Mbeti ti Nzapa ayeke nzoni ti fa ye na zo
1. Mama-tene ti kota bungbi ti circonscription ti ngu 2014 ayeke nyen, nga hundango ndo wa a yeke kiri tënë ande na ni na ngoi ti kapa ni?
1 Kota “Maître” ti e Jéhovah ayeke nzoni wafango ye so ahon tanga ti azo kue na yâ ti dunia (És. 30:20, 21). Me, na lege wa Jéhovah ayeke fa ye na e? Lo mû na e mbeni buku so ahon tanga ti abuku kue, so a yeke Bible so a sû ni na gbe ti yingo ti lo. Me tongana nyen la fango ye so alondo na Nzapa alingbi ti ga na e aye ti nzoni na lege ti mitele, ti sara si e duti na nzoni bibe, ti sara si e gi bê ti e ahon ndo ni pëpe, nga ti wara ye ti nzoni na lege ti yingo? E yeke wara kiringo tënë na hundango ndo so na ngoi ti kapa ti kota bungbi ti circonscription ti ngu 2014 so mama-tene ni ayeke: ‘Mbeti ti Nzapa ayeke nzoni ti fa ye na zo’ so aluti na ndo ti versê ti 2 Timothée 3:16.
2. Ahundango ndo wa so aluti na ndo ti angbongboro tënë ti kapa ni e yeke wara ande akiringo tënë ni?
2 Gi angbongboro tënë so: Angbongboro tënë ti kapa ni ayeke sigigi ande polele na lege ti akiringo tënë na ahundango ndo so:
• Ye ti nzoni wa fango ye ti Nzapa alingbi ti ga na ni na yâ ti fini ti e? (És. 48:17, 18).
• Nyen la a yeke nzoni e hinga tongana e gi ti changé ambeni ye na yâ ti dutingo ti e, ti sara kusala ti ngoi kue? (Mal. 3:10).
• E yeke sara ye tongana nyen na ngoi so e tingbi na “afango ye so alondo na mbeni ndo nde”? (aHéb. 13:9).
• Tongana nyen la e lingbi ti mû tapande ti “kode ti fango ye” ti Jésus? (Mat. 7:28, 29).
• Ngbanga ti nyen a lingbi aita so ayeke fa ye na yâ ti congrégation afa ye nga na ala wani? (aRom. 2:21).
• Na lege wa Tënë ti Nzapa ayeke nzoni? (2 Tim. 3:16).
• So Jéhovah ayeke “yengi” amara kue ayeke sara ngangu wa na ndo ti azo? (Ag. 2:6, 7).
• Nyen la Jéhovah ahinga na bê ti lo kue so e lingbi ti sara ni? (aÉph. 5:1).
• Ngbanga ti nyen a lingbi e sara kua ngangu ti ngbâ gi na yâ ti fango ye ti Jéhovah? (Luc 13:24).
3. Ngbanga ti nyen a yeke kota ye ti tene e gue na e dengi mê na kota bungbi so a leke tâ na ngoi ni so?
3 Kozoni si lo sû atënë so ayeke na 2 Timothée chapitre 3 so mama-tene ti kapa so aluti na ndo ni, bazengele Paul asara tënë ti angoi ti akpale so afa so e yeke na alango ti nda ni. Lo tene: “Azo ti sioni na azo ti handango azo ayeke ngbâ gi ti sara sioni ti gue na ni, ala yeke handa azo na a yeke handa ala nga.” (2 Tim. 3:13). Ti tene azo ahanda e pëpe, a yeke nzoni e mä afango ye ti Jéhovah na e sara ye alingbi na ni. Ni la, zia e leke na bê ti e ti gue na ti dengi mê na kapa ti kota bungbi so a leke ni alingbi tâ na ngoi ni.