Na table ti capitaine
ANZONI zo, nzerengo kobe, nga na anzoni lisoro asala si tengo kobe na table ti capitaine na ndo bateau anzere mingi. Me mbeni lisoro so a sala na table ti Capitaine Robert G. Smith, so asala kua teti ndokua ti White Star Line, afa ye na ndo mbeni matanga ti yingo.—Esaïe 25:6.
Na ngu 1894, tongana lo yeke na ngu 24, Robert aga capitaine ti mbeni kota bateau Kinclune of Dundee ti sala na kozo tambela ti lo ti ngoro sese kue. Na pekoni lo ga capitaine ti ambeni bateau ti White Star, tongana Cedric, Cevic, nga na Runic.a Na ngoi so lo yeke fâ kota ngu ti Atlantique a londo na New York ti gue na Liverpool, Angleterre, na yâ ti mbeni oko ti abateau so, Robert ahiri Charles Taze Russell ti te kobe legeoko na lo na table ti lo. Lisoro so Robert asala na Russell azingo nzara ti lo teti tënë ti Bible, na ti tene lo manda ye mingi ahon so, lo yeda na ngia ti mû ambeti Études des Écritures so Russell afa na lo.
Russell angbâ lakue ti tokua na lo ambeti, na ye so asala si nzara ti Robert teti tënë ti Bible akono. Robert akangbi na wali ti lo fini hingango ye so lo wara. A ninga pëpe, ala use kue aga angangu Wamandango Bible, tongana ti so a hinga lani na aTémoin ti Jéhovah. Na pekoni, Robert awara lege ti mû ambeni diskur na ndo Bible. Na tapande na Brisbane, Australie, lo sala tënë na ndo “Baume ti Galaad” na lo fa tongana nyen Mbeti ti Nzapa ayeke na mbeni tokua so ayeke “yorö ti avundu kue ti sese.” Tongana lo kiri na Angleterre, wali ti lo na amolenge ti lo amû maboko na lo ti fa “Photo-Drame de la Création,” nga na ngoi so a yeke fa afoto ni, ala zia asembe ti bia, so na yâ ni a lingbi ti mä atënë ti Russell dä.
Robert amû na amolenge ti lo tâ tënë ti Royaume so lo wara tongana ye ti héritier. Laso, awagame oku na pekoni, azo ti sewa ti lo 18 ayeke mû mbage ti ala mingi na yâ fango nzo tënë na azo, na ala kiri singila teti ye so a mû lani na table ti capitaine.
Na lege ti ambeti ti ala nga na kusala ti ala ti fango Mbeti ti Nzapa na azo, aTémoin ti Jéhovah ayeke mû maboko na azo na ndo sese kue ti mä tënë ti Bible so agbu lani bê ti Capitaine Smith mingi. Mo nga kue mo lingbi ti bâ ye so asala si table ti capitaine ni aduti lani nzoni mingi tongaso.
[Kete Tene na Gbe Ni]
a Na ngoi so mbeni mara ti bateau tongaso, so iri ni ayeke Titanic, alï ngu na kozo tambela ti lo, a duti lani Capitaine E. J. Smith (so ayeke pëpe fami ti Robert) si ayeke kpe na ni.
[Foto na lembeti 8]
Robert G. Smith
[Foto na lembeti 8]
Charles T. Russell