Lege So Mo Yeke Soro na Akpengba-ndia
MO YEKE mbeni zo ti batango kpengba-ndia na ndo tambela? Wala mo yeke bâ akpengba-ndia so andu tambela tongana aye so aga ngbele ye awe? Tâ tënë ni ayeke so, kamême ambeni kpengba-ndia ayeke dä so ayeke fa lege na zo oko oko kue, na so zo oko oko kue ayeke bâ ni tongana kota ye mingi. A lingbi ti fa nda ti kpengba-ndia tongana mbeni bungbi ti asalango ye so ayeke na lege ni. Akpengba-ndia asala ngangu na ndo adesizion ti e na afa na e lege so e yeke mû na yâ fini. Akpengba-ndia alingbi ti sala kusala tongana mbeni boussole (mbeni montre so ayeke fa na zo lege ti banga, ti bongo, ti do, na ti tö).
Na tapande, Jésus awa adisciple ti lo ti bata Ndia ti Lor so a wara na Matthieu 7:12: “Ye kue so i ye azo asala na i, i sala na ala tongaso nga; teti so ayeke tënë ti Ndia na aProphète.” Adisciple ti Confucius ayeke bata akpengba-tene ti li na jen, so agboto lê na ndo alengo tongana nzobe, be-kota-pepe, yekiango ndo, na be-biani. Même azo so ayeke na yâ mbeni vorongo pëpe ayeke kamême na ambeni ye so aga na kozo ndo na yâ fini ti ala wala awango-tene so ayeke fa lege na tambela ti ala.
Mara ti Akpengba-ndia Wa?
Ye oko, e yeke sala nzoni ti bata na li so akpengba-ndia alingbi ti duti nzoni wala sioni. Na tapande, na yâ angu bale oko so ahon, a wara azo mingi mingi so azia si tënë so a di iri ni “bingo bê kozoni na ndo zo mveni” afa lege na ala. Atâa azo mingi alingbi peut-être pëpe ti hinga tënë so wala ti bi bê so a ndu ala pëpe, tënë ti “bingo bê kozoni na ndo zo mveni” aga mbeni kpengba-ndia so azo mingi ayeke mû pekoni gi tongaso na li ti ala mveni, na so ala yeke sala na kusala tongana ala zia ti bata akpengba-ndia ti tambela so ayeke na nduzu. Atâa a sala kusala na atënë so wala pëpe ti tene a hiri ni tongaso, tënë ti “bingo bê kozoni na ndo zo mveni” ayeke mbeni fä ti salango ye na bibe ti kion, na fani mingi, kota nzala ti gingo mosoro ague oko na ni. Mbeni kota zo ti da-singale na Chine atene: “E yeke gi na akpengba-ndia use. Mbeni oko ayeke kaïngo nzala ti aye so azo ahunda. Mbeni nde ayeke bungbingo mosoro.”
Bingo bê kozoni na ndo zo mveni alingbi ti sala kusala tongana mbeni kuran. Tongana nyen mbeni kuran ayeke sala ngangu na ndo mbeni boussole? Tongana a zia ala use kue na tele ti mba, suä ti boussole ni ayeke fa mbeni lege nde. Legeoko tongaso nga, bingo bê kozoni na ndo zo mveni alingbi ti sala si boussole ti salango ye ti lo, so ti tene bungbi ti andia na ndo tambelango na lege ni, afa mbeni lege nde na ziango ye kue na use ndo na peko ti anzala ti bê ti lo.
Fade a yeke duti ye ti dongo bê teti mo ti hinga so bingo bê kozoni na ndo zo mveni ayeke pëpe mbeni fini ye? Salango ye so abâ gigi na yaka ti Éden tongana akozo babâ na mama ti e ake kpengba-ndia na ndo tambela, so Wasalango ala aleke. Ye so abuba boussole ti tambela ti ala. Teti so ala ga na lege ti Adam na Ève, azo abâ so oko ye so a di iri ni fadeso “bingo bê kozoni na ndo zo mveni” ayeke sala ngangu na ndo ala.—Genèse 3:6-8, 12.
A lingbi ti bâ guengo na li ni ti bango ndo so na yâ ngoi so prophétie ti Bible ahiri ni “lâ ti nda ni,” so ayeke “ngoi ti kpale na ti ngangu.” Azo mingi ayeke “azo so andoye tele ti ala mveni.” A yeke ye ti dongo bê pëpe ti bâ so a yeke sala ngangu na ndo e ti tene e sala ye na bingo bê kozoni na ndo e mveni.—2 Timothée 3:1-5, NW.
Peut-être mo yeke yeda na tënë so mbeni maseka so iri ti lo ayeke Olaf asû na mbeti na mbeni filiale ti aTémoin ti Jéhovah na Poto: “A yeke tâ ngangu ti bata nzoni tambela, mbilimbili teti e so e de maseka. Mbi wa i ti ngbâ lakue ti mû na e adango bê na ndo nene ti ngbâ lakue ndulu na akpengba-ndia ti Bible.”
Olaf afa na gigi mbeni bango ndo ti zo so agbu nda ti ye nzoni. Akpengba-ndia ti Nzapa alingbi ti mû maboko na e, atâa e yeke maseka wala mbakoro, ti ngbâ lakue ndulu na akpengba-ndia so ayeke na nduzu, so andu tambela. Ala lingbi nga ti mû maboko na e ti luti na gbele bingo bê kozoni na ndo e mveni, atâa a hiri ni tongaso wala pëpe. Tongana mo ye ti hinga mingi ahon tongana nyen akpengba-ndia ti Bible alingbi biani ti mû maboko na mo, bâ na nzobe article so aga na peko.
[Afoto na lembeti 4]
Azo mingi laso afa na gigi bingo bê oko pëpe na ndo aye so atia amba ti ala