Nyen la a lingbi amolenge ahinga na ndo ti Nzapa?
“Atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa, na a yeke nzoni ti fa na ye na zo, ti suku na zo, ti kiri na aye na nzoni lege, ti se na zo na lege ti mbilimbili.”—2 TIMOTHÉE 3:16.
A LINGBI a fa tâ tënë na ndo ti Nzapa na amolenge. Ala lingbi ti wara tâ tënë ni so na ndo wa? Na yâ ti Bible so azo ane ni mingi ahon tanga ti mbeti kue ti vorongo Nzapa.
Bible ayeke tongana mbeni lettre so alondo na Nzapa. Na yâ ni, Nzapa afa na e asarango ye ti tere ti lo nga lo fa nzoni lege ti sarango ye teti amolenge ti lo kue, amaseka nga na akota zo. Zia e bâ ambeni fango ye so ayeke na yâ ti Bible nga aye so même amolenge alingbi ti manda dä.
Tongana ti so atapande so afa, afango ye so ayeke na yâ ti Bible alingbi ti mû maboko na amolenge ti duti azo so ahinga ti kiri singila, ti ne zo, nga ti sara ye na nzoni bê na ngoi so ala kono. Me a yeke nzoni zo wa la afa aye ni so na amolenge?
Nyen la Nzapa aye ti tene e hinga na ndo ti lo?
◼ Ye so Bible afa: “Mo so iri ti Mo ayeke L’Éternel [“Jéhovah,” FD], Mo so Mo yeke Lo Ti Nduzu Ahon Kue na ndo sese kue.”—Psaume 83:19.
Ye so e manda dä: Nzapa ayeke dä biani nga lo yeke na iri.
◼ Ye so Bible afa: “L’Éternel atara bê kue, na Lo hinga bibe kue. Tongana mo gi Lo, fade mo wara Lo.”—1 Chronique 28:9.
Ye so e manda dä: Jéhovah Nzapa ayeke bi bê ti lo na e kue, même akete molenge (Psaume 10:14; 146:9). Lo ye si e hinga ye na ndo ti lo.
◼ Ye so Bible afa: ‘A lingbi i sara ye ti vundu pëpe na amolenge so babâ ti ala ayeke pëpe. Tongana mo sara ye ti vundu na ala, na ala toto na Mbi, fade Mbi mä toto ti ala biani.’—Exode 22:22-24.
Ye so e manda dä: Jéhovah ayeke mä même sambela ti akete molenge. E lingbi ti sara tënë na Nzapa lakue nga ti fa na lo atënë so ayeke na gbe ti bê ti e.
◼ Ye so Bible afa: “Biani, ala kiri ala handa Nzapa, na ala mû vundu na Lo Ti Nzoni-kue ti Israël.”—Psaume 78:41.
Ye so e manda dä: Tënë ti yanga ti e wala asarango ye ti e alingbi ti zia ngia na bê ti Jéhovah wala ti mû vundu na lo. Ni la, kozoni si e sara tënë wala e sara mbeni ye, a yeke nzoni e gbu li ti e si.
A lingbi e sara ye tongana nyen na azo so ayeke nde na e?
◼ Ye so Bible afa: “Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”—Kusala 10:34, 35.
Ye so e manda dä: Teti so Nzapa aye mara ti azo nde nde kue, a lingbi e zia kangbi pëpe na popo ti azo gi ndali ti so poro ti tere ti ala wala lê ti ala ayeke nde na ti e.
◼ Ye so Bible afa: “Lakue ala duti nduru ti gbu koko ti beku ti ala na gbele azo kue so ayeke hunda ala na nda ti beku ni so; me ala sara ni na ngangu pëpe nga na nengo zo mingi.”—1 Pierre 3:15.
Ye so e manda dä: Na ngoi so e yeke sara lisoro na ambeni zo na ndo ti ye so e mä na bê na ni, a yeke nzoni e sara tënë na bê ti e kue me na nzoni bê. A lingbi nga e ne azo so atënë ti mabe ti ala ayeke nde na ti e.
A lingbi e sara ye tongana nyen na mbage ti azo ti yâ ti sewa ti e?
◼ Ye so Bible afa: “Amolenge, ala mä yanga ti ababâ na amama ti ala na yâ ti aye kue, teti sarango tongaso anzere na bê ti Seigneur.”—aColossien 3:20.
Ye so e manda dä: Amolenge so amä yanga afa so ala ye ababâ na amama ti ala nga so ala ye ti nzere na lê ti Nzapa.
◼ Ye so Bible afa: “Ala ngbâ ti kanga bê na amba ti ala na popo ti ala, na ti pardone mba na bê ti ala kue, tongana mbeni zo ayeke na tënë ti dema na tere ti mba ti lo. Gi tongana ti so Jéhovah apardone ala na bê ti lo kue, ala nga ala sara tongaso.”—aColossien 3:13.
Ye so e manda dä: Ngoi na ngoi, ambeni zo nga na azo ti sewa ti e ayeke zia vundu na bê ti e. Me tongana e ye ti tene Nzapa apardone e, a lingbi e pardone amba ti e.—Matthieu 6:14, 15.
Ngbanga ti nyen a lingbi e sara ye na lege ni nga na nzoni bê?
◼ Ye so Bible afa: “Ala ke mvene [nga] zia zo oko oko na popo ti ala atene tâ tënë na mba ti lo.”—aÉphésien 4:25.
Ye so e manda dä: Tongana e tene tâ tënë, e yeke mû tapande ti Nzapa nga e yeke zia ngia na bê ti lo. Tongana e ga zo so ayeke tene ka mvene, e yeke ga tongana wato ti Nzapa, Zabolo, so ayeke “babâ ti mvene.”—Jean 8:44; Tite 1:2.
◼ Ye so Bible afa: “Ye kue so ala ye azo asara na ala, a lingbi ala sara na azo ni nga.”—Matthieu 7:12.
Ye so e manda dä: A lingbi e bâ na nene ni atënë ti bê nga na bezoin ti azo ti sewa ti e nga na ti azo so e na ala e yeke ndo oko. Tongana e fa so e ‘zia tere ti e na place ti amba ti e,’ ala nga kue ayeke duti nduru ti sara ye na e na nzoni bê.—1 Pierre 3:8; Luc 6:38.