkonni dhiigu dhibbi agureennasi huri.* 43 Hakkiinni Yesuusi mancho seekke qorophisiise bayichonkonni haꞌrisi; 44 togo yiisi: “Tenne mittohono kulattokki gede qorophi; kayinni hadhe ateneeto kakkalaanchoho leellishi; kakkalaano huroottota affanno gede Muse hajajino garinni keeraawate kakkalono shiqishi.” 45 Ikkollana manchu haꞌrihu gedensaanni, tenne daafira lowore hasaawi; duduwono bayicho baala tuqisi; hakkunni gedensaanni Yesuusi katama faajjete ea dandiinokki daafira katamu gobbaanni mannu nookkiwa keeshshi. Ikkollana, mannu ragu baalinni isiwa daa diagurino.

2 Ikkollana, Yesuusi shiimu barri gedensaanni galagale Qifirinaahoomi dayi; isi mine no yinanni duduwino mannaho iilli. 2 Konnira lowo manni gamba yee mine woꞌmeenna, nafaru nafa ruukki; isino qaale kulinsa. 3 Hatte yannara mannu, shoolu manchi duheenna mitto laanshaawino mancho isiwa haaꞌre dayi. 4 Ikkollana mannu batiꞌrino daafira, laanshaawino mancho Yesuusiwa shiqqi assitanno faro hooggu; konnira, Yesuusi noo taaloote laꞌe mineho iimiido diigge laanshaawino mancho rerentenni dirrissu. 5 Yesuusino ammanansa lae laanshaawino mancho, “Beettoꞌya, cubbokki maarroonnihe” yiisi. 6 Hakkiicho ofolte noo borreessaano giddo mitu wodaninsanni togo yite heddu: 7 “Kuni manchi konni garinni coyiꞌrannohu mayiraati? Isi Magano xonanni no. Mitto Magano agurranna cubbo maara dandaannohu ayeti?” 8 Ikkirono, Yesuusi hakkawoyintenni heddanni noore ayyaanisinni afe togo yiinsa: “Wodaniꞌnenni konne coye mayira heddinanni? 9 Laanshaawino mancho, ‘Cubbokki maarroonnihe’ yaatenna ‘Kaꞌe rerekki duqqite haꞌri’ yaate giddo shottannoti hiitteeti? 10 Ikkirono manchi Beettira uullate aana cubbo gatona yaate silxaane noosita affinara hasiꞌreemmo.” Hakkiinni laanshaawino mancho togo yiisi: 11 “Kai, rerekki duqqite minikkira haꞌri.” 12 Manchuno kae, hakkawoyintenni reresi duqqe mannu baalu albaanni fule haꞌri. Konnira mannu baalu lowo geeshsha dhagge assiꞌre, “Togoo coye horo laꞌne diegenninoommo” yaanni Maganoho ayirrinye uyi.

13 Yesuusi galagale baaru qacce haꞌri; mannu baaluno timbiliqqi yee isiwa mari; isino rosiisinsa. 14 Sae haꞌranni heeꞌre, Ilfiyoosi beetti Leewi qaraxo qaranxanni darga ofolle nooha afe, “Hoodeꞌya amo” yiisi. Isino kae hoodesi haꞌri. 15 Hakkunni gedensaanni, Yesuusi Leewi mine sagale itanni heeꞌreenna lowo qaraxaasinenna cubbaataammi Yesuusinna rosaanosi ledo sagale ittu; insa giddo batinyu haꞌrunsaanosiiti. 16 Ikkollana, Farisootu wido ikkitino borreessaano Yesuusi cubbaataammunna qaraxaasinete ledo itanni nooha laꞌe rosaanosi, “Qaraxaasinetenna cubbaataammu ledo itannohu mayiraati?” yitu. 17 Yesuusino tenne macciishshe togo yiinsa: “Xagisaanchu hasiisannohu dhiwantinoriraati ikkinnina fayyu mannira diꞌꞌikkino. Ani dayommohu keeraano ikkikkinni cubbaataamma woshshammoraati.”

18 Yohaannisi rosaanoranna Farisootaho xoomate rosichi noonsa. Konnira insa Yesuusiwa dagge togo yitusi: “Yohaannisi rosaanonna Farisootu rosaano duucha woyite xoontanna ate rosaano kayinni xoontannokkihu mayiraati?” 19 Yesuusino togo yiinsa: “Idayichu ledonsa heeꞌreenna idayichu jaalla xoontanno gede assannonsari mayi no? Idayichu ledonsa heeꞌri geeshsha insa xooma dihasiissannonsa. 20 Ikkollana idayicho insawiinni haaꞌne hoollanni yanna dagganno; insa hakkawoyite xoontanno. 21 Akkala uddanora haaro hocco qaaffisiꞌranno manchi dino. Hatto assiro, haaru hocci duuranno daafira uddanote dadhamme lexxitanno. 22 Qoleno, haaro woyine akkalu woyinete ogorira wodhanno manchi dino. Hatto assiro, woyine ogoro dhoossanno, woyineno duꞌnantanno, ogoruno baꞌꞌanno. Hakko daafira, haaro woyine haaru woyinete ogorira worranni.”

23 Yesuusi Sambatunni gidu irshi giddoonni hige saꞌꞌanni heeꞌreenna, ledosi hadhanni noori rosaanosi shoye tattayisse ittu. 24 Konnira Farisootu togo yitusi: “Kune lai! Rosaanokki Sambatunni seeru hoolinore assitanni noohu mayiraati?” 25 Isi kayinni togo yiinsa: “Daawiti sagale hoogeenna isinna ledosi noo manni hudiꞌri woyite maa assinoro horo dinabbabbinoonni? 26 Kakkalaanote roorrichi Abiyaataari daafira kultanno xaggera, Daawiti Maganu minira eꞌꞌe kakkalaano agurranna mittu manchino itara fajjinoonnikkiha qullaawa tima* itinotanna ledosi noo mannirano uyinota dinabbabbinoonni?” 27 Hakkiinni togo yiinsa: “Sambatu kalaqaminohu mannahooti ikkinnina, mannu Sambataho dikalaqamino. 28 Konnira, manchi Beetti Sambataho nafa Mootichaho.”

3 Wole yannarano Yesuusi xaadu minira ei; hakkiicho mittu anga laanshaawino manchi no. 2 Farisootu Yesuusa busha assa hasidhino daafira, Sambatunni konne mancho hursannoronna teꞌee affara ille worte laꞌanni no. 3 Isino anga laanshaawino mancho, “Kaꞌe kawa mereerira amo” yiisi. 4 Hakkiinni insa togo yii: “Sambatunni fajjinoonnihu danchanso busha assate? Lubbo* gatisatenso shaate?” Insa kayinni sammi yite gibbu. 5 Yesuusi, wodaninsa dillaawinotera baasa dadille, lowo geeshsha hanqinohu mitu hakko noo manna laihu gedensaanni anga laanshaawino mancho, “Angakki diriirsi” yiisi. Manchuno angasi diriirsi; angasino hurtu. 6 Farisootuno gobbara fulte hakkawoyintenni Heroodiisi manni ledo gamba yite, Yesuusa shitanno gara maꞌlitu.

7 Yesuusi kayinni rosaanosi ledo Galiilu Baara haꞌri; Galiilunninna Yihudunni dayinohu lowo mannino hoodesi haꞌri. 8 Lowo manni isi assinoha batinye coye macciishshe, wole agurina Yerusaalametenni, Edoomiyaasinni, Yordaanoosi Lagira widiidinni, hattono Xiroosinna Sidooni qooxeessinni nafa isiwa dayi. 9 Yesuusi mannu cifannosikki gede, rosaanosi mitte shiima yowolo qixxeessitannosi gede kulinsa. 10 Isi lowo manna hursino daafira, buutote dhibbi amadinonsari baalu, iso kissara mulesi cifante mimmito tuttuggu. 11 Battete ayyaanna nafa iso laꞌu kiiro albasiinni ubbe, “Ati Maganu Beettooti” yitanni raartanno. 12 Ikkollana ayimmasi mittohono kultannokki gede hige hige qorophisiisinsa.

13 Yesuusi ilaala fule hasiꞌrino manna isiwa woshshi; insano isiwa daggu. 14 Hakkiinni isi 12 manna doore soqqamaasine yee suꞌma fushshinsa; insa ledosi hadhannoreetinna sabbakkara soyannoreeti; 15 hattono agaaninte fushshitanno gede roorre uyinanninsareeti.

16 Doodhinori 12 kuriiti: Pheexiroosi yee suꞌma fushshisihu Simooni, 17 Zebidewoosi beetti Yaaqoobinna Yaaqoobi rodii Yohaannisi (insara suꞌma Boanergeesi yeeno fushshino; hatto yaa “Belequ Ooso” yaate), 18 Indiriyaasi, Filiphoosi, Bertelemewoosi, Maatewoosi, Toomaasi, Ilfiyoosi beetti Yaaqoobi, Taadewoosi, Laalaataanchu* Simooninna 19 gedensoonni Yesuusa sayise uyihu Asqorootu Yihuda.

Hakkiinni Yesuusi minira haꞌri; 20 xaano lowo manni gamba yii; hakko daafira sagale ita nafa didandiitino. 21 Ikkollana fiixisi tenne macciishshe, “Wodana difayyino” yee iso amade haaꞌre haꞌrara dayi. 22 Qoleno, Yerusaalametenni daggino borreessaano togo yitu: “Giddosi Bieelizebuuli* no; agaaninte fushshannohu agaanintete roorrichi wolqanniiti.” 23 Konnira Yesuusi insa isiwa woshshihu gedensaanni togo yee lawishshunni kulinsa: “Sheexaanu Sheexaane hiitto asse fushsha dandaanno? 24 Mittu gashshooti isi isiniiwa babbadamiro, hakku gashshooti kaajje uurre diafanno; 25 qoleno mittu mini isi isiniiwa babbadamiro, hakku mini kaajje uurra didandaanno. 26 Sheexaanuno isi isiniiwa giwamironna babbadamiro, baꞌꞌanno ikkinnina kaajje uurra didandaanno. 27 Balaxe wolqaataamo mancho usurikkinni, hakko manchi minira eꞌꞌe jajjasi mulqiꞌra dandaannohu mittuno dino. Jajjasi mulqiꞌra dandaannohu hatto assiro callaati. 28 Halaale yeemmoꞌnena, mannu loosanno cubbinna xonanno xono ikkitutano ikkituro, baalanka coye gatona yinanninsa. 29 Qullaawa ayyaana xonannohura kayinni hegere geeshsha gatona diyinannisi; hatteentenni konni cubbisira hegere geeshsha xaꞌmamanno.” 30 Isi hatto yiinohu insa, “Battete ayyaani amadinosi” yitannosi daafiraati.

31 Hatte yannara amasinna roduuwisi daye gobba uurre, iso woshshara mitto mancho soyi. 32 Mulesi ofolle noohu lowo manni, “Kune amakkinna roduuwikki gobbaanni heedhe woshshitanni noohe” yee kulisi. 33 Isi kayinni, “Amaꞌyanna roduuwiꞌya ayeooti?” yiinsa. 34 Hakkiinni isi mulesi iso doyisse ofolle noo manna lae togo yii: “Amaꞌyanna roduuwiꞌya kuriiti! 35 Maganu fajjo assannohu baalu labbaa rodooꞌyaati, meya rodooꞌyaatinna amaꞌyaati.”

4 Yesuusi galagale baaru mule rosiisi; lowo mannino mulesi gamba yii. Konnira isi yowolo gidde ofolle baaru qaccenni shiimare giddo hige shiqqi yii; mannu baalu kayinni baaru qaccera no. 2 Hakkiinni lowo coye lawishshunni rosiisinsa; togo yiinsa: 3 “Hanni macciishshe! Mittu manchi wixa wixiꞌrara fuli. 4 Wixanni heeꞌreenna, mitu wixi doogote qaccera uwi; hakkiinni cea dagge xinqite ittu. 5 Wolu wixi qole gari bushshi nookkiwa kinnaame baattora uwi; baatto lowo bushshi nookkita giddo tula ikkitino daafira, wixu mulenni muri. 6 Arrishsho fultuta kayinni qoori; qoleno rumushsho afiꞌrinokki daafira mooli. 7 Mitu wixi utu mereero uwi; utuno lophe qalxe amadi; konnira gumiweele gati. 8 Wolu wixi kayinni danchu bushshira uwe, mure lophihu gedensaanni guma laali; mittu 30, mittu 60, mittu 100 ero laali.” 9 Hakkiinni, “Macciishshitanno macca noohu macciishsho” yii.

10 Yesuusi callisi heeꞌreenna, Tonaalame soqqamaasinenna ledosi noohu wolu manni lawishshu tiro kulannonsa gede xaꞌmitu. 11 Isino togo yiinsa: “Kiꞌnera Maganu Gashshootita qullaawa fojo huwatate dandoo uyinoonniꞌne; gobbaanni noorira kayinni baalunku coyi mulla lawishsha calla ikke gatanno; 12 hakko daafira laꞌꞌate woyite laꞌanno, kayinni dibuuxxanno; macciishshate woyite macciishshitanno, kayinni diwodanchitanno; konnira insa horo dihigganno; maarono diafidhanno.” 13 Hakkiinni togo yiinsa: “Konne lawishsha huwata hoogginiro, wole lawishshuwa baala hiitto assitine huwattinanni?”

