Ngbâ ti ‘Sala Ye so Ayeke Nzoni’
1 Na ngoi so mo ga la ni mbeni wakua ti Jéhovah Nzapa, mo sala mbeni ye so ayeke nzoni. Ye oko, fadeso kpale ni na yâ angoi ti ngangu so ayeke ti ngbâ ti ‘sala ye so ayeke nzoni.’ (aGal. 6:9) Atä ye so ahunda ti sala ngangu mingi, mo lingbi ti sala ni. Tongana nyen?
2 Gi ti wara bibe ti Jésus: Legeoko tongana Jésus, mo lingbi ti gbu ngangu na gbe ti atara tongana mo zia lakue lê ti mo na mbage ti beku ti Royaume. (aHéb. 12:2, 3) Hinga biani na bê so Jéhovah andoye mo na lo ye si mo wara nzoni. (2 Pi. 3:9) Zia bê ti mo kue na lo, na hingango biani so lo yeke mu ande maboko na mo. (1 aCor. 10:13) Zia ti sambela pepe, na hundango na Jéhovah ti mu maboko na mo ti gbu ngangu. (aRom. 12:12) Duti na ngia na hingango biani na bê so gbungo ngangu ti mo ayeke sala si Nzapa ayeda na mo. (aRom. 5:3-5) Fade dutingo be-ta-zo ti mo na yâ gingo ti wara “oko bibe so Christ Jésus ayeke na ni giriri” ayeke mu ngia na mo na ayeke zia ngia na bê ti Jéhovah.—aRom. 15:5, NW; aProv. 27:11.
3 Ngbâ ti sala apendere kusala: Wara ye ti nzoni kue na yâ aye so Jéhovah aleke teti azo ti lo ti mu maboko na ala ti ngbâ ti sala ye so ayeke nzoni. Bata mbeni nzoni kode ti dikongo Tene ti Nzapa mo mveni nga na ti mandango ambeti so aluti na ndo Bible so ngba ti be-ta-zo na ti ndara aleke. Na be-biani, leke tele teti abungbi kue ti kongregation, ti gue dä na ti mu mbage na ni. Kozoni nga na peko ti bungbi ti aChrétien, ga ndulu na aita ti mo ti koli na ti wali ti yingo. Zia na gbele mo aye so ayeke na lege ni na yâ kusala ti mo ti mu mbage mingi ahon na yâ kua ti fango tene na ti maï kode ti mo ti fango nzo tene na azo.
4 A yeke tongaso si mo lingbi ti ngbâ ti sala ye so ayeke nzoni na ti wara ngia mingi na oko ngoi ni. Na ndo tene so, mbeni ita-koli na sese ti Italie atene: “A si na lakui, tongana mbi kiri na kodoro na peko ti so mbi bi tele ti mbi kue na yâ kusala ti Jéhovah, biani mbi nze. Me mbi yeke na ngia, na mbi kiri singila na Jéhovah so lo mu na mbi ngia so zo oko alingbi pepe ti lungula ni.” Tongaso, ngbâ ti sala ye so ayeke nzoni, na fade mo nga mo yeke wara kota ngia.