Ye ti héritier so mo lingbi ti zia bê kue dä

“TONGANA mbeni zo atokua na mo mbeni lettre na lo tene na mo so a zia na mo mbeni ye ti héritier so mo hinga tënë ni pëpe, a lingbi mo sala hange, ngbanga ti so mo lingbi ti tï na yâ ti gbanda ti mbeni tâ kota wahanda.”

A yeke tongaso si kota ndokua ti tokuango ambeti ti kodoro ti Amerika azia gbotongo mê so na ndo ti Internet. Ngbanga ti nyen? A yeke ngbanga ti so azo saki mingi awara mbeni lettre so na yâ ni a tene na ala so ‘mbeni sewa ti ala so akui awe azia na ala mbeni ye ti héritier’. Na pekoni, a hunda na mingi ti ala ti zia na yâ ti alettre mbeni wungo ti nginza so alingbi na 16 000F CFA tongaso, wala so ahon ni ti tene a fa na ala na ndo wa ala lingbi ti wara ye ti héritier ni nga ye so ala lingbi sala ti wara ni. Ye ti vundu ni ayeke so a yeke biani mbeni kota tënë ti handa. Azo kue so awara alettre ni so, beku ti ala kue atï na ngu.

Mara ti ye so a leke ni na mayele tongaso ayeke sala ngangu na ndo nzara so zo ayeke na ni ti wara mbeni ye ti héritier. Ye oko, Mbeti ti Nzapa asala nzoni tënë ti azo so azia aye ti héritier na ambeni zo tongana lo tene: “Zo ti nzoni azia ye ti héritier teti amolenge ti lo.” (aProverbe 13:22). Biani, Jésus mveni na yâ fango ye ti lo na ndo Hoto asala lani mbeni tënë so azo ahinga ni na aye ni mingi tongana lo tene: “Ngia ayeke na azo so ayeke na tâ be-ti-molenge, teti fade sese so aga ye ti héritier ti ala.”​—Matthieu 5:5.

Atënë ti Jésus so adabe e na ye so David, Gbia ti Israël ti giriri, asû na gbe ti yingo ti Nzapa a ninga mingi awe: “Azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”​—Psaume 37:11.

“Fade sese ni aga ye ti héritier”, so tâ pendere beku! Me a yeke pëpe mbeni lege ti handa azo tongana ti so e bâ ni na nduzu ge? Oko pëpe, a yeke mbeni tënë ti handa pëpe ngbanga ti so sese ayeke mbeni mbage ti apendere ye so Jéhovah Nzapa aleke ni. Lo yeke Walekengo ni, nga sese ni ayeke ye ti lo mveni na lo yeke na droit ti mû ni tongana ye ti héritier na mbeni zo so bê ti lo mveni aye. Na lege ti Gbia David, Jéhovah amû zendo so na lege ti prophétie na Molenge ti lo so Lo ndoye lo mingi, Jésus Christ: “Mo hunda Mbi, na fade Mbi mû na Mo amara ti ga ye ti héritier ti Mo, na nda ti sese kue ti ga ye ti Mo.” (Psaume 2:8). Ndali ti nda ti tënë so, bazengele Paul afa tënë ti Jésus tongana “Lo so Nzapa azia Lo héritier ti ye kue”. (aHébreu 1:2). E lingbi ti duti na beku so tongana Jésus atene lani so “fade sese so aga ye ti héritier” ti azo ti tâ be-ti-molenge, lo sala lani tënë ni so tâ na nzoni bê, na lo yeke na ngangu ti sala si zendo so aga tâ tënë.​—Matthieu 28:18.

Na pekoni, kota hundango tënë ni ayeke so: Tongana nyen si zendo so ayeke ga ande tâ tënë? Na ndo kue laso, e yeke bâ so azo so ayeke sala ye na ngangu na so ayeke na baba, aye ti ala ayeke ga nzoni na ala yeke wara aye so bê ti ala aye. Me, ye wa ayeke ngbâ tongana ye ti héritier teti ala so ayeke na tâ be-ti-molenge? Nga, sese so asi singo na akota kpale so aga na lege ti bubango sese na so warango lege ti leke ni ayeke ngangu. Na a yeke gi azo ti kota bê nga ala so abâ ndo ayo pëpe si ayeke sala kusala na aye ti mosoro ni. Fade sese ayeke duti mbeni ndo so ayeke nzoni ti ga ye ti héritier? E tisa mo ti diko article so ayeke ga ti wara kiringo tënë na ahundango tënë so nga na ambeni nde.

[Foto na lembeti 3]

Fade mo yeke wara tâ ye ti héritier?