14 “Wixannohu Maganu qaale wixanno. 15 Qaale winxi woyite doogote qaccera uwi wixi gede ikkitinori kuriiti; insa qaale macciishshitanni heedheenna, Sheexaanu daye giddonsa winxoonni qaale hawulukanno. 16 Wolu manni kayinni, kinnaame baattora winxoonni wixi gedeeti; insa qaale macciishshitanni heedhenni hagiidhite adhitanno. 17 Ikkollana, qaalu wodaninsara rumuxxannokki daafira shiima yannalla keeshshanno; qaalunni kainohunni qarru woy dartu iillannonsa woyite bayichonkonni gufidhanno. 18 Wolootu qolte utu mereero winxoonni wixi gedeeti. Insa qaale macciishshitinoreeti; 19 ikkollana, tenne alame* yaaddonna jironniti dogate wolqa, hattono wole yorto baala wodanisi giddora surte eꞌe qaale qalxite amaddanno daafira gumiweele gatanno. 20 Jeefote, mitu manni danchu bushshira winxoonni wixi gedeeti; insa qaale macciishshite hagiidhite adhitanno; gumano laaltanno; mittu 30, mittu 60, mittu 100 ero laaltanno.”

21 Qoleno togo yiinsa: “Caabbicho xawise kae gimboola gombisannohu woy daallasaho woroonni worannohu nooni? Worrannihu leellanno darga diꞌꞌikkino? 22 Konni daafira, dahaawinori xawo fulasi, goꞌlinorino leellasi digattanno. 23 Macciishshitanno macca noohu baalu macciishsho.”

24 Hakkiinni togo yiinsa: “Macciishshitinannire wodanche. Safartinanni safaraanchinni safarranniꞌne; isinni hakkiinni roorsine lendanniꞌne. 25 Noosihura baalaho lendannisi; noosikkihura baalaho kayinni hakkonne noosinka haaꞌne hoollanni.”

26 Hakkiinni isi togo yii: “Gordu Gashshooti baattote wixa wixiꞌranno manchi gedeeti. 27 Manchu hashsha goxe soodo kaꞌꞌanno; hiitto ikkeetiro afikkinni wixino wixi mure lophanno. 28 Baatto umisenni sunu sununni guma laaltanno; umo mura, tenne agashsho, hakkiinni agashshote aana iillino guma uyitanno. 29 Gidu iillanno woyite kayinni, manchu midote yanna iillitino daafira haantotenni midanno.”

30 Yesuusi lede coyiꞌranni togo yii: “Maganu Gashshoote mayinni lawisa dandiineemmo? Woy mayinni masalsine kula dandiineemmo? 31 Maganu Gashshooti lenteetu* gumi gedeeti; kuni gumi baattote winxanni woyite uullate aana noo gumi baalunkunni roore shiimaho. 32 Winxihu gedensaanni kayinni lophe wole muꞌro baala rooranno; jajjabba sinnano kalaqiꞌranno; hakko daafira iimi cea caalisira fooliishshidhannowa afidhanno.”

33 Yesuusi togoota lowo lawishshuwa horoonsiꞌre, mannu wodancha dandaanno deerrinni qaale kulinsa. 34 Isinni, lawishshiweelo dikulannonsa; rosaanosi calluwu noo woyite kayinni baalanka coye xawise kulannonsa.

35 Hakko barra hashshita Yesuusi, “Kaꞌe baara widoonni fullona” yiinsa. 36 Manna haꞌrissuhu gedensaanni, Yesuusa wonanni yowolote aana nooha haadhe hadhu; wole yowollano ledo no. 37 Hatte yannara lowoti wolqaataame bubbe kaꞌu; dambaluno yowolote daye gaꞌnanni giddora ei; hakko daafira, wayi yowolote woꞌmara kai. 38 Yesuusi kayinni, yowolote badhiidi kifilera barko barkiꞌre goxe no. Konnira insa iso goxinoha kayisse, “Rosiisaancho, goonfanna sammi yaatto?” yitu. 39 Hakkiinni isi gotti yee bubbe ufi; baarano, “Sammi yii! Eemarami!” yii. Bubbeno uurritu; baaruno qaxaqaꞌa yii. 40 Hakkiinni isi, “Togo mayira waajjitinanni?* Xaano ammana dinoꞌne?” yiinsa. 41 Insa kayinni lowo geeshsha waajjite mimmito, “Bubbenna baaru nafa hajajamannosihu isi kuni ayeti?” yitu.

5 Hakkiinni baara tayisse widoonni fulte Gergesenooni yinanni qoqqowo daggu. 2 Yesuusi yowolote aaninni dirranni heeꞌreenna, mittu battete ayyaani amadino manchi waammate* mereerinni daye isi ledo xaadi. 3 Kuni manchi waammate mereero heeꞌrannoho; hatte yanna geeshsha iso sansalatetenni nafa usure hoola dandiinohu mittu manchino dino. 4 Iso duucha hinge angano lekkano sansalatetenni usurroonniha ikkirono, isi kayinni sansalate tattayise billa-biinxa fushshanno; konnira, iso amade heeshshi assate wolqa afiꞌrinohu mittu manchino dino. 5 Qoleno isi woꞌmanka woyite hashshanna barra waammate mereeronna ilaallate aana raaranno; hattono biso kinnatenni huduuxxanno. 6 Ikkollana isi xeertote heeꞌre Yesuusa laiti, dodanni mare albasiinni kumbuuli. 7 Hakkiinni lowo geeshsha raaranni togo yii: “Woꞌmunkura Aliidi Magani Beetto Yesuusa, anera ate ledo mayi nooe? Shetisattoekki gede Maganu suꞌminni xaarie.” 8 Hatto yiinohu Yesuusi balaxe, “Koo battete ayyaana, manchu giddonni fuli” yiino daafiraati. 9 Yesuusi kayinni, “Suꞌmikki ayeti?” yee xaꞌmisi. Isino, “Batinye ikkinoommo daafira, suꞌmiꞌya Leegiyooniiti”* yee qoli. 10 Isino, battete ayyaanna gobbatenni fushshe haꞌrisannonsakki gede Yesuusa eeggifate huucciꞌri.

11 Hatte yannara, lowoti manchaamete hoshsha ilaalu aana hayisso ittanni no. 12 Hakko daafira battete ayyaanna, “Marre manchaamete giddora eꞌneemmo gede fajjinke” yite huuccidhusi. 13 Isino fajjinsa. Battete ayyaannano fulte manchaamete giddora eꞌu; hakkiinni 2,000 meddi yitanno manchaame boonu gaminni bitintirtanni dirrite baaru giddora eꞌe itantu. 14 Manchaame allaalte noori kayinni xooqqe marte, konne duduwo katamahonna baadiyyete kultu; mannuno tenne ikkito laꞌꞌara dayi. 15 Insa Yesuusiwa dagge mitte leegiyoone ikkitanno agaaninte amaddino manchi uddano uddiꞌre surre fayyo ikke ofolle nooha affu; hatte yannara insa lowo geeshsha waajjitu. 16 Qoleno konne coye laꞌinori, agaaninte amaddino manchi aana ikkinorenna manchaame ikkitinore odeessitunsa. 17 Hakko daafira insa, Yesuusi qooxeessinsanni agure haꞌranno gede huuccidhusi.

18 Isi yowolo giddanni heeꞌreenna, agaaninte fultusi manchi ledosi haꞌrara huucciꞌri. 19 Yesuusi kayinni difajjinosi; hatteentenni togo yiisi: “Qaera hadhe Yihowa* assinohere baalanna maarinohe gara fiixikkira kuli.” 20 Manchuno haꞌre Yesuusi assinosire baala Dikaapolisi* duduwi; mannu baaluno dhagge assiꞌri.

21 Yesuusi xaano yowolotenni baara tayise saihu gedensaanni, lowo manni isiwa gamba yii; isino baaru mule no. 22 Iyyaairoosi yinannihu xaadu mini roorrooti giddo mittu hakkira daye Yesuusa afe lekkasira uwi. 23 Isi hige hige togo yaanni huucciꞌri: “Shiima qaaqqoꞌya buuto dhiwante no.* Gatte lubbote heedhannoe gede dagge angakki aanaho worise ballo.” 24 Yesuusino kae ledosi haꞌri; hoodesi haꞌranni noohu lowo mannino cifisi.

25 Mannu mereero, 12 diro mundee duꞌnantannase heedhino mancho no. 26 Tini mancho, batinye xagisaanowa hadhanni lowo geeshsha qarrantino;* woxese baalano guxxitino; ikkollana, dhibbu lexxinose ikkinnina woyyimma diafidhino. 27 Ise Yesuusi daafira coyiꞌnanna macciishshite mannu mereero isira badheenni higge dagge uddanosi kissu; 28 hatto assitinohu, “Uddanosi nafa kisummaro hureemma” yite heddino daafiraati. 29 Bayichonkonni duꞌnantanni noose mundee uurritu; waadanni noose dhibbinni hurtinotino leeltuse.

30 Hakkawoyintenni, Yesuusi giddosinni wolqa fultinota afe alba mannunniwa hige, “Uddanoꞌya kisihu ayeti?” yee xaꞌmi. 31 Rosaanosi kayinni togo yitusi: “Mannu cifanni nooheta affanni heedhenni kisiehu ayeti yaatto?” 32 Isi kayinni kisinosihu ayetiro afara kawa kaꞌa lai. 33 Manchono ise aana ikkinore affino daafira, waajjite huxidhanni dagge albasiinni ubbe noore gudisse kultusi. 34 Isino togo yiise: “Beettoꞌya, ammanakki hursitinohe. Waadannohe dhibbikkinni huroottana, keerunni haꞌri.”

35 Yesuusi coyiꞌranni heeꞌreenna, mitu manni xaadu mini roorrichi qaenni daye, “Qaaqqokki gufidhino!* Xaate Rosiisaancho mayira qarrisatto?” yii. 36 Yesuusi kayinni yitinore macciishshe xaadu mini roorricha, “Ammani ikkinnina waajjitooti”* yiisi. 37 Hakkunni gedensaanni Pheexiroosi, Yaaqoobinna Yaaqoobi rodoo Yohaannisi agurranna wolu mittuno hoodesi haꞌrara difajjino.

38 Xaadu mini roorrichi qae iillituta, Yesuusi mannu koocanna, wiꞌlannanna raaranna lai. 39 Isi minira eihu gedensaanni, “Wiꞌlitinannihunna kooccinannihu mayiraati? Qaaqqo goxxinollana direyitino” yiinsa. 40 Hatto yiita insa arrassitanni osoꞌlitu. Ikkollana, manna baala gobbara fushshihu gedensaanni qaaqqote annanna ama hattono ledosi noore haaꞌre qaaqqo noowa ei. 41 Hakkiinni qaaqqote anga amade, “Xaalita quumi!” yiise; hatto yaa “Tee qaaqqo, kai!” yaate. 42 Qaaqqono hakkawoyintenni kaꞌe haꞌrantu. (Ise 12 dirite.) Hakkawoyintenni insa hagiidhe ikkannota hoogi. 43 Isi kayinni tenne mittohono kultannokki gede hige hige hajajinsa;* qaaqqote ittannore uyitanno gedeno kulinsa.

6 Hakkiinni kae ilamino gobba dayi; rosaanosino hoodesi daggu. 2 Isino Sambatu barra xaadu mine rosiisi; rosiisanna macciishshino manni giddo rooru dhagge assiꞌre togo yii: “Kuni manchi konne coye baala mama rosi? Isira tenne hayyonna maalale loosate dandoo ayi uyisi? 3 Isi dihanaaxichaho? Amasi Maariyaami, roduuwisino Yaaqoobi, Yooseefi, Yihudanna Simooni diꞌꞌikkitino? Meya roduuwisino dininke ledo heeꞌranno?” Hakko daafira, isinni kainohunni gufidhu. 4 Yesuusi kayinni togo yiinsa: “Masaalaanchu gobbasira, fiixisiwanna minesi agurranna wolewa baalawa ayirranno.” 5 Konnira anga aanaho wore boode dhiwamino manna hursinota agurranna hakko wole maalale loosa didandiino. 6 Ammana noonsakki daafira lowo geeshsha maalaꞌli. Hakkunni gedensaanni, qooxeessaho noo qachuwa doyanni rosiisi.

