Ye so Jésus afa na ndo ti Royaume ti Nzapa

“Lo to nda ti tambela na yâ ti agbata oko oko nga na yâ ti akete kodoro oko oko, lo yeke fa . . . nzoni tënë ti royaume ti Nzapa.”​—LUC 8:1.

E YE ka mingi ti sara tënë na ndo ti ye so agbu bê ti e. Tongana ti so Jésus lo mveni atene, “yanga ayeke sara tënë ti ye so ayeke mingi na bê.” (Matthieu 12:34). Tongana e gbu li ti e na ndo ti aye so Jésus asara tënë na ndo ni na ngoi ti kusala ti lo na sese ge, e yeke bâ so Royaume ti Nzapa agbu lani bê ti lo mingi.

Royaume ti Nzapa ayeke nyen? Royaume ayeke ngorogbia so mbeni gbia si ayeke na ndo ni. Tongaso, Royaume ti Nzapa ayeke mbeni ngorogbia ti Nzapa. Jésus asara tënë mingi na ndo ti Royaume ti Nzapa, lo sara si fango tënë ti lo aluti gi na ndo ni. Na yâ ti aÉvangile (Matthieu, Marc, Luc, Jean) wungo ti mbupa Royaume ahon 110. Me lani Jésus afa ye gi na lege ti tënë ti yanga pëpe. Asarango ye ti lo afa aye mingi na ndo ti Royaume ti Nzapa nga ye so Royaume ni ayeke sara ande.

Zo wa la ayeke Gbia ni? Azo la ayeke soro Gbia ti Royaume ni na lege ti vote pëpe. Nde na so, a yeke Nzapa lo wani la asoro Gbia ni. Afango ye ti Jésus afa so lo la Nzapa asoro lo ti duti Gbia.

Jésus ahinga so Bible afa kozoni awe na lege ti aprophétie so Messie so a mû zendo ti lo ayeke komande na ndo ti mbeni Royaume so ayeke ngbâ lakue (2 Samuel 7:12-14; Daniel 7:13, 14; Matthieu 26:63, 64). Girisa pëpe so Jésus atene polele so lo la lo yeke Messie so a fa tënë ti lo kozoni. Tongaso, Jésus ahinga lani so lo la lo yeke Gbia so Nzapa asoro lo (Jean 4:25, 26). A yeke na lege ni so fani mingi Jésus atene “royaume ti mbi”.​—Jean 18:36.

Jésus afa nga so ambeni zo ayeke komande ande na tere ti lo na yâ ti Royaume ni (Luc 22:28-30). Lo iri azo ni so “kete kundu,” ngbanga ti so wungo ti ala ayeke mingi pëpe. Lo tene na ala: “Babâ ti ala abâ so a yeke nzoni ti mû na ala royaume ni.” (Luc 12:32). Mbeti ti Apocalypse afa so ala kue so ayeke na pasa ti komande ande legeoko na Christ, wungo ti ala ayeke 144 000.​—Apocalypse 5:9, 10; 14:1.

Royaume ni ayeke na ndo wa? Jésus atene na Ponce Pilate, gouverneur ti Judée, lo tene: “Royaume ti mbi ayeke ti dunia so pëpe.” (Jean 18:36). Royaume ti Nzapa so Jésus ayeke na ndo ni ayeke komande pëpe na lege ti mbeni zo ti sese. Fani mingi, Jésus asara tënë ti Royaume ti Nzapa tongana “royaume ti yayu”.a (Matthieu 4:17; 5:3, 10, 19, 20). Tongaso, Royaume ti Nzapa ayeke mbeni ngorogbia so ayeke na yayu.

Jésus ayeke ku lani kungo ti kiri na yayu na peko ti kusala ti lo na sese ge. Lo tene lo yeke gue kâ ti “leke mbeni ndo” ndali ti azo so ayeke komande ande legeoko na lo.​—Jean 14:2, 3.

Ye wa Royaume ni ayeke sara? Jésus afa na awamango lo ti sambela Nzapa, lo tene: “Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.” (Matthieu 6:9, 10). A to nda ni awe ti sara ye so bê ti Nzapa aye na yayu. Na lege ti Royaume so, Nzapa ayeke sara si ye so lo leke na bê ti lo ti sara ndali ti sese aga tâ tënë. Ti sara ni, Royaume ni ayeke ga ande na akota gbiango ye na ndo ti sese.

Ye wa Royaume ni ayeke sara ande na ndo ti sese? Jésus afa so Royaume ti Nzapa ayeke lungula ande aye ti sioni na futingo azo so aye gi ti ngbâ ti sara ye ti sioni (Matthieu 25:31-34, 46). So ti tene, a yeke hunzi ande atënë ti petengo goro nga na aye ti sioni kue. Jésus afa so sese ayeke si singo na azo so “ayeke sara ye na ngangu pëpe,” azo ti mbilimbili, azo so ayeke sara nzoni bê na mba, azo so “bê ti ala avuru” nga na azo so asara si siriri amaï.​—Matthieu 5:5-9.

