Zia ala ndoye terê ngangu mingi

1. Commandement wa la Jésus amû polele na adisciple ti lo? (Bâ foto ti couverture ni.)

NA BÏ so na ndade ni Jésus akui, lo mû mbeni commandement polele na adisciple ti lo. Lo tene na ala: “Legeoko tongana ti so mbi ndoye ala, zia ala nga ala ndoye terê na popo ti ala.” Na pekoni, lo kiri lo tene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.”—Jean 13:34, 35.

2. Ngbanga ti nyen la a yeke kota ye ti ndoye terê na popo ti e?

² Jésus atene lani so azo ayeke hinga atâ disciple ti lo polele tongana ala ndoye azo tongana ti so lo sara lani. Tënë so ayeke lani tâ tënë na ngoi ti akozo Chrétien, na a yeke nga tâ tënë laso. A yeke kota ye mingi ti tene e hon ndö ti akpale kue na e ndoye terê na popo ti e!

3. Nyen la e yeke bâ na yâ ti article so?

³ So e yeke mbilimbili-kue ape, a yeke kete ye ape ti ye amba ti e ngangu mingi. Me a lingbi e gi ti mû tapande ti Christ. Na yâ ti article so, e yeke bâ tongana nyen la ndoye ayeke mû maboko na e ti duti azo so asara si siriri amaï, azo so azia kangbi na popo ti azo ape nga azo so ayamba azo. Na ngoi so e yeke manda article ni, hunda terê ti mo: ‘Nyen la mbi lingbi ti manda na lege ti aita so angbâ ti ndoye terê na popo ti ala atâa akpale?’

DUTI ZO SO ASARA SI SIRIRI AMAÏ

4. Ti gue oko na Matthieu 5:23, 24, ngbanga ti nyen la e doit ti gi ti duti na siriri na mbeni ita so ayeke na mbeni tënë na terê ti e?

⁴ Jésus afa na e so a yeke kota ye ti gi ti duti na siriri na mbeni ita ti e so ayeke na mbeni tënë na terê ti e. (Diko Matthieu 5:23, 24.) Lo tene so tongana e ye ti nzere na lê ti Nzapa, a yeke kota ye ti ngbâ ti duti na nzoni songo na amba ti e. Tongana e sara kue ti duti na siriri na aita ti e, Jéhovah ayeke duti na ngia. Tongana e ngbâ ti sara ngonzo na terê ti mbeni zo nga e ke même ti gi ti duti na siriri na zo ni, vorongo so e voro na lo ayeke nzere na lo ape.—1 Jean 4:20.

5. Nyen la asara si a yeke ngangu na mbeni ita-koli ti duti na siriri na mbeni mba ti lo?

⁵ Peut-être a yeke ngangu na e ti gi ti duti na siriri na mbeni zo. Ngbanga ti nyen? Bâ ye so asi na Mark.b Bê ti lo ason na ngoi so mbeni ita-koli akasa lo nga adiko sioni tënë na terê ti lo na aita ti congrégation. Mark asara ye lani tongana nyen? Lo tene: “Mbi kanga lani bê ape nga ngonzo asara mbi.” Me na pekoni, Mark aregretté ye so lo sara na lo gi ti hunda pardon na ita ni nga lo gi ti tene siriri akiri na popo ti lo na ita ni. Me ita ni so aye pëpe ti duti na siriri na Mark. Na tongo nda ni, Mark atene: ‘Lo ye ti tene e leke tënë ape, ngbanga ti nyen la mbi doit ti gi ti duti na siriri na lo?’ Ye oko, surveillant ti circonscription awa lo ti ngbâ ti gi ti duti na siriri na ita ni. Nyen la Mark asara lani?

6. (a) Tongana nyen la Mark agi ti duti na siriri na mbeni ita? (b) Tongana nyen la Mark asara ye alingbi na aColossien 3:13, 14?

