Tongana nyen la mo peut ti hon ndö ti mbeto ti kuâ?

Kiringo tënë ti Bible

A yeke na lege ni ti sara mbeto ti kuâ, tongana ti so zo ayeke sara mbeto ti mbeni wato, na lo yeke sara ambeni ye ti mû lege na lo ti bata fini ti lo (1 aCorinthien 15:26). Me, afango ye ti mvene nga na atënë ti kotara asara si mbeto ti kuâ ahon ndö ti azo na “a mû ala na ngbâa na yâ ti gigi ti ala kue.” (aHébreu 2:15). Ti hinga tâ tënë ayeke zi e na gbe ti mbeto ti kuâ. A yeke mbeni mbeto so apeut ti kanga lege na e ti vivre nzoni.—Jean 8:32.

Tâ tënë na ndö ti kuâ

Akuâ ahinga ye oko ape (Psaume 146:4). So Bible ahaka kuâ na lango, e bezoin ape ti sara mbeto ti tënë so azo ayeke tene so zo ayeke bâ pasi na peko ti kuâ ti lo.—Psaume 13:3; Jean 11:11-14.
Akuâ apeut ti sara sioni na e ape. Même azo so aye ti sara ye ti sioni na e tongana ala kui, ala ‘yeke na ngangu pëpe’ ti sara ni (aProverbe 21:16). Bible atene so “kengo terê ti ala na kota bê ti ala ahunzi awe.”—Zo-ti-fa-tene 9:6, Mbeti ti Nzapa, Tënë so amu fini.
Kuâ ayeke pëpe hunzingo ti mbeni ye biani biani. Grâce na zingongo ti akuâ, Nzapa ayeke kiri ande na azo so akui awe na fini.—Jean 5:28, 29; Kusala 24:15.
Nzapa amû zendo so “kuâ ayeke duti ande dä mbeni pëpe”. (Apocalypse 21:4). Na ndö ti tënë ti ngoi ni so, Bible atene so “sese ayeke ga ande ye ti azo ti mbilimbili, na ala yeke ngbâ na ndö ni lakue lakue,” na a yeke zi azo biani biani na gbe ti mbeto ti kuâ.—Psaume 37:29.