Ngangu wa Jésus Christ ayeke na ni na ndo ti mo?

NA BANGO ye so e tene na yâ ti article so ahon, zo wa alingbi ti dë kite na ndo ngangu so afango ye ti Jésus ayeke na ni na ndo azo ti sese? Me kota hundango tënë ni ayeke so: “Afango ye ti Jésus andu fini ti mbi tongana nyen?”

Afango ye ti Jésus andu gbâ ti atënë. Akota ye ti manda so ayeke dä alingbi ti sala ngangu na yâ ambage kue ti fini ti mo. Zia e bi lê ti e na ndo ye so Jésus afa ândö na ndo ziango ye na kozo ndo, lengo songo na Nzapa, dutingo na nzoni songo na azo, lekengo akpale na ti ke ti sala ye ti ngangu.

Zia na yâ fini ti mo ye so aga na kozo ndo

Sese ti laso, so aye ayeke gue gi na loro dä, ayeke mû ngoi na angangu ti e mingi, na asala si a mene akusala ti yingo. Bâ tapande ti mbeni koli ti ngu 20 so e yeke hiri lo Jerry. Atâa so Jerry aye mingi alisoro na ndo aye ti yingo na lo mû na nene ni aye so lo manda dä, lo dema tele ti lo: “Mbi yeke na ngoi mingi pëpe ti sala lisoro mingi na ndo aye so. Na yâ yenga, mbi yeke sala kua lango omene. Lango ti hungo tele ti mbi ayeke gi dimanche. Na tongana mbi hunzi ti sala akusala ti mbi, mbi nze mingi.” Tongana mo nga kue mo yeke na yâ mara dutingo so, mo lingbi ti wara ye ti nzoni na yâ fango ye ti Jésus na ndo ti hoto.

Jésus atene na azo mingi mingi so abungbi lani ti mä lo: “I gi bê ti i tënë ti fini ti i pëpe, fade i te nyen, wala i nyon nyen, wala i yü bongo ti nyen. Fini ahon kobe pëpe? na tele ahon bongo pëpe? Bâ andeke ti nduzu, ala lu le-kobe pëpe, ala fâ le-kobe pëpe, na ala bungbi le-kobe na gogoro pëpe; me Babâ ti i na yayu amû kobe na ala. Ngele ti i ayeke ngangu ahon ngele ti ala pëpe? . . . Tongaso i gi bê ti i pëpe, na i tene pëpe, Fade e te nyen? wala, Fade e nyon nyen? wala, Fade e yü bongo ti nyen? Teti aGentil agi ye so kue; Babâ ti i na yayu ahinga i ye ye so kue. Me i gi royaume ti Nzapa na mbilimbili ti Lo kozoni, na fade A mû ye so kue na i nga.” (Matthieu 6:25-33). Ye wa e manda na yâ ti atënë so?

Jésus aye ti tene pëpe so a lingbi e bâ na nene ni pëpe abezoin ti e na ti azo ti dä ti e na lege ti mitele. Bible atene: “Tongana mbeni zo abata azo ti lo pëpe, na a hon so, tongana lo bata azo ti da ti lo mveni pëpe, lo bele tënë ti mabe awe, na sioni ti lo ahon sioni ti zo so amä na bê pëpe.” (1 Timothée 5:8). Jésus amû na e zendo so fade Nzapa ayeke mû na e tanga ti aye so e yeke na bezoin ni gi tongana e zia na kozo ndo aye ti yingo. Kota tënë ni ge andu ziango aye so aga na kozo ndo. Salango ye alingbi na wango so ayeke gue na zo na tâ ngia, ngbanga ti so “ngia ayeke na azo so ahinga ye ti yingo amanke ala.”​—Matthieu 5:3.

Lë songo na Nzapa

Azo so ahinga atene ye ti yingo atia ala abâ nene ti lë mbeni nzoni songo na Nzapa. Tongana nyen ti lë nzoni songo na mbeni zo? A yeke ti gi lege ti hinga lo nzoni mingi. A lingbi e mû ngoi ti hinga bango ndo ti lo, akode ti lo, aye so lo sala, aye so lo ye na aye so lo ke. A yeke nga legeoko ti lë songo na Nzapa. A hunda ti duti na tâ hingango ye na ndo ti lo. Na ngoi so lo yeke sambela Nzapa teti adisciple ti lo, Jésus atene: “So ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.” (Jean 17:3). Biani, ti lë songo na Nzapa ahunda ti tene e hinga lo. Oko lingu ti hingango ye so ayeke Bible, Tënë ti Nzapa so a sû na gbe ti yingo ti lo (2 Timothée 3:16). A lingbi e zia mbeni ngoi nde ti mandango Mbeti ti Nzapa.

