Lege ti sara kua na kode ti sarango na alisoro

Depuis janvier 2018, a zia kode ti sarango na alisoro na ndö ti couverture ti Mbeti ti bungbi: Kusala ti e nga na gigi ti e ti Chrétien. E lingbi ti sara kua na ni tongana nyen?

Na ngoi so a mû na mo devoir: A lingbi mo sara kua na hundango tënë ni, versê ni, nga na hundango tënë ti peko so ayeke na yâ ti kode ti sarango na lisoro ni. Ye oko, a ye ti tene ape so mo doit gï ti sara kua na a-oko tënë so ayeke na yâ ti vidéo ti kode ti sarango na lisoro ni. Mo lingbi ti changé place so mo wara zo ni dä, atënë ti tongo nda ni, fason so mo yeke gue na zo ni ti yeda na tënë ni, nga na ambeni ye tongaso. Mo lingbi nga ti mû na zo ni mbeni mbeti so e yeke fa na ye na azo, même si na yâ ti mbage so a mû na mo ti sara a hunda ti sara tongaso ape.

Na ngoi so mo yeke na fango tënë: A leke kode ti sarango na alisoro ti mû maboko na e na fango tënë. Tongana mbeni zo asara nzara ti tënë ni nga lo ye ti hinga ye mingi na ndö ni, mo lingbi ti ngbâ ti sara lisoro ni, peut-être na sarango kua na kode ti sarango vizite. Mo lingbi ti leke yâ ti kode ti sarango na alisoro ni wala ti sara kua na mbeni kode so ayeke tâ nde. Eskê tënë so a sara lisoro na ndö ni na yâ ti nze so ahon wala mbeni versê nde andu bê ti azo mingi na yâ ti territoire ti mo? Eskê azo ti ndo so mo yeke dä ayeke sara lisoro mingi na ndö ti mbeni ye so asi ade ti ninga ape na mbeni ndo wala na yâ ti territoire ti mo? Atâa fason wa la e soro ti sara kua na kode ti sarango na alisoro, ye so e yeke gï ti si dä ayeke ti ‘sara ye kue ndali ti nzoni tënë si e wara mbage ti e dä legeoko na ambeni zo.’—1aC 9:22, 23.