Tongana nyen la aTémoin ti Jéhovah ayeke sara kua na a-offrande so azo amû?
E yeke sara kua na a-offrande so azo amû ti sara na kua ti Nzapa nga ti mû maboko na azo so abezoin mungo maboko. E bâ akua ni so tongana mbeni mbage ti kota kua so e yeke na ni ti sara, so ayeke ti mû maboko na azo ti ga adisciple ti Christ Jésus.—Matthieu 28:19, 20.
A-offrande ni so ayeke gue na yâ ti bozo ti mbeni zo ape. A yeke payé a-ancien wala azo so ayeke mû li ni na yâ ti bungbi ti e ape. Nga so aTémoin ti Jéhovah ayeke gue da na da ti fa tënë ti Nzapa so, a yeke payé ala ndali ni ape. Azo so ayeke sara kua na yâ ti afiliale ti e nga na kota ndokua ti e, so na popo ni a yeke wara amembre ti Bebungbi, ayeke azo so ayeke sara kua ti Nzapa na ala yeke wara pëpe mbeni salaire ndali ti kua ni.
Ambeni kua so e yeke sara
Sigingo na ambeti: Ngu oko oko, e yeke traduire aBible nga na ambeni mbeti ti Nzapa, e yeke imprimé ni, e tokua ni nga e kangbi ni kutu mingi senge senge na azo. Na ndö ni, site jw.org nga na application JW Library asara si azo apeut ti wara ambeti ti e na ndö ti a-appareil ti ala sân ti futa mbeni ye nga sân ti tene e sara apublicité tongaso si e wara na nginza.
Lekengo ada nga na bango lege ni: E yeke leke ada ti Nzapa na yâ ti dunia kue nga e yeke bâ lege ni, tongaso si amû lege na acongrégation ti wara nzoni ndo ti tene ala bungbi dä ti gonda Nzapa. E yeke sara mara ni ndali ti andokua ti e nga na ando so a yeke sara traduction dä. Avolontaire la ayeke sara mingi ti akua ni so, ye so asara si a hunda nginza mingi ape ti leke na ada ni nga ti bâ lege ni.
Bango lege ti akua: A-offrande so azo ayeke mû la ayeke mû lege ti sara na akua so ayeke sara na kota ndokua ti e, na yâ ti afiliale ti e, na yâ ti ando so a sara atraduction dä nga na akua so asurveillant so ayeke gue na ando nde nde ayeke sara.
Fango tënë: A yeke payé pëpe aTémoin ti Jéhovah ndali ti kua ti ala ti fango nzoni tënë wala ndali ti kua ti ala ti fango “tënë ti Nzapa” na azo (2 aCorinthien 2:17). Me, legeoko tongana ti so a yeke sara lani na ngoi ti akozo Chrétien, ambeni wafango tënë so a soro ala, a formé ala nga so ayeke mû ngoi ti ala mingi ti fa tënë ti Nzapa, ayeke wara mbeni kete pata so a mû na ala ti tene ala payé na ndo ti lango nga ti wara na ye so ala bezoin ni.—aPhilippien 4:16, 17; 1 Timothée 5:17, 18.
Fango ye: A-offrande so azo ayeke mû la ayeke mû lege ti futa na ando so e yeke sara na akota bungbi ti e dä. Na ndö ni, e yeke sigi nga na a-enregistrement audio nga na avidéo so a mû atënë ti yâ ni na yâ ti Bible. E yeke sara nga ambeni formation ndali ti a-ancien nga na aTémoin ti Jéhovah so ayeke mû ngoi ti ala mingi nze na nze ti fa tënë ti Nzapa, tongaso si ala sara kua ti ala nzoni.
Mungo maboko na azo so atingbi na akota kpale: E yeke mû kobe, ngu nga na ndo ti lango na azo so aperdre aye ti ala ndali ti akpale tongana yengingo ti sese, ngu so asuku amû ndo wala akpale so azo la ayeke na gunda ni. E yeke mû aye ni so gï pëpe na “aita ti e na yâ ti mabe,” me nga na azo so ayeke aTémoin ti Jéhovah ape kue.—aGalate 6:10.