Mo dabe mo na ni?

Dikongo a-article ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:

• Ye ti nzoni wa e lingbi ti wara na mandango ye na ndo sewa ti Saphan?

Saphan ayeke lani wakuasu nga wasungo peko ti atënë ti Josias, gbia ti Juda. Teti so lo yeke lani mbeni oko ti akota zo ti kodoro-gbia ni, Saphan amû maboko na yâ kapa so gbia amû ti kiri na tâ vorongo. Use ti amolenge ti Saphan angbâ be-ta-zo na prophète Jérémie. Mbeni molenge ti lo ni, nga na atarä ti lo use, asala kusala na kota ndo ti ala ti mû maboko na tâ vorongo. E nga kue, a yeke nzoni e mû amosoro ti e nga na kota ndo ti e ti mû maboko na tâ vorongo.​—15/12, alembeti 19-22.

• Tongana nyen Irene Hochstenbach ahon ndo ti mbeni kota kpale ti seni, si lo sala na Jéhovah?

Tongana lo yeke lani na ngu mbasambala, mê ti lo akanga. Atâa so kue, lo manda ti sala lisoro na azo. Fadeso, lo yeke gue na tele ti koli ti lo (mbeni surveillant so ague na ndo nde nde) tongana koli ni ayeke sala kusala na yâ ti akongregation ti Pays-Bas.​—1/1, alembeti 23-26.

• Afini mbeti use wa ti manda na ye asigigi na aKota Bungbi ti District “Awakua ti Royaume so ayeke na wâ”?

A-Chrétien na ndo sese mobimba aduti na ngia ti wara buku Voro oko tâ Nzapa. Buku so ayeke ti manda na afini zo na peko ti so ala hunzi ti manda buku Hingango Ye So Ague na Fini ti Lakue Lakue. Mbeni fini buku ni nde ayeke Ga ndulu na Jéhovah. A luti mingi na ndo alengo nga na asalango ye ti Jéhovah. A fa nga tongana nyen e lingbi ti manda tapande ti lo na yâ fango na gigi alengo ti lo.​—15/1, alembeti 23, 24.

• A-Proverbe 12:5 so atene, “Bibe ti zo ti mbilimbili ayeke na lege ni,” aye ti tene nyen?

Atënë ti bê ti azo ti nzoni ayeke nzoni, a sala kangbi pëpe, nga a yeke mbilimbili. Teti so azo ti mbilimbili aye Nzapa nga aye amba ti ala azo, aye so ala ye ti sala ayeke nzoni.​—15/1, lembeti 30.

• Ye nyen alingbi ti mû maboko na mbeni zo ti duti na nzoni bango ndo na ndo kua?

A yeke nzoni ti tene na ngoi so zo ade molenge, a fa na lo ti bâ kua na nene ni. Bible awa e ti sala kua ngangu nga ti kpe goigoi (aProverbe 20:4). A wa nga aChrétien ti zia si kuâ amû ngoi ti ala kue pëpe. A yeke nzoni e hinga so kota ye na yâ fini ti e ayeke kusala ti Nzapa (1 aCorinthien 7:29-31). Nga, atâ Chrétien ahinga biani so Nzapa ayeke zia ande ala oko pëpe.​—1/2, alembeti 4-6.

• Na yâ versê wa ti Bible a sala tënë fani kozo ti balaga?

A yeke na Genèse 8:20, so a sala tënë ti balaga so Noé aleke tongana lo sigigi na yâ arche na peko ti Kota Moa. Ye oko, Caïn na Abel amû peut-être lani sandaga ti ala na Jéhovah na ndo abalaga (Genèse 4:3, 4).​—15/2, lembeti 28.

• Tongana nyen ambeni Chrétien asala nzoni ye tongana aye agbian na yâ fini ti ala?

Ambeni ayeda, wala amû li ni, ti gbian aye na yâ kua ti nginza ti ala, si a mû lege na ala ti wara ngoi mingi ndali ti fango tënë. Ambeni akono ngoi ti ala nga na amatabisi ti ala na yâ kusala ti Nzapa. Ala sala ni tongana kungba ti ala ti sewa akiri na peko, na tapande tongana amolenge ti ala akono awe nga amû koli wala wali.​—1/3, alembeti 19-22.

• Tongana nyen tapande ti Jonas na ti bazengele Pierre amû maboko na e ti bâ azo tongana ti so Jéhovah ayeke bâ na ala?

Azo mingi ahinga so Jonas na Pierre ayeke lani na abango ndo so ayeke na lege ni pëpe, nga so ala sala ye nzoni pëpe na ambeni tara ti mabe na ti mango yanga so asi na ala. Atâa so kue, Jéhovah abâ polele anzoni lengo na yâ ala, na lo sala kusala lakue na ala. Tongana azo aso bê ti e wala azia vundu na bê ti e, e lingbi ti bâ anzoni lengo ti ala so peut-être anzere ândö na bê ti e, nga anzoni ye so Nzapa abâ na yâ ala.​—15/3, alembeti 16-19.

• Ngbanga ti nyen lege so a zia na anuméro ti apsaume ayeke legeoko pëpe na yâ ti aBible kue?

Kangbi ayeke dä na yâ lege so a zia na anuméro ti apsaume na popo ti buku so a sû na ngbele yanga ti Hébreu, nga na ti so a sû na yanga ti Grec na yâ Bible ti Septante. Na yâ afini Bible so asigigi aninga pëpe, anuméro ni alingbi ti duti nde nde, teti so ala luti na ndo Bible na yanga ti Hébreu wala na ndo Bible ti Septante.​—1/4, lembeti 31.