Zia E Manda Prophétie ti Daniel
1 Ngbele ye na yenga ti lango 17 ti avril, e yeke manda buku E Bi Bê na Prophétie ti Daniel! na yâ amandango buku. Azo so adiko awe pendere buku so ayeke mingi; ye oko, fadeso e yeke na pasa ti zia na ndo ni mbeni nzoni mandango ye legeoko na ambeni zo nde. A tisa awafango tene kue, azo ti be-ti-mbilimbili nga na amolenge, biani, a wa ala kue ti ga yenga oko oko kue na ngoi ti kota gingo nda ti buku ti Bible ti Daniel.—Deut. 31:12, 13.
2 Programme ti mandango ye ni nga awango-tene: Programme ni kue ti mandango buku Prophétie ti Daniel ayeke na yâ numéro so ti Kusala ti Royaume. Bi bê ti zia mbeni oko na yâ buku ti mo ti mandango ye. Programme ni afa teti yenga oko oko chapitre na aparagraphe ti buku ni nga aversê ti Daniel so a yeke sala ande lisoro na ndo ni. Akete tene na gbe ti lembeti afa tongana nyen na lawa a yeke manda ande ambeni mbage ti buku ni. Na hunzingo ti mandango ye oko oko, a hunda na zo so amu li ni ti kiri ti ba na azo so aga aversê ti buku ti Daniel so ayeke na yâ programme teti yenga ni. Tongana ngoi ayeke dä, a lingbi ti diko aversê ni na ti sala tene na ndo ni. Fade a yeke ba ambeni versê ni teti yenga use na peko ti tele, ndali ti so fango nda ni ayeke hunda ande ti luti na ndo ni a ninga.
3 Leke tele ti mo teti mbeni mandango ye so alï ngangu: A leke si a zia ngoi mingi teti yenga oko oko ti manda aye ni juska na gunda ni. A lingbi ti tene so ambeni ye ti manda osio ayeke ndulu. A wara na yâ mandango ye ti manda ti yenga ti 4 septembre fango mbilimbili nda ti afoto na aversê oko na oko ti lembeti 139. A lingbi a ba afoto ti alembeti 188 na 189 na yenga ti 2 octobre.
4 Leke tele ti mo nzoni teti mandango ye yenga oko oko na wara ngia na yâ mungo mbage dä. Ba na nene ni matabisi so mo yeke na ni ti sala songo na bungbi ti Jéhovah so lê aba na ti wara ndara nga gbungo nda ti ye so awakua ti lo be-ta-zo, so asa yingo na ndo ala, amu na e. (Dan. 12:3, 4) Wa ambeni zo na ndoye ti ga lakue na mandango buku. Zia e kue e bi bê na atene ti prophétie ti Nzapa tongana ti so a fa ni na gigi na yâ kpengba buku ti Daniel!—aHéb 10:23-25; 2 Pi. 1:19.