Tongana zo so e fa tënë na lo atene mbeni yanga nde
1. Ngbanga ti nyen a hunda ti ngbâ ti mä tere nzoni na ngoi ti fango tënë na yâ ti territoire?
1 Fani mingi, awafango tënë ti Royaume na ndo ti sese kue ayeke wara azo so asara nzara ti tënë ni me so atene mbeni yanga ti kodoro nde na ti so a yeke tene na yâ ti kongregation. Ti mû maboko na azo tongaso na lege ti yingo, afiliale mingi abâ nene ti zia na sese agroupe na akongregation. Teti so a lingbi ti tene ayanga mingi na mbeni ndo, akongregation ti ayanga nde nde alingbi ti fa tënë na yâ ti oko territoire ni. Tongana nyen akongregation ni alingbi ti mä tere nzoni si kusala ti fango tënë atambela na lege ni?—1 aCor. 14:33.
2. Tongana nyen e lingbi ti mä tere na ambeni groupe wala akongregation ti yanga nde na ngoi ti fango tënë da na da na yâ ti territoire?
2 Nzoni mango tere: Tongana mbeni wafango tënë ayeke fa tënë na lege wala na alege kue so azi, ye oko akanga lege na lo pëpe ti ga nduru na mbeni zo, même ala so atene mbeni yanga nde, na ti mû mbeti na zo ni na yanga ti kodoro so lo ye ti diko. Ye oko, na ngoi so e yeke fa tënë da na da na yâ ti avaka so mbeni groupe wala kongregation ti yanga nde ayeke fa nga tënë dä, a yeke nzoni wafango tënë abi bê ti lo kozoni gi na ndo ti azo so ayeke tene yanga so a yeke tene na yâ ti kongregation so lo yeke gue dä. Tongana akongregation nde nde afa tënë na yâ ti vaka oko, a yeke kota ye ti mû note. A yeke nzoni asurveillant ti kusala asara lisoro na popo ti ala na ndo ti akusala ni na ala leke aye ni na lege so azo kue alingbi ti wara ye ti nzoni dä (aProv. 11:14). Ye oko, tongana mbeni wafango tënë atingbi na mbeni zo so atene mbeni yanga nde na ngoi ti fango tënë da na da, na akongregation so atene yanga ni so ayeke nduru pëpe, a lingbi wafango tënë ni asara ngangu ti fa tënë na lo na ti ngbâ ti mû maboko na lo.
3. A lingbi e sara nyen tongana e tingbi na awafango tënë ti mbeni groupe wala kongregation ti yanga nde so ayeke fa tënë na yâ ti oko territoire na e?
3 Gi oko kusala: Ye nyen a lingbi ti sara na ngoi so awafango tënë ti akongregation nde nde ayeke fa tënë na yâ ti oko vaka na oko lango ni? Biani, fade ndoye ti aChrétien ahon ndo ti kpale ti yanga ti kodoro so ayeke na popo ti ala, na fade ala bi bê kozoni kue na bezoin ti azo ti yâ ti territoire ni (Jean 13:34, 35). Na ndo ni, fade ala so amû li ni afa so ala sara ye na nzobe nga na ndoye na mungo desizion ti bâ wala a lingbi mbeni groupe oko ague afa tënë na mbeni territoire nde teti kete ngoi.—Jacq. 3:17, 18.
4. Prophétie wa ayeke ga tâ tënë laso?
4 Bible afa kozoni so fade azo ti yanga nde nde ayeke mä nzo tënë (Apoc. 14:6, 7). Nzoni mango tere na popo ti e kue alingbi ti sara si awafango tënë ti agroupe wala ti akongregation ti yanga nde nde asi na yanga-da ti azo legeoko pëpe. Na lege so fade afini zo mingi ayeke mä nzo tënë, même ala so atene mbeni yanga nde.—aEph. 4:16.