Nyen la mo peut ti sara ti vivre na yâ ti fini dunia?

Na yâ ti a-article so ahon afa so na yâ ti kete ngoi Nzapa ayeke futi azo ti sioni nga lo yeke zi akpale kue. E yeke sûr so ye so ayeke si ande. Ngbanga ti nyen? A yeke ngbanga ti so Bible la amû zendo ni:

“Dunia so angbâ ti hon.”—1 JEAN 2:17.

E yeke sûr so azo ayeke sö kuâ ande ndali ti so versê ni akiri atene:

“Zo so asara ye so bê ti Nzapa aye, lo ngbâ lakue lakue.”

Tongaso, tongana e ye ti sö kuâ, e bezoin ti sara ye so bê ti Nzapa aye. Ti sara ye so bê ti Nzapa aye, e doit kozoni ti hinga lo.

TI SÖ KUÂ NA NGOI TI NDA NI A LINGBI E “GI TI HINGA” NZAPA

Foto: 1. Mbeni infirmière ayeke duti na sese na yâ ti hôpital, lo fatigué nga lo découragé. 2. Lo yeke na yâ ti cafétéria ti hôpital ni na lo bâ mba ti lo so ayeke diko mbeni périodique na ngia. 3. Mba ti lo ni adiko mbeni versê ti Bible na lo nga lo mû na lo carte ti jw.org.

Jésus atene: “Ti wara fini ti lakue lakue, a lingbi ala gi ti hinga mo, mo oko tâ Nzapa.” (Jean 17:3). Ti sö kuâ na ngoi ti nda ni nga ti tene e wara fini ti lakue lakue, e bezoin ti “gi ti hinga” Nzapa. A yeke gï pëpe ti hinga so Nzapa ayeke dä wala ti hinga gï ye kete na ndö ti lo. E bezoin ti ga akamarade ti lo. Tongana e ye ti tene songo ti e na akamarade ti e akpengba, e bezoin ti mû ngoi ndali ti ala. Ti sara kamarade na Nzapa ayeke nga tongaso. Bâ ambeni kpengba tâ tënë so e manda na yâ ti Bible so a-aidé e ti ngbâ ti kpengba songo ti e na Nzapa.

Atâ tënë so e manda na yâ ti Bible

E manda so Nzapa aleke lani ti tene e vivre na yâ ti Paradis.

Nzapa aleke Adam na Ève, na lo zia ala lani na yâ ti mbeni pendere ndo so a iri ni yaka ti Éden. Ala yeke lani mbilimbili-kue nga Nzapa amû na ala aye kue so ala yeke na bezoin ni tongaso si ala duti na ngia na yâ ti fini ti ala. Ala lingbi ti ngbâ na fini lakue lakue. Tongana ala ngbâ lani akamarade ti Nzapa, ala peut fade ti kui ape. Me, ala soro ti ke yanga so Nzapa amû na ala.

E manda ye na ndö ti ndani so e yeke bâ pasi.

So Adam ake yanga ti Nzapa, lo perdre pasa ti vivre teti lakue lakue so lo nga na azo ayeke na ni. Bible atene so: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue.” (aRomain 5:12). Gï tongana ti so mbeni zo apeut ti wara kobela na lege ti babâ na mama ti lo, amolenge ti Adam kue awara siokpari na lege ti lo. Ye ti peko ni ayeke so, e yeke ga mbakoro na e kui.

E manda so Nzapa asara déjà awe mbeni ye ti aidé e.

Bible atene: “Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.” (Jean 3:16). Nzapa atokua lani Jésus na sese ti mû fini ti lo ndali ti e. Mbeni koli so ayeke na ngu 86 so iri ti lo ayeke Prabhakar na Inde atene: “Ye so Jéhovaha asara so afa so lo ndoye mbi mingi. Ndoye ti lo amû na mbi beku ti fini ti lakue lakue.”

E manda tongana nyen la e peut ti kiri singila na Nzapa ndali ti ye so lo sara na e.

Bible atene so e peut ti kiri singila na Nzapa ndali ti ye so lo sara na e na lege so e yeke “bata acommandement ti lo.” (1 Jean 2:3). Na ndoye, Jéhovah Nzapa afa na e ye so e peut ti sara ti duti na ngia laso (Ésaïe 48:17, 18, kete tënë na gbe ni). Nzapa aye ti tene e bâ pasi ape. Lo tene so tongana e sara ye alingbi na fango ye ti lo, e yeke wara ngia gï laso ape me e yeke nga na pasa ti wara fini ti lakue lakue.

DIKO BIBLE LÂ OKO OKO

Infirmière ni ayeke na gigi na lo bâ ndo na lê ti nduzu na peko ti so lo diko Bible na temps ti pause. — Mo peut ti sö kuâ na hunzingo ti dunia so na lege so mo yeke sambela Nzapa ti aidé mo ti sara ye so lo ye

E yeke te kobe lakue ti ngbâ na fini. Me, Jésus atene: “Zo ayeke ngbâ na fini gï na lege ti mapa pëpe, me na lege ti tënë kue so asigi na yanga ti Jéhovah.”—Matthieu 4:4.

Laso, e yeke wara atënë ti Jéhovah na yâ ti Bible. Tongana mo yeke manda Bible, mo yeke hinga ye so Nzapa asara ândö, ye so lo yeke sara laso, nga ye so lo yeke sara ande.

SAMBELA NZAPA TI MÛ MABOKO NA MO

Nyen la mo peut ti sara tongana mo ye ti mä yanga ti Nzapa, me mo bâ so ayeke ngangu na mo ti zia lege ti aye so lo tene ayeke sioni? Tongana ayeke tongaso, ti gi ti hinga Nzapa ayeke aidé mo mingi.

Bâ tapande ti mbeni wali so iri ti lo ayeke Sakura, lo yeke wali so ayeke gi lani akoli kirikiri. Na temps so lo komanse ti manda Bible, lo manda ye na ndö ti commandement ti Nzapa so ahunda ti “kpe yongoro na lango-sioni”. (1 aCorinthien 6:18). Sakura asambela lani Nzapa ti wara ngangu na lo wara lege ti zia sioni sarango ye so. Me lo doit ti ngbâ ti sara ngangu ti hon ndö ti atara. Lo tene: “Tongana mbi wara pensé ti sarango lango-sioni, mbi sara tënë ni polele na Jéhovah na yâ ti sambela, ndali ti so mbi hinga so mbi peut ti hon ndö ni mbi oko ape. Sambela asara si mbi ga nduru mingi na Jéhovah.” Tongana ti Sakura, azo kutu mingi ayeke gi ti hinga Nzapa. Lo mû na ala ngangu so ala bezoin ni ti sara achangement na yâ ti fini ti ala nga ti vivre na fason so anzere na lo.—aPhilippien 4:13.

Tongana mo gi ti hinga Nzapa nzoni, ‘biani Nzapa ayeke hinga mo’ tongana mbeni nzoni kamarade (aGalate 4:9; Psaume 25:14). Na pekoni, mo yeke sö ande kuâ ti lï na yâ ti fini dunia ti Nzapa. Me, fini dunia ni ayeke duti ande tongana nyen? Article so ayeke ga na peko ayeke fa ni.

a Jéhovah ayeke iri ti Nzapa so ayeke na yâ ti Bible.