7 Hakkiinni Yesuusi Tonaalamenka isiwa woshshe lame lame asse soyinsa; battete ayyaanna hajajjanno gedeno roorre uyinsa. 8 Qoleno hadhanno woyite siqqo agurranna daabbo, ogoro hattono qoraho woxe* adhitannokki gede hajajinsa; 9 caamma wodhitanno gede, layinki uddano* kayinni adhitannokki gede* kulinsa. 10 Isi lede togo yiinsa: “Mitto mine eꞌiniro, hakko qacha agurtine fultina geeshsha hakko keeshshe. 11 Haaꞌrannoꞌneha woy kultinannire macciishshannoha hoogginiro, hakkiinni agurtine hadhinanni woyite qorophishsha ikkannonsa gede lekkaꞌne buko gangaꞌne.” 12 Insano fulte mannu maaro eanno gede sabbakku; 13 lowo agaaninteno fushshitu; hattono dhiwaminoha lowo manna zayite buurte hursitu.

14 Yesuusi suꞌmi lowo geeshsha egennamino daafira, Moote Heroodiisi tenne macciishshi; hatte yannara mannu, “Cuuaanchu Yohaannisi reyotenni kaino; maalale loosa dandiinohu iseraati” yaanno. 15 Wolootu kayinni, “Eeliyaasiiti” yitanno. Mitootu qolte, “Albi masaalaano gedee masaalaanchooti” yitanno. 16 Heroodiisi kayinni konne coye macciishshe, “Ani goowa mursiisummohu Yohaannisi reyotenni kaino” yii. 17 Heroodiisi, rodiisi Filiphoosi galte Heroodiyaadanni kainohunni, manna soye Yohaannisi sansalatetenni usursiise usuru minira eessino. Heroodiisi hatto assinohu ise galtesi assiꞌrino daafiraati. 18 Korkaatuno Yohaannisi Heroodiisi duucha woyite, “Rodiikki galte adhattora seeru difajjannohe” yaannosi. 19 Hakko daafira, Heroodiyaada koma amaxxite Yohaannisi shaa hasidhino; ikkollana tenne assa didandiitino. 20 Heroodiisi, Yohaannisi keeraanchonna qullaawa mancho ikkinota afino daafira iso waajjanno; mitturi kisannosikki gedeno agarisi. Heroodiisi, Yohaannisi coyiꞌrannore macciishshanno woyite assannori baꞌꞌannosiha ikkirono, coyiꞌrannore kayinni macciishsha baxanno.

21 Ikkollana Heroodiisi ilamino barra ayirrisara gashshootu roorroota, olantote hajajaanonna ayirradda Galiilu gobba manna jila jile woshshi; hatte yannara Heroodiyaada injo afidhu. 22 Heroodiyaada beetto dagge sirbite Heroodiisinna ledosi itanni noo manna hagiirsiissu. Mooteno beetto, “Hasiꞌrittare baala xaꞌmie eemmohena” yiise. 23 Qoleno, “Gashshootiꞌya darati geeshsha ikkiro nafa xaꞌmiꞌrittare baala eemmohe” yee xaarise. 24 Konnira ise amasewa marte, “Maa xaꞌmiꞌro ikka?” yitu. Amaseno, “Cuuaanchu Yohaannisi umo xaꞌmiꞌri” yituse. 25 Ise hakkawoyintenni rakke mootenniwa marte, “Cuuaanchu Yohaannisi umo sayinete worte xaanni aattoera hasiꞌreemma” yite xaꞌmidhu. 26 Moote tennera lowo geeshsha dadillinoha ikkirono, xaarino xaaroranna wosinisira* yee xaꞌmidhinore hoꞌla dihasiꞌrino. 27 Konnira moote hakkawoyintenni agaraanchosi soye Yohaannisi umo abbanno gede hajaji. Agaraanchuno haꞌre usuru mine Yohaannisi goowa muri; 28 hakkiinni umo sayinete wore abbe beettote uyi; beettono amasera uyitu. 29 Rosaanosi tenne macciishshite, dagge reeshsha haadhe madaartu.

30 Soqqamaasine Yesuusi mule gamba yite assitinorenna rosiissinore baala kultusi. 31 Hakkiinni Yesuusi, “Kaꞌe callootu mannu nookkiwa haꞌneenna hakkiicho shiima geeshsha fooliishshidhinannina” yiinsa. Hatto yiinohu, lowo manni daanninna haꞌranni noo daafira, sagale ittanno faro nafa hoogginohuraati. 32 Hakko daafira, hakkiinni kaꞌe yowolo giddite mannu nookki qooxeessa hadhu. 33 Ikkollana mannu insa hadhanna lai; lowo mannino hadhinota afe katamu baalunni fule, dodanni lekkatenni haꞌre balaxe sae agari. 34 Yesuusino yowolotenni dirranni heeꞌre, lowo manna lai; mannu allaalaanchu nookki geꞌreewi gede ikke noo daafira lowo geeshsha mararinsa. Hakkiinni lowore rosiisinsa.

35 Yanna hashshituta rosaanosi isiwa shiqqi yite togo yitu: “Heeꞌnoommohu baddowaati; yannano hashshitino. 36 Hakko daafira, qooxeessaho noo baadiyyenna qachuwa haꞌre itannore hidhanno gede manna haꞌrisi.” 37 Yesuusi kayinni, “Ittannore kiꞌne uyiyyensa” yee qoli. Insano togo yitusi: “Haꞌne 200 diinaarenni* daabbo hirre itara mannaho uyinoni?” 38 Isino, “Meu timi nooꞌne? Hanni martine laꞌe!” yiinsa. Insano hadhe laꞌuhu gedensaanni, “Ontu timinna lame qulxuꞌmicho noonke” yitu. 39 Hakkiinni Yesuusi baalunku manni gaamo gaamo ikke hayissote aana ofollanno gede hajaji. 40 Konnira, mannu xibbe xibbenna ontawo ontawo ikke gaamote ofolli. 41 Hakkiinni ontenka timanna lamenta qulxuꞌmicho haaꞌre iima hige lae maassiꞌri. Timma hiiqqaqqe mannaho iillishshanno gede rosaanosira uyi; lamenta qulxuꞌmichono baalunkura beehi. 42 Baalunku itte duubbu; 43 hakkiinni intanna gatino haambaa qulxuꞌme agurranna 12 gimboola woꞌma gamba assitu. 44 Timma itinohu 5,000 labballooti.

45 Hakkiinni bayichonkonni Yesuusi manna haꞌrisa geeshsha, rosaanosi yowolo giddite Beetesaayidu widoonni noota baaru qacce iso balaxxe saꞌanno gede kulinsa. 46 Ikkollana isi manna haꞌrisihu gedensaanni huuccatto assiꞌrara ilaala haꞌri. 47 Hashshi woyite yowolo baaru mereero no; Yesuusi kayinni callisi moola baatto aana no. 48 Hatte yannara bubbe insawa higge bubbissanni noo daafira, laaqiꞌrate sharrantanna lae, hashsha shoolki agare* balla baaru aana lekkatenni haꞌranni insawa dayi; ikkollana isi sae haꞌrara hedinoha lawanno. 49 Insano baaru aana lekkatenni haꞌranna laꞌe, “Haaqiiꞌnanni heeꞌnoommonso?” yite raartu. 50 Baalunku iso laꞌuti lowo geeshsha massu. Ikkollana isi bayichonkonni hasaawisinsa; qoleno, “Massinoonte! Aneetina waajjitinoonte” yiinsa. 51 Hakkiinni insa giddite noo yowolo giddita bubbe gabbi yitu. Hatte yannara insa lowo geeshsha dhagge assidhu; 52 dhagge assidhinohu Yesuusi timmatenni loosino maalale tiro huwattinokkihuraati; wodaninsa dillaawinohura xaano diwodanchitino.

53 Hakkiinni, baara tayisse saꞌe Gensereexi yinanni gobba daggu; yowolonsano hakko qooxeessira uurrisidhu. 54 Ikkollana yowolotenni dirritanni heedheenna mannu Yesuusa ikkinota afi. 55 Hatte yannara qachu baalunni dodante, dhiwantinore rerete dukke Yesuusi no yiniwa massitu. 56 Mannu, Yesuusi haꞌriwa baala qachuwate, katammatenna baadiyyete dhiwantinore baala masse dikkote wori; insano uddanosi qacce calla kissara huuccidhusi. Kissinori baaluno dhibbinsanni hurtu.

7 Hakkiinni Yerusaalametenni daggino Farisootinna mite borreessaano mulesi gamba yitu. 2 Insa Yesuusi rosaano giddo mitu battaabbino anganni yaano hayishshidhinokki anganni* sagale ittanna laꞌu. 3 (Farisootunna Ayihudootu baalu albi manni woga seekkite haꞌrunsitanno daafira, anga cigilete geeshsha hayishshidhukkinni sagale diꞌꞌittanno; 4 dikkotenni higganno woyiteno hayishshidhukkinni diꞌꞌittanno. Qoleno insara albi manniwiinni adhite seekkite haꞌrunsitannoti lowo woga noonsa; lawishshaho insa finiincho, maaqqenna camotenni seekkinoonni uduunne wayi giddo cuuꞌanno.) 5 Hakko daafira kuri Farisootinna borreessaano togo yite xaꞌmitusi: “Rosaanokki albi manni woga haꞌrunsa agurte sagale battaabbino anganni ittannohu mayiraati?” 6 Isino togo yiinsa: “Kiꞌne lawisiisaano, Isayyaasi kiꞌne daafira masaalinori garaho; togo yine borreessinoonni: ‘Kuni manni suumensanni ayirrisannoe; wodaninsa kayinni anewiinni lowo geeshsha xeertiꞌrinoho. 7 Mannu wodho rosiissannore ikkitino daafira, ane magansiꞌransa mulla haafaho.’ 8 Maganu hajajo agurtine mannu woga seekkitine haꞌrunsitinanni.”

9 Ledeno togo yiinsa: “Kiꞌne wogaꞌne agadhate yitine Maganu hajajo diigate fullakkinoonnireeti. 10 Lawishshaho, Muse ‘Annakkinna amakki ayirrisi’ hattono ‘Annasi woy amasi xonannoha* shinona’ yiino. 11 Kiꞌne kayinni, ‘Mittu manchi annisira woy amasira “Kiꞌne kaaꞌleemmokki gede nooeri baalu qurbaanete (Maganoho uyinoonni kakkalo yaate)” yiiro,’ 12 hakkunni gedensaanni annisira woy amasira mittoreno assara difajjitinanni. 13 Wolootaho sayissinanni wogaꞌnenni Maganu qaale diigginanni. Woleno togooha lowo coye assitinanni.” 14 Hakkiinni manna galagale isiwa woshshe togo yiinsa: “Baalunku ani coyiꞌreemmore macciishshe; macciishshitinannireno wodanche. 15 Gobbayidinni giddora eꞌꞌe mancho batteessara dandaannohu mittu coyino dino; mancho batteessannohu giddosinni fulannoreeti.” 16* ——

17 Hakkiinni mannuwiinni baxxe minira eita rosaanosi lawishshu tiro xaꞌmitusi. 18 Isino togo yiinsa: “Kiꞌneno insa gede xaano dihuwattinoonni? Gobbayidinni giddora eꞌꞌe mancho batteessara dandaannori mitturino nookkita diaffinoonni? 19 Korkaatuno eannohu wodanisi giddora ikkikkinni godowisi giddoraati; hakkiinni fule bale eanno.” Konni garinni sagale baala fayyo ikkitinota xawise kuli. 20 Isi lede togo yii: “Mancho batteessannohu giddosinni fulannoreeti. 21 Lawishshaho, wodanu giddonni busha hedo fultanno: foorre,* mooru, shoo, 22 soorro, hafuurre, bunshe, doga, mancaꞌꞌa ikkito,* dhiibbe, xono, booꞌnanna gowwimma. 23 Kuni baalunku bushu coyi wodanu giddonni fule mancho batteessanno.”

24 Yesuusi hakkiinni kae Xiroosinna Sidooni qoqqowo haꞌri. Hakkiicho mittu minira ei; mittu manchino isi hakkiicho noota afara dihasiꞌrino; ikkollana isi noowa mannu afi. 25 Bayichonkonni shiima qaaqqose battete ayyaani amadinoti mitte mancho isi daafira macciishshite, dagge lekkasira ubbu. 26 Tini mancho Girikittete; ise Siirofinqete daga mereero heedhannote;* ise qaaqqose amaddino agaaninte fushshannose gede wotto wortusi. 27 Yesuusi kayinni togo yiise: “Oosote sagale haaꞌne buttuꞌleho tuga gara ikkitinokki daafira, balaxxe ooso duubbona.” 28 Ise kayinni togo yite qoltusi: “Mootichaꞌya hattee woyite halaaleho; kayinni buttuꞌluno ooso ittanna giggilinoha xinqiꞌrannowe.” 29 Hatte yannara isi, “Hatto yootta daafira, qaaqqokki amaddino agaaninte fultinona haꞌri” yiise. 30 Konnira ise qaese higgu woyite, qaaqqose agaaninte fulteenna maꞌna goxxe noota affu.

