E Lingbi ti Sala si Octobre 2000 Ahon Tanga ti Anze Kue?
1 Nze ti octobre ayeke duti ande teti aita ti e kue ti koli na ti wali na ndo sese kue mbeni nze so ayeke nde mingi. Tongaso e tisa i teti mbeni kusala so ayeke nde na so anzere: kusala ti pionnier auxiliaire. Tongana nyen zo alingbi ti leke tele ti lo na ti sala ye nzoni na kusala so?
2 Nze ti octobre kue amu na e mbeni lege so ayeke nde ti fa na gigi na âme ti e kue bê ti kiri singila teti nzobe ti Jéhovah so e lingbi na ni pepe. Tongana nyen? Bazengele Paul asû na mbeti: “Ndoye so Christ ayeke na ni apusu e, ngbanga ti so a yeke ye so e hinga, so zo oko akui awe teti azo kue; tongaso azo kue akui; na lo kui teti azo kue si ala so ayeke na fini aduti na fini mbeni pepe teti ala mveni, me teti lo so akui teti ala na so a yä lo na popo ti awakinda.” (2 aCor. 5:14, 15, NW) Tongaso, na nze ti octobre, e lingbi ti fa so e duti na fini, pepe teti e mveni, me teti lo so akui teti e: e lingbi ti sala si a ga mbeni nze so ahon atanga ni kue na yâ fini ti e ti awakua ti Royaume!
3 E duti apionnier auxiliaire na octobre: Bazengele Paul amu na e mbeni tapande so amu wâ tongana lo tene: “Mbi ba fini ti mbi tongana kota ye na lê ti mbi pepe, mbi ye gi ti si na nda ti lege ti mbi, na ti sala kusala so Seigneur Jésus amu na mbi ti sala, si mbi ga témoin ti Tene-nzoni ti grâce ti Nzapa.” (Kus. 20:24) E yeke na oko matabisi ni: ti sala tene ti témoin kue na ndo Jéhovah Nzapa. Ndali ni, e ye si octobre aduti mbeni nze so ahon atanga ni kue na yâ kusala ti apionnier auxiliaire.
4 Teti so anda-yenga kue osio ayeke na yâ ni, octobre 2000 ayeke duti ande nzoni ngoi ti tene azo mingi aga apionnier. So ti tene, lege ayeke dä teti e ti hon ndo ti kota wungo ti apionnier auxiliaire ti kozoni. Na mbage, a kiri na peko awe wungo ti angbonga so ahunda, ye so asala si azo mingi ahon na yâ kongrégation alingbi ti sala kusala so. A lingbi wafango tene oko oko kue so akamata batême awe aba na yâ sambela wala lo lingbi ti duti pionnier auxiliaire na octobre so ayeke ga.
5 Na lege ti Calendrier 2000, leke fadeso kapa ti kusala ti mo teti nze ti octobre. Gi ti hinga na alango wa mo lingbi ti fa tene, na diko wungo ti angbonga ni kue so mo ba mo lingbi ti sala na yâ nze ni. Diko ngoi so mo lingbi ti mu ti kangbi mabe ti mo na lege kue so azi wala legeoko na kongrégation. Wungo ni kue aga ndulu na angbonga 50 so a hunda na apionnier auxiliaire? Tongana ambeni ngbonga atia mo, ngbanga ti nyen ti gbian pepe kapa ti kusala ti mo ti vo ngoi so ahunda ti duti pionnier auxiliaire? A hunda na mo ti fa tene gi ngbonga 1 na apenze-ngbonga 40 lâ oko oko ti wara angbonga 50 na yâ nze oko.
6 Teti so a kiri fadeso na peko wungo ti angbonga so a hunda na apionnier permanent, mo yeke bi bê ti mo ti mu kusala ti ngoi kue? Ngbanga ti nyen ti ku ti to nda ni? Nze ti octobre ayeke duti ande mbeni nzoni ngoi ti bi tele ti mo na yâ kusala so! Tongana mo hinga nzoni pepe so mo yeke wara ande angbonga 70 ti apionnier permanent, ngbanga ti nyen ti duti pepe pionnier auxiliaire na octobre na ziango na gbele mo ti wara angbonga 70? Na pekoni so mo wara ni, peut-être mo yeke wara nzala ti duti na popo ti apionnier permanent fade fade tongana lege azi.—Ba Notre ministère, alembeti 113-14.
7 Tongana awafango nzo tene, zia e mu ye ti nzoni ahon ti e: Atä e yeke awafango tene wala apionnier, e kue, ndali ti tâ ndoye teti Nzapa na teti afon e, e yeke mu ye ti nzoni ahon ti e, na âme ti e kue, na yâ kusala ti Jéhovah alingbi na dutingo ti e. (Luc 10:27) Na lege so e fa so “e yeke sala kusala ngangu na e yeke tiri, teti so e zia beku ti e na mbeni Nzapa so ayeke na fini, so ayeke Sauveur ti mara ti azo nde nde kue, mingi ni ti abe-ta-zo.” (1 Tim. 4:10, NW) Nda ni la, a lingbi e ku ti ba mungo mbage ti azo oko oko kue na nze ti octobre: zo oko oko ayeke mu ande mbage na yâ kusala ti Royaume alingbi na ngangu ti lo.
