Mû tapande ti aprophète: Joël
1. Tongana nyen la e lingbi ti mû tapande ti prophète Joël na ngoi so e yeke fa tënë?
1 Prophète Joël ayeke lani zo wa? Lo fa so lo yeke “molenge ti Pethuel.” (Joël 1:1). Na tâ be-ti-molenge lo ye ti luti mingi gi na ndo ti atënë ti tokua ti Jéhovah, me pëpe na ndo ti lo wani. Legeoko nga, na ngoi so e yeke fa tënë, ahon ti gboto lê ti azo na ndo ti e wani, a yeke nzoni ti gboto lê ti azo gi na ndo ti Jéhovah nga na atënë ti lo so ayeke na yâ ti Bible (1 aCor. 9:16; 2 aCor. 3:5). Na ndo ni, e yeke wara ngangu na lege ti kusala ti e ti fango tënë. Laso, ambeni ye wa na yâ ti prophétie ti Joël alingbi ti mû na e ngangu nga na beku?
2. So lâ ti Jéhovah aga nduru apusu e ti sara nyen?
2 ‘Lâ ti Jéhovah ayeke nduru’. (Joël 1:15): Atâa so a sû atënë so asara ngu saki mingi tongaso awe, e bâ gango tâ tënë ni na ngoi ti e laso. Aye abuba mingi na yâ ti dunia. Tongana e yeke fa tënë e bâ polele so azo aye tâ tënë pëpe, ala yeke azo ti hengo ndo. Aye so a fa na e biani so ngoi ti hunzingo ti asioni ye ti dunia so aga nduru awe (2 Tim. 3:1-5; 2 Pi. 3:3, 4). Teti so e bâ so lâ ni aga nduru ti hunzi, a yeke nzoni e zia kusala ti fango tënë na kozo ndo na yâ ti fini ti e.—2 Pi. 3:11, 12.
3. Ngbanga ti nyen fango tënë ayeke mbeni kota kusala laso?
3 ‘Jéhovah ayeke Ndo ti Bata tere teti azo ti Lo’. (Joël 3:16): Ndo ti batango tere so a sara tënë ni na yâ ti versê so a fa so gi Jéhovah oko la alingbi ti fâ ngbanga na ngoi ti kota ye ti vundu. A dë bê ti e ti hinga so Jéhovah ayeke zi awakua be-ta-zo ti lo na yâ ti ngoi ni so (Apoc. 7:9, 14). Na mungo mbage mingi na kusala ti fango tënë nga na bango tongana nyen Jéhovah ayeke mû maboko nga lo yeke kpengba e, a yeke mû lege na e ti duti na mabe nga ti gbu ngangu na ngoi so kota ye ti vundu ayeke ga.
4. Ngbanga ti nyen alingbi e duti na ngia nga e zia bê ti e kue na ndo ti gigi ti kekereke?
4 Atâa so ambeni zo abâ tokua ti Joël tongana mbeni tokua ti vundu, a mû na azo ti Nzapa beku so fade a sö ala (Joël 2:32). Tongaso, a lingbi e zia bê ti e kue na ndo ti gigi ti kekereke nga e mû mbage mingi na fango nzoni tënë ti Royaume ti Nzapa na sarango ye alingbi na tënë ti Joël 2:23 so atene: ‘I duti na ngia na yâ Jéhovah Nzapa ti i’.