Anzoni ye so e wara na lege ti agroupe ti fango tënë

1-2. Aita mingi atene nyen na ndö ti groupe ti fango tënë?

ESKÊ mo dabe ti mo na lango so a yeda na mo ti fa nzoni tënë? Na lango ni so, mo yeke lani na ngia ndali ti so mo lï na yâ ti mbeni kota groupe ti azo so ayeke gonda iri ti Jéhovah (Ps. 148:​1, 2, 12, 13). Me na lango ni so, peut-être mo lï nga na yâ ti mbeni kete groupe so ayeke groupe ti fango tënë. Groupe ti fango tënë a-aidé e mingi ti sara kua so a mû na e so ayeke ti fa nzoni tënë ti Royaume “na ndö ti sese kue so azo ayeke dä”.—Mat. 24:14.

² Mo pensé nyen na ndö ti groupe ti fango tënë? Ita-wali Wendya atene: “So mbi yeke na yâ ti mbeni groupe ti fango tënë a-aidé mbi na alege mingi. A aidé mbi ti manda afini kode ti fango tënë nga na ti fango ye. A aidé mbi ti zia mbeni ye na gbele mbi ti si dä na lege ti yingo. A aidé nga mbi ti wara anzoni kamarade.” Mbeni ita-koli so iri ti lo Rich atene: “Mbi bâ kua ti bango ndo na ndö ti mbeni groupe ti fango tënë tongana mbeni kota pasa. Aita ayeke mû maboko na mbeni zo ti gue na li ni ti wara batême, me ita so ayeke bâ ndo na ndö ti groupe ti fango tënë ayeke na pasa so ayeke nde ti mû maboko na zo ni ti kpengba songo ti lo na Jéhovah na yâ ti angu mingi so ayeke ga.” Mbeni ita-wali so iri ti lo ayeke Dinah atene: “Ti duti na yâ ti mbeni groupe ti fango tënë ayeke pendere mingi. Mbi bâ groupe ti mbi tongana sewa ti mbi.”

3. Nyen la e yeke sara tënë na ndö ni na yâ ti article so?

³ Na yâ ti article so, e yeke sara tënë kozoni na ndö ti kua ti ita so ayeke mû li ni na yâ ti groupe ti fango tënë nga na ita so ayeke mû maboko na lo; nga e yeke bâ tongana nyen la ala yeke bâ lege ti aita so ayeke na yâ ti groupe ti ala. Na pekoni, e yeke sara tënë na ndö ti aye so e oko oko e peut ti sara ti mû maboko na aita so ayeke na yâ ti groupe ti e. Na nda ni, e yeke bâ anzoni ye so e wara na lege ti groupe ti fango tënë.

SURVEILLANT TI GROUPE TI FANGO TËNË NA ADJOINT TI LO

4. (a) Kua ti surveillant ti groupe ti fango tënë ayeke nyen? (b) Tongana nyen la surveillant ti groupe ti fango tënë ayeke bâ lege ti azo so ayeke na yâ ti groupe ti lo? (Bâ encadré “Awango ndali ti surveillant ti groupe.”)