Me, gi hingango ye ti Nzapa oko alingbi pëpe. Gi na yâ oko sambela so, Jésus atene: “Ala [adisciple ti lo a]bata tënë ti Mo.” (Jean 17:6). A lingbi e wara gi pëpe hingango ye ti Nzapa, me e sala ye alingbi na hingango ye so nga. A hunda ti sala tongaso ti ga kamarade ti Nzapa. E lingbi ti ku ti tene songo ti e na mbeni zo amaï tongana na mbana e sala aye so ague nde na bango ndo ti lo nga na akpengba-ndia ti lo? Tongaso, a lingbi abango ndo ti Nzapa nga na akpengba-ndia ti lo afa lege na fini ti e kue. Zia e bâ tongana nyen akpengba-ndia ti lo use andu songo ti e na amba ti e.

Duti na nzoni songo na amba ti mo

Mbeni lâ, Jésus atene mbeni kete mbaï so afa mbeni kota ye ti manda na yâ salango songo na popo ti azo. Lo sala tënë ti mbeni gbia so ahunda nginza ti lo na awakua ti lo. Bon ti mbeni oko ayeke kota mingi na lo yeke na nginza ti kiri na ni pëpe. Gbia ni amû yanga ti tene a kä koli ni, wali ti lo na amolenge ti lo kue na place ti bon ni. Koli ni atï na sese na lo gbu gere ti gbia ni, lo tene: “Bê ti mo anze na mbi pëpe, na fade mbi futa kue na mo.” Na be-nzoni, gbia ni alungula bon ni kue. Me tongana wakua so asigigi, lo wara mbeni mba ti lo so ayeke na bon ti lo gi teti kete nginza, na lo hunda na lo na ngangu ti futa ni. Atâa so mba ti lo ni atoto na lo ti wara be-nzoni ti lo, wakua so ague abi mba ti lo ni na da ti kanga juska ti tene lo futa bon ti lo ni kue. Me tongana gbia ni amä tënë ti ye so asi, ngonzo agbu lo ngangu. Gbia ni ahunda lo: “A lingbi mo sala be-nzoni na fon mo boi nga pëpe?” Na lo bi sioni wakua so na da ti kanga juska lo futa bon ti lo kue. Ti fa ye ti manda so ayeke na yâ ni, Jésus atene: “Fade Babâ ti Mbi na yayu asala tongaso na i nga, tongana i oko oko kue i pardone aita ti i na bê ti i pëpe.”​—Matthieu 18:23-35.

Teti so e yeke awasiokpari, e yeke na awokongo mingi. E lingbi oko pëpe ti futa na Nzapa bon ti asiokpari kue so e sala na kengo ndia ti lo. Ye kue so e lingbi ti sala ayeke ti gi pardon ti lo. Na Jéhovah Nzapa ayeke ndulu ti pardone awokongo ti e kue gi tongana e sala legeoko nga na aita ti e. Bâ kota ye ti manda so ayeke na yâ ti tënë so! Ni la, Jésus afa lani na adisciple ti lo ti sambela: “Mo pardone kuda ti e legeoko tongana e pardone awakuda ti e nga.”​—Matthieu 6:12.

Leke akpale na gunda ni

Na ndo salango ye ti azo, Jésus ahinga ye na ndo ni mingi. Awango ti lo ayeke leke ye kue so ayeke lingu ti mbeni kpale. Zia e bâ atapande use so.