⁶ Tongana Mark agbu li na ndö ti bango ndo ti lo, lo bâ so lo sara terê ti lo kete ape nga lo sara ye mo bâ mo tene lo yeke mbilimbili ahon ita ni. Lo ga ti hinga so a lingbi lo changé bango ndo ti lo (aCol. 3:8, 9, 12). Lo sara terê ti lo kete lo kiri lo gue lo bâ ita-koli ni na lo hunda pardon ndali ti ye so lo sara. Mark asû nga alettre na ita-koli ni, lo tene so vundu asara lo mingi nga lo ye mingi ti tene ala kiri ala duti akamarade. Mark amû même na ita ni akete kete cadeau so lo pensé so ita ni ayeke ye ni. Mawa ni ayeke so ita ni angbâ ti bata tënë na bê ti lo na terê ti Mark. Ye oko, Mark angbâ ti sara ye alingbi na commandement ti Jésus ti ye ita ti lo nga ti pardonné lo. (Diko aColossien 3:13, 14.) Même tongana azo ayeda pëpe na a-effort so e sara ti duti na siriri na ala, ndoye ti e ti tâ Chrétien ayeke mû maboko na e ti ngbâ ti pardonné ala nga ti ngbâ ti sambela ti kiri ti duti na siriri na ala.—Mat. 18:21, 22; aGal. 6:9.

7. (a) Nyen la Jésus awa e ti sara? (b) Kpale wa la mbeni ita-wali awara?

⁷ Jésus awa e ti ngbâ ti sara ye na amba ti e tongana ti so e ye a sara na e. Lo kiri lo tene so a lingbi e ndoye gï pëpe azo so andoye e (Luc 6:31-33). Atâa so a yeke si ka hio hio ape, nyen la mo yeke sara tongana mbeni zo na yâ ti congrégation ayeke kpe mo kpengo nga lo ke ti bara mo? A yeke ye so asi lani na Lara. Lo tene: “Mbeni ita-wali asara sanka ti mbi, na mbi hinga ndani ape. A sara si mbi gi bê ti mbi ngangu nga guengo na bungbi anzere na mbi ape.” Na tongo nda ni, Lara atene: ‘Faute ni ayeke ti mbi ape. Na ndö ni kue, aita ti congrégation nga abâ sarango ye ti ita-wali ni so zo agi li ti lo na ni gbä.’

8. Nyen la Lara asara ti duti na siriri na mbeni ita-wali? Nyen la e lingbi ti manda na lege ti ye so asi na lo?

⁸ Lara asara mbeni ye ti tene lo na ita ni aduti na siriri. Lo sambela Jéhovah nga lo mû desizion ti sara lisoro na ita ni. Ala sara lisoro na ndö ti kpale ni, ala gbu mba na kate nga ala kiri ala duti na siriri. Na bango ni, ye kue aga lani nzoni awe. Lara atene: “Me mbeni ngoi na pekoni, ita ni akiri asara na mbi oko ye so lo sara lani. Mbi découragé ngangu.” Na tongo nda ni, Lara abâ so lo lingbi ti duti na ngia gï tongana ita ni achangé bango ndo ti lo. Me na nda ni, Lara aga ti bâ so nzoni ye so lo lingbi ti sara ayeke ti ngbâ ti sara ye na ndoye na mbage ti ita ni nga ti ‘pardonné lo na bê kue.’ (aÉph. 4:32–5:2). Lara adabe ti lo so tâ ndoye ‘ayeke diko pëpe sioni so a sara na lo. Lo kanga bê na gbele aye kue, lo mä na bê na aye kue, lo zia beku na ndö ti aye kue, lo gbu ngangu na yâ ti aye kue.’ (1 aCor. 13:5, 7). Lara agi bê ti lo na ndö ti kpale ni encore ape. Ambeni ngoi na pekoni, ita ni asara ye na lo na nzoni bê ahon ti kozo. Tongana mo gi ti duti na siriri na aita nga mo ye ala, mo lingbi ti duti na confiance so “Nzapa ti ndoye nga na ti siriri ayeke duti ande na” mo.—2 aCor. 13:11.

SARA KANGBI NA POPO TI AZO APE

9. Ti gue oko na Kusala 10:34, 35, ngbanga ti nyen la a lingbi e sara kangbi na popo ti azo ape?

⁹ Jéhovah asara kangbi na popo ti azo ape. (Diko Kusala 10:34, 35.) Tongana e sara kangbi na popo ti azo ape, e fa so e yeke amolenge ti lo. E sara ye alingbi na commandement so ahunda ti ndoye amba ti e tongana terê ti e wani nga e mû maboko ti tene siriri aduti na popo ti e na aita ti e.—aRom. 12:9, 10; Jacq. 2:8, 9.

10-11. Tongana nyen la mbeni ita-wali ahon ndö ti asioni pensé so lo yeke na ni?