⁴ Surveillant ti groupe ti fango tënë adoit ti duti mbeni ancienb so bungbi ti a-ancien la asoro lo ti aidé aita so ayeke na yâ ti groupe ti fango tënë ti lo ti kpengba songo ti ala na Jéhovah. Lo yeke sara ni tongana nyen? Kozoni, lo yeke fa so lo pensé na ita oko oko kue so ayeke na yâ ti groupe ti lo (aProv. 27:23). Surveillant ti groupe ti fango tënë adoit ti hinga aita ti groupe ti lo nzoni nga lo yeke sara lisoro na ala lakue ti hinga dutingo ti ala. Tongana lo sara tongaso, lo peut ti aidé ala ti ngbâ nduru na Jéhovah. Lo peut ti fa so lo ye ala na ngoi so ala gi bê ti ala wala ala yeke na vundu nga lo peut ti sara ambeni ye ti aidé ala (aProv. 12:25; És. 32:2; Jacq. 2:​15-17). Use ni, lo yeke aidé wafango tënë oko oko kue ti fa tënë mingi. Lo yeke sara kue ti fa tënë na groupe ni yenga oko oko. Lo yeke sara nga kue ti tene lakue lo fa tënë na ita oko oko so ayeke na yâ ti groupe ni tongaso si lo peut ti kpengba ala nga ti aidé ala ti ga anzoni wafango ye. Tongana lo yeke duti dä ape, lo yeke sara kue ti tene adjoint ti lo wala mbeni wafango tënë so alingbi amû li ni na bungbi ti fango tënë. Ota ni, lo yeke aidé aita-koli so awara batême awe ti gi ti sara akua na yâ ti congrégation (1 Tim. 3:1). Lo yeke gonda aita na bê ti lo kue, lo yeke mû na ala awango ti Bible nga lakue lo yeke fa ye na aita-koli ti aidé ala ti ga awakua ti mungo maboko wala a-ancien. So kua ti surveillant ti groupe ayeke kota kua mingi, a yeke nzoni bungbi ti a-ancien asoro a-ancien so alingbi si asara kua ni.

5. Akpale wa la ambeni surveillant ti groupe awara?

⁵ Na ngoi so mbeni surveillant ti groupe ayeke bâ lege ti aita ti groupe ti lo, lo peut ti wara akpale. Bâ tapande ti Jörg so ayeke mbeni surveillant ti groupe na Allemagne. Legeoko tongana ti mingi ti a-ancien, lo doit ti bâ lege ti gbâ ti akua na yâ ti congrégation. Lo tene: “Ti duti surveillant ti groupe nga ti bâ lege ti ambeni kua na yâ ti congrégation ayeke kete ye ape. A sara si a yeke ngangu na mbi ti tene mbi sara lisoro na aita kue ti groupe ti mbi.” Abel, so ayeke na ngu 70, so ayeke ancien na Ouganda atene: “A-ancien nga na awakua ti mungo maboko ayeke mingi ape na yâ ti congrégation ti e. A sara si na yâ ti agroupe ti fango tënë, wungo ti aita ayeke mingi. Tongaso, a yeke ngangu na mbi ti fa tënë na wafango tënë oko oko kue nga ti kpengba lo fani mingi tongana ti so mbi ye.” Obed, so ayeke ancien na Suriname, atene: “Mbi ye mingi ti fa ye na azo. Me ti sara ni, a hunda ngoi nga na ngangu na a yeke bâ aye ti peko ni lakue hio ape. A sara si mingi ni mbi yeke fa ye na aita ape ndali ti so mbi mû ngoi mingi ti bâ lege ti ambeni ye nde.” Nyen la apeut ti aidé a-ancien so awara akpale so nga na ambeni nde?

6. Tongana aita ayeke mingi ape na yâ ti agroupe, tongana nyen la ayeke aidé asurveillant ti groupe ni ti bâ lege ti aita so ayeke na yâ ni?

⁶ Tongana lege ayeke dä, a yeke nzoni aita aduti mingi ape na yâ ti agroupe ti fango tënë tongaso si asurveillant ni apeut ti hinga ala nzoni nga ti aidé ala ti duti na kpengba songo na Jéhovah. Ka tongana a-ancien ayeke mingi ape na yâ ti congrégation? Tongana aita ayeke mingi na yâ ti mbeni groupe ti fango tënë, a yeke duti ngangu na surveillant ti groupe ni ti sara kua ti lo nzoni. Tongaso, bungbi ti a-ancien apeut ti soro mbeni wakua ti mungo maboko ti bâ lege ti mbeni groupe teti mbeni ngoi. Tongana ala sara tongaso, surveillant ti groupe ni ayeke wara lege ti sara kota kua so ayeke ti aidé aita ti duti na kpengba songo na Jéhovah nga ti gbu ngangu na yâ ti akpale.

