Ga nduru na Nzapa
E sara aye so Nzapa ahunda na e
LÂ OKO mo hunda tere ti mo awe, ‘Ngbanga ti nyen e yeke na fini?’ Jéhovah aleke e na lo zia na yâ ti e nzara ti hundango mara ti hundango ndo so na lo zia nga na yâ ti e kota nzara ti hinga kiringo tënë ni. Ye ti nzoni ni ayeke so, Nzapa ti e so ayeke sara ye na ndoye asara si lege ayeke dä ti wara kiringo tënë ni. Kiringo tënë ni so e yeke gi ni gingo ayeke na yâ ti Mbeti ti lo, Bible. Bâ tënë ti Gbia Salomon so ayeke na Zo-ti-fa-tene 12:15.
Dutingo ti Salomon ayeke lani nde mingi nga lo yeke na mbeni hingango ye so mbeni zo ayeke na mara ni pëpe. Lo lingbi lani ti sara tënë nzoni na ndo ti ye so zo alingbi ti sara ti duti na ngia nga ti hinga ndani so zo ayeke na fini. So lo yeke lani na kota ndara, gbâ ti mosoro, nga lo yeke gbia, lo wara lege ti gbu li na ndo ti aye so azo ayeke gi ti wara, aye tongana mosoro nga na kota ndo (Zo-ti-fa-tene 2:4-9; 4:4). Ni la, yingo ti Nzapa apusu lo ti fa na nduru tënë aye so lo wara, lo tene: “Tongana a mä ye kue awe, so ayeke nda ti tënë ni: mo kpe mbeto ti Nzapa, na mo bata commandement ti Lo, teti so ayeke kusala ti azo kue.” Atënë so afa tâ nzoni ye so zo alingbi ti sara, so na pekoni lo yeke bâ nzoni dä mingi.
“Kpe mbeto ti Nzapa.” Na bango ni kpâ tongaso, kpengo mbeto ti Nzapa alingbi ti duti mbeni ye so anzere na zo pëpe. Me kpengo mbeto ni so ayeke mbeni nzoni ye so ayeke pusu zo ti sara ye. E lingbi ti pensé pëpe na mbeni ngbâa so asara mbeto ti zia ngonzo na bê ti wa ti lo so asara ye na ngangu me e lingbi ti pensé na mbeni molenge so aye mingi ti zia ngia na bê ti babâ ti lo so aye lo mingi. Mbeni buku atene so kpengo mbeto ti Nzapa ayeke “nengo so azo ti Nzapa ane na Lo mingi ndali ti so ala ye Lo nga ala hinga so Lo yeke na ngangu nga Lo yeke kota mingi.” Mara ti bibe tongaso apusu e ti sara ye so bê ti Nzapa aye ndali ti so e ye lo nga e hinga so lo ye e. A yeke mbeni nzoni mbeto so ayeke gi na yâ ti e pëpe, me e yeke fa ni na lege ti asarango ye ti e. Tongana nyen?
“Bata acommandement ti Lo.” Kpengo mbeto ti Nzapa apusu e ti mä yanga ti lo. A yeke na lege ni ti tene e mä yanga ti Jéhovah. Teti so lo yeke Wasarango e, lo hinga lege ti dutingo na fini so ayeke nzoni ahon atanga ni, legeoko tongana mbeni zo ti lekengo masini so ahinga nzoni lege ti sarango kua na masini ni. Na ndo ni, Jéhovah aye mingi ti tene e duti nzoni. Lo ye si e duti na ngia, nga aye so lo hunda na e ti sara ayeke ndali ti nzoni ti e (Ésaïe 48:17). Bazengele Jean afa ni na lege ti atënë so: “Ndoye ti Nzapa ayeke so: e bata acommandement ti lo; me acommandement ti lo ayeke ye so ane pëpe.” (1 Jean 5:3). Tongana e mä yanga ti Nzapa afa so e ye lo, nga acommandement ti lo afa so lo ndoye e.
“So ayeke kusala ti azo kue.” Atënë so afa kota raison so ndali ni a lingbi e kpe mbeto ti Nzapa nga e mä yanga ti lo. A yeke ti e ti sara ni. Jéhovah ayeke Wasarango e, tongaso a yeke ndali ti lo la e yeke na fini (Psaume 36:10). Nga, a lingbi e mä yanga ti lo. Tongana e duti na fini tongana ti so lo ye, andâ e sara kusala ti e.
Tongaso, e yeke na fini ngbanga ti nyen? Na nduru tënë e lingbi ti tene: E yeke na fini ti sara ye so bê ti Nzapa aye. Ni la a yeke nzoni ye so ahon tanga ti aye kue so mo lingbi ti sara ti duti na ngia. Mo ye ti hinga ye mingi na ndo ti ye so bê ti Jéhovah aye nga tongana nyen ti sara ye na yâ ti fini ti mo ague oko na ni? A yeke nzere mingi na aTémoin ti Jéhovah ti mû maboko na mo.