O le filifiliga sili e faia e se tasi, o le tuuina atu lea o lona ola mo Ieova, ma avea ma vaega o Lona ʻauaiga o tagata tapuaʻi. E naunau Ieova i tagata uma ia latou faia faapea. Aiseā? O lona finagalo ia maua e i latou se faauōga ma ia, ma ola e faavavau. (Teu. 30:​19, 20; Kala. 6:​7, 8) E lē faamalosia e Ieova se tasi e auauna atu iā te ia. E na te tuu atu i tagata taʻitoʻatasi e fai lana ia lava filifiliga. Ae e faapefea pe afai e solia e se tasi ua uma ona papatiso se tulafono a le Atua, ma faia se agasala matuiā? Afai e na te lē faaalia le salamō, e tatau ona aveesea o ia mai i le faapotopotoga. (1 Kori. 5:13) E ui i lea, e matuā naunau Ieova i le tagata faimea sesē ia toe foʻi mai iā te ia. O le mea moni, o se tasi lenā o māfuaaga tāua na ia saunia ai le togiola, ina ia faamagaloina ai agasala a tagata faimea sesē ua salamō moni. O Ieova o le Atua alofa, ma ua ia augani atu i tagata na faia agasala matuiā ina ia faaalia le salamō.—Saka. 1:3; Roma 2:4; Iako. 4:8. w24.08 14 ¶1-2

E oo ane i le taimi na tusi ai e le aposetolo o Ioane lana tusi lona tolu, ua faasalalau atu e nisi aʻoaʻoga sesē ma faatupu ai fevaevaeaʻiga i le faapotopotoga. Peitaʻi, e iai nisi na “savavali pea . . . i le upu moni.” Na latou usiusitaʻi iā Ieova, ma “savavali e tusa ai ma ana poloaʻiga.” (2 Ioa. 4, 6) O le faamaoni o nei Kerisiano, e lē gata na maua ai e Ioane le olioli, ae na faafiafiaina ai foʻi Ieova. (Faata. 27:11) O le ā le lesona mo i tatou? O le faamaoni e iʻu atu i le mauaina o le olioli. (1 Ioa. 5:3) O se faataʻitaʻiga, e tatou te maua le olioli i lo tatou iloaina o loo tatou faafiafiaina Ieova. E olioli o ia pe a silasila mai o loo tatou teena faaosoosoga a le lalolagi ae talia le upu moni, ma e olioli foʻi le ʻauagelu. (Luka 15:10) E tatou te maua foʻi le olioli i le mātauina o le faamaoni o isi. (2 Tesa. 1:4) Pe a faaumatia lenei faiga o mea, o le a tatou maua le faamalieina i lo tatou iloa na tatou faamaoni iā Ieova, e ui o loo pulea e Satani lenei lalolagi. w24.11 12 ¶17-18

O le ā le umi e tatau ona e mātauina ai se tasi, a o leʻi faailoa atu ou faalogona alofa iā te ia? Pe afai e vave ona e talanoa atu i lenā tagata, atonu o le a ia manatu ua e faia se filifiliga e aunoa ma le mafaufau lelei. (Faata. 29:20) Ae afai o loo iloa e lenā tagata e te fia uō iā te ia ae o loo faatuatuai ona e faailoa atu i ai ou faalogona, atonu o le a ia manatu o loo e faatalatū e faia se filifiliga. (Fai. 11:4) Ia manatua, e lē faapea o le tagata lea o le a e talanoa i ai, ua mautinoa lava o le a e faaipoipo i ai. Ae ia e mautinoa ua e nofosauni e faaipoipo, ma atonu e talafeagai lelei lenā tagata mo oe. Ae e faapefea pe afai e te iloa o loo fia uō se tasi iā te oe? Pe afai e te lē fia uō i lenā tagata, ia atagia atu i au gaoioiga o le mea moni lava lenā e te manaʻo i ai. E lē o se gaoioiga alofa le faafoliga atu o loo e fia uō i le isi tagata, ae e lē o le mea moni lenā.—Efe. 4:25. w24.05 22-23 ¶9-10