Siokpari ayeke nyen?
Kiringo tënë ti Bible
Siokpari ayeke asarango ye, asentiment wala apensé kue so ague nde na andia ti Nzapa. Andu nga asioni sarango ye wala aye so ayeke na lege ni ape so ague nde na andia ti Nzapa (1 Jean 3:4; 5:17). Bible afa nga so tongana mbeni zo ake ti sara mbeni ye so ayeke nzoni ayeke sarango siopkari la.—Jacques 4:17.
Na ayanga ti kodro so a sû lani na Bible, tënë so a kiri peko ni na siokpari aye ti tene “ti raté mbeni ye,” wala ti atteindre ape mbeni ye so mo ye ti sara. Na tapande, tongana aturugu ti Israël ti ândö azia lani tënê na yâ ti mvingi ti pika mbeni ye, tënê ni “ayeke raté ye ni pëpe.” A peut nga ti kiri na peko ti tënë so na ti sara siopkari pëpe (aJuge 20:16). Tongaso, ti sara siokpari aye ti tene ti raté ti sara ye alingbi na andia ti Nzapa so ayeke mbilimbili-kue.
So Nzapa la acréé aye kue, lo yeke na droit ti lu andia na azo (Apocalypse 4:11). E yeke na tënë ti kiri na ni na lo ndali ti aye so e sara.—aRomain 14:12.
Eskê a yeke possible ti tene zo asara siokpari kete tongaso ape?
Ên-ën. Bible atene so “azo kue asara siokpari awe na ala si nduru na gloire ti Nzapa pëpe”. (aRomain 3:23; 1 aGbia 8:46; Zo-ti-fa-tene 7:20; 1 Jean 1:8). E tene tongaso ngbanga ti nyen?
Na tongo nda ni, Adam na Ève ayeke lani na siopkari na terê ti ala ape ndali ti so Nzapa acréé ala mbilimbili-kue nga lo sara ala na image ti lo (Genèse 1:27). Me, so ala ke yanga ti Nzapa, ala perdre dutingo ti ala ti mbilimbili-kue (Genèse 3:5, 6, 17-19). Na ngoi so ala dü amolenge, amolenge ni nga kue siopkari ayeke na terê ti ala (aRomain 5:12). Ndani la David, so ayeke gbia ti Israël, atene: ‘Na ngoi so a dü mbi, tënë ayeke na li ti mbi awe.’—Psaume 51:5.
Eskê ambeni siokpari ayeke sioni mingi ahon ambeni?
En. Na tapande, Bible atene so azo ti Sodome ayeke “sioni mingi nga ala yeke akota zo ti sarango siokpari” nga “siokpari ti ala ane mingi.” (Genèse 13:13; 18:20). Bâ aye ota so afa so mbeni siokpari ayeke sioni mingi wala ane mingi.
Siokpari so ayeke sioni mingi. Bible awa e ti kpe akota siokpari tongana sarango lango-sioni, vorongo ayanda, nzi, nyongo sämba ahon ndö ni, mungo ye ti zo na likisi, fango zo nga na sarango yorö (1 aCorinthien 6:9-11; Apocalypse 21:8). Bible azia kangbi na popo ni na ambeni siokpari so zo ayeke sara ni sân ti gbu li, na tapande, ambeni tënë wala asarango ye so ayeke son bê ti zo (aProverbe 12:18; aÉphésien 4:31, 32). Me, Bible awa e ti bâ ambeni siokpari tongana akete siokpari ape ndali ti so aye ni so apeut ti gue na e ti sara akota siokpari so ague nde na andia ti Nzapa.—Matthieu 5:27, 28.
Aye so ayeke pusu e ti sara ye. Azo ayeke sara ambeni siokpari sân ti hinga ye so bê ti Nzapa aye (Kusala 17:30; 1 Timothée 1:13). Atâa so Bible akanga lê pëpe na ndö ti mara ti asiokpari tongaso, me kangbi ayeke na popo ni na asiokpari so zo asara na bê ti lo wani ti ke andia ti Nzapa (Nombre 15:30, 31). Asiokpari so zo asara na bê ti lo wani alondo na “aye ti sioni so bê ti lo afa na lo.”—Jérémie 16:12.
Wungo ti siokpari ni. Bible azia nga kangbi na popo ti mbeni siokpari so zo asara ni gï tongaso nga na mbeni siokpari so zo asara ni teti angoi mingi (1 Jean 3:4-8). Azo so asara “siokpari na mbana,” même na peko ti so ala manda ti sara ye na lege ni, Nzapa ayeke fâ ande ngbanga na ndö ti ala.—aHébreu 10:26, 27.
Azo so abâ so tënë ayeke na li ti ala ndali ti mbeni kota siokpari so ala sara apeut ti bâ so asiokpari ti ala ane mingi. Na tapande, Gbia David atene: “Afaute ti mbi ayeke lakue na ndö ti li ti mbi; a yeke tongana mbeni nengo kungba so mbi lingbi ti yô ni pëpe.” (Psaume 38:4). Me, Bible amû beku so: “Zia zo ti sioni azia lege ti lo, nga zia zo so aye gï ti sara sioni azia lege ti apensé ti lo. Zia lo kiri na mbage ti Jéhovah, so ayeke sara nzoni bê na lo, zia lo kiri na mbage ti Nzapa ti e, ndali ti so lo yeke pardonné zo kue kue kue.”—Ésaïe 55:7.