7. Na yâ ti acongrégation so a-ancien ayeke mingi ape, nyen la asurveillant ti groupe apeut ti sara ti bâ lege ti aita kue ti groupe ti ala nzoni? (1 Pierre 5:2). (Bâ nga foto.)

⁷ Tongana mo yeke surveillant ti groupe na yâ ti congrégation so a-ancien ayeke mingi ape, mû ngoi mingi ti fa kua na adjoint ti mo ti aidé mo ti bâ lege ti aita ti groupe ti mo. (Diko 1 Pierre 5:2.) Mû ambeni kua na adjoint ti mo. Na tapande, ngoi na ngoi mo peut ti hunda na lo ti mû li ni na bungbi ti fango tënë. A yeke nga kota ye ti sara lisoro na lo ti bâ tongana nyen la ala peut ti aidé aita ti groupe ni ti maï kode ti ala ti fango tënë nga ti ngbâ nduru na Jéhovah. Lakue tongana mo gue ti sara vizite na aita, mû adjoint ti mo na terê ti mo. Kozo na vizite ni, fa na lo ye so ala yeke gue ti sara, na pekoni gonda lo ndali ti anzoni ye so lo sara nga fa na lo aye so lo doit ti changé ni. A si na mbeni ngoi, adjoint ti mo ni apeut ti ga mbeni surveillant ti groupe (2 Tim. 2:2). Mo peut nga ti hunda na ambeni ita so akpengba ti aidé ambeni ita ti fa tënë nzoni. Apionnier nga na aita so afa tënë aninga mingi awe apeut ti fa tënë legeoko na afini wafango tënë nga na aita so ayeke na kode mingi ape. Ala peut ti fa na ala tongana nyen ti to nda ti lisoro, ti sara avizite nga ti manda Bible na azo. Fadeso, zia e bâ aye ota so e peut ti sara ti kpengba aita ti groupe ti e.

AYE SO MO PEUT TI SARA TI KPENGBA AITA TI GROUPE TI MO

8. Nyen la e peut ti sara ti kpengba aita ti groupe ti e? (aRomain 1:12).

⁸ Fa tënë na aita ti groupe ti mo. Tongana mo na aita ti groupe ti mo afa tënë, ala yeke ‘wa terê na popo ti ala’. (Diko aRomain 1:12.) Tongana mo na aita afa tënë, mbeto ayeke sara mo mingi ape ti sara lisoro na azo nga mbeto ayeke sara mo ape ti fa tënë na ando so kpale apeut ti si na zo dä. Tongana kua ti mo akanga lege na mo ti gue na bungbi ti fango tënë na groupe ti mo, eskê mo peut ti hunda patron ti mo ti changé kapa ti kua ti mo? Li ti mo apeut ti kpe na kiringo tënë ti lo (Néh. 2:​4-6). Tongana ngu ti mo ague na li ni wala mo yeke na mbeni kpale ti seni so asara si a yeke ngangu na mo ti gue na bungbi ti fango tënë ti groupe ti mo, sara tënë ni na surveillant ti groupe ti mo. Lo peut ti leke ti tene mo sara bungbi ti fango tënë na lege ti vidéoconférence nga mo fa tënë na lege ti alettre wala téléphone. Eskê mo yeke maseka nga na nzoni seni, me a yeke ngangu na mo ti fa tënë lakue? Tongana a yeke tongaso, leke ti fa tënë na mbeni zo ti groupe ti fango tënë ti mo yenga oko oko. A yeke nzoni mo gbu li na ndö ti ye so ayeke kota ye mingi na yâ ti gigi ti mo nga bâ tongana nyen la mo peut ti sara kua nzoni na ngoi ti mo (aRom. 12:11; aCol. 4:5). Tongana mo sara effort ti fa tënë lakue na aita ti groupe ti mo, zo kue ayeke bâ nzoni dä. Sambela Jéhovah. Lo peut ti mû na mo ‘nzara nga na ngangu ti sara ni’.—aPhil. 2:13.