Jésus atene: “I mä awe tënë so A tene na azo ti giriri, A lingbi mo fâ zo pëpe; na zo so afâ zo, fade ngbanga atï na li ti lo. Me Mbi tene na i, zo so ngonzo ti lo alondo na tele ti ita ti lo, fade ngbanga atï na li ti lo.” (Matthieu 5:21, 22). Ge, Jésus afa so tënë ti fango mba ti mo zo ayeke gi pëpe salango ni. A yeke mbeni ye so alondo kozoni na yâ bê ti zo. Tongana fade azo azia lege pëpe na songo bê wala ngonzo ti hon ndo ti ala, ka fade bingo bê ti sala ngangu na amba ti e ayeke girisa. Bâ tongana nyen amênë so a tuku mingi alingbi fade ti duti dä pëpe tongana azo amä fango ye so!

Bâ fadeso tongana nyen Jésus afa tâ gunda ti mbeni kpale so ayeke ga ka na kota vundu. Lo tene na azo mingi so abungbi: “I mä awe tënë so A tene giriri, A lingbi mo sala lango-sioni pëpe. Me Mbi tene na i, zo so abâ mbeni wali na nzara ti wali ni asala lo​—na yâ bê ti lo, lo sala lango-sioni na lo awe. Na tongana lê ti mo ti koti asala si mo tï, mo gboto lo, mo bi yongoro.” (Matthieu 5:27-29). Jésus afa so kpale ni ayeke kota mingi ahon salango lango-sioni ni mveni. Lingu ti kpale ni: nzara ti pitan. Tongana mbeni zo ake ti bi bê ti lo na ndo asioni nzara ti bê na ti “gboto” ala na yâ ti li ti lo, fade lo yeke hon ndo ti kota kpale ti salango ye ti pitan.

“Kiri épée ti mo na yâ bozo ni”

Na bï so a kä Jésus na a gbu lo, mbeni oko ti adisciple ti lo agboto épée ti gbu koko ti lo. Jésus akomande na lo: “Kiri épée ti mo na yâ bozo ni; teti azo kue so akamata épée, fade ala kui na lege ti épée.” (Matthieu 26:52). A si na ndapelele, Jésus atene na Ponce Pilate: “Royaume ti Mbi ayeke ti sese so pëpe; tongana royaume ti Mbi ayeke ti sese so, ka azo ti Mbi asala bira si Mbi tï na tïtî aJuif pëpe. Me royaume ti Mbi ayeke ti sese so pëpe.” (Jean 18:36). Tënë so ayeke biani lege ti ndara?

Tongana nyen akozo Chrétien asala ye na ndo wango ti Jésus ti mû mbage pëpe na yâ salango ye ti ngangu? Buku Salango ye ti akozo Chrétien na yâ abira (Angl.) atene: “Na bango so [afango ye ti Jésus] ake na ngangu salango ngangu kue nga na ye ti sioni kue na tele ti mbeni zo, a fa polele so mungo mbage na abira ayeke [lani] na lege ni oko pëpe. . . . Akozo Chrétien amû tâ gi peko ti ye so Jésus atene, na ala gbu nda ti fango ye ti lo na ndo nzobe nga nene ti ke ti sala ngangu na gbele ye ti ngangu so a sala na ala. Ala tingbi lani vorongo ti ala na siriri; ala ke na kuru go bira teti tukungo mênë so lo ga na ni.” Bâ tongana nyen fade mbaï ti azo alingbi ti duti nde tongana azo kue so laso atene ala yeke aChrétien amû peko ti fango ye so!

Mo lingbi ti wara nzoni na yâ afango ye kue ti Jésus

Afango ye ti Jésus so e londo ti bâ ayeke pendere, akpengba pëpe na ayeke na ngangu. Azo alingbi ti wara aye ti nzoni na yâ ni na hingango ni nga na salango ye alingbi na ni.a

A-Témoin ti Jéhovah ti ndo so mo yeke dä ayeke duti ande na ngia ti mû maboko na mo ti bâ tongana nyen mo lingbi ti wara nzoni na yâ afango ye ti kota ndara so ade ti sigigi na yanga ti mbeni zo pëpe. E tisa mo na wâ ti ga ndulu na mbeni oko ti ala wala ti sû mbeti na mbeni oko ti a-adresse so ayeke na lembeti 2 ti mbeti so.

[Kete tënë na gbe ni]

[Foto na lembeti 5]

“Babâ ti i na yayu amû kobe na ala”

[Foto na lembeti 7]

Afango ye ti Jésus alingbi ti sala mbeni nzoni ngangu na yâ fini ti mo