31 Yesuusi Xiroosi qoqqowinni higiti, Sidooni widoonni hige Dikaapolisi* qoqqowo sae Galiilu Baara haꞌri. 32 Hakkiicho mitto macciweelonna babbicha mancho haadhe isiwa abbite, anga aanasi woranno gede huuccidhusi. 33 Isino konne mancho mannuwiinni bade qacce fushshi. Hakkiinni qubbesi lamente manchu maccara wore, anjicho tufihu gedensaanni, arrawosi amammadi. 34 Iima hige laꞌꞌanni lowo geeshsha foolihu gedensaanni, “Efaata” yiisi; hatto yaa “Faꞌnami” yaate. 35 Hakkawoyintenni maccasi faꞌnantu; babbano agure taashshe coyiꞌrannoha ikki. 36 Konne coye mittohono kultannokki gede hajajinsa; insa kayinni hige hige hajajinonsata agurte ledde ledde dudubbu. 37 Lowo geeshsha dhagge assidhino daafira togo yitu: “Assinori baalu danchaho. Wole agurina isi macciweelootu macciishshitanno gede, danqootu coyidhanno gede assanno.”

8 Hatte yannara, galagale lowo manni Yesuusiwa gamba yii; insara ittannori dinonsa. Konnira Yesuusi rosaanosi woshshe togo yiinsa: 2 “Kuni manni ane ledo sase barra keeshshinohuranna itannori noonsakki daafira mararsinoe. 3 Hudiꞌre* heeꞌreenna qaensa haꞌrisummoro, doogo shaqqe uwanno; qoleno insa giddo mitu xeertotenni dagginoreeti.” 4 Rosaanosi kayinni togo yite qoltusi: “Konne baddowa kageeshshi manna duushshitanno daabbo mamiinni abbineemmo?” 5 Hatte yannara isi, “Meꞌꞌe daabbo nooꞌne?” yee xaꞌminsa. Insano, “Lamala” yitu. 6 Isino manna uulla ofollanno gede hajaji. Hakkiinni lamalanta daabbo haaꞌre Magano galatihu gedensaanni, tuqissanno gede hiiqqaqqe rosaanosira uyi; insano mannaho tuqissu. 7 Boode shiimmaadda qulxuꞌme noonsatano maassiꞌre kae, mannaho tuqissanno gede kulinsa. 8 Hakkiinni mannu ite duuweenna gatino haambaa lamala jajjabba gimboola woꞌma gamba assitu. 9 Hakkiicho noohu 4,000 meddi yaanno labballooti. Hakkunni gedensaanni isi manna haꞌrisi.

10 Hakkawoyintenni Yesuusi rosaanosi ledo yowolo gidde, Dalmanuuta yinanni qoqqowo dayi. 11 Hakkiicho Farisootu dagge iso jiffe laꞌara yite, iiminni malaate leellishannonsa gede xaꞌmidhanni isi ledo heewisantu. 12 Yesuusi tennera lowo geeshsha dadille foole tuge foolihu gedensaanni togo yii: “Tini ilama malaate hasidhannohu mayiraati? Halaale yeemmoꞌnena, tenne ilamara horonta malaate dileellinshanni.” 13 Hakkiinni insa agure haꞌre, galagale yowolo gidde baara widoonni sai.

14 Ikkollana insa daabbo adhitukkinni habbe hadhino daafira, yowolote giddo mitte daabbicho agurranna woluri dinonsa. 15 Yesuusino, “Farisootunna Heroodiisi irsho qorophe” yee xawise kulinsa. 16 Insano daabbo adhitinokki daafira, insa insanaawa heewisantu. 17 Yesuusino tenne afe togo yiinsa: “Daabbo adha hoogginoonnihura mayira heewisantinanni? Xaano coyi dileellinoꞌne? Dihuwattinoonni? Wodaniꞌne xaano dillaawe wodancha hoogella no? 18 ‘Ille heedheennaꞌne dilaꞌinanni? Macca heedheennaꞌne dimacciishshitinanni?’ Qulli diyaannoꞌne? 19 Onte tima 5,000 labballira hiiqqaqqe iillishummo woyite, gatino haambaa meꞌꞌe gimboola woꞌmalla kayissini?” Insano, “Tonaalame” yitusi. 20 “Lamala tima 4,000 labballira hiiqqaqqe iillishummo woyite, gatino haambaa meꞌꞌe jajjabba gimboola woꞌmalla kayissini?” Insano, “Lamala” yitusi. 21 Isino, “Xaano dileellinoꞌneyya?” yiinsa.

22 Hakkiinni Beetesaayida daggu. Hakkiicho mannu mitto ille ballino mancho isiwa haaꞌre daye, hursannosi gede huucciꞌri. 23 Yesuusino, ille ballino mancho anga amade haaꞌre qachu gobbaanni fushshi. Isi, manchu illera anjicho xuꞌi yiihu gedensaanni, angasi aanaho wore “Leellannoheri no?” yee xaꞌmisi. 24 Manchuno gotti yee lae, “Mannu leellannoe; ikkollana haꞌrantanni noo haqqe lawanno” yii. 25 Yesuusi xaano angasi manchu ille aana wori; manchuno xunse lai. Illesi faꞌniteenna baalankare lae bada dandii. 26 Konnira Yesuusi mancho, “Qacha martooti” yee minisira haꞌrisi.

27 Yesuusinna rosaanosi Filiphoosi Qiisaariya yinanni qachuwa hadhu; hadhanni doogote heedheenna isi rosaanosi, “Mannu ane ayeti yaanno?” yee xaꞌminsa. 28 Insano “Mitu ‘Cuuaancho Yohaannisiiti,’ mitu ‘Eeliyaasiiti,’ wolootu kayinni ‘Masaalaanote giddonni mittoho’ yitannohe” yitusi. 29 Hakkiinni isi, “Kiꞌne ane ayeti yitinannieyya?” yee xaꞌminsa. Pheexiroosino, “Ati Kiristoosiiti” yee qolisi. 30 Hatte yannara Yesuusi isi ayimma daafira mittohono kultannokki gede duure hajajinsa. 31 Qoleno manchi Beetti lowo qarra adhasi, hattono cimeeyyete, kakkalaanote roorrootinna borreessaanote albaanni mishamasi, qoleno reyasinna sasu barri gedensaanni kaꞌꞌasi gattannokkita rosiisinsa. 32 Isi konne coye xawise kulinsa. Pheexiroosi kayinni, iso bade qacce fushshe seejjisi. 33 Hatte yannara Yesuusi rosaanosi caaqqi yee lae Pheexiroosi, “Sheexaane, badheꞌyaanni sai! Ati mannu hedo ikkinnina Maganu hedo dihedatto” yee ufisi.

34 Hakkiinni Yesuusi manna rosaanosi ledo isiwa woshshe togo yiinsa: “Hoodeꞌya haꞌra hasiꞌrannohu aye manchino umosi kaado; qarru haqqasi* duqqe agurikkinni hoodeꞌya dayo. 35 Heeshshosi* gatisiꞌra hasiꞌrannohu baalu huꞌnanno; aneranna danchu duduwira yee heeshshosi* huꞌnannohu baalu kayinni gatisiꞌranno. 36 Qoleno mittu manchi alame woꞌma isita assiꞌre, heeshshosi huꞌniro kayinni maa kaaꞌlitannosi? 37 Woy mittu manchi heeshshosi* gatisiꞌrate maa aa dandaanno? 38 Tenne fooranna* cubbaataame ilama giddo anenna qaaleꞌya fokkannoha baala, manchi Beettino Annisi ayirrinyinni qullaawa sokkaasine ledo daanno woyite fokkannosi.”

9 Isi lede togo yiinsa: “Halaale yeemmoꞌnena, koye uurritinori giddo mitu, Maganu Gashshooti wolqatenni dayenna laꞌa geeshsha horonta reyo diqamassanno.” 2 Yesuusi lewu barri gedensaanni, Pheexiroosi, Yaaqoobinna Yohaannisi calla haaꞌre mitto seeda ilaala fuli. Hakkiinni albansaanni danisi soorrame wole ikki; 3 uddanosino uullate aana ayino hayishshe fushshe afannokki garinni waajjo qoffe ikkitu. 4 Qoleno Eeliyaasinna Muse leeltunsa; insa Yesuusi ledo hasaabbanni no. 5 Hakkiinni Pheexiroosi Yesuusa togo yii: “Rosiisaancho,* kowiicho heeꞌra ninkera danchate. Hakko daafira sase dunkaana, mitto atera, mitto Musera, mitto Eeliyaasira qanseemmo.” 6 Hige Pheexiroosi yaannori baeennasi gurchaawe no; korkaatuno insa lowo geeshsha waajjitino. 7 Hakkiinni gomichu daye guggushshinsa; gomichu giddonni togo yitanno huuro daggu: “Baxeemmo Beettiꞌya konneeti. Isi yaannota macciishshe.” 8 Hakkiinni insa hedeweelcho kawa kaꞌa laꞌanno woyite, Yesuusa agurranna wolu ledonsa noohu dino.

9 Ilaalunni dirritanni heedheenna, manchi Beetti reyotenni kaꞌꞌa geeshsha laꞌinore mittohono kultannokki gede seekke hajajinsa. 10 Insano yiinonsata wodanaho wodhitu;* ikkollana, ‘Reyotenni kaeemmo yaasi mayyaate?’ yitanni insa insanaawa hasaabbu. 11 Qoleno insa, “Borreessaano balaxe Eeliyaasi daa hasiissannosi yitannohu mayiraatiyya?” yite xaꞌmitusi. 12 Isino togo yiinsa: “Balaxe Eeliyaasi daye baalankare albiwa qolanno; ikkollana manchi Beetti lowo qarra adha hasiissannositanna gimbannisita borreessinoonnihu mayira lawannoꞌne? 13 Ani kayinni yeemmoꞌnena, isi daafira borreessinoonni garinni, Eeliyaasi daate woyite dayino; insa kayinni baxxuta assidhinosi.”

14 Insa teꞌee rosaanowa dagganno woyite, lowo manni doyisse noonsata affu; borreessaanono insa ledo heewisantanni no. 15 Ikkollana hakko noo manni baalu Yesuusa laꞌꞌanni heeꞌrenni dhagge assiꞌri; hakkiinni iso keere haaꞌrara dodanni mari. 16 Yesuusino, “Insa ledo heewisantinannihu mayi daafiraati?” yee xaꞌminsa. 17 Gamba yiino manni giddonni mittu togo yee qolisi: “Rosiisaancho, qaaqqoꞌya danqisanno ayyaani amadeenna atewa abbiꞌroommo. 18 Kaꞌꞌannosi woyite uulla tugannosi; hakkiinni haambiishshannosi; qoleno hinko quruuxanno hattono quubbi yaanno; rosaanokki fushshitannosi gede kuꞌloommo; insa kayinni fushsha didandiitino.” 19 Yesuusi kayinni togo yee qoli: “Ammana nooꞌnekki ilama, kiꞌne ledo mageeshshi geeshsha keeshsha hasiissaeraati? Kiꞌne cince heeꞌreemmohu mageeshshi geeshshaati? Hanni beetto anewa abbe.” 20 Insano beetto isiwa massitu; beetto amadino ayyaani Yesuusa laiti, hakkawoyintenni iso uulla tuge fittifachishi; beettuno uulla uwihu gedensaanni haambaanni gongoꞌmi. 21 Hakkiinni Yesuusi beettu anna, “Togo assannasi mageeshshi yanna ikki?” yee xaꞌmi. Isino togo yee qoli: “Anjesinni kayiseeti; 22 shaasira duucha woyite giiratenna wayi giddo tugannosi. Assa dandaattori nooro mararte kaaꞌlinke.” 23 Yesuusino, “Dandaattori nooro yiitto? Ammana noosihura baalunku coyi dandaamannosi” yiisi. 24 Beettu annino hakkawoyintenni qoonqosi naggi asse, “Ammana nooena, ammanaꞌya kaajjitanno gede ati kaaꞌlie!” yii.

25 Yesuusi, mannu dodanni insawa timbiliqqi yee daanni nootta laiti battete ayyaana togo yee ufi: “Ati danqichunna macciweelu ayyaani, isiwiinni fulatto gedenna galagalte eattokki gede hajajeemmohe!” 26 Battete ayyaani raarihunna beetto lowo geeshsha fittifachishihu gedensaanni fuli; beettuno reyinohu gede ikki; hakko daafira rooru manni “Reyino!” yii. 27 Ikkollana Yesuusi beetto anga amade kayisi; beettuno kae uurri. 28 Yesuusi minira eihu gedensaanni callisi heeꞌreenna rosaanosi, “Ninke fushsha hoongoommohu mayiraati?” yite xaꞌmitusi. 29 Isino, “Togoohu huuccattotenni ikkinnina difulannoho” yiinsa.

30 Hakkiinni kaꞌe Galiilu widoonni higge saꞌu; isi kayinni tenne mittu manchino afara dihasiꞌrino. 31 Korkaatuno isi rosaanosi rosiisa hasiꞌrino. Togo yee kulinsa: “Manchi Beetto mannu angara sayinse uyinanni; insano shitannosi; isi kayinni shinisirono sayikki barra kaꞌꞌanno.” 32 Ikkollana insara coyiꞌrinori dileellinonsa; xaꞌmitannokki gede kayinni waajjitino.

