Fa tënë na lege ti salango ye ti mo
1 Sân ti sala tënë, aye so Jéhovah aleke ayeke fa ye mingi na ndo asalango ye ti lo so lê abâ pëpe (Ps. 19:2-4; aRom. 1:20). Legeoko nga, nzoni tambela ti e ti Chrétien nga yungo bongo ti e nzoni alingbi ti fa tënë sân ti tene e zi yanga (1 Pi. 2:12; 3:1-4). A lingbi ti duti kota nzara ti e oko oko kue “ti sepela nzo tënë ti Nzapa Sauveur ti e na yâ ye kue” na lege ti salango ye ti e.—Tite 2:10.
2 Tongana nyen asenge zo ti mitele alingbi ti sala si afango ye ti Bible awara gonda? Ala lingbi ti sala ni gi tongana ala zia si Tënë ti Nzapa nga na yingo vulu ti lo afa lege na ala (Ps. 119:105; 143:10). Tënë ti Nzapa “a yeke na fini, na ayeke na ngangu ti sala ye, a za ahon épée ti yanga use”. (aHéb. 4:12). A yeke lï ngangu na yâ e na a pusu e ti yû zo ti fini (aCol. 3:9, 10). Yingo vulu ayeke lë na yâ e anzoni lengo, tongana bê ti sala nzoye, nzobe, tâ be-ti-molenge nga na ngangu ti kanga nzara ti tele (aGal. 5:22, 23). E oko oko kue e yeke zia lege na tënë ti Nzapa na yingo vulu ti lo ti sala kusala na yâ e?—aEph. 4:30; 1 aThes. 2:13.
3 Azo ayeke bâ ye so mo yeke sala: Tongana fini ti e ague oko na andia ti Jéhovah na nga e yeke sala ngangu ti sala ye tongana lo, azo ayeke bâ ni. Bâ, na tapande, mbeni koli ayeke so amba ti lo wakua ayeke he ka lo na ngia gi ngbanga ti so lo yeke ndulu zo. Mbeni ita-wali so asala kusala na yâ ti biröo oko na koli so ayeke sala ye na mbage ti lo na nengo tele nga na yekiango ndo. Ye so apusu lo ti hunda ita-wali ni ngbanga ti nyen salango ye ti lo ayeke nde. Ita-wali ni atene na lo so tongana lo sala ye na lege ti yekiango ndo, a yeke ngbanga ti so lo zia si akpengba-ndia ti Bible afa lege na fini ti lo. Lo fa nga na lo anzoni beku so aluti na ndo Royaume. Koli ni ato nda ti manda Bible, lo gue na li ni nga na nda ni lo wara batême. Tongana lo kiri na kodoro so a dü lo dä, bê ti asewa ti lo ti mitele adö na bango anzoni salango ye ti lo. Na ye ti pekoni ayeke so mingi ti ala ayeda na tâ tënë.
4 Na ndo ti kusala, na ekole, na popo ti asewa ti e ti mitele wala azo so alango na tele ti da ti e, nzoni salango ye ti e so ague legeoko na fango tënë ti e alingbi ti pusu azo ti mû gloire na Nzapa.—Mat. 5:16.