HUNDA TI AMASEKA
Tongana nyen la mbi peut ti soro azo so ayeke anzoni tapande?
“Na ngoi so mbi wara akpale na ekole, mbi yeke gbu li ndö ti mbeni zo so mbi ye asarango ye ti lo mingi so awara mara kpale ti mbi ni na mbi yeke tara ti sara ye tongana lo. A yeke ngangu ape ti hon ndö ti angangu kpale, tongana e yeke na mbeni zo so e ye ti mû tapande ti lo.”—Haley.
Mbeni zo so ayeke mbeni nzoni tapande apeut ti aidé mo ti hon ndö ti akpale ti mo nga ti atteindre a-objectif ti mo. Tongaso, soro mbeni zo so ayeke mbeni nzoni tapande.
Ngbanga ti nyen la mo doit ti sara hange na azo so mo yeke soro ala ti duti anzoni tapande?
Zo so mo soro lo ti duti tapande ndali ti mo ayeke na influence na ndö ti asarango ye ti mo.
Bible a-encouragé aChrétien ti mû tapande ti azo so ayeke na nzoni sarango ye, a tene: “Na ngoi so ala yeke bâ ye ti peko ti sarango ye ti ala, ala sara ye na mabe tongana ti ala.”—aHébreu 13:7.
Wango: Azo so mo yeke soro ala ti duti tapande ti mo apeut ti sara si mo sara ye ti nzoni wala ye ti sioni. Tongaso, soro azo so ayeke na anzoni sarango ye, gï pëpe azo so iri ti ala awu mingi wala azo so ngu ti mo na ala ayeke oko.
“Mbi manda ye mingi na mbage ti Adam, mbeni mba ti mbi Chrétien so ayeke na anzoni sarango ye, me pëpe na ndö ti fason ti lekengo terê ti lo. Ye so a-étonné mbi ayeke so mbi ngbâ ti rappelé na atënë so lo tene nga na aye so lo sara. Lo hinga ape so asarango ye ti lo ajoué lani na ndö ti mbi.”—Colin.
Zo so mo soro lo ti duti tapande ti mo ayeke sara ngangu na ndö ti pensé ti mo.
Bible atene: “Zia ambeni zo ahanda ala pëpe. Ti sara songo na asioni zo ayeke buba anzoni sarango ye ti zo.”—1 aCorinthien 15:33.
Wango: Soro mbeni zo so ayeke na anzoni sarango ye, me bâ gï pendere ti lo ape. Tongaso ape, peut-être asarango ye ti lo apeut ti découragé mo.
“Tongana mo ngbâ gï ti haka terê ti mo na azo so ayeke pendere mingi ayeke sara si mo bâ so mo yeke pendere ape nga mo yeke ye oko ape. Na ye so apeut ti pusu mo ti pensé mingi gï na ndö ti pendere ti mo.”—Tamara.
Gbu li na ndö ti ye so: Kpale wa la apeut ti si tongana mo soro azo so iri ti lo awu mingi wala awanguru ti duti azo so mo ye ti mû tapande ti ala?
Azo so mo soro ala ti duti tapande ti mo apeut ti joué na ndö ti a-objectif so mo ye ti atteindre.
Bible atene: “Zo so atambela na azo ti ndara, lo yeke ga zo ti ndara.”—aProverbe 13:20.
Wango: Soro azo so ayeke na anzoni sarango ye si mo mû tapande ti ala. Tongana mo gbu li na ndö ti asarango ye ti ala, mo yeke hinga aye so mo peut ti sara ti atteindre a-objectif ti mo.
“Ahon ti zia mbeni objectif gï tongaso mbi yeke gi ti leke yâ ti aye so mbi ye ti sara, mo peut ti tene: ‘Mbi ye ti leke yâ ti aye so mbi ye ti sara tongana ti Jane. Lo yeke sara ye lakue na l’heure nga lo yeke sara akua so a mû na lo nzoni.’”—Miriam.
Na nduru tënë: Tongana mo soro mbeni zo so ayeke mbeni nzoni tapande, a yeke sara si mo yeke ga zo so mo ye ti ga ni.
A yeke facile ti atteindre a-objectif ti mo tongana mo mû peko ti mbeni zo so ayeke mbeni nzoni tapande
Mo yeke soro zo ni tongana nyen?
Ambeni ye use ayeke dä so apeut ti aidé mo.
Gbu li na ndö ti mbeni sarango ye so mo ye ti duti na ni. Na pekoni, gi mbeni zo so mo ye sarango ye ti lo mingi so ayeke na mara sarango ye ni so.
Mo peut ti soro mbeni zo so sarango ye ti lo anzere na mo nga gi ti bâ mbeni sarango ye so lo yeke na ni so mo kue mo ye ti duti na mara ni.
Fiche ti gbungo li so ayeke na yâ ti article so apeut ti aidé mo ti sara ni.
Azo so mo soro ala ti duti tapande ti mo apeut ti duti:
Azo so ngu ti mo na ala ayeke oko. “Mbi ye ti sara ye gï tongana mbeni kota kamarade ti mbi. Lo yeke ka na gbâ ti aye ti sarango ni, me lo yeke pensé lakue na azo. Mbi yeke kota zo na lo, me lo yeke na apendere sarango ye so mbi yeke na ni ape, na a sara si mbi ye ti mû tapande ti lo.”—Miriam.
Azo so ayeke kota zo na mo. A peut ti duti babâ na mama ti mo wala azo so mo na ala asara bungbi oko. “Ti vrai ni, babâ na mama ti mbi la ayeke anzoni tapande ndali ti mbi. Ala yeke na apendere sarango ye. Mbi bâ so ala yeke na awokongo, me ala sara kue ti ngbâ be-ta-zo na Nzapa. Mbi ye ti tene a tene mara ti tënë ni so na ndö ti mbi tongana mbi wara ande mara ngu ti ala so.”—Annette.
Azo so Bible asara tënë ti ala. “Mbi soro na yâ ti Bible azo so mbi ye ti mû tapande ti ala ndali ti araison nde nde, azo tongana Timothée, Ruth, Job, Pierre nga na kete molenge-wali ti Israël. So mbi manda ye mingi na ndö ti ala, a sara si ayeke bâ mo tene mbi yeke vivre lani na ngoi ti ala. Mbi ye mingi ti diko livre Sara ye na mabe tongana ti ala nga mbi yeke sara kua na ‘Index des modèles’ so ayeke na yâ ti volume 1 na 2 ti livre Les jeunes s’interrogent — Réponses pratiques.”—Melinda.
Wango: Ngbâ gï pëpe na ndö ti mbeni tapande oko. Bazengele Paul, atene na amba ti lo Chrétien, atene: “Ala zia lê ti ala na ndö ti azo so ayeke tambela alingbi na tapande so ala bâ na mbage ti e.”—aPhilippien 3:17.
Mo hinga? Mo kue mo peut ti duti mbeni tapande ndali ti amba ti mo. Bible atene: “Me mo ga mbeni tapande ndali ti azo so ayeke be-ta-zo, na lege ti tënë ti yanga ti mo, sarango ye ti mo, ndoye so mo yeke na ni, na lege ti mabe nga na dutingo so ayeke na sioni oko pëpe.”—1 Timothée 4:12.
“Mo peut ti aidé ambeni zo, atâa so mo ngbâ ti gi ti duti na ambeni nzoni sarango ye. Peut-être ambeni zo ayeke bâ mo, hinga ape mbeni tënë so mo tene apeut ti changé gigi ti mbeni zo.”—Kiana.