33 Hakkiinni Qifirinaahoomi daggu; mine heedheenna Yesuusi rosaanosi, “Wona doogote heewisantinannihu mayi daafiraati?” yee xaꞌminsa. 34 Doogote insa insanaawa, “Ninke giddo roorannohu ayeti?” yitanni heewisantino daafira sammi yitu. 35 Yesuusino ofollihu gedensaanni Tonaalamenka woshshe, “Umiha ikka hasiꞌrannohu baalu woꞌmunkura gedensiidihanna baalunkura soqqamaancho ikka hasiissannosi” yiinsa. 36 Hakkiinni isi shiima qaaqqo haaꞌre mereeronsa uurrisi; qaaqqo hanqafe togo yiinsa: 37 “Togoo qaaqquulli giddo mitto suꞌmiꞌyanni haaꞌrannohu baalu aneno haaꞌranno; ane haaꞌrannohu baaluno ane calla ikkikkinni soyinoehano haaꞌranno.”

38 Yohaannisi togo yiisi: “Rosiisaancho, mittu manchi suꞌmikkinni agaaninte fushshanna anfe, ninke ledoha ikkinokki daafira hoolate woꞌnaalloommo.” 39 Yesuusi kayinni togo yii: “Suꞌmiꞌyanni maalale loose kae, bayichonkonni ane daafira busha coye coyiꞌra dandaannohu dinona hooltinoonte. 40 Korkaatuno gibbannonkekkiri baalu ninke widooti. 41 Halaale kuleemmoꞌnena, Kiristoosire ikkitinoonni daafira mitte birciqqo agginanni waa aannoꞌnehu baalu baꞌraaꞌra adhikkinni horo digatanno. 42 Ikkollana ammana noonsari kuri shiimaaddu giddonni mittoho guficho ikkannohu baalu, goowaho jawa daamma* usudhe baaru giddo bairo woyyannosi.

43 “Angakki guficho ikkituhero murte huni. Lame anga heedheennahe giira xoꞌara dandiitannokkiwa Gaannaamete* tugamattonte, kotticha ikkite heeshsho afiꞌrittoro woyyannohe. 44* —— 45 Lekkakki guficho ikkituhero murte huni. Lame lekka heedheennahe Gaannaame* eattonte naaficha ikkite heeshsho afiꞌrittoro woyyannohe. 46* —— 47 Qoleno illekki guficho ikkituhero fushshite huni. Lame ille heedheennahe Gaannaamete* tugamattonte, mitte illeha ikkite Maganu Gashshoote eittoro woyyannohe. 48 Hakkiicho daꞌmuulchu direyanno; giirano dixoꞌanno.

49 Mittu manchi sagalete aana maxine giggishshannonte gede, Maganuno togoo manni aana giira dirrisanno. 50 Maxine danchate. Ikkirono maxine nyammo baꞌuro, galagalte nyammo afidhanno gede hiissitine assa dandiitinanni? Heeshshoꞌne maxine noota ikkito; mimmitu ledono keere heedhe.”

10 Yesuusi hakkiinni kae Yordaanoosira widoonni noota Yihudu dannuwa dayi; xaano lowo manni isiwa gamba yii. Isino bashshonte gede xaano rosiisinsa. 2 Farisootu jiffe laꞌasira yite isiwa shiqqe, mittu manchi galtesi fushshe haꞌrisara seeru fajjannoronna teꞌee xaꞌmitusi. 3 Isino qole, “Muse mayyeella hajajinoꞌne?” yiinsa. 4 Insano, “Muse fushshe haꞌrisate woraqata borreesse fushshe haꞌrisara fajjino” yitu. 5 Yesuusi kayinni togo yiinsa: “Muse tenne hajajo borreessinoꞌnehu wodaniꞌne kakkachinota laeeti. 6 Ikkollana kalaqamu hanafora ‘Maganu labbaahanna meyata asse kalaqinonsa. 7 Konni daafira, manchu annasinna amasi aguranno; 8 lamunku mitto maala ikkanno’; konnira, insa xaate mitto maalaati ikkinnina lame diꞌꞌikkino. 9 Hakko daafira, Maganu waaxinore mittu manchino badoonke.” 10 Galagalte minira eꞌuta rosaanosi konni coyi daafira xaꞌmitusi. 11 Isino togo yiinsa: “Galtesi fushshe haꞌrise wole adhannohu baalu, soorre galtesi miicinoho; 12 minaannase agurte woleho assidhanno manchono soorritinote.”

13 Anga aanaho worannonsa gede mannu shiimmaadda qaaqquulle haaꞌre isiwa dayi; rosaanosi kayinni uffunsa. 14 Yesuusi tenne laiti insa hanqe togo yiinsa: “Qaaqquullu anewa daggona hooltinoonte; Maganu Gashshooti insa gedee mannihona. 15 Halaale yeemmoꞌnena, Maganu Gashshoote qaaqqu gede ikke adhannokkihu baalu konne Gashshoote horonta dieanno.” 16 Hakkiinni qaaqquulle hanqafe angasi aanansa wore maassiꞌrinsa.

17 Mininni fule haꞌranni heeꞌreenna, mittu manchi dodanni daye albasiinni guluphe, “Dancha Rosiisaancho, hegere heeshsho ragiꞌrate maa assa hasiissannoe?” yee xaꞌmisi. 18 Yesuusino togo yiisi: “Mayira dancha yaattoe? Mitto Magano agurranna danchu dino. 19 ‘Shitooti, soorritooti, moortooti, kapho farcidhooti, hanaaqqooti, annakkinna amakki ayirrisi’ yitanno hajajo diafootto?” 20 Manchuno “Rosiisaancho, tenne hajajo baala anjeꞌyanni kayise agadhe heeꞌroommo” yiisi. 21 Yesuusi konne mancho lae baxisi; hakkiinni togo yiisi: “Mittu coyi xeinohe: Hadhe noohere hirte woxe buxanete uyi; iima jiro afiꞌrattona; hakkiinni dagge haꞌrunsie.” 22 Manchu kayinni konne coye macciishshiti dihisatino; lowo jiro noosi daafira dadillanni haꞌri.

23 Yesuusi kawa kaꞌa laihu gedensaanni rosaanosi togo yiinsa: “Woxe afidhinorira Maganu Gashshoote ea lowo geeshsha qarraho!” 24 Rosaanosira kayinni coyiꞌrinori dhagge ikkinsa. Hakkiinni Yesuusi togo yiinsa: “Oosoꞌya, Maganu Gashshoote ea lowo geeshsha qarraho! 25 Dureessu manchi Maganu Gashshoote eantenni, gaalu marfete xullo giddoonni lulluqqa roore shotate.” 26 Xaano insa wonanni roore dhagge assidhe, “Hatto ikkiro ayi gatannoyya?” yitusi.* 27 Yesuusino insa seekke laꞌꞌanni togo yiinsa: “Kuni mannaho dandaamannokkireeti; Maganoho kayinni baalunku coyi dandaamanno.” 28 Hakkiinni Pheexiroosi, “Kuneeti ninke baalankare agurre hoodekki haꞌnanni heeꞌnoommo” yiisi. 29 Yesuusino togo yii: “Halaale yeemmoꞌnena, aneranna danchu duduwira yee labballo roduuwa woy meya roduuwa woy ama woy anna woy ooso woy gate agurannohu baalu, 30 xa tenne yannara dartu ledo mine, labballo roduuwa, meya roduuwa, amuuwa, oosonna gate 100 ero afiꞌranno; dagganno alamera* qole hegere heeshsho afiꞌranno. 31 Ikkollana, lowohu albiidi manni gedensiidiha, gedensiidihu kayinni albiidiha ikkanno.”

32 Yerusaalame massitanno doogora hadhanni heedheenna, Yesuusi albansaanni haꞌranni no; rosaanosino maalaꞌlitu; hoodensa haꞌranni noo manni kayinni waajji. Xaano Tonaalamenka bade qacce fushshe muli yannara isi aana ikkannore kulanni togo yiinsa: 33 “Kuneeti Yerusaalame haꞌnanni heeꞌnoommo; manchi Beetto kakkalaanote roorrootinna borreessaanote angara sayinse uyinanni. Insano shinannisi gede yoo yitanno; qoleno dagate sayisse uyitannosi; 34 insano qacifattannosi, anja tuffannosi, halangetenni gantannosi, hattono shitannosi; isi kayinni sayikki barra kaꞌꞌanno.”

35 Zebidewoosi ooso Yaaqoobinna Yohaannisi isiwa shiqqe, “Rosiisaancho, xaꞌmiꞌneemmohere baala assattonkera hasiꞌneemmo” yitusi. 36 Isino, “Maa assammoꞌnera hasidhinanni?” yiinsa. 37 Insano, “Ayirrado bayichokki ofollatto woyite, mittu qiniitekkiinni mittu gurakkiinni ofollineemmo gede fajjinke” yite qoltu. 38 Yesuusi kayinni togo yiinsa: “Huuccidhinannire diegentinoonni. Ani aganni noommo finiinchinni aga woy ani cuuamanni noommo cuuama cuuama dandiitinanni?” 39 Insano, “Ee dandiineemmo” yitusi. Hatte yannara Yesuusi togo yiinsa: “Ani aganni noommo finiincho agginanni; ani cuuamanni noommo cuuamano cuuantinanni. 40 Ikkollana, qiniiteꞌyaanni woy guraꞌyaanni ofollinanni gede asseemmohu ane diꞌꞌikkoommo; konne darga ofoltannore doorannohu Maganoho.”

41 Gattinori tonnu tenne macciishshituti, Yaaqoobiranna Yohaannisira hanqitu. 42 Yesuusi kayinni insa isiwa woshshe togo yiinsa: “Dagate gashshaasine* manninsara mootooꞌmitannota, roorrootinsano kadde gashshitannonsata affinoonni. 43 Kiꞌne mereero kayinni hattoo coyi dihasiisanno; mereeroꞌne rooriidiha ikka hasiꞌrannohu baalu soqqamaanchoꞌne ikka hasiissannosi; 44 mereeroꞌne albiidiha ikka hasiꞌrannohu baaluno, woꞌmunkura borojjicho ikka hasiissannosi. 45 Korkaatuno, manchi Beetti nafa dayinohu soqqamaranna heeshshosi* lowo mannira wodo asse aaraati ikkinnina soqqammasira diꞌꞌikkino.”

46 Hakkiinni Iyyaarko daggu. Isinna rosaanosi lowo manni ledo Iyyaarkotenni fulte hadhanni heedheenna ille ballinohu Xemewoosi beetti Berxemewoosi doogote qaccera ofolle huucciꞌranni no. 47 Isi Naaziretete Yesuusi hakkaanni hige saꞌꞌanni noota macciishshe, “Daawiti Beetto Yesuusa, mararie!”* yee cance coyiꞌri. 48 Hatte yannara lowo manni sammi yaanno gede ufisi; manchu kayinni “Daawiti Beetto, mararie!”* yaanni wonanni roorse canci. 49 Konnira Yesuusi uurre “Anewa woshshe” yiinsa. Insano ballicha mancho woshshite, “Waajjitooti! Woshshanni noohena kai” yitusi. 50 Manchuno aanaanni uddiꞌre noo uddano tuge agure handuruffi yee kae Yesuusiwa mari. 51 Yesuusino, “Maa assammohera hasiꞌratto?” yiisi. Ille ballino manchino, “Rosiisaancho,* galagale laꞌꞌa dandeemmo gede assie” yiisi. 52 Yesuusino, “Ammanakki hursitinohena haꞌri” yiisi. Manchuno hakkawoyintenni ille faꞌniteennasi galagale lai; hakkiinni mannu ledo Yesuusi hoode haꞌri.

11 Yerusaalame iilla rakkuti, Beetefaagenna Biitaaniyu qachi nooha Ejedhete Ilaala martu; hakko heedheenna rosaanosi giddonni lame togo yee soyi: 2 “Kooee laꞌinanni qacha marre; hakkiicho martinanni heedhinenni, mittu manchino gulufe egenninokkita usurante noo darmicho affinannina tirtine kawira abbe. 3 Aye manchino, ‘Mayira assitinanni?’ yiiꞌnero, ‘Mootichu hasiꞌrino daafiraati; isi mulenni qole soyanno’ yiiyye.” 4 Hakkiinni insa marte, darmicho mittu minira nafara doogote qaccera usurante noota affe tirtu. 5 Hakkiicho uurre noo manni giddo mitu kayinni, “Darmicho mayira tirtinanni heedhinoonni?” yiinsa. 6 Insano Yesuusi yiinota kulteenna agurtunsa.

