Kpe mbeto ti Nzapa mingi tongana Abdias

Abdias ayeke lani zo ti kua ti sioni Gbia Achab so azia si sioni vorongo Baal amû yâ ti kodro ti Israël kue. Me Abdias akpe mbeto ti Jéhovah ‘ngbene ye so lo de maseka.’ (1 aGbia 18:​1-13). Tongaso, na ngoi so Gbia-wali Jézabel amû yanga ti tene a fâ aprophète ti Jéhovah kue, Abdias abâ so lo doit ti sara ye sân mbeto ti tene sioni ye so asi ape. Ti honde mbeni prophète oko apeut lani ti ga na kpale; me Abdias ahonde ala 100 na lo yeke ga na ala kobe na ngoi ti mbeni kota nzara. Imaginé tongana nyen la a yeke lani ngangu ti sara ni sân ti tene aprophète ti wataka ngbangbo mingi, so ayeke sara na gbia nga na gbia-wali, abâ lo.—1 aGbia 18:19.

Nyen la e peut ti manda na lege ti tapande ti koli so akpe mbeto ti Nzapa so? Atâa so Abdias asara mbeto ti Achab, lo kpe mbeto ti Nzapa mingi ahon lo. A sara si sân mbeto, lo zia fini ti lo na lê ti kuâ ti bata aita ti lo. Tongana a kanga lege na kua ti e na ndo so mo yeke dä, mo nga kue mo peut ti manda ti kpe mbeto ti Nzapa mingi. Mara ti kpengo mbeto tongaso ayeke mû na e ngangu ti aidé aita ti e so ayeke na yâ ti akpale.