9. Tongana nyen la e peut ti sara si aita ti groupe ti e abâ so ala yeke afami? (aRomain 12:13).

⁹ Duti zo so ayamba azo. Tongana e yamba aita ti groupe ti e, ala yeke bâ so a ye ala. (Diko aRomain 12:13.) Na tapande, e peut ti yeda ti tene a sara bungbi ti fango tënë na ndo ti e. Na yâ ti ambeni congrégation, agroupe ti fango tënë ayeke yamba ita so aga ti sara diskur tour na tour. Ti ambeni groupe, tongana a yeke tour ti ala ti yamba ita ni, ala yeke leke ti te ye ndo oko nga ti kpengba mba même tongana ita so aga ti sara diskur ni apeut ti ga ape. Sarah, so ayeke pionnier spécial, atene: “Ti yamba aita na ndo ti mbi ayeke sara ka si mbi gi bê ti mbi mingi, tongaso mbi sara aye so ayeke simple. Mbi gi ti zia li ti mbi na ndö ti gingo ti hinga aita nzoni ahon ti zia li ti mbi na ndö ti tongo gbâ ti aye.” Tongana e sara si aita ti groupe ti fango tënë ti e abâ terê tongana afami, e yeke ga nduru mingi na Jéhovah nga na amba ti e.—Néh. 8:10; Kus. 20:35.

10. Nyen la e peut ti sara ti fa tënë nga ti fa ye nzoni mingi? (aProverbe 1:5; 27:17). (Bâ nga foto.)

¹⁰ Gi ti ga zo so ahinga ti fa tënë nga ti fa ye nzoni. Tongana e yeke fa tënë nga e yeke fa ye nzoni mingi, e yeke ye mingi ti fa tënë na aita ti groupe ti e. Eskê mbeni mbage ti fango tënë ayeke dä so mo ye ti maï ni? Mo peut ti hunda mbeni zo ti aidé mo, peut-être mo peut ti hunda mbeni pionnier wala mbeni ita so ahinga ti fa tënë nzoni mingi ti aidé mo. (Diko aProverbe 1:5; 27:17.) Fa na surveillant ti groupe ti mo ye so mo leke ti si dä, lo peut ti aidé mo ti si dä. Mo peut ti hunda nga ambeni ita ti aidé mo. A yeke ye so mbeni ita-wali so iri ti lo Heather asara lani. Atâa so lo yeke kamene, lo tene: “Mbi hunda lani mbeni pionnier ti aidé mbi ti hinga ti sara avizite. Lo ye azo nga lo yeke sara ye na nzoni bê na lo leke ti tene lakue mbi na lo e fa tënë. Lo aidé même lani mbi ti komanse ti manda Bible na mbeni vizite ti mbi. Mbi yeke na ngia mingi so mbi hunda lani lo ti aidé mbi ndali ti so mbi kiri mbi ye mingi ti fa tënë.” A yeke polele so e peut ti aidé aita ti groupe ti e na alege mingi.

ANZONI YE SO MO PEUT TI WARA NA MBAGE TI AITA TI GROUPE TI MO

11-12. Anzoni ye wa la mo peut ti wara na lege ti aita ti groupe ti fango tënë ti mo? Fa mbeni ye so asi.

¹¹ E yeke ngbâ nduru na Jéhovah. E kue e peut ti wara aye ti nzoni na mbage ti aita ti groupe ti e. Na tapande, surveillant ti groupe ti e apeut ti sara vizite na azo so Jéhovah aye ala mingi tongana awali-mua, amolenge so babâ na mama ti ala ayeke dä ape nga na ambakoro ti kpengba ala na ngoi so ala wara akpale (1 aThes. 2:8; Jacq. 1:27). Tongana e fa tënë legeoko na aita ti groupe ti e, e yeke fa tënë nga e yeke fa ye nzoni mingi. A peut ti fa ye na aita-koli so awara batême awe ti sara gbâ ti akua na yâ ti congrégation ti aidé azo kue.—1 Tim. 3:10.

