Zo alingbi biani ti duti na ngia na ye so lo yeke na ni?
“Wayere so ayeke na ngia na yâ ti ye so lo yeke na ni aga zo ti mosoro; zo ti mosoro so ayeke na ngia pëpe na yâ ti ye so lo yeke na ni aga wayere.”—Benjamin Franklin.
MATO so ayeke tâ tënë. Azo mingi ahinga so ti tene zo awara ngia na yâ ti ye so lo yeke na ni ayeke mbeni ye so zo ayeke vo ni vongo pëpe. A yeke ye ti dongo bê pëpe ti bâ so a yeke ngangu ti tene zo azia bê ti lo gi na ndo ti ye so lo yeke na ni na yâ ti dunia so so ayeke pusu zo ti wara gi gbâ ti akungba, ti ga kota zo wala ti sara nzara ti ye so amba ti lo ayeke na ni. Mara ti aye tongaso asara ngangu na ndo ti mo awe?
• Azo ti sarango asabango ayeke tene lakue na mo so mo yeke wara ngia gi tongana mo vo gbâ ti akungba.
• Sarango mandako na place ti kua wala na ekole apusu mo ti haka tere ti mo na amba ti mo.
• Azo ayeke kiri singila na mo pëpe ndali ti aye so mo sara na ala.
• Akamarade ti mo asara si mo sara bê ti aye so ala yeke na ni.
• Mo wara pëpe kiringo tënë na akota hundango tënë so mo yeke hunda na ndo ti nda ti fini ti azo.
Na gbele mara ti akpale tongaso, zo alingbi biani ti zia bê ti lo gi na aye so lo yeke na ni? Bazengele Paul asara lani tënë ni tongana “kode ti duti nzoni”. Na ambeni ngoi, lo yeke na aye mingi me na ambeni ngoi nde lo yeke na aye mingi pëpe. Akamarade ti lo agonda lo me ambeni zo ayeke he ti ala lo. Ye oko, lo tene ‘na angoi kue, lo manda ti zia bê ti lo gi na ndo ti ye so lo yeke na ni.’—aPhilippien 4:11, 12.
Ti tene zo aduti na ngia na yâ ti ye so lo yeke na ni ayeke mbeni ye so ahonde na azo so agi lâ oko ti hinga ni pëpe. Me, tongana ti so Paul atene, zo alingbi ti manda ni. E tisa mo fadeso ti bâ aye oku na yâ ti Bible so zo alingbi ti sara ti duti na ngia na yâ ti aye so lo yeke na ni.