Ala fa lani Tënë ti Nzapa na mbeto pëpe!

Atâ Chrétien ayeke sara ye na mbeto pëpe, même na gbele kangango lege. A yeke ye so a fa ni na yâ ti abuku tongana ‘Fa nda ti tënë ni kue’ na ndo ti Royaume ti Nzapa nga na Les Témoins de Jéhovah : Prédicateurs du Royaume de Dieu. Na tapande ti amba ti e akozo Chrétien, e yeke sambela na Jéhovah ti hunda yingo ti lo nga ti tene lo mû maboko na e si e fa tënë ti lo na mbeto pëpe.​—Kus. 4:23-31.

Mbeni ita-koli asara tënë ti kusala ti fango tënë na ngoi ti Kozo Bira so Amû Sese Kue, lo tene: “Na mbeto pëpe, awakua ti Nzapa akangbi volume mbasambala ni ti buku Études des Écritures, so iri ni ayeke Le mystère accompli. Nde na Bible, a yeke buku so la a kangbi ni ahon tanga ti abuku kue na ngoi ni so. A sigigi na tract Asango ti Royaume No. 1 na ngu 1918. Na pekoni a yeke Asango ti Royaume No. 2 so afa ndani so akota zo ti kodoro akanga lege ti tene a kangbi buku Le mystère accompli. Na pekoni a sigigi na Asango ti Royaume No. 3. Groupe ti aChrétien be-ta-zo so a soro ala ti gue na yayu akangbi lani ambeti so na azo mingi. A lingbi zo ayeke na mabe nga lo sara ye na mbeto pëpe si lo kangbi Asango ti Royaume.”

Laso, mingi ni a yeke fa na afini wafango tënë ti Royaume tongana nyen ti fa tënë, me kozo a yeke tongaso pëpe. Mbeni ita-koli ti kodoro ti Pologne so ague na Amerika adabe ti lo na ye so asi na lo na kozo lango so lo gue ti fa tënë na ngu 1922, lo tene: “Lani mbi hinga ape tongana nyen ti zia mbeti na azo nga mbi hinga ti tene anglais nzoni ape. Mbi luti mbi oko na yanga ti bureau ti mbeni docteur na mbi pika ni. Mbeni wali infirmier azi porte ni. Mbi yeke girisa ye so asi lani na mbi so lâ oko pëpe, ndali ti so mbi gi lani bê ti mbi mingi nga mbeto ahon ndo ti mbi. Na ngoi so mbi ye ti zi yanga ti bozo ti mbi, abuku kue so ayeke na yâ ni atuku na gere ti wali ni. Mbi hinga tënë so mbi tene lani na lo ape, me mbi zia na lo mbeni mbeti. Na ngoi so mbi ga ti hon, mbi sara ye na mbeto mbeni pëpe na mbi bâ so Jéhovah airi tënë nzoni na ndo ti mbi. Na lango ni so mbi zia abrochure mingi na azo na ndo ti lege.”

Mbeni ita-wali atene: “Na ngu 1933, aita-koli mingi asara kusala na a-oto so a zia haut-parleur dä ti fa na tënë ti Royaume.” Mbeni lâ, lo na mbeni ita-koli na wali ti lo ague ti fa tënë na ando so ayeke na yâ ti ahoto ti Californie, na Amerika. Lo tene: “Ita-koli ni ague azia oto ni na ndo ti mbeni hoto ni so ayo na nduzu mingi, me e ngbâ ti e na yâ ti gbata ni na gbe ni. Na ngoi so lo zi go ti haut-parleur ni ngangu, a toto mo bâ mo tene a londo na yayu. Azo ti gbata ni agi lani ita-koli ni gbä ala wara lo pëpe. Tongana tënë ni so ayeke toto na yâ ti haut-parleur ni so ahunzi awe, e gue e bâ azo ni e fa tënë na ala. Mbi sara kua na ambeni oto ni use me mbi tene na mo, azo mingi aye ti mä tënë ni pëpe. Ye oko, ala lingbi ti kanga mê ti ala pëpe ndali ti so tënë so ayeke sigigi na yâ ti haut-parleur ni so atoto juska asi na yâ ti da ti ala. E bâ so lakue Jéhovah ayeke sara si e wara anzoni kode so alingbi tâ na ngoi ni. Sarango kua na kode ni so ahunda ti tene e zi mbeto na yâ ti e, me lakue e yeke si na ye so a sigigi na kode ni so ndali ni nga iri ti Jéhovah awara gonda.”