8 E glisa pepe wango so ti Jésus: “Le-kobe ti yaka ayeke mingi biani, me azo ti kusala ayeke mingi pepe. Tongaso i sambela Mveni ti le-kobe ni si Lo to azo ti kusala ti fâ le-kobe ti Lo.” Fade fade na pekoni so lo sala atene so, Jésus ahiri abazengele ti lo 12 na lo to ala ti fa tene. (Mat. 9:37, 38; 10:1, 5, 7) Ndulu na ngu oko na pekoni, tongana a leke nzoni awe azo 12 so na yâ fango tene, Jésus “ahiri ambeni disciple bale mbasambala, Lo to ala” na mungo na ala a-oko wango tene: “Le-kobe ti yaka ayeke mingi biani . . . Tongaso i sambela Mveni ti le-kobe ni si Lo to azo ti kusala ti fâ le-kobe ti Lo.” (Luc 10:1, 2) Na ngoi ti e, a lingbi e ngbâ lakue ti sambela Mveni ti tokua ambeni wafango tene ti Royaume. A lingbi na asambela ti e, a yeke nzoni wafango tene oko oko aleke tele ti lo nzoni ti mu mbage na fango tene nze na nze.
9 Mo ye ti luti kete na ndo nze ti octobre na yâ Calendrier 2000? Teti so kozo lango ti nze so atï na mbeni la-yenga, ngbanga ti nyen ti leke pepe ti fa tene na lango ni so, ye so ayeke mu lege na mo ti to nda ni gi na li ti nze ni? Mo lingbi ti mu mbage na “Journée des périodiques” oko oko kue na yâ nze ni legeoko na azo ti mandango buku ti mo? Mo ba tongana nyen ti sala ngbonga oko wala ahon so na yâ fango tene na la-yenga oko oko? Na ngbanga ti nyen ti leke tele ti mo pepe teti fango tene na lakui? Nga glisa pepe ti gbu angoi kue ti fa tene na lege kue so azi na ndo ti kusala, na ekole, nga na yâ akusala nde nde ti lâ oko oko. Sû na mbeti alango so mo lingbi ti sigigi na fango tene dä, na sala kusala na calendrier ti sû angbonga so mo sala na yâ fango tene.
10 Fade octobre ayeke duti ande, teti azo kue so alingbi na aye so a hunda na so a-ancien ayeda na ala, ngoi ti to nda ti sala kusala tongana awafango tene so ade ti kamata batême pepe. Tongana mo yeke manda Bible na mbeni zo, lo gue na li ni mingi awe si mo lingbi ti sala tene ti nzala ti lo ti ga mbeni wafango nzo tene na surveillant-président? Tongana mo yeke na amolenge so ade ti kamata batême pepe, mo sala lisoro na ancien awe na ndo guengo na li ni ti ala na lege ti yingo? A yeke pepe ngoi teti ala ti to nda ti fa tene?—Ba Notre ministère, alembeti 98-101.
11 Teti so e ye ti sala si octobre 2000 aduti mbeni nze so ahon atanga ni kue, a lingbi zo oko oko na popo ti e amu mbage na fango tene, nga na pekoni amu rapport ti kusala na hunzingo ti nze. (Ba Marc 8:30.) Fade a wa awafango tene so ade akamata batême pepe so ayeke fa tene ti fani kozoni ti mu rapport ti ala hio. Na salango mbage ti e, fade e yeke mu mbage mingi na yâ rapport ti octobre nga na kota dekongo ti sepela so a yeke mu ande na Jéhovah teti angangu so e sala na yâ kusala. Ti tene octobre 2000 aduti mbeni nze so ahon atanga ni kue, a lingbi azo kue, a-ancien, aserviteur ti mungo maboko, na abeli ti sewa, asala kusala maboko na maboko. Fade a-ancien ayeke ba si a leke aye kue nzoni na ala mu nzoni tapande ni. (aHéb. 13:7) A lingbi a leke ambimbili ye teti arendez-vous ti fango tene na yâ yenga nga na nda-yenga. A lingbi ti leke ambeni bungbi na ndo ni teti fango tene na hunzingo ti bekombite nga na tongo nda ti lakui. A lingbi azia na tableau programme kue ti ye so a leke ti sala na octobre. Teti arendez-vous kue so a leke, a yeke zia ande mbeni zo ti mu li ni. Fade a mu aterritoire alingbi teti bezoin ti bungbi oko oko. Ti e kue so e yeke sala na Jéhovah, a lingbi nze ti octobre aduti mbeni ngoi ti kusala mingi. A yeke duti ande tongaso tongana wafango nzo tene oko oko amu ye ti nzoni ahon ti lo dä. Zia e sambela Jéhovah na bê kue ti hiri deba nzoni mingi na ndo angangu ti e ti sala si octobre 2000 aduti mbeni nze so ahon atanga ni kue, teti sepelango lo nga teti gloire ti lo!—aHéb. 13:15.
[Tene na Lembeti 3]
Apionnier auxiliaire
Kota wungo so e wara: 346
(Octobre 1998)