Ngbâ ti sambela Nzapa ti nzere na lê ti lo

Nzapa amû lege na azo ti sara tënë na lo na ti fa atënë ti bê ti ala na lo na lege ti sambela. Prophète David atene lani atene: “Mo so mo yeke mä sambela, mara ti azo nde nde kue ayeke ga ande na mbage ti mo.” (Psaume 65:2). Me tongana nyen la e lingbi ti sambela ti tene Nzapa amä e nga lo iri tënë nzoni na ndö ti e?

SARA TERÊ TI MO KETE NA ZI BÊ TI MO NA LO

Asambela ti mo ayeke mû lege na mo ti ‘zi bê ti mo kue na [Nzapa]’ wala ti fa na lo atënë ti gbe ti bê ti mo (Psaume 62:8). Nzapa so ngangu ti lo ahon angangu kue aye mingi ti mä asambela so alondo na gbe ti bê.

DI IRI TI NZAPA NA YÂ TI ASAMBELA TI MO

Atâa so Nzapa ayeke na gbâ ti atitre, lo yeke gï na iri oko. Lo tene: “Mbi yeke Jéhovah. So ayeke iri ti mbi la.” (Ésaïe 42:8). Iri ti Jéhovah asigi fani 7 000 tongaso na yâ ti Mbeti ti Nzapa. Gbâ ti aprophète ayeke di iri ti Nzapa lani na yâ ti asambela ti ala. Abraham atene lani atene: “Pardon, Jéhovah, . . . zia mbi ngbâ ti sara tënë [na mo].” (Genèse 18:30). E nga kue a lingbi e di iri ti Nzapa, Jéhovah, tongana e yeke sambela.

SAMBELA NA YANGA TI KODRO TI MO WANI

Atâa yanga ti kodro wa la e yeke tene, Nzapa ayeke comprendre apensé ti e nga na atënë ti bê ti e. Mbeti ti lo adë bê ti e atene: “Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”—Kusala 10:34, 35.

Me ti tene Nzapa airi tënë nzoni na ndö ti e, gï ti sambela lo alingbi awe ape. Na yâ ti ambage so ayeke ga, e yeke bâ ye so e doit ti sara.