Abe-ta-zo so ayeke duti ande na ndo ti sese so aye abuba na yâ ni? Ên-ën! Jésus amû zendo ti apendere ye so a yeke sara ande na ndo ti sese na gbe ti Royaume ti Nzapa. Mbeni koli so a pika lo na ndo ti keke legeoko na Jésus atene: “Jésus, dabe ti mo na mbi tongana mo ga na yâ ti royaume ti mo.” Jésus akiri tënë, lo tene: “Ti tâ tënë ni, mbi tene na mo laso: Mo yeke duti ande na mbi na Paradis.” (Luc 23:42, 43). Biani, Royaume ti Nzapa ayeke sara si sese kue akiri aga paradis, tâ gi tongana ti yaka ti Éden lani.

Ambeni ye nde wa Royaume ni ayeke sara ande teti azo? Jésus amû lani gi pëpe zendo ti ye so Royaume ti Nzapa ayeke sara ande. Lo sara ambeni ye ti fa ye so Royaume ni ayeke sara. Jésus akaï akobela mingi na lege ti miracle ti fa kete yanga ti ye so lo yeke sara ande na ndo ti sese kue na ngoi so lo ga gbia. Évangile ti Matthieu asara tënë ti lo atene: “Jésus atambela na sese ti Galilée kue. Lo fa ye na yâ ti asynagogue ti ala nga lo fa nzoni tënë ti royaume. Lo sava mara ti akobela na asongo tere nde nde kue na popo ti azo ni.”​—Matthieu 4:23.

Jésus asava mara ti akobela nde nde. Lo ‘zi lê ti mbeni zo so a dü lo waziba.’ (Jean 9:1-7, 32, 33). Na nzoni bê, Jésus asava mbeni koli so buruma asara lo (Marc 1:40-42). Na ngoi so a ga na lo “mbeni koli so mê ti lo akanga na so mbeni ye akanga menga ti lo”, Jésus afa so lo lingbi ti sara si “azo so mê ti ala akanga amä ndo nga azo so yanga ti ala akanga asara tënë.”​—Marc 7:31-37.

Gbia so Nzapa asoro lo ayeke même na ngangu ti zingo akuâ. Mbeti ti Nzapa afa so fani ota Jésus azingo akuâ. Lo zingo oko molenge-koli ti mbeni womua, lo zingo mbeni molenge-wali so ayeke na ngu 12, nga lo zingo kamarade ti lo Lazare.​—Luc 7:11-15; 8:41-55; Jean 11:38-44.

Na lege ti bazengele Jean, Jésus afa apendere ye so ayeke ku azo so ayeke duti ande na gbe ti Royaume ti Nzapa, lo tene: “Bâ, tente ti Nzapa ayeke na azo, Nzapa ayeke sara ande kodoro na ala, na ala yeke duti azo ti lo. Nga Nzapa wani ayeke duti ande na ala. Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.” (Apocalypse 1:1; 21:3, 4). Tara ti bâ mbeni dunia so toto, vundu nga na kuâ ayeke dä pëpe! Na ngoi ni so, sambela so na yâ ni e hunda ti tene a sara ye so bê ti Nzapa aye na sese tongana ti so a sara na yayu ayeke ga ande tâ tënë kue.

Lawa si Royaume ti Nzapa ayeke ga? Jésus afa so ngoi so lo yeke to nda ti komande tongana Gbia nga na ‘ngoi so lo yeke si na lo yeke duti dä’ ayeke to nda ni legeoko. Jésus amû mbeni prophétie ti fa lawa si ngoi so lo yeke si na lo yeke duti dä tongana Gbia ayeke to nda ni. Na yâ ti ngoi ni so, fade aye ti wusuwusu ayeke mû ndo kue. Aye tongana abira, kota nzara, sese ayeke yengi, asioni kobela nga kpengo ndia pëpe ayeke wu mingi (Matthieu 24:3, 7-12; Luc 21:10, 11). Aye so nga na ambeni mingi so Jésus afa tënë ni kozo awe, a bâ ni polele na ngu 1914, ngoi so Kozo Bira so Amû Sese Kue ato nda ni. Ye so afa so Jésus ato nda ni awe ti komande tongana Gbia. Na yâ ti ngoi kete, fade Royaume ni ayeke ga na ayeke sara si a sara na sese ye so bê ti Nzapa aye.b

Gango ti Royaume ti Nzapa aye ti tene nyen teti mo? Lege so afango ye ti Jésus ayeke sara ngangu na ndo ti mo la ayeke fa ni.

[Akete tënë na gbe ni]