¹⁰ Ti ngbâ ti sara kangbi pëpe na popo ti azo alingbi ti duti kete ye na ambeni zo ape. Na tapande, bâ ye so asi na mbeni ita-wali so iri ti lo ayeke Ruth. Na ngoi so lo de lani kete, mbeni zo ti mbeni kodro asara ye na lo nzoni ape. Ye so asara nyen na ndö ti lo? Ruth atene: “Mbi ke aye ti kodro so kue na bê oko. Mbi pensé lani so sarango ye ti azo kue ti kodro so ayeke oko, même aita kue.” Tongana nyen la Ruth ahon ndö ti sioni pensé so lo yeke na ni?

¹¹ Ruth aga ti hinga so lo doit ti sara ngangu ti hon ndö ti sioni pensé so lo yeke na ni. Lo diko aye so asi na aita nga na atondo so ayeke na yâ ti Annuaire na ndö ti kodro so. Lo tene: “Mbi sara ngangu ti duti na nzoni bango ndo na ndö ti azo ti kodro so. Mbi komanse ti bâ so aita ti kodro so ayapu na kua ti Jéhovah. Mbi bâ polele so ala nga kue ayeke mbage ti sewa ti e ti aita so ayeke na yâ ti dunia kue.” Yeke yeke, Ruth abâ so lo bezoin ti sara ambeni ye encore. Lo tene: “Na ngoi kue so mbi wara terê na aita ti kodro so, mbi sara ngangu effort ti sara ye na ala na nzoni bê. Mbi sara lisoro na ala nga mbi yeke gi ti hinga ala nzoni mingi.” Ye ti peko ni ayeke nyen? Ruth atene: “A si na mbeni ngoi, sioni pensé so mbi yeke ni na ni ahon.”

12. Kpale wa la mbeni ita-wali so iri ti lo ayeke Sarah awara lani?

¹² Ambeni zo alingbi ti sara kangbi na popo ti azo sân ti hinga ni. Na tapande, Sarah apensé lani so lo sara kangbi na popo ti azo ape ndali ti so lo fâ ngbanga pëpe na ndö ti azo alingbi na mara ti ala, yere ti ala wala mosoro ti ala, wala kua so ala yeke na ni na yâ ti bungbi ti Jéhovah. Me lo tene: “Mbi komanse ti bâ so mbi sara lani kangbi biani na popo ti azo.” Na lege wa? Sarah ayeke lani na yâ ti mbeni sewa so amanda mbeti ayo nga lo ye mingi ti duti na azo so amanda mbeti ayo tongana lo. Mbeni lâ, lo tene même na mbeni kamarade ti lo, lo tene: “Mbi yeke duti mingi na aita so amanda mbeti ayo. Mbi ye pëpe ti duti na azo so amanda mbeti ayo ape.” A yeke polele so Sarah abezoin lani ti changé bango ndo ti lo. Lo sara ni lani tongana nyen?

13. Nyen la e lingbi ti manda na lege ti fason so Sarah achangé bango ndo ti lo?

¹³ Mbeni surveillant ti circonscription amû maboko na Sarah ti gbu li na ndö ti bango ndo ti lo. Sarah atene: “Lo gonda mbi ndali ti nzoni kua ti mbi, anzoni commentaire ti mbi nga ndali ti so mbi hinga Bible nzoni. Na pekoni, lo fa na mbi so na ngoi so hingango ye ti e ayeke kono, e bezoin nga ti gi ti duti na asarango ye ti aChrétien tongana sarango terê kete, bango terê kete nga na nzoni bê.” Sarah asara ye alingbi na atënë ti surveillant ni. Lo tene: “Mbi ga ti bâ so ye so ayeke kota ye mingi ayeke ti tene e sara ye na nzoni bê nga na ndoye.” Ye ti peko ni ayeke so lo komanse ti duti na nzoni bango ndo na ndö ti aita ti lo. Lo tene: “Mbi gi ti hinga asarango ye wa la asara si Jéhovah abâ ala na nene ni.” Ka ti e? E ye lâ oko ape ti pensé so e yeke nzoni mingi ahon aita ti e ndali ti mandango mbeti ti e. Tongana e “ndoye sewa ti e ti aita kue” ngangu mingi, e yeke sara kangbi na popo ti ala ape.—1 Pi. 2:17.

DUTI ZO SO AYAMBA AZO

14. Ti gue oko na aHébreu 13:16, tongana e yamba amba ti e ayeke sara Jéhovah tongana nyen?

¹⁴ Jéhovah abâ na nene ni mingi yambango azo. (Diko aHébreu 13:16.) Lo bâ ni tongana mbage ti vorongo so e yeke voro na lo, mbilimbili tongana e mû maboko na azo so abezoin ni (Jacq. 1:27; 2:14-17). Ni la Bible awa e ti “gi lege lakue ti yamba agene .” (aRom. 12:13). Tongana e yamba amba ti e, e yeke fa na ala so e pensé biani na ala, e ye ala nga e ye ti duti kamarade ti ala. A yeke nzere na Jéhovah mingi tongana e mû na amba ti e mbeni ye ti nyongo ni wala ti tengo ni wala e mû ngoi ti duti na ala (1 Pi. 4:8-10). Ye oko, ambeni ye alingbi ti sara si a yeke ngangu na e ti yamba azo.