Ti londo na ngu 1930 juska na angu so aga kete na peko ti ngu 1940, a fa tënë na lege ti aphonographe nga na adiskur so a zia na ndo ti adisque. Mbeni ita-wali adabe ti lo lo tene: “Mbeni ita-wali so ade maseka ayeke fa lani tënë da na da na phonographe. Na ngoi so lo zia phonographe ni ayeke toto na yanga ti mbeni da na gbe ti véranda, wa ti da ni asara ngonzo ngangu asara si lo pika phonographe ni na gere ti lo. Mbeni disque oko afâ pëpe. Ambeni koli ota so ayeke te ye na yâ ti mbeni oto so aluti abâ ye so asi so, ala iri ita-wali ni ti zia phonographe ni ti tene ala mä, na pekoni lo zia na ala mbeni mbeti. Ye so adë bê ti lo na peko ti vundu so lo wara fade so.” A hunda ti tene zo asara ye na mbeto pëpe si lo gbu ngangu na yâ ti mara ti atara tongaso.

Oko ita-wali so akiri atene: “Mbi dabe ti mbi na ngoi so e to nda ti fa apériodique na ndo ti lege na ngu 1940. Kozo aita ayeke tambela na apancarte ti fa na tënë. Aita-koli na aita-wali akpo molongo oko, ala tambela na tere ti lege na mbeni kota mbeti na kate ti ala so na lê ni a tene: ‘Bungbi ti vorongo Nzapa ayeke mbeni kûkû nga ye ti handango na zo’ nga ‘Sara na Nzapa nga na Christ, Gbia ni.’ Na oko ngoi ni, a kangbi atract na azo senge senge. A hunda lani ti duti na mbeto pëpe si zo abi tere ti lo na yâ ti amara ti kode ti fango tënë tongaso, me akode so asara si azo mingi ahinga iri ti Jéhovah nga na azo ti lo.”

Mbeni ita-wali atene: “Fango tënë na apériodique na ndo ti lege na yâ ti akete gbata ayeke lani ngangu mingi. A yeke lani tongaso na ngoi so azo akanga lege ngangu na aTémoin. . . . A yeke nzoni zo aduti zo ti mbeto pëpe si lo luti na tere ti lege ti fa apériodique na azo nga ti dekongo na tënë so a hunda lani na e ti tene ni. Me, a yeke ngangu ti tene e manke mbeni samedi. Na ambeni ngoi azo ayeke sara ye nzoni. Me na ambeni ngoi ambeni zo so bê ti ala ason na tere ti e ayeke bungbi gbani gbani na tere ti e, nga ngoi na ngoi a lingbi e kpe si ala sara sioni na e pëpe.”

Atâa aye ti ngangu so azo asara lani na aTémoin ti Jéhovah na ngoi ti Use Bira so Amû Sese Kue, na mbeto pëpe ala ngbâ ti fa tënë. A leke lani mbeni kapa ti fango tënë ti lango 43 so ato nda ni na lango 1 ti décembre ngu 1940 ti si na lango 12 ti janvier ngu 1941. Na ngoi ni so awafango tënë ti kodoro ti Amerika 50 000 akangbi abrochure ahon kutu miombe; a iri ni lani ngoi ti fango tënë na “mbeto pëpe.”

Aita mingi so aninga na yâ ti bungbi ti Nzapa na so aga mbakoro awe ayeke dabe ti ala nzoni mingi na akpale so lani ahunda ti tene ala zi mbeto na yâ ti ala si ala luti na lê ni. Ambeni adabe ti ala so lani teti ngu mingi, ala yeke tene fani mingi: “Gue na bira ni juska na yanga ti gbagba.” Tënë ni so afa bibe ti ala ti sarango ye na mbeto pëpe. E hinga pëpe mara ti tokua wa Nzapa ayeke fa ande na e ti fa ni kozo na futingo ti sioni dunia so. Ye oko, grâce na mungo maboko ti Jéhovah, e yeke ngbâ ti fa tënë na bê ti e kue nga na mbeto pëpe.

[Kete tënë na lembeti 9]

Lakue a hunda ti tene zo asara ye na mbeto pëpe si lo fa tënë ti Royaume