7 Hakkiinni darmicho Yesuusiwa abbitu; uddannansa darmichote aana worteenna isi aanaho ofolli. 8 Qoleno lowo manni uddannansa doogote kari; wolootu kayinni doogote qaccenni daraame sinna murmurte abbite kartu. 9 Albasiinninna badhesiinni haꞌranni noo manni togo yaanni qeexaaꞌli: “Gatisattosi gede huucciꞌneemmohe!* Yihowa* suꞌminni daannohu maassaminoho! 10 Daanni noohu anninke Daawiti Gashshooti maassaminoho! Iima heeꞌrattohu, gatisattosi gede huucciꞌneemmohe!” 11 Yesuusi Yerusaalame iilli; hakkiinni qullaawa mine eꞌꞌe baalanka coye lai; ikkollana, yanna yannitino daafira Tonaalamunku ledo Biitaaniya haꞌri.

12 Layinki barra Biitaaniyunni fulte hadhanni heedheenna Yesuusi hudiꞌri. 13 Xeertote heeꞌre daro lattinota balasete haqqicho lai; aanase laalo afiꞌrammokka yee hatte haqqichowa mari; ikkollana, shiqqi yee laꞌꞌanno woyite balase laaltanno yanna ikkitinokkihura daro agurranna aanase mitto gumano diafiꞌrino. 14 Konnira isi hattee haqqicho, “Layinkita laalokki mittuno itoonke” yii. Hatto yii woyite rosaanosi macciishshitanni no.

15 Hakkiinni Yerusaalame daggu. Isi hakkiicho qullaawa mine eꞌꞌe, qullaawu mini giddo hirtanninna hidhitanni noore fushshe shorri; woxe soorritannori xarapheeyyenna lemboola hirtannori wombarrano galche uullate gani; 16 mittu manchino uduunne duqqe qullaawu mini widoonni tayise saꞌꞌannota hooli. 17 Qoleno manna togo yaanni rosiisi: “‘Miniꞌya daga baalate huuccattote mine ikkanno’ yine diborreessinoonni? Kiꞌne kayinni mulqiꞌraanote goda assitinoonni.” 18 Kakkalaanote roorrootinna borreessaano tenne macciishshite, iso shitanno gara hasidhu; korkaatuno, mannu isi rosiisino roso dhagge assiꞌrino daafira insa Yesuusa waajjitino.

19 Yanna hawarrituta katamunni fulte hadhu. 20 Ikkollana soodo guto doogo saꞌanni heedhe balasete haqqicho rumushshunku mooltinota laꞌu. 21 Pheexiroosira qulli yeennasi, “Rosiisaancho lai! Rumittoti balasete haqqicho mooltuwe” yiisi. 22 Yesuusino qole togo yiinsa: “Magano ammanne. 23 Halaale yeemmoꞌnena, aye manchino konne ilaala ‘Kawiinni kaꞌe baaru giddo uwi’ yiironna, wodanisinni huluullamikkinni coyiꞌrinori woꞌmannota ammaniro, yiino gede ikkannosi. 24 Hakko daafira, huuccidhinannire baala afidhinoonnihu gede assitine ammanne; qoleno afidhinanni. 25 Huuccatto assidhinara uurritinanni woyite, iima heeꞌranno Anniꞌne saoꞌne aguranno gede, kiꞌneno aye manchino koffi assinoꞌnere baala agurre.” 26* ——

27 Insa galagalte Yerusaalame daggu. Isi qullaawu mini giddo haꞌramanni heeꞌreenna kakkalaanote roorrooti, borreessaanonna cimeeyye dagge 28 togo yitusi: “Konne coye assattohu mayi silxaanenniiti? Woy konne coye assatto gede tenne silxaane uyinohehu ayeti?” 29 Yesuusino togo yiinsa: “Mitte xaꞌmo xaꞌmeemmoꞌne. Qoltiniero, anino konne coye asseemmohu mayi silxaanenniitiro kuleemmoꞌne. 30 Yohaannisi manna cuuate silxaane afiꞌrinohu gordunniitinso mannuwiinniiti? Hanni qolleꞌꞌe.” 31 Konnira insa togo yitanni insa insanaawa hasaabbu: “Gordunniiti yinummoro, ‘Iso mayira ammana gibbiniyya?’ yaannonke. 32 Waajja agurre ‘Mannuwiinniiti’ yinokka?” Ikkollana, mannu baalu Yohaannisi masaalaanchu gede asse laꞌꞌanno daafira manna waajjitu. 33 Konnira insa Yesuusira, “Dianfoommo” yite qoltu. Yesuusino, “Anino konne coye asseemmohu mayi silxaanenniitiro dikuleemmoꞌne” yiinsa.

12 Hakkiinni Yesuusi togo yee lawishshunni kulinsa: “Mittu manchi woyinete kaashsho kaasiꞌri; hatte woyine gaangeesse huxxa huxxi; hakkiicho woyine huuncinanni darga ume qixxeessi; hattono agarranni shae seekki; hakkiinni gate loossannorira guto oye wole gobba haꞌri. 2 Woyinete laalo gamba assinanni yanna iillituta, qeechasi abbanno gede mitto borojjicho gate loossannoriwa soyi. 3 Ikkollana insa borojjicho amadde gantuhu gedensaanni, mulla anganni haꞌrissu. 4 Tenne isi, insawa wole borojjicho soyi; insano iso gante umo facce shollishshu. 5 Xaano lede soyinoha shitu; hattono wole lowo manna soyenna mito gantu, mito shitu. 6 Xa gatinohu baxanno beettosiiti. Jeefote, ‘Beettoꞌya ayirrissanno’ yee iso insawa soyi. 7 Ikkollana gatu loosaasine insa insanaawa, ‘Ragiꞌrannohu konneeti. Ragge ninketa ikkitanno gede amme iso shinona’ yitu. 8 Konnira insa amadde shite woyinete irshi giddonni fushshite tuggu. 9 Woyinete irshi anni massannoha lawannoꞌne? 10 Qullaawa Borro giddo togo yaannoha horonta dinabbabbinoonni? ‘Mine mintannori mishshe agurtino kinchi, qara dhaawate kincho ikkino. 11 Kuni kinchi dayinohu Yihowawiinniiti;* illenkerano maalalete.’”

12 Hatte yannara, lawishsha coyiꞌrinohu insa hede ikkinota affe amaddasira* hasidhu; ikkollana, manna waajjitino daafira agurte hadhu.

13 Hakkiinni, coyiꞌranno coyinni amaddasira yite mito Farisootanna Heroodiisi manna isiwa sokku. 14 Kuni manni isiwa mare togo yii: “Rosiisaancho, ati halaalaancho ikkoottota, mannu naadahera yite mittoreno assattokkita, manna aana laꞌe mallaadattokkitanna Maganu doogo halaalunni rosiisattota anfoommo. Ikkina, Qeesaarira giwire aa hasiissannonso dihasiissanno?* 15 Uyinonso agurro?” Yesuusino giddonsa bunshe afe togo yiinsa: “Mayira jiffinannie? Hanni mitte diinaare* abbitine leellishsheꞌꞌe.” 16 Insano abbitu; isino, “Tenne saante aana noo misile ayete? Aanaho borreessinoonni suꞌmino ayeho?” yiinsa. Insano, “Qeesaariho” yitu. 17 Hakkiinni Yesuusi, “Qeesaariha Qeesaarira, Maganunniha Maganoho uyiyye” yiinsa. Insano coyiꞌrinore dhagge assidhu.

18 Kao noota ammantannokki Saduqooti dagge togo yite xaꞌmitusi: 19 “Rosiisaancho, Muse mittu manchi ooso ilikkinni reyiro rodiisi minaamasi ragiꞌre rodiisira sircho sayisa hasiissannosita borreessinonke. 20 Mitto mine lamalu roduuwi no. Insa giddo bayiriidihu seenne adhe ooso kayinni ilikkinni reyi. 21 Layinkihuno, hatte mancho ragiꞌre ooso ilikkinni reyi; sayikkihuno hattonni ikkino. 22 Lamalunku sircho saꞌukkinni reyitu; insa baalu reyituhu gedensaanni manchono reyitu. 23 Ise lamalunku adhitino daafira, reyotenni kaꞌnanni woyite hiikkunnita ikkitanno?” 24 Yesuusi togo yiinsa: “Kiꞌne sodhinoonnihu Qullaawa Borrono Maganu wolqano affinoonnikki daafira diꞌꞌikkino? 25 Korkaatuno, reyotenni kaꞌnanni woyite labballu diadhitanno, seennuno mine diassiꞌranno; insa iimi sokkaasine gede ikkanno. 26 Reyotenni kaꞌꞌate daafira kayinni, Muse maxaafi giddo citu daafira kultanno xaggera Maganu Muse, ‘Ani Abirihaami Maganooti, Yisaaqi Maganootinna Yaaqoobi Maganooti’ yiinota dinabbabbinoonni? 27 Isi noori Maganooti ikkinnina reyitinori Magano diꞌꞌikkino. Kiꞌne lowo geeshsha sodhinoonni.”

28 Borreessaanote giddonni mittu daye heewisantanna macciishshanni no; isi, Yesuusi dancha dawaro qolinonsata afe, “Hajajo baalate giddo umiti* hiittenneeti?” yee xaꞌmisi. 29 Yesuusi togo yee qoli: “Umi hajajo togo yitannote: ‘Israeeli macciishshi; Maganinke Yihowa* mitto Yihowaati;* 30 Maganokki Yihowa* woꞌmu wodanikkinni, woꞌma lubbokkinni,* woꞌma hedokkinninna* woꞌma wolqakkinni baxi.’ 31 Layinki hajajo, ‘Olliichokki* umikki gede assite baxi’ yitannote. Kuri roortannoti wole hajajo dino.” 32 Borreessaanchuno togo yiisi: “Rosiisaancho, coyiꞌroottori halaaleho; ‘Isi mittoho; iso agurranna wolu Magani dino’; 33 iso woꞌmu wodaninni, woꞌma hedonninna woꞌma wolqanni baxa, hattono olliicho meessi gede assine baxa, woꞌmunni woꞌma shilqinshe shiqinshanni kakkalonna wole kakkalo baala lowo geeshsha roorete.” 34 Hatte yannara Yesuusi kuni manchi wodanchatenni qolinota lae togo yiisi: “Ati Maganu Gashshootiwiinni dixeertiꞌroottoho.” Hakkunni gedensaanni kayinni, worbe Yesuusa xaꞌmo xaꞌminohu dino.

35 Ikkollana, Yesuusi qullaawu mini giddo rosiisanni heeꞌre togo yii: “Borreessaano, ‘Kiristoosi Daawiti beettooti’ hiitto yitanno? 36 Daawiti umisi qullaawu ayyaaninni, ‘Yihowa* Mootichiꞌyara, “Diinnakki lekkakkira woroonni qolammo geeshsha qiniiteꞌyaanni ofolli” yiinosi’ yee coyiꞌrino. 37 Daawiti umisi Mootichaꞌya yiisina, Kiristoosi hiitto beettosi ikkannoyya?”

Hakkawoyite isi coyiꞌrannore lowo manni hagiidhe macciishshanni no. 38 Hakkiinni rosiisanni heeꞌre togo yii: “Borreessaano qorophe; insa seeda uddano uddidhe dowanna gudumaaleho* mannu ayirrise keere haaꞌransara hasidhanno; 39 xaadu minnara albaanni* ofollanna jilu mine ayirrado darga ofolla baxxanno. 40 Gunnootu mine* mulqitanno; hattono leellamate yite huuccatto seedissanno. Insa wolu manninni roore qorichishantanno.”

41 Isi woxe tunganni saaxinera* dhaawate ofolle lowo manni saaxinete woxe tuganno gara lai; batinye dureeyyeno lowo saante tugganni no. 42 Hatte yannara mitte buxicho gunnitte mancho dagge, shiima waaga afidhinota lame shiimmaadda saante* tuggu. 43 Yesuusino rosaanosi isiwa woshshe togo yiinsa: “Halaale yeemmoꞌnena, tini buxicho gunnitte woxe tunganni saaxinera woxe tugi manni baalunkunni roorsite uyitino. 44 Korkaatuno, wolu manni baalu ikke gatinonsahu aaninni uyino; ise kayinni buxxe heedhenni noosere baala mittoreno gatisidhukkinni tayisse uyitino.”

13 Yesuusi qullaawu mininni fule haꞌranni heeꞌreenna rosaanosi giddonni mittu, “Rosiisaancho, tini kinnanna qullaawu mini gudisiꞌre hiitto biifinoro lai!” yiisi. 2 Yesuusi kayinni togo yiisi: “Tenne hoola yinoonni kinna laitto? Kinchu kinchu aana togo ikke duunamino gedeenni diigamikkinni horo diheeꞌranno.”

3 Yesuusi qullaawu mini leellannowa Ejedhete Ilaalira ofolle heeꞌreenna, Pheexiroosi, Yaaqoobi, Yohaannisinna Indiriyaasi calluwinsa isiwa dagge togo yite xaꞌmitusi: 4 “Hanni kulinke, kuni coyi ikkannohu mamarooti? Kuni coyi baalu gumulamara kainota leellishanno malaati maati?” 5 Yesuusino togo yee kulinsa: “Mittuno soꞌrisiisannoꞌnekki gede qorophe. 6 Batinyu manni, ‘Ani isooti’ yaanni suꞌmiꞌyanni daanno; lowo mannano soꞌrisiisanno. 7 Qoleno, olu luulonna olu duduwo macciishshitinanni woyite massinoonte; kuni coyi ikkikkinni digatannoho; goofimarchu kayinni albillittete.