¹² Bâ tongana nyen la aita ti groupe ti Wendy, so e sara tënë ti lo fade, a-aidé lo. Lo tene: “So babâ ti mbi aye tâ tënë ape, a yeke ka ngangu ti tene mbi na mama ti mbi e fa tënë na anda-yenga na aita ti groupe ti e. Me lo mû lani lege na mbi ti gue. Mbeni pionnier so ngu ti lo ahon ti mbi amû mbi na terê ti lo nga lo aidé mbi ti maï akode so a-aidé mbi na fango tënë nga na yâ ti congrégation. Mbi dabe ti mbi so fani mingi surveillant ti groupe ti mbi amû na mbi awango ti Bible so a-aidé mbi juska laso.”

13. Tongana nyen la e peut ti ga akota kamarade ti aita ti groupe ti e? (Bâ nga foto .)

¹³ Akamarade. Tongana e na aita ti groupe ti e e fa tënë “na terê ti mba”, e yeke ye terê mingi (aPhil. 1:27). So wungo ti e ayeke mingi ape na yâ ti groupe ti e, a peut ti duti ngangu ape ti ga kamarade ti azo so ayeke ka kamene wala so mbeto ti gbâ ti azo asara ala (2 aCor. 6:13). E peut ti zia bê ti e na akamarade ti e ti aidé e na ngoi ti akpale. Na tapande, na ngoi so terê ti e ason, vundu asara e wala e perdre mbeni zo so e ye lo mingi (1 aThes. 5:14). Kite ayeke dä ape so tongana kota ye ti vundu ayeke pusu nduru, e yeke ande na bezoin ti anzoni kamarade (Mat. 24:21). Peut-être akpale ti e ayeke hon ape, me e peut ti gbu lê ni tongana e hinga so e peut ti zia bê ti e na ndö ti aita so aye e nga so ayeke mû maboko na e.—aProv. 17:17.

14. Tongana nyen la aita ti groupe ti e apeut ti aidé e na ngoi ti akota kpale wala na ngoi so a bezoin ti sara ye hio?

¹⁴ Ala yeke aidé e na ngoi ti akpale. Aita ti groupe ti e apeut ti aidé e na ngoi so akota kpale asi. Akpale tongana ngu so asuku amû ndo wala sese so ayengi, sioni kobela so ayeke mû ndo, sarango ye ti ngangu na zo nga na kpale ti nginza. Tongana akpale tongaso asi, asurveillant ti groupe ayeke nduru ti aidé e. Na tapande, tongana mbeni kota kpale asi, ala yeke gi ti iri asewa oko oko ti groupe ti ala ti hinga ndo so ala yeke dä nga ti hinga aye so ala bezoin ni, na tapande, yorö, kobe, ngu, ndo ti lango wala bongo. Tongana surveillant ni ahinga bezoin ti ala, lo peut ti aidé ala. Nga lo yeke sara lisoro na Komite ti kusala ti congrégation ti hinga wala azo ti groupe ti lo abezoin ambeni ye encore na ala yeke leke tongana nyen ti aidé ala. Aita ti groupe ti mo ayeke aidé mo biani tongana mbeni kota kpale asi wala tongana mo bezoin ti tene a aidé mo hio.

15. Nyen la e kue so e yeke voro Jéhovah e ye?

¹⁵ Tongana ti so e tene fade, bungbi ti Jéhovah akono mingi. Gï mbage ni so ayeke na yayu, a yeke wara na yâ ni a-ange kutu mingi wala milliard mingi so ayeke be-ta-zo. Mbage ni so ayeke na sese, wungo ti azo so ayeke na yâ ni ahon kutu gumbaya na wungo ti ala angbâ ti gue na li ni (Zach. 8:23; Apoc. 5:11). Atâa na yayu wala na sese, e awakua ti Jéhovah kue e ye ti tene gbâ ti azo amä nzoni tënë ti Royaume ti Nzapa (Apoc. 14:​6, 7). Zia e kue e bâ nzoni na lege ti agroupe ti fango tënë ti e so ayeke aidé e ti gonda Jéhovah Nzapa ti e na bê ti e kue.—Ps. 111:1.