BITIMA

Qullaawa Borro umo borreessinoonnihu Ibiraawootu, Aramayiketenna Girikete Afiinniiti; borreessinoonnihuno Maganu ayyaani massagannaati. “Daga baala” Maganu Qaale nabbabbe horo afidhanno gede, Qullaawa Borro batinyu qaalira qolle tira hasiissanno. (Maatewoosi 24:14) Maatewoosinni kayisse Ajuujate geeshsha noota 27 maxaaffa “Girikete Afiita Qullaawa Borro” yinanni; hatto yinannihu, umi xibbi maarote diro qullaawu ayyaani massagino Kiristaani tenne maxaaffa Girikete Afiinni borreessino daafiraati.

Girikete Afiiti Qullaawa Borro Haaro Alame Tiro umo Ingilizete Afiinni 1950 fultino. Roore anga tenne tirora kaima assine horoonsiꞌnoonnihu, Westikotinna Hortita egennantinota Girikete Afii borrooti; tini borro, angatenni borreessinoonnite hundite Girikete Afii borro ledo sumuu yitannote. Haaro Alame Tirora dandaami deerrinni Girikete Afii borro noo gedeenni tirate woꞌnaalloonni. Tenne Sidaamu Afii tiro qixxeessinoonnihu, 2013 Ingilizete Afiinni fultinota Haaro Alame Tiro kaima assineeti; qoleno noo gedeenni tirate woꞌnaalloonni.

Girikete Afiite Qullaawa Borro Haaro Alame Tirora, Yihowa yinannihu baxxinohu Maganu suꞌmi qara borrora 237 bayicho no. Maganu suꞌmi qullaambe lowo geeshsha hasiissannota ikkitino daafiranna mannu baalu gatate suꞌmasi woshsha hasiissanno daafira, tenne tirora Yihowa yinanni suꞌma Qullaawu Maxaafi giddo bayichosi qolloonni.—Maatewoosi 6:9; Rooma 10:13.

Haaro Alame Tiro yaanno suꞌmi, Maganu baalunku manni qiniitira yee keeraanchimma woꞌmitinota haaro alame abbara uyino hexxo aana xintaminoho. (2 Pheexiroosi 3:13) Tenne tiro qixxeessitinori, Qullaawu Maxaafi Anna ikkinoha Magano baxxannoreetinna isi hedonna biddishsha mittoreno leddukkinninna xeissukkinni sayisate hadari noonsata huwattinoreeti. Tini tiro, dancha giddonni “halaalunnita gara ikkitino egenno” afiꞌrate sharrantanno nabbawaano lowonta kaaꞌlitara huuccatto assineemmo.—1 Ximootewoosi 2:4.