Mandango buku Ga ndulu na Jéhovah ayeke to nda ni na yenga ti 6 janvier
1. Ti to nda ni na yenga ti 6 janvier, lege wa ayeke zi ande na e ti kiri ti ga nduru mingi na Jéhovah?
1 Jéhovah aye ti tene e ga nduru na lo (Jacq. 4:8). Ti mû maboko na e ti sara ni, e yeke manda ande buku Ga ndulu na Jéhovah na Mandango Bible ti Congrégation na yenga ti lango 6 ti janvier. A sara buku so ngbanga ti nyen? Kozo lembeti ni afa ndani: “Tongana e gbu li na ndo lege so Jéhovah afa na gigi alengo ti lo oko na oko, tongana nyen Jésus Christ afa alengo so na gigi pendere mingi, nga tongana e hinga lege so e nga kue e lingbi ti gi ti wara ni, fade e yeke ga nduru na Nzapa mingi ahon ti kozo.” E manda lani buku so kozo awe na yâ ti acongrégation na ngu 2004 ti si na ngu 2005. Ye oko, teti so awafango tënë mingi so wungo ti ala aga nduru na kutu use tongaso akiri aga na yâ ti tâ tënë, a yeke duti ande ti ala ti kozoni la ti manda anzene nzene ye na ndo ti apendere sarango ye ti Jéhovah. Ti ala so amanda lani buku ni kozo awe, ti kiri ti manda ni ayeke mû maboko na ala ti kiri ti bâ na nene ni mingi asarango ye ti Jéhovah.—Ps. 119:14.
2. Fa tongana nyen e yeke manda ande buku Ga ndulu na Jéhovah.
2 Lege ti manda ni: Ita so amû li ni ayeke sara ande mbeni nduru tënë ti tongo nda ni. A fa pëpe ambilimbili versê so a lingbi a diko ni, tongaso, a yeke gi akota versê so ague oko na tënë ni si ita so amû li ni ayeke soro ti tene a diko ni na ngoi ti mandango ye ni. A lingbi ti hunda tënë oko wala use na hunzingo ti aye ti manda oko oko tongana tënë ti dango bê. Tongana encadré “Atënë ti gbu li dä” ayeke na yâ ni, sara kusala na ni tongana tënë ti dango bê. Tongana ngoi ayeke dä, ita ni alingbi ti soro ambeni versê so ayeke na yâ ti encadré ni ti tene a diko ni na lo yeke hunda ambeni tënë nde so alingbi ti pusu aita ti fa atënë ti bê ti ala na ndo ni.
3. Na ngoi so e yeke manda buku so, nyen la a lingbi e sara nyen nga ngbanga ti nyen?
3 Gi ti wara nzoni dä mingi: Leke tere ti mo kozo ti ga na abungbi ni même tongana mo manda buku ni kozo awe. Mû mbage dä na kiringo tënë; ti sara tongaso ayeke mû gonda na Jéhovah, a yeke mû maboko na mo ti bata aye ni na li ti mo, nga ayeke ga na aye ti nzoni na aita (Ps. 35:18; aHéb. 10:24, 25). Tongana mo yeke gbu li na ndo ti akota sarango ye ti Jéhovah so mara ni ayeke use pëpe so, mo yeke ga nduru mingi na lo (Ps. 77:11-13). Na nda ni, mo yeke duti ande nduru mingi ti bata acommandement ti lo nga a yeke pusu mo ti fa tënë ti lo mingi na azo ahon ti kozo.—Ps. 150:1-6.