Sala hange na lege so mo yeke sala kusala na ngoi ti mo

1. Kpale wa azo na ndo kue ayeke luti na gbele ni laso?

¹ Na ngoi ti e so asi singo na agbakuru so a leke ti mû lege na zo ti bata ngoi nga na ngangu ti lo, mingi ti azo abâ so ala yeke na aye mingi ti sala, me ala yeke na ngoi mingi pëpe ti sala ni. Mo bâ so a yeke ngangu na mo ti bata mbeni nzoni kapa ti akusala ti mo ti lâ oko oko na lege ti yingo? Mo ye ti wara ngoi mingi ahon ti kozo teti kusala ti fango tënë? Tongana nyen e lingbi ti sala kusala nzoni mingi na ngoi ti e?​—Ps. 90:12; aPhil. 1:9-11.

2, 3. Akpale wa senda-kode ti warango asango aga na ni? Na tongana nyen zo oko oko na popo ti e alingbi ti gi ti bâ dutingo ti lo?

² Gi ti hinga aye so ayeke buba ngoi ti mo: Ngoi na ngoi, a lingbi e kue e gi ti bâ tongana nyen e yeke sala kusala na ngoi ti e. Bible amû wango so: “Tongaso, i bata nzoni si i tambela pëpe tongana awabuba me tongana awandara, i vo ngoi so alingbi teti i mveni, teti angoi ni ayeke sioni.” (aEph. 5:15, 16, NW ). Zia e bâ akpale so aga na lege ti guengo na li ni ti afini kode ti warango asango. Atâa so a lingbi ti sala aye ti nzoni na a-ordinateur nga na ambeni masini nde nde, ala lingbi ti ga mbeni gbanda teti e tongana e sala hange pëpe na lege so e yeke sala kusala na ngoi ti e.​—1 aCor. 7:29, 31.

³ A lingbi zo oko oko ahunda tele ti lo: ‘Mbi yeke mû ngoi lâ oko oko ti diko wala ti kiri tënë na alettre so mbi yeke wara na ndo ordinateur, na so ayeke gi ambeni ye so ayeke senge senge? Fani mingi, mbi yeke mû ngoi ti hiri ndo wala ti tokua ambeni tënë na ndo aye so ayeke kota ye pëpe na lege ti téléphone? (1 Tim. 5:13). Mbi yeke gi aye gi senge senge tongaso na ndo Internet wala mbi yeke gi ti bâ gbâ ti achaîne nde nde na ngoi so mbi yeke bâ télé? Mungo ngoi teti angia so ayeke na ndo ordinateur ato nda ti buba awe yâ ti ngoi so mbi bata ni ti manda na Tënë ti Nzapa?’ Tombango peko ti aye tongaso alingbi ti buba yeke yeke nzoni dutingo ti e na lege ti yingo.​—aProv. 12:11.

4. Gbiango ye wa mbeni maseka asala lani, na ngbanga ti nyen?

⁴ Salango kusala na ngoi ti e na lege ti ndara: Agbakuru tongana ordinateur wala télé ayeke tara ti nzi ngoi ti e kue nga ti gboto lê ti e. Mbeni maseka so abi lani tele ti lo kue na yâ angia ti ordinateur atene: “Na ambeni ngoi, tongana mbi sala angia ti ordinateur kozoni ti gue na fango tënë wala na bungbi, mbi bâ so a yeke tâ ngangu na mbi ti bata li ti mbi na ndo ye so a yeke fa. Lakue mbi yeke ndulu ti bi bê na ndo tongana nyen mbi lingbi ande ti sala mbeni ngia nzoni ahon ti kozo tongana mbi kiri na yanga-da. Ye so asala sioni na ndo mandango ye mbi mveni nga na dikongo Bible lakue. Mbi to nda ti girisa ngia ti mbi ti sala na Nzapa.” Na hingango so a yeke kota ye teti lo ti gbian asalango ye ti lo, lo zi angia kue so ayeke na ndo ordinateur ti lo. Lo kiri lo tene: “Ye so ayeke lani ngangu biani. Mbi bâ so angia ni agbu bê ti mbi mingi ahon ti so mbi pensé fade. Me mbi wara nga mbeni kota bibe ti songo benda teti mbi hinga so mbi sala ni lani teti nzoni ti mbi mveni.”​—Mat. 5:29, 30.

5. Tongana nyen e lingbi ti vo ngoi ti tomba peko ti aye ti yingo? Na tongana nyen e yeke wara ye ti nzoni na salango tongaso?

⁵ A yeke kota ye ti sala mara ti ye tongaso tongana ambeni ye ayeke dä so a hunda ti tene mo gbian ni. Mo lingbi ti vo apenze-ngbonga bale-ota lâ oko oko na ndo akusala so ayeke kota mingi pëpe? So ayeke wungo ti ngoi so a hunda lâ oko oko tongana mo ye ti diko Bible kue na yâ ngu oko. So ayeke biani tâ futa na lege ti yingo! (Ps. 19:8-12; 119:97-100). Leke teti biani angoi ti dikongo Bible, lekengo bungbi nga na kusala ti fango tënë (1 aCor. 15:58). Salango tongaso ayeke mû ande maboko na mo ti bâ ndo nzoni na ndo aye so ayeke buba ngoi ti mo na a yeke mû ande maboko na mo ti “ngbâ ti gbu nda ti ye so bê ti Jéhovah aye.”​—aEph. 5:17, NW.