Atënë so azo ahunda

Lawa la amara ayeke tene ande “siriri na nzoni duti ayeke dä”?

Tongana ti so e bâ na yâ ti “Atënë so azo ahunda” so asigi na yâ ti Tour ti Ba Ndoa ade ti ninga ape, fafadeso Jéhovah ayeke zia na bê ti “adidi bale-oko” (agouvernement kue ti dunia) “ye so ayeke na bê ti lo”, so ayeke ti tene ala mû ngangu nga na komandema ti ala na “bengba nyama ti ngonda” ni, so ti tene Bendo ti gigi. A iri nga nyama ti ngonda so “statue ti nyama ti ngonda ni”. (Apoc. 13:​14, 15; 17:​3, 16, 17). Na pekoni, “adidi bale-oko” ni nga na nyama ti ngonda ni so akiri awara ngangu ayeke futi abungbi ti vorongo nzapa ti wataka na yâ ti dunia kue. Eskê amara ayeke tene ande “siriri na nzoni duti ayeke dä”b kozo wala na peko ti so a futi abungbi ti vorongo nzapa ti wataka?—1 aThes. 5:3.

Na nduru tënë, e hinga ape lawa la amara ayeke tene ande “siriri na nzoni duti ayeke dä”. Tongana e hinga anzene nzene tënë kue na ndö ni, e yeke duti na bezoin ape ti tene lê ti e akpengba. Me fani mingi, Jésus awa adisciple ti lo ti “lango pëpe”. (Mat. 24:42; 25:13; 26:41). Fadeso, zia e gbu li nzoni na ndö ti prophétie so bazengele Paul atene na yâ ti lettre ti lo na aChrétien ti Thessalonique.

Paul atene: “Na ngoi so azo ni ayeke tene: ‘Siriri na nzoni duti ayeke dä!’ mo ye ti bâ, futingo ayeke ga gï hio tongaso na ndö ti ala.” (1 aThes. 5:​2, 3). Fani mingi, ambeti ti e afa nda ti tënë ti Paul so tongaso: Amara ayeke tene ande “siriri na nzoni duti ayeke dä” ngoi kete kozo na kota ye ti vundu, so ayeke komanse na futingo Babylone, Ngangu gbata, so ti tene abungbi ti vorongo nzapa ti wataka ti dunia kue. E tene nga lani so tongana amara atene tënë so, andâ kota ye ti vundu aga nduru ti komanse awe.

Me na peko ti so e gbu li nzoni na ndö ti tënë ni, na bango ni mbeni fason nde ti mä yâ ni ayeke dä. Peut-être amara ayeke tene ande “siriri na nzoni duti ayeke dä” na peko ti so a futi abungbi ti vorongo nzapa ti wataka kue. Ngbanga ti nyen la a peut ti duti tongaso? Gbu li na ndö ti ahunda so.

Tongana nyen la abungbi ti vorongo nzapa ti wataka amû maboko na yâ ti abira so a sara na ndö ti sese? Bible atene: “A wara na yâ ti lo [“kota wali-ndumba”, Babylone, Ngangu gbata] mênë ti . . . azo kue so a fâ ala na ndö ti sese.” (Apoc. 17:​1, 5; 18:24). Na yâ ti mbaï ti azo, kota wali-ndumba so amû maboko na abira so amara asara nga lo sara si a sara ye ti ngangu na azo kutu mingi nga même a fâ ala. Tongaso lo yeke na gunda ti bira nga na sarango ye ti ngangu na zo, me siriri na nzoni duti ape. A sara si hunda so alondo: Eskê amara ayeke tene ande “siriri na nzoni duti ayeke dä” gï na peko ti so a futi Babylone, Ngangu gbata? A peut ti duti tongaso. Me e hinga ape.

Nyen la ayeke si na peko ti so amara atene “siriri na nzoni duti ayeke dä”? Paul atene: “Futingo ayeke ga gï hio tongaso na ndö ti ala.” (1 aThes. 5:3). Tongana akota zo ti poroso atene “siriri na nzoni duti ayeke dä” na peko ti so a futi abungbi ti vorongo nzapa ti wataka, na pekoni a yeke futi amara kue gï hio tongaso.

Awakua ti Jéhovah ayeke sara ande ye tongana nyen na ngoi so aye so lo sara tënë ni asi? Paul atene: “Aita, ala yeke na yâ ti bingo pëpe, si lango ni so anzi ala nzingo tongana ti so kota lâ ayeke nzi azo ti nzi.” (1 aThes. 5:4). Gbu li na ndö ti ye so: Tongana a tene “siriri na nzoni duti ayeke dä” na peko ti so a futi abungbi ti vorongo nzapa ti wataka, awakua ti Jéhovah ayeke hinga so a ga nduru awe ti futi amara. Me ti amara, futingo ni ayeke ga tongana zo ti nzi, so ti tene, a yeke si gï hio tongaso sân ti tene ala hinga.

Mbeni ye ayeke dä so e hinga ni nzoni. Fafadeso, “adidi bale-oko” nga na nyama ti ngonda ni so ayeke na ngangu ayeke futi abungbi ti vorongo nzapa ti wataka. Ye so ayeke duti ande tongo nda ti kota ye ti vundu. E hinga nga so a si na mbeni ngoi, a yeke tene “siriri na nzoni duti ayeke dä”. Ye so ayeke si ande lawa? E sara fade tënë ti angoi use. Kozo ngoi ni: A yeke tene tënë so kozo si a futi abungbi ti vorongo nzapa ti wataka. Use ngoi ni: A yeke tene tënë so na peko ti so akota zo ti poroso afuti biani biani abungbi ti vorongo nzapa ti wataka. E yeke ku ti bâ ye so ayeke passé ande. Mingi ni a yeke mä yâ ti aprophétie ti Bible nzoni na ngoi so angbâ ti ga tâ tënë wala na peko ti so aga tâ tënë.—Bâ Jean 12:16.

Ti ku na ngoi ni so, ye so ayeke kota ye mingi na lê ti e ayeke pëpe ngoi so a yeke tene “siriri na nzoni duti ayeke dä” me a yeke ti duti be-ta-zo na Nzapa. E doit ti “zia lê ti e angbâ na zingo ni na e zia li ti e kpô” tongaso si e leke terê ti e atâa ngoi wa la aye ni asi na ni.—1 aThes. 5:6.