15-16. (a) Ngbanga ti nyen la ambeni zo asara mbeto ti yamba azo? b) Tongana nyen la Edit ahon ndö ti mbeto ti lo ti yambango azo?

¹⁵ Peut-être e sara mbeto ti yamba azo ndali ti dutingo ti e. Bâ tapande ti mbeni wali-mua so iri ti lo ayeke Edit. Kozo ti tene lo ga Témoin, lo ye lani mingi ape ti duti na azo. Edit abâ lani so amba ti lo la ayeke na anzoni ye so amû lege na ala ti yamba azo.

¹⁶ Na peko ti so Edit aga Témoin, lo changé fason so lo yeke pensé na ni. Lo sara ambeni ye ti yamba azo. Lo tene: “Na ngoi so a yeke leke fini Da ti Royaume ti e, mbeni ancien asara na mbi tënë ti mbeni couple so asara mariage awe so ayeke ga ti mû maboko na kua ni, nga lo hunda mbi ti tene ala lango na ndö ti mbi yenga use. Mbi dabe ti mbi na lege so Jéhovah asara lani tufa na ndö ti wali-mua ti Zaréphath.” (1 aGbia 17:12-16). Edit ayeda ti yamba couple ni. Eskê lo wara lani aye ti nzoni na pekoni? Lo tene: “Yenga use aga nze use. Na ngoi ni so, e lë kpengba songo ti kamarade.” Edit awara nga akota kamarade na yâ ti congrégation. Lo yeke fadeso pionnier nga a nzere na lo ti yamba aita so lo na ala ayeke fa tënë na ndo ti lo ti te mbeni ye wala ti nyon mbeni ye. Lo tene: “Mungo ye na zo asara si mbi duti nzoni. Nga ti tâ tënë ni mbi wara aye ti nzoni mingi na pekoni.”—aHéb. 13:1, 2.

17. Nyen la Luke na wali ti lo aga ti bâ na ndö ti yambango azo so ala yeke yamba?

¹⁷ Peut-être e yeke yamba azo, me eskê e lingbi ti sara ni nzoni ahon ti kozo? Na tapande, Luke na wali ti lo ayeke mbeni couple so ayeke yamba azo. Ala yeke yamba ka ababâ na amama ti ala, afami ti ala, akota kamarade ti ala nga na surveillant ti circonscription na wali ti lo. Ye oko, Luke atene: “E ga ti bâ lani so e yeke tisa lani gï azo so e yeke na kpengba songo na ala.” Tongana nyen la Luke na wali ti lo agi ti yamba azo nzoni ahon ti kozo?

18. Tongana nyen la Luke na wali ti lo ayamba azo nzoni ahon ti kozo?

¹⁸ Luke na wali ti lo achangé bango ndo ti ala na peko ti so ala gbu li ti ala na ndö ti atënë ti Jésus so: “Tongana ala ndoye gï azo so andoye ala, futa wa la ala yeke wara na pekoni?” (Mat. 5:45-47). Ala bâ lani so ala doit ti mû tapande ti Jéhovah, so ayeke mû ye na azo kue. Tongaso, ala mû desizion ti tisa aita so ade ala tisa ala kozo ape. Luke atene: “A nzere na e kue mingi ti duti oko na angoi ni so. E kue e bâ so e kpengba mba nga asara si e yeke nduru na mba nga na Jéhovah.”

19. Tongana nyen la e yeke fa so e yeke adisciple ti Jésus? Nyen la mo leke na bê ti mo ti ngbâ ti sara?

¹⁹ E bâ awe tongana nyen la ti ndoye terê ngangu mingi alingbi ti mû maboko na e ti duti azo so asara si siriri amaï, azo so asara kangbi na popo ti azo ape nga azo so ayamba azo. A lingbi e hon ndö ti asioni bibe kue nga e ndoye aita ti e ngangu na ndoye so alondo na bê. Tongana e sara tongaso, e yeke duti na ngia nga e yeke fa so e yeke biani adisciple ti Jésus.—Jean 13:17, 35.