Guengo na bungbi lakue: Mbeni ye so aga na kozo ndo
1 Asewa ti aChrétien ayeke zia na kozo ndo guengo lakue na abungbi. Me agingo bê ti laso na ndo aye so a hunda ti mû ngoi ti sala ni alingbi ti duti mbeni kpale. Akua ti yâ ti da, kua ti nginza wala aye so a hunda ti sala na ekole ato nda ti hon ndo ti ngoi so e zia ni nde teti vorongo ti Jéhovah? Bango aye tongana ti so Jéhovah ayeke bâ na ni ayeke mû ande maboko na e ti bata aye so ayeke akozo ye teti e.—1 Sam. 24:7; 26:11.
2 Mbeni koli na Israël ake na mbana ti bâ na nene ni bango ndo ti Jéhovah, na lo ro keke na lâ ti sabbat. Lo lingbi lani ti tene na bê ti lo so lo sala ni teti sewa ti lo wala ye so lo sala ayeke gi mbeni kete ye. Ye oko, na lege ti ngbanga so a fâ ni lani, Jéhovah afa so tombango peko ti aye ti sese na yâ ti angoi so amû ni teti vorongo ayeke tâ mbeni kota tënë mingi.—Nom. 15:32-36.
3 Hon ndo ti aye so aye ti kanga lege: Ti mingi ti azo, a yeke mbeni tiri ti kanga lege na kua ti nginza ti buba yâ ti kapa ti guengo na bungbi. Ambeni ahon ndo ti kpale so lani na salango tënë ni na patron ti ala, na gbiango angoi ti kusala ni na ambeni mba ti ala ti place ti kua, na gingo mbeni kusala nde so alingbi nzoni mingi na kapa ti salango ye ti ala wala na salango si dutingo na fini ti ala akpengba pëpe. Kite ayeke dä pëpe so mara ti asandaga tongaso, so a sala ni teti nzoni ti tâ vorongo, ayeke zia ngia mingi na bê ti Nzapa.—aHéb. 13:16.
4 Adevoir ti ekole alingbi nga ti duti mbeni kpale. Mbeni maseka-wali atene: “Mbi yeke sala ambeni mbage ti adevoir ti mbi ti ekole kozoni na abungbi, na mbi yeke hunzi tanga ni na pekoni so mbi kiri na yanga-da.”
5 Salango ye maboko na maboko nga na nzoni programme ayeke akota ye so ayeke mû lege na e ti sala akusala kue ti da na ti leke tele ti e si sewa ni kue ague na abungbi legeoko nga na ngoi ni (aProv. 20:18). A lingbi même ti fa na amolenge so ade kete ti yü bongo na ti duti ndulu ti gue na bungbi na mbilimbili ngoi so a fa ni. Na lege ti tapande ti ala, ababâ na mama alingbi ti yôro na yâ bibe ti amolenge ti ala nene ti abungbi.—aProv. 20:7.
6 Na ngoi so akpale ti sese ti laso ayeke gue na li ni, a yeke kota ye teti e ti gue lakue na abungbi. Zia e ngbâ ti bâ aye ni tongana ti so Jéhovah ayeke bâ na ni, na e sala si guengo lakue na bungbi aga mbeni ye so aga na kozo ndo.—aHéb. 10:24, 25.