8 “Daga dagate aana, gashshootuno gashshootu aana ola kayisanno; addi addi darga baatto huxidhanno; qoleno hude ubbanno. Tini coyibba ilate game gede qarraho hanafote.

9 “Kiꞌne kayinni qorophe. Mannu yoote minira sayise aannoꞌne; xaadu minnarano gannanniꞌne; qoleno ane daafira yitineenna gashshaanotenna mootoollate albira shiqishshannoꞌne; hakkiicho insara farcidhinanni. 10 Qoleno, balanxe daga baalate dancha duduwo duduwa hasiissanno. 11 Sayisse uyitaꞌnera haadhe hadhannoꞌne woyite, maa coyiꞌneemmo yitine balaxxine yaaddinoonte; ikkollana, hattee saatera kullanniꞌnere coyidhe; korkaatuno, coyiꞌrannohu qullaawa ayyaanaati ikkinnina kiꞌne diꞌꞌikkitinoonni. 12 Qoleno roduu rodoosi, annu beettosi reyote sayise aanno; ooso anninsaranna amansara finqiltanno; hattono shiishiishshannonsa. 13 Suꞌmiꞌyara yitineenna mannu baalu giwannoꞌne. Goofimarchu geeshsha kaajje uurrinohu* kayinni gatanno.

14 “Ikkollana, bao abbannohu battete coyi uurra hasiissannokki darga uurre nooha laꞌinanni woyite, nabbawannohu wodancho; hatte yannara Yihudaho noori ilaallate widira higge xooqqo. 15 Mineho iimaanni noo manchi dirroonke; mittoreno adhara minisira eoonke. 16 Gate noo manchi uddano adhara badhera higoonke. 17 Hatte yannara godowinni noo meentiranna qansiꞌranni noorira aanneꞌe! 18 Kuni coyi hawado ikkannokki gede woꞌmanka woyite huuccidhe. 19 Korkaatuno, hatte yannara Maganu kalaqino kalaqaminni kayise hatte yanna geeshsha daye egenninokkihu, layinkimeeshshono daannokki qarri daanno. 20 Isinni, Yihowa* barruwa haransa hoogoommero mittu manchino* digatanno. Ikkollana, isi doodhinorira yee hattee barruwa haransino.

21 “Hatte yannara aye manchino, ‘Kuneeti Kiristoosi kowiicho no’ woy ‘Kooiicho no’ yiiꞌnero ammantinoonte. 22 Korkaatuno, kaphaano Kiristoosootinna kaphu masaalaano kaꞌanno; insa dandiituro doorantinore nafa soꞌrisiissara lowo maalalenna xagge leellishshanno. 23 Konnira kiꞌne qorophe. Baalankare balaxe kuloommoꞌne.

24 “Ikkollana hatte barruwara, hakko qarri gedensaanni arrishsho tunsitanno; aganuno dixawanno; 25 beeddaheno gordunni giggiltanno; iima noorino shafamanno.* 26 Qoleno hatte yannara manchi Beetti lowo wolqanninna lowo ayirrinyinni gomichunni daanna laꞌanno. 27 Isi sokkaasine soye shoolunku raginni, baattote qasiꞌronni gordu qasiꞌro geeshsha isira doorantinore gamba assanno.

28 “Balasete haqqichonni konne lawishsha rosse: Sinnase ciirtannonna darose lattanno woyite arru* rahinota affinanni. 29 Kiꞌneno konne coye baala laꞌinanni woyite, manchi Beetti shiqe waalchoho noota affe. 30 Halaale yeemmoꞌnena, kuni coyi baalu woꞌma geeshsha tini ilama horonta disaꞌanno. 31 Iiminna uulla saꞌꞌanno; qaaliꞌya kayinni horonta disaꞌꞌanno.

32 “Hakkonne barra woy hattenne saate Anna agurranna gordu sokkaasineno ikkito, Beettono ikko, woy wolu mittuno afinohu dino. 33 Dinyinoonni yanna mamooteetiro affinoonnikki daafira, aye woyiteno ille wortine laꞌe; woꞌmanka woyite baqqi yitine agadhe. 34 Kuni coyi, borojjootisira silxaane uyihu gedensaanni, mittu mittunkura looso oye kae waalcho agarannohu baqqi yee agaranno gede hajaje minesi agure wole gobba haꞌrino manchi gedeeti. 35 Konni daafira, qaete anni hawarro woy hashshu taalootira woy duuꞌmo saaqqara* albaanni woy soodo guto daannoro affinoonnikki daafira woꞌmanka woyite baqqi yitine agadhe. 36 Hakkunni kaꞌa, isi hedeweelcho daanno woyite goxxine heedhinoonnire afannoꞌne. 37 Ikkollana, kiꞌnera kuleemmore baalunkura kuleemmo: Woꞌmanka woyite baqqi yitine agadhe.”

14 Faasikunna Timu Ayyaanira* lamu barri gate no. Kakkalaanote roorrootinna borreessaano iso amaddannonna* shitanno faro hasidhanni gano gantanni no. 2 Ikkollana, “Mannu cancamara dandaanno daafira, iso ayyaanu yannara amandoonke” yitu.

3 Yesuusi Biitaaniyaho Simooni yinannihu dhiigu dhibbi amadinosi manchi mine sagale itanni heeꞌreenna, mitte mancho lowo woxita naardoosi yinannita kaajja shitto* albaasxiroosi yinanni gujuujjera haadhe daggu. Ise gujuujjete goowa hiiqqite fante, shitto Yesuusi umira duntu. 4 Mitootu tennera hanqite mimmito togo yitu: “Hanni tenne shitto mulla mayira hunnanni heeꞌnoonni? 5 Tenne shitto 300 saꞌanno diinaarera* hirre woxe buxanete uyinoommero hanni mayi no!” Qoleno insa manchote lowo geeshsha hanqitu.* 6 Yesuusi kayinni togo yii: “Agurrese. Mayira qarrissinannise? Ise anera dancha coye assitino. 7 Buxane woꞌmanka woyite ledoꞌne heedhanno daafira, baxxini woyite insara danchare assa dandiitinanni; ani kayinni woꞌmanka woyite kiꞌne ledo diheeꞌreemmo. 8 Ise dandiitannore assitino; ane waammate qixxeessate bisiꞌyara balaxxe shitto duntino. 9 Halaale yeemmoꞌnena, dancha duduwo alame woꞌmate dudumbanniwa baalankawa, tini mancho assitinorino ise qaaggora kullanna heeꞌranno.”

10 Tonaalamu giddonni mittu, Asqorootu Yihudi, Yesuusa insara sayise aara kakkalaanote roorrootiwa mari. 11 Insa tenne macciishshituti lowo geeshsha hagiidhite woxe* uyitasira qaale eꞌu. Konnira isi, Yesuusa sayise aanno injo hasiꞌra hanafi.

12 Timu Ayyaanira* umi barra, rosamino garinni Faasiku kakkalo shiqinshanni yannara rosaanosi togo yitusi: “Faasiku hurbaate haꞌne mama qixxeessinammohera hasiꞌratto?” 13 Isino rosaanosi giddonni lame togo yee soyi: “Katama hadhine, hakko wayi gambayicho duhino mancho xaaddinannina hoodesi hadhe. 14 Manchu eannowa eꞌine minu anna, ‘Rosiisaanchu, “Rosaanoꞌya ledo Faasiku hurbaate iteemmoti wosinu kifile hiikkiicho no?” yiino’ yiiyye. 15 Isino, minu aana minnoonni minira karre qixxeessinoonnita halaꞌlado kifile leellishannoꞌne. Faasiku hurbaate hakko qixxeessenke.” 16 Rosaanosino hadhe katama iillituti, baalunku coyi Yesuusi yiinonsa gede ikke nooha affu; Faasikaho hasiisannore baalano qixxeessitu.

17 Hashshihu gedensaanni, Tonaalamunku ledo dayi. 18 Ofolte hurbaate ittanni heedheenna Yesuusi, “Halaale yeemmoꞌnena, kiꞌne giddo mittu ledoꞌya itanni noohu sayise aannoe” yii. 19 Insano dadillite mittu mittunku, “Aneeti ikka?” yitusi. 20 Isino togo yiinsa: “Kiꞌne Tonaalamunku giddonni mittoho; isi xa ane ledo sayinete tima qasiꞌranni no. 21 Manchi Beetti balanxe isi daafira borreessinoonni garinni reyanno; manchi Beetto sayise aannohura kayinni aanneꞌe! Hakku manchi ilama hoogoommero woyyannosihu baino.”

22 Sagale ittanni heedheenna, Yesuusi tima haaꞌre maassiꞌrihu gedensaanni hiiqqaqqe insara aanni, “Hiiꞌe; kuni maaliꞌyara lawishshaho” yiinsa. 23 Hakkiinni finiincho haaꞌre Magano galatihu gedensaanni uyinsa; insa baalunkuno finiinchunni aggu. 24 Isino togo yiinsa: “Tini, lowo mannira duꞌnantannote qaalu gondoori mundeeꞌyara lawishshaho. 25 Halaale yeemmoꞌnena, Maganu Gashshootira haaro woyine ageemmo barri daa geeshsha layinkita tenne woyine horonta diageemmo.” 26 Jeefote, guweenyu faarso faarsituhu gedensaanni Ejedhete Ilaala hadhu.

27 Yesuusi togo yiinsa: “‘Allaalaancho ganeemmo; geꞌreewuno billaallanno’ yine borreessinoonni daafira, kiꞌne baalunku gufidhinanni. 28 Ikkollana, reyotenni kaummohu gedensaanni kiꞌne balaxe Galiila saeemmo.” 29 Pheexiroosi kayinni, “Wolootu baalu gufidhuro nafa, ani digufiꞌreemmo” yiisi. 30 Hatte yannara Yesuusi togo yiisi: “Halaale yeemmohena, techo konne hashsha lukkichu lame hige ganikkinni ati sase higge kaadattoe.” 31 Pheexiroosi kayinni, “Reya hasiissuero nafa ate ledo reyemmo ikkinnina, horonta dikaadeemmohe” yee kaajjishe coyiꞌri. Wolootu baalunkuno hatto yitu.

32 Hakkiinni insa Geetesemaane yinanni base daggu; isi rosaanosi, “Ani huuccatto assiꞌrammo geeshsha kiꞌne kowiicho ofolle” yiinsa. 33 Yesuusi Pheexiroosi, Yaaqoobinna Yohaannisi ledosi haaꞌre haꞌri; hakkiicho lowo yaaddonna* dadilli amadisi. 34 Isi togo yiinsa: “Yaaddo shitanni nooe.* Kowiicho heedhine baqqi yitine agadhe.” 35 Hakkiinni insawiinni shiima geeshsha alba hige haꞌre, uulla uwe, dandaamannoha ikkiro hatti saate isiwiinni saꞌanno gede huucciꞌri. 36 Togo yii: “Abba,* Anna, atera baalunkuri dandaamannohe; konne finiincho anewiinni hoolie. Kayinni, ani hasiꞌroommori ikkikkinni ati hasiꞌroottori ikkona.” 37 Higi woyite, insa goxxe noore afe Pheexiroosi togo yii: “Simooni, goxxe nootto? Mitte saate nafa baqqi yite agadha hoogitto? 38 Jifamate giddora eꞌinannikki gede baqqi yitine agadhe; hattono agurtinikkinni huuccidhe. Hige ayyaanu qixxaawaho; maalu kayinni daafuraamoho.” 39 Hakkiinni galagale haꞌre, wona yiinota yaanni huucciꞌri. 40 Galagale dayi woyiteno mugichu amadeennansa goxxe noore afi; konnira insa haadhe qoltannore hooggu. 41 Sayikkimeeshshono galagale hige togo yiinsa: “Tini gonxanninna fooliishshiꞌnanni yanna diꞌꞌikkitino! Xaate ikkino! Saate iillitino! Kuneeti manchi Beetto cubbaataammu angara sayinse uyinaraati. 42 Kaꞌe haꞌnona. Kuneeti sayise aannoehu dayino.”

43 Hakkawoyintenni, isi coyiꞌranni heeꞌreenna Tonaalamu wido ikkinohu Yihudi kae dayi; kakkalaanote roorrooti, borreessaanonna cimeeyye sokkinohu bisenna dulla adhinohu lowo manni ledosi no. 44 Sayise aannosihuno togo yee malaate kulinonsa: “Hasidhinannihu ani sunqeemmohona iso amadde; fule baꞌꞌannokki gede seekkitine amaddine haadhine haadhe.” 45 Isi hakkawoyintenni Yesuusiwa mare, “Rosiisaancho!” yee kimmi asse sunqisi. 46 Insano, Yesuusa amadde usurtu. 47 Ikkollana, mulesi uurrite noori giddonni mittu bise fushshiꞌre, kakkalaanote biili borojjichira macca gane tayisi. 48 Yesuusi kayinni togo yiinsa: “Mulqiꞌrannoha amandannihu gede, bisenna dulla adhitine dagginihu ane amadateeti? 49 Barru baala qullaawu mini giddo rosiisanni ledoꞌne noommo; kiꞌne kayinni hakkawoyite diamaddinoonnie. Ikkollana, kuni ikkinohu Qullaawa Borro yitannori woꞌmanno gedeeti.”

50 Hatte yannara rosaanosi baalanti iso hunte xooqqu. 51 Ikkollana shalaalatenni gannoonni uddano calla aanaho tuqqinohu mittu wedellichi, lowo geeshsha xeertiꞌrikkinni Yesuusi hoode haꞌranni no; insano amaddasira woꞌnaaltu; 52 isi kayinni, uddiꞌrinota shalaalatenni gannoonni uddano hune mullichu* xooqi.

53 Yesuusa kakkalaanote biiliwa haadhe massitu; kakkalaanote roorrooti, cimeeyyenna borreessaano baalunku gamba yitu. 54 Ikkollana Pheexiroosi Yesuusiwiinni xeertiꞌre, kakkalaanote biili hoowe geeshsha hoodesi haꞌri; hakkiicho mini soqqamaano ledo ofolle giira giwaari. 55 Kakkalaanote roorrootinna Sanihediriini shongo woꞌma Yesuusa shaate naqaashshe hasidhanni no; ikkollana diafidhino. 56 Lowo manni isi daafira kapho farciꞌrinoha ikkirono, coyidhinori kayinni dixaadino. 57 Qoleno mitu manni kae isi daafira togo yaanni kapho farciꞌri: 58 “‘Mannu anganni minnoonniha konne mine diige, sasu barri giddo mannu anganni minnoonnikkiha wole mineemmo’ yaanna macciishshinoommo.” 59 Ikkollana, konni coyi daafira farcidhinorino dixaadino.

60 Hakkiinni kakkalaanote biili mereeronsa uurre Yesuusa togo yee xaꞌmi: “Mitte dawarono diqolatto? Mannu mayyee kassasanni noohero dimacciishshootto?” 61 Isi kayinni sammi yee giwi; mitte dawarono diqolino. Xaano kakkalaanote biili, “Ati Maassamino Magani Beetto Kiristoosiitini?” yee xaꞌmisi. 62 Yesuusino togo yii: “Ee; manchi Beetti Wolqaataamu qiniiteenni ofolle gordu gomichinni daanna laꞌinanni.” 63 Hatte yannara kakkalaanote biili uddanosi dare togo yii: “Wole naqaashshe mayira hasiꞌneemmo? 64 Kuneeti Magano xonanna macciishshitinoonni. Xa ma assinona yitinanni?”* Insa baalunku, ‘Reya hasiissannosi’ yitu. 65 Mitootu anja tuffusi; hattono alba dibbe tuntuꞌmotenni gantanni, “Hanni ati masaalaanchohoro ganihehu ayetiro kulinke!” yitusi. Shongote soqqamaanono qawaaddanni haadhe hadhusi.

66 Pheexiroosi eelaanni hoowete giddo heeꞌreenna kakkalaanote biilira soqqamanno seenni giddo mitte kaꞌe daggu. 67 Pheexiroosi giira giwaaꞌranni nooha affuti iso seekkite laꞌe, “Atino konni Naaziretete Yesuusi ledoho” yitusi. 68 Pheexiroosi kayinni, “Konne mancho diegennoommo; maricho coyidhanni noottaronni dileellinoe” yee kaadi; hakkiinni xullichunniwa hige haꞌri. 69 Xaano soqqamaancho isi hakko nooha laꞌe mulesi uurre noo mannira, “Kunino insa widooti” yitu. 70 Isi kayinni xaano kaadi; shiima yanna gedensaanni hakko uurrite noori xaano Pheexiroosi, “Galiilu mancho ikkootto daafira, addaho atino insa widiho” yitusi. 71 Pheexiroosi kayinni, “Konne yitinanni mancho ani diegennoommo!” yaanni xaaranni isonooto rumi. 72 Hakkawoyintenni lukkichu layinkimeeshsho gani; Pheexiroosira Yesuusi, “Lukkichu lame hige ganikkinni sase higge kaadattoe” yiinositi qulli yitusi. Hakkiinni lowo geeshsha dadille wiꞌli.

15 Hakkawoyintenni soodo guto, kakkalaanote roorrooti, cimeeyyenna borreessaano yaano Sanihediriini shongo woꞌma gamba yite amaalantu; qoleno Yesuusa usurte, massite Philaaxoosira sayisse uyitu. 2 Philaaxoosino, “Ati Ayihudete Mooteeti?” yee xaꞌmisi. Isino, “Atinni yiittowe” yee qoli. 3 Kakkalaanote roorrooti kayinni duuchare yitanni kassassusi. 4 Xaano Philaaxoosi togo yee xaꞌmisi: “Mitte dawarono diqolatto? Meu coyira kassassanni noohero dilaꞌꞌatto?” 5 Yesuusi kayinni lede didawarino; tini Philaaxoosira dhagge ikkitusi.

6 Philaaxoosi diru kiiro Faasiku Ayyaana ayirrinsanni woyite, mannu tirinke yaannoha mitto usuranya tiranno. 7 Hatte yannara Barbaani yinanni manchi, mannu gashshooteho finqilanno gede kakkayissanni manna shite usurantino shittooti ledo usurame no. 8 Konnira mannu Philaaxoosiwa daye bashsho assannonsare assansara xaꞌmiꞌri. 9 Isino, “Ayihudete Moote tirammoꞌnera hasidhinanni?” yiinsa. 10 Philaaxoosi hatto yiinohu, kakkalaanote roorrooti Yesuusa dhiibbifatte sayisse uyitinota afeeti. 11 Ikkollana, kakkalaanote roorrooti Yesuusa agure Barbaani tirannonsa gede xaꞌmiꞌrara manna kakkayissu. 12 Xaano Philaaxoosi, “Konne Ayihudete Mooteeti yitinanniha hiissoyya?” yiinsa. 13 Insano, “Suti!”* yite xaano ledde cancitu. 14 Philaaxoosi kayinni, “Mayira? Isi assino bunshe maati?” yiinsa. Insa kayinni, “Suti!”* yee lede lede canci. 15 Hakkiinni Philaaxoosi manna hagiirsiisara yee Barbaani tirinsa; Yesuusa kayinni halangetenni gansiisihu gedensaanni haqqaho suntanni gede sayise uyi.

16 Olanto Yesuusa haadhe hoowete giddora yaano gashshaanchu minira massitu; olanto baalano gamba assitu. 17 Qoleno duume xiille uddano uddisiissusi; hattono utu worraaqqa* seekkite umisira wortu; 18 hakkiinni huuronsa naggi assite, “Ayihudete Moote, keereho?” yitusi. 19 Qoleno shomboqqote siqqichonni umo gantanni anja tuffusi; hattono albasiinni guluphite kumbuultu. 20 Jeefote, qacifattusihu gedensaanni duume xiille uddano mulqite umisi uddano uddisiissusi. Hakkiinni haqqaho suttara haadhe hadhu. 21 Simooni yinannihu Qereenu katami manchi baadiyyetenni daanni hakkaanni hige saꞌꞌanni nooha affe, Yesuusa suntanniha qarru haqqa* duhanno gede gadadissusi; kuni manchi Iskindirinna Rufoosi annaati.

22 Hakkiinni Yesuusa Golgoota yinanni bayicho abbitu; hatto yaa “Umu Qooncho” yaate. 23 Hakkiicho woyine, dimbissanno kaarbe* ledo karsiisse uyitusi; isi kayinni adha giwi. 24 Yesuusa haqqaho qolte gante suttuhu gedensaanni, anna annaho iillannonsare afate hixa tuqqite uddannasi beeqqitu. 25 Haqqaho suttusi woyite yanna sase saateeti. 26 Iso kassansoonnihu mayiraatiro leellishshanno borro, “Ayihudete Moote” yite borreessite wortu. 27 Qoleno lame shittoota, mitto qiniitesiinni mitto gurasiinni haqqaho suttu. 28* —— 29 Hakkaanni hige saꞌꞌanno manni xonisi; hattono umo shafanni togo yii: “Qullaawa mine diige sasu barri giddo mineemmo yaattohu! 30 Hanni sutamootto haqqi* aaninni dirrite umokki gatisi.” 31 Kakkalaanote roorrootinna borreessaano, insa insanaawa togo yitanni qacifattusi: “Woloota gatisino; umosi kayinni gatisa didandiino! 32 Laꞌne ammanneemmo gede, Israeelete Moote Kiristoosi hanni xa qarru haqqi* aaninni dirro.” Ledosi haqqaho sutante noori nafa qacifattusi.

33 Barra lee saatenni kayise honse saate geeshsha gobba baala tunsitu. 34 Yesuusi honse saate ikkita lowo huuronni, “Eeli, Eeli, laama sabaqitani?” yee raari; hatto yaa, “Maganoꞌya, Maganoꞌya, mayira agurittoe?” yaate. 35 Hakko uurrite noori giddo mitu tenne macciishshituti, “Laꞌe! Eeliyaasi woshshiꞌranni no” yitu. 36 Hakkiinni mittu manchi dodanni mare shiishshino woyine giddo haanxicho cuue, shomboqqote siqqichora wore agara ee, “Agurre! Hanni Eeliyaasi daye dirrisannasi laꞌneemmona” yii. 37 Yesuusi kayinni lowo huuronni raare reyi.* 38 Hatte yannara, qullaawu mini dukko* alinni eeli geeshsha lamewa dadhantu. 39 Albasiinni uurre noohu olantote hajajaanchi, Yesuusi reyi woyite ikkinore baalankare laiti, “Addinta kuni Maganu Beettooti” yii.

40 Qoleno hatte yannara xeertote heeꞌre laꞌꞌanni noo meenti no; insa giddo Megidelitte Maariyaami, Shiimiidi* Yaaqoobinna Yoosa ama Maariyaami, hattono Seloome no; 41 kuri meenti Yesuusi Galiilaho noo yannara hoodesi haꞌrinohonna soqqaminosiho; isi ledo Yerusaalame dayinohu wolu batinyu meentino no.

42 Yanna hawarritino; gaꞌa gede Sambata ikkanna techo qole Sambataho qixxaambanni barraati; 43 hakko daafira, ayirradu shongote miilinna Maganu Gashshoote agadhe noohu Armaatiyu Yooseefi dayi. Kuni manchi worbimmatenni Philaaxoosiwa mare Yesuusi reeshsha aasira xaꞌmiꞌri. 44 Philaaxoosi kayinni, Yesuusi reyinoronna teꞌee afara hasiꞌrino daafira, olantote hajajaancho woshshe reyinoronna teꞌee xaꞌmi. 45 Reyinota olantote hajajaanchiwiinni buuxihu gedensaanni, Yooseefi reeshsha adhanno gede fajjisi. 46 Isi, shalaalatenni gannoonniha dancha imaana hirihu gedensaanni, reeshsha dirrise hakko imaaninni kafani; hakkiinni kincho kurkurre qixxeessinoonni waammara* madaari; hakkunni gedensaanni, kincho gongoꞌmishe waammate afoo cufi. 47 Hatte yannara, Megidelitte Maariyaaminna Yoosa ama Maariyaami reeshsha massine madaarroonni base laꞌꞌanni no.

16 Sambatu saihu gedensaanni, Megidelitte Maariyaami, Yaaqoobi ama Maariyaaminna Seloome mare Yesuusi reeshshira buurara suꞌniitanno qimame hidhi. 2 Hakkiinni lamalate umi barra, soodo guto arrishsho lekka abbitanna waammanniwa* dayi. 3 Insa insanaawa, “Waammate afiinni kincho ayi gongoꞌmishe hoolannonke?” yaanni hasaawi. 4 Ikkollana insa gotti yee laꞌꞌanno woyite kinchu lowo geeshsha jawa ikkirono, gongoꞌme hoꞌle nooha afi. 5 Waammate giddora eanno woyite, waajjo uddano uddiꞌre qiniiteenni ofolle nooha mitto wedellicha mancho afe masi. 6 Isino togo yiinsa: “Massinoonte. Haqqaho suntiha Naaziretete Yesuusa hasidhinanni heedhinoonnita afoommo. Isi reyotenni kaino. Kowiicho dino. Laꞌe, iso madaartino dargi kowiichooti. 7 Xa hadhine rosaanosiranna Pheexiroosira togo yiiyye: ‘Isi kiꞌne balaxe Galiila saꞌꞌanno. Balaxe kulinoꞌnente gede hakko laꞌinannisi.’” 8 Meentuno waammatewiinni fule, lowo geeshsha dhagge assiꞌre, waajje huxiꞌranni xooqi. Lowo geeshsha waajjino daafira mittu manchirano cuqqi